ಟ್ವಿಟ್ಟರ್ ಅಥವಾ ಎಕ್ಸ್ ಪ್ಲಾಟ್ಫಾರ್ಮ್ನಲ್ಲಿ ಸ್ವಯಂಚಾಲಿತ ಬೋಟ್ಗಳ ಹಾವಳಿ ತಡೆಯಲು ಮಾಸಿಕ ಶುಲ್ಕ ವಿಧಿಸುವ ಸಾಧ್ಯತೆಯಿದೆ. ಎಕ್ಸ್ ಮುಖ್ಯಸ್ಥ ಇಲಾನ್ ಮಸ್ಕ್ ಅವರು ಈ ನಿಟ್ಟಿನಲ್ಲಿ ಸುಳಿವು ನೀಡಿದ್ದಾರೆ.
ಟ್ವಿಟ್ಟರ್ನ ಬ್ಲೂಟಿಕ್ಗೆ ಈಗಾಗಲೇ ಮಾಸಿಕ ಸಬ್ಸ್ಕ್ರಿಪ್ಷನ್ ಪ್ಲಾನ್ ಇದೆ. ಅದರ ಜೊತೆಗೆ ಎಲ್ಲಾ ಬಳಕೆದಾರರಿಗೂ ಸಣ್ಣ ಮೊತ್ತದ ಮಾಸಿಕ ಶುಲ್ಕ ವಿಧಿಸುವ ಯೋಜನೆ ಇದೆ. ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆಟಾನ್ಯಹು ಜೊತೆಗಿನ ಸಂವಾದದಲ್ಲಿ ಮಾತನಾಡುತ್ತಿದ್ದ ಎಕ್ಸ್ ಮುಖ್ಯಸ್ಥ ಇಲಾನ್ ಮಸ್ಕ್ ಅವರು ಈ ಬಗ್ಗೆ ಸುಳಿವು ನೀಡಿದ್ದಾರೆ. ವರದಿ ಪ್ರಕಾರ ಶೀಘ್ರದಲ್ಲೇ ಟ್ವಿಟ್ಟರ್ ಪೇಯ್ಡ್ ಸೋಷಿಯಲ್ ಮೀಡಿಯಾ ಆಗಲಿದೆ. ಮಾಸಿಕ ಶುಲ್ಕ ಹೆಚ್ಚೇನೂ ಇರುವುದಿಲ್ಲ ಎನ್ನಲಾಗಿದೆ. ಎಕ್ಸ್ ಹೆಸರಿನಿಂದ ಗುರುತಿಸಲಾಗುತ್ತಿರುವ ಟ್ವಿಟ್ಟರ್ಗೆ ಮಾಸಿಕ ಸಬ್ಸ್ಕ್ರಿಪ್ಷನ್ ದರ ವಿಧಿಸಲಾಗುತ್ತಿದೆ.
ಟ್ವಿಟ್ಟರ್ನಲ್ಲಿ ಹಾವಳಿ ಎನಿಸಿರುವ ಬೋಟ್ಗಳಿಗೆ ಕಡಿವಾಣ ಹಾಕಲ ಇಲಾನ್ ಮಸ್ಕ್ ಅವರು ಮಾಸಿಕ ಶುಲ್ಕ ವಿಧಿಸುವ ಕ್ರಮಕ್ಕೆ ಮುಂದಾಗಿರುವುದು ತಿಳಿದುಬಂದಿದೆ. ಎಕ್ಸ್ ಅನ್ನು ಪೂರ್ಣವಾಗಿ ಪೇಯ್ಡ್ ಸರ್ವಿಸ್ ಮಾಡುವ ಆಲೋಚನೆ ಒಂದು ವರ್ಷದಿಂದಲೂ ಇದೆ.
ಟ್ಟಿಟ್ಟರ್ ಅನ್ನು ಖರೀದಿಸಿದಾಗಲೇ ಇಲಾನ್ ಮಸ್ಕ್ ಅವರು ಇಂಥದ್ದೊಂದು ಪ್ರಸ್ತಾಪ ಮಾಡಿದ್ದರು. ಅದರ ಭಾಗವಾಗಿ ಟ್ವಿಟ್ಟರ್ನ ಬ್ಲೂಟಿಕ್ಗೆ ಮಾಸಿಕ ಸಬ್ಸ್ಕ್ರಿಪ್ಷನ್ ಪ್ಲಾನ್ ಕೊಡಲಾಗಿದೆ. ಅಂತೆಯೇ ಪ್ರತಿಯೊಬ್ಬ ಬಳಕೆದಾರರಿಂದಲೂ ಸಣ್ಣ ಮೊತ್ತದ ಮಾಸಿಕ ಶುಲ್ಕ ಪಡೆಯುವ ಆಲೋಚನೆಯೂ ಇದೆ.
‘ಬೋಟ್ಗಳ ದೊಡ್ಡ ಪಡೆಗಳನ್ನ ಎದುರಿಸಲು ಇರುವ ಒಂದೇ ಮಾರ್ಗ ಎಂದರೆ ಇದೇ. ಒಂದು ಬೋಟ್ಗೆ ಒಂದು ಪೆನ್ನಿಯ (ಪೈಸೆ) ಸಣ್ಣ ಭಾಗ ಮಾತ್ರವೇ. ಕೆಲ ಡಾಲರ್ಗಳಷ್ಟು ಶುಲ್ಕ ಕಟ್ಟಬೇಕೆಂದರೆ ಈ ಬೋಟ್ಗಳು ದುಬಾರಿ ಎನಿಸಿಬಿಡುತ್ತವೆ’ ಎಂದು ಲೈವ್ ಸಂವಾದದಲ್ಲಿ ಇಲಾನ್ ಮಸ್ಕ್ ಹೇಳಿದ್ದರು.
ಈ ಮೂಲಕ ಮಾಸಿಕ ಶುಲ್ಕ ವಿಧಿಸುವ ಸಾಧ್ಯತೆ ಕುರಿತು ಸುಳಿವು ನೀಡಿದ್ದರು. ಬೋಟ್ಗಳ ವಿಚಾರಕ್ಕೆ ಬಂದರೆ ಹಲವು ಏಜೆನ್ಸಿಗಳು ನಕಲಿ ಬಳಕೆದಾರರನ್ನು ಸೃಷ್ಟಿಸಲು ಈ ಸ್ವಯಂಚಾಲಿತ ಖಾತೆಗಳನ್ನು ಸೃಷ್ಟಿಸುತ್ತವೆ. ಕೃತಕ ಫಾಲೋವರ್ಸ್ಗಳ ಬಳಗ ಸೃಷ್ಟಿಸಲು ಈ ಬೋಟ್ಗಳನ್ನು ಬಳಸಲಾಗುತ್ತದೆ.