ಸೀಮಾ-ಸಚಿನ್​ ಮನೆಯಲ್ಲಿ ಸಂಭ್ರಮ: ಮಗುವಿಗೆ ಭರತ್​ ಎಂದು ನಾಮಕರಣ; ಪಾಕಿಸ್ತಾನಕ್ಕೆ ಸೀಮಾ ಕೊಟ್ಟ ಸಂದೇಶವೇನು? Seema Haider

ನೋಯ್ಡಾ: ನಿಮಗೆ ನೆನಪಿದೆಯೇ 2023 ರಲ್ಲಿ ಪ್ರೀತಿಗಾಗಿ ಗಡಿ ದಾಟಿ ಪಾಕಿಸ್ತಾನದಿಂದ ಭಾರತಕ್ಕೆ ಬಂದಿದ್ದ ಸೀಮಾ ಹೈದರ್ (Seema Haider) ಅಂದು ಇಡೀ ದೇಶಾದ್ಯಂತ ಸಂಚಲನ ಮೂಡಿಸಿದ್ದರು. ಈಗ ಅದೇ ಸೀಮಾ ಹೈದರ್ ಮತ್ತೆ ಸುದ್ದಿಯಲ್ಲಿದ್ದಾರೆ. ಆದರೆ ಈ ಬಾರಿ ಯಾವುದೇ ವಿವಾದಕ್ಕಲ್ಲ, ಬದಲಾಗಿ ತಮ್ಮ ನವಜಾತ ಶಿಶುವಿನ ನಾಮಕರಣ ಶಾಸ್ತ್ರದ ಸಂಭ್ರಮಕ್ಕಾಗಿ ವೈರಲ್​ ಆಗುತ್ತಿದ್ದಾರೆ.

ನೋಯ್ಡಾದ ರಬುಪುರದಲ್ಲಿರುವ ತಮ್ಮ ನಿವಾಸದಲ್ಲಿ ಸೀಮಾ ಹೈದರ್ ಮತ್ತು ಅವರ ಭಾರತೀಯ ಪತಿ ಸಚಿನ್ ಮೀನಾ ಸಂಪ್ರದಾಯಬದ್ಧವಾಗಿ ನಾಮಕರಣ ಸಮಾರಂಭವನ್ನು ಹಮ್ಮಿಕೊಂಡಿದ್ದರು. ಈ ವರ್ಷದ ಫೆಬ್ರವರಿಯಲ್ಲಿ ತಮ್ಮ ಆರನೇ ಮಗುವನ್ನು (ಸಚಿನ್ ಜೊತೆಗಿನ ಎರಡನೇ ಮಗು) ಸ್ವಾಗತಿಸಿದ ಈ ಜೋಡಿ, ಈಗ ಮಗನಿಗೆ ನಾಮಕರಣ ಮಾಡುವ ಮೂಲಕ ಸಂಭ್ರಮಿಸಿದ್ದಾರೆ.

ಮಗನಿಗೆ ಹೆಸರಿಡುವ ವಿಚಾರ ಬಂದಾಗ ಪುರೋಹಿತರು "ಭ" ಅಕ್ಷರದಿಂದ ಹೆಸರು ಬರಬೇಕು ಎಂದು ಸೂಚಿಸಿದ್ದರು. ಆಗ ದಂಪತಿಗಳು ಯಾವುದೇ ಯೋಚನೆ ಮಾಡದೇ ಆಯ್ಕೆ ಮಾಡಿದ ಹೆಸರು "ಭರತ್". ಹೌದು, ಭಾರತದ ಮೇಲಿರುವ ಗೌರವ ಮತ್ತು ಪ್ರೀತಿಯ ಸಂಕೇತವಾಗಿ ತಮ್ಮ ಮಗನಿಗೆ 'ಭರತ್' ಎಂದು ಹೆಸರಿಟ್ಟಿರುವುದಾಗಿ ಸೀಮಾ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.

ಸೀಮಾ ಹೈದರ್ ಮತ್ತು ಸಚಿನ್ ಮೀನಾ ಅವರ ಕಥೆ ಯಾವುದೋ ಸಿನಿಮಾಕ್ಕಿಂತ ಕಡಿಮೆ ಇಲ್ಲ. ಆನ್‌ಲೈನ್ ಗೇಮ್ PUBG ಆಡುವಾಗ ಪರಿಚಯವಾದ ಇವರಿಬ್ಬರು ನಂತರ ಪ್ರೀತಿಸಲು ಶುರು ಮಾಡಿದರು. ಸೀಮಾ ತನ್ನ ಹಿಂದಿನ ಮದುವೆಯ ನಾಲ್ಕು ಮಕ್ಕಳೊಂದಿಗೆ ನೇಪಾಳದ ಮೂಲಕ ಅಕ್ರಮವಾಗಿ ಭಾರತಕ್ಕೆ ಬಂದಿದ್ದರು. ನಂತರ ಕಠ್ಮಂಡುವಿನ ದೇವಸ್ಥಾನವೊಂದರಲ್ಲಿ ಸಚಿನ್ ಅವರನ್ನು ಮದುವೆಯಾಗಿದ್ದರು. ಈಗ ಸೀಮಾಗೆ ಒಟ್ಟು ಆರು ಮಕ್ಕಳಿದ್ದಾರೆ.

ತಮ್ಮ ಸಮುದಾಯದ ಜನರು ತನ್ನನ್ನು ತುಂಬಾ ಗೌರವದಿಂದ ನಡೆಸಿಕೊಳ್ಳುತ್ತಿದ್ದಾರೆ ಎಂದು ಸೀಮಾ ಹೇಳಿದ್ದಾರೆ. "ನನಗೆ ಈಗ ಭಾರತವೇ ಮನೆ. ಇಲ್ಲಿನ ಕ್ರಿಕೆಟ್ ಪಂದ್ಯಗಳ ಸಮಯದಲ್ಲಿ ಭಾರತವನ್ನು ಬೆಂಬಲಿಸುವುದು ಮತ್ತು ವಿಜಯವನ್ನು ಆಚರಿಸುವುದು ನನಗೆ ತುಂಬಾ ಇಷ್ಟ. ಯಾವುದೇ ಕಾರಣಕ್ಕೂ ನಾನು ಪಾಕಿಸ್ತಾನಕ್ಕೆ ಮರಳುವ ಯೋಚನೆ ಮಾಡಿಲ್ಲ ಮತ್ತು ಮಾಡುವುದೂ ಇಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ,(ಏಜನ್ಸೀಸ್​).