2025ರ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ ಅರ್ಹತೆಗೆ ಏಕದಿನ ವಿಶ್ವಕಪ್ ಟೂರ್ನಿಯ ಅಂಕಪಟ್ಟಿಯೇ​ ಮಾನದಂಡ!

ಬೆಂಗಳೂರು: ಹಾಲಿ ಏಕದಿನ ವಿಶ್ವಕಪ್​ನಲ್ಲಿ ಅಗ್ರ 4 ಸ್ಥಾನ ಪಡೆಯುವ ತಂಡಗಳು ಸೆಮಿಫೈನಲ್​ಗೇರಲಿವೆ ಮತ್ತು ಪ್ರಶಸ್ತಿ ಗೆಲ್ಲುವ ಅವಕಾಶ ಪಡೆಯಲಿವೆ. ಹಾಗೆಂದು ಇತರ ತಂಡಗಳು ನಿರಾಸೆ ಅನುಭವಿಸಬೇಕಾಗಿಲ್ಲ! 2025ರ ಚಾಂಪಿಯನ್ಸ್​ ಟ್ರೋಫಿ ಗೆಲುವಿನ ಆಸೆ ಜೀವಂತವಿಡಲು ಪ್ರಯತ್ನಿಸಬಹುದಾಗಿದೆ. ಯಾಕೆಂದರೆ, ಹಾಲಿ ವಿಶ್ವಕಪ್​ ಅಂಕಪಟ್ಟಿಯಲ್ಲಿ ಅಗ್ರ 8ರೊಳಗಿನ ಸ್ಥಾನ ಪಡೆಯುವ ತಂಡಗಳಿಗೆ ಚಾಂಪಿಯನ್ಸ್​ ಟ್ರೋಫಿಗೆ ಅರ್ಹತೆ ಲಭಿಸಲಿದೆ.

ಪಾಕಿಸ್ತಾನ 2025ರ ಚಾಂಪಿಯನ್ಸ್​ ಟ್ರೋಫಿಗೆ ಆತಿಥ್ಯ ವಹಿಸಲಿದೆ. ಹೀಗಾಗಿ ಅದಕ್ಕೆ ನೇರ ಅರ್ಹತೆ ಸಿಗಲಿದೆ. ಇನ್ನುಳಿದಂತೆ ಪಾಕ್​ ಸೇರಿ ವಿಶ್ವಕಪ್​ ಅಂಕಪಟ್ಟಿಯ ಅಗ್ರ 8 ತಂಡಗಳು ಅಥವಾ ಪಾಕ್​ ಅದಕ್ಕಿಂತ ಕೆಳಗಿನ ಸ್ಥಾನದಲ್ಲಿದ್ದರೆ ಅಗ್ರ 7 ತಂಡಗಳು ಚಾಂಪಿಯನ್ಸ್​ ಟ್ರೋಫಿಗೆ ಅರ್ಹತೆ ಪಡೆಯಲಿವೆ. ಹೀಗಾಗಿ ಸದ್ಯ ಅಂಕಪಟ್ಟಿಯಲ್ಲಿ ಕೊನೇ 2 ಸ್ಥಾನದಲ್ಲಿರುವ ಬಾಂಗ್ಲಾದೇಶ, ಇಂಗ್ಲೆಂಡ್​ಗೆ ಚಾಂಪಿಯನ್ಸ್​ ಟ್ರೋಫಿ ಅರ್ಹತೆ ಕೈತಪ್ಪುವ ಭೀತಿ ಎದುರಾಗಿದೆ.

ಚಾಂಪಿಯನ್ಸ್​ ಟ್ರೋಫಿ ಅರ್ಹತೆಗೆ ಐಸಿಸಿ ರೂಪಿಸಿರುವ ಈ ಮಾನದಂಡದಿಂದಾಗಿ, ಟೆಸ್ಟ್​ ಮಾನ್ಯತೆ ಹೊಂದಿರುವ ವೆಸ್ಟ್​ ಇಂಡೀಸ್​, ಜಿಂಬಾಬ್ವೆ ಮತ್ತು ಐರ್ಲೆಂಡ್​ ತಂಡಗಳಿಗೆ ಅರ್ಹತೆಯ ಅವಕಾಶ ಕೈತಪ್ಪಿದಂತಾಗಿದೆ. ಏಕದಿನ ಮಾದರಿಯ ಚಾಂಪಿಯನ್ಸ್​ ಟ್ರೋಫಿ 2017ರಲ್ಲಿ ಕೊನೆಯದಾಗಿ ನಡೆದಿತ್ತು ಮತ್ತು ಐಸಿಸಿ ರ್ಯಾಂಕಿಂಗ್​ ಆಧಾರದಲ್ಲಿ ಅಗ್ರ 8 ತಂಡಗಳಿಗೆ ಅರ್ಹತೆ ನೀಡಲಾಗಿತ್ತು.

2029ರಲ್ಲಿ ಮತ್ತೆ ಭಾರತದ ಆತಿಥ್ಯದಲ್ಲಿ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ ನಡೆಯಲಿದೆ. ಆಗ 2027ರ ಏಕದಿನ ವಿಶ್ವಕಪ್​ನಲ್ಲಿ ಅಗ್ರ 8 ತಂಡಗಳಿಗೆ (ಆತಿಥೇಯ ಭಾರತ ಸೇರಿ) ಚಾಂಪಿಯನ್ಸ್​ ಟ್ರೋಫಿ ಅರ್ಹತೆ ಲಭಿಸಲಿದೆ ಎಂದು ಐಸಿಸಿ ತಿಳಿಸಿದೆ. 2027ರ ಏಕದಿನ ವಿಶ್ವಕಪ್​ನಲ್ಲಿ 14 ತಂಡಗಳು ಭಾಗವಹಿಸಲಿವೆ. ಹೀಗಾಗಿ ಆಗ ಸ್ಪರ್ಧೆ ಇನ್ನಷ್ಟು ನಿಕಟವಾಗಿರಲಿದೆ.

2027ರ ಏಕದಿನ ವಿಶ್ವಕಪ್​ಗೆ ದಣ ಆಫ್ರಿಕಾ, ಜಿಂಬಾಬ್ವೆ ಮತ್ತು ನಮೀಬಿಯಾ ಆತಿಥ್ಯ ವಹಿಸಲಿದೆ. ಈ ಪೈಕಿ ಆತಿಥೇಯ ದಕ್ಷಿಣ ಆಫ್ರಿಕಾ ಮತ್ತು ಜಿಂಬಾಬ್ವೆಗೆ ವಿಶ್ವಕಪ್​ಗೆ ನೇರಅರ್ಹತೆ ಲಭಿಸಲಿದ್ದರೆ, ನಮೀಬಿಯಾ ಅರ್ಹತಾ ಸುತ್ತಿನಲ್ಲಿ ಭಾಗವಹಿಸಿ ಅರ್ಹತೆಗೆ ಪ್ರಯತ್ನಿಸಬೇಕಿದೆ. ಉಳಿದಂತೆ, 2027ರ ಮಾರ್ಚ್​ 31ರ ವೇಳೆಗೆ ಐಸಿಸಿ ಏಕದಿನ ರ್ಯಾಂಕಿಂಗ್​ನಲ್ಲಿ ಅಗ್ರ 8ರೊಳಗಿರುವ (ದಕ್ಷಿಣ ಆಫ್ರಿಕಾ, ಜಿಂಬಾಬ್ವೆ ಹೊರತಾಗಿ) ತಂಡಗಳು ವಿಶ್ವಕಪ್​ಗೆ ಅರ್ಹತೆ ಸಂಪಾದಿಸಲಿವೆ. ಉಳಿದ 4 ತಂಡಗಳನ್ನು ಅರ್ಹತಾ ಸುತ್ತಿನ ಮೂಲಕ ಆರಿಸಲಾಗುತ್ತದೆ.

https://www.vijayavani.net/cwc23-what-pakistan-need-to-qualify-for-the-world-cup-semi-finals