ವಿಶ್ವಕಪ್​ನಲ್ಲಿ ಸತತ 4 ಪಂದ್ಯ ಸೋತರೂ, ಸೆಮಿಫೈನಲ್​ ಆಸೆ ಕೈಬಿಟ್ಟಿಲ್ಲ ಪಾಕಿಸ್ತಾನ! ಹೀಗಿದೆ ಲೆಕ್ಕಾಚಾರ…

ಬೆಂಗಳೂರು: ಏಕದಿನ ವಿಶ್ವಕಪ್​ನಲ್ಲಿ ಆರಂಭಿಕ 2 ಪಂದ್ಯಗಳನ್ನು ಗೆದ್ದು ಬೀಗಿದ್ದ ಪಾಕಿಸ್ತಾನ ತಂಡ ಆತಿಥೇಯ ಹಾಗೂ ಸಾಂಪ್ರದಾಯಿಕ ಎದುರಾಳಿ ಭಾರತ ತಂಡದ ಎದುರು ಹೀನಾಯವಾಗಿ ಸೋಲು ಕಂಡ ಬಳಿಕ ಗೆಲುವಿನ ಮುಖ ನೋಡಿಲ್ಲ. ಸತತ 4 ಸೋಲುಗಳೊಂದಿಗೆ ಪಾಕಿಸ್ತಾನ ಈಗ ಅಂಕಪಟ್ಟಿಯಲ್ಲಿ 6ನೇ ಸ್ಥಾನಕ್ಕೆ ಕುಸಿದಿದೆ. ಇದರಿಂದ ಪಾಕಿಸ್ತಾನ ಸೆಮಿಫೈನಲ್​ ರೇಸ್​ನಿಂದ ಬಹುತೇಕ ಹೊರಬಿದ್ದಂತಿದ್ದರೂ, ಕೆಲ ಲೆಕ್ಕಾಚಾರಗಳ ಪ್ರಕಾರ ಅದಕ್ಕೆ ಈಗಲೂ ನಾಕೌಟ್​ ಹಂತಕ್ಕೇರುವ ಅವಕಾಶ ಜೀವಂತವಿದೆ! ಆ ಲೆಕ್ಕಾಚಾರದ ವಿವರಕ್ಕಾಗಿ ಈ ಸುದ್ದಿಯನ್ನು ಪೂರ್ತಿ ಓದಿ...

ಪಾಕಿಸ್ತಾನ ಇದುವರೆಗೆ ಆಡಿರುವ 6 ಪಂದ್ಯಗಳಲ್ಲಿ 2ರಲ್ಲಷ್ಟೇ ಗೆದ್ದು, 4ರಲ್ಲಿ ಸೋತಿದ್ದು, 4 ಅಂಕ ಕಲೆಹಾಕಿದೆ. ಇನ್ನು ಪಾಕಿಸ್ತಾನಕ್ಕೆ ಗರಿಷ್ಠವೆಂದರೆ 5 ಪಂದ್ಯ ಗೆದ್ದು, ಒಟ್ಟು 10 ಅಂಕ ಕಲೆಹಾಕಲು ಅವಕಾಶವಿದೆ. ದಕ್ಷಿಣ ಆಫ್ರಿಕಾ ಮತ್ತು ಭಾರತ ಈಗಾಗಲೆ ತಲಾ 5 ಪಂದ್ಯ ಗೆದ್ದಿದ್ದು, ಇನ್ನೊಂದು ಪಂದ್ಯ ಗೆದ್ದರೆ ಬಹುತೇಕ ಸೆಮೀಸ್​ ಪ್ರವೇಶಿಸಲಿವೆ. ಇನ್ನು ನ್ಯೂಜಿಲೆಂಡ್​-ಆಸ್ಟ್ರೆಲಿಯಾ ತಂಡಗಳು ತಲಾ 4ರಲ್ಲಿ ಗೆದ್ದಿದ್ದು, ಇವೆರಡೂ ತಂಡಗಳಿಗೆ ಇನ್ನೂ 3 ಪಂದ್ಯಗಳು ಬಾಕಿ ಇವೆ. ಈ ಪೈಕಿ ಒಂದು ತಂಡವಾದರೂ, ಕನಿಷ್ಠ 2ರಲ್ಲಿ ಸೋತರೆ ಗರಿಷ್ಠ 10 ಅಂಕಗಳನ್ನಷ್ಟೇ ಕಲೆ ಹಾಕಲಿವೆ. ಮತ್ತೊಂದೆಡೆ ಶ್ರೀಲಂಕಾ ಮತ್ತು ಅಫ್ಘಾನಿಸ್ತಾನ ತಂಡಗಳಿಗೆ ಇನ್ನೂ 4 ಪಂದ್ಯಗಳು ಬಾಕಿ ಇದ್ದು, ಇವೆಲ್ಲವನ್ನೂ ಗೆದ್ದರೆ ಒಟ್ಟು 6 ಪಂದ್ಯ ಗೆದ್ದಂತಾಗುತ್ತದೆ. ಹೀಗಾಗಿ ಇವೆರಡು ತಂಡಗಳೂ ಟೂರ್ನಿಯಲ್ಲಿ ಇನ್ನೊಂದು ಸೋಲು ಕಾಣಬೇಕು. ಇನ್ನು ನೆದರ್ಲೆಂಡ್​, ಇಂಗ್ಲೆಂಡ್​ ತಂಡಗಳಿಗೆ ಗರಿಷ್ಠ 5 ಪಂದ್ಯಗಳನ್ನು ಗೆಲ್ಲಲಷ್ಟೇ ಅವಕಾಶವಿದೆ. ಹೀಗಾಗಿ 3ಕ್ಕಿಂತ ಹೆಚ್ಚಿನ ತಂಡಗಳು 6 ಪಂದ್ಯಗಳನ್ನು ಗೆಲ್ಲದಿರುವ ಸಂದರ್ಭ ಸೃಷ್ಟಿಯಾದರೆ, ಪಾಕಿಸ್ತಾನ ರನ್​ರೇಟ್​ನಲ್ಲಿ ಮೇಲುಗೈ ಸಾಧಿಸಿ ಉಪಾಂತ್ಯಕ್ಕೇರಲು ಅವಕಾಶವಿದೆ.

ಆದರೆ ಸದ್ಯ ಪಾಕಿಸ್ತಾನದ ರನ್​ರೇಟ್​ ನ್ಯೂಜಿಲೆಂಡ್​, ಆಸ್ಟ್ರೆಲಿಯಾ, ಶ್ರೀಲಂಕಾ ತಂಡಗಳಿಗಿಂತ ಕಳಪೆಯಾಗಿದೆ. ಹೀಗಾಗಿ ಉಳಿದ 3 ಪಂದ್ಯಗಳಲ್ಲಿ ಗೆಲ್ಲುವ ಜತೆಗೆ ರನ್​ರೇಟ್​ನಲ್ಲಿ ಭಾರಿ ಸುಧಾರಣೆ ಕಾಣಬೇಕಾದ ಸವಾಲು ಬಾಬರ್​ ಅಜಮ್​ ಬಳಗದ ಮುಂದಿದೆ. ಆದರೆ 3ರಲ್ಲಿ ಒಂದು ಪಂದ್ಯ ಸೋತರೂ, ಪಾಕ್​ ಅಧಿಕೃತವಾಗಿ ವಿಶ್ವಕಪ್​ ಗೆಲುವಿನ ಕನಸು ಕೈಚೆಲ್ಲಬೇಕಾಗುತ್ತದೆ.

ಪಾಕಿಸ್ತಾನ ತನ್ನ ಉಳಿದ ಮೂರು ಪಂದ್ಯಗಳಲ್ಲಿ ಬಾಂಗ್ಲಾದೇಶ (ಅಕ್ಟೋಬರ್​ 31, ಕೋಲ್ಕತ), ಹಾಲಿ ರನ್ನರ್​ಅಪ್​ ನ್ಯೂಜಿಲೆಂಡ್​ (ನವೆಂಬರ್​ 4, ಬೆಂಗಳೂರು) ಮತ್ತು ಹಾಲಿ ಚಾಂಪಿಯನ್​ ಇಂಗ್ಲೆಂಡ್​ (ನವೆಂಬರ್​ 11, ಕೋಲ್ಕತ) ತಂಡಗಳನ್ನು ಎದುರಿಸಲಿದೆ. ಈ ಮೂರರಲ್ಲೂ ಪಾಕ್​ ತನಗೆ ಬೇಕಾದ ಫಲಿತಾಂಶ ಪಡೆದುಕೊಂಡರೆ ಮತ್ತು ಇತರ ಫಲಿತಾಂಶಗಳೂ ಅದರ ಪರವಾಗಿ ಬಂದರೆ ಸೆಮಿಫೈನಲ್​ ಪ್ರವೇಶಿಸಲಿದೆ. ಹೀಗಾಗಿ ಪಾಕಿಸ್ತಾನ ತಂಡದ ನಿರ್ದೇಶಕ ಮಿಕಿ ಆರ್ಥರ್​, ದಕ್ಷಿಣ ಆಫ್ರಿಕಾ ವಿರುದ್ಧದ ರೋಚಕ ಸೋಲಿನ ಬಳಿಕವೂ, ಸೆಮಿಫೈನಲ್​ಗೇರುವ ಆಶಾವಾದ ಇನ್ನೂ ಇದೆ ಎಂದಿದ್ದರು.

ಪಾಕಿಸ್ತಾನ ತಂಡ ಒಂದು ವೇಳೆ ನಾಲ್ಕನೇ ಸ್ಥಾನಿಯಾಗಿ ಉಪಾಂತ್ಯಕ್ಕೇರಿದರೆ ಮತ್ತು ಆತಿಥೇಯ ಭಾರತ ತಂಡ ಲೀಗ್​ ಹಂತದ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಅಲಂಕರಿಸಿದರೆ, ಆಗ ಸೆಮಿಫೈನಲ್​ನಲ್ಲಿ ಭಾರತ-ಪಾಕಿಸ್ತಾನ ತಂಡಗಳೇ ಮುಖಾಮುಖಿ ಆಗಲಿವೆ ಮತ್ತು ಈ ಹೈ-ವೋಲ್ಟೇಜ್​ ಪಂದ್ಯ ಕೋಲ್ಕತದಲ್ಲಿ ನವೆಂಬರ್​ 16ರಂದು ನಡೆಯಲಿದೆ.

https://www.vijayavani.net/south-africa-all-but-pip-pakistan-out-of-world-cup-with-narrow-win