ನಮ್ಮ ಸೋಲಿಗೆ ಇವರೇ ಪ್ರಮುಖ ಕಾರಣ; ತವರಿನಲ್ಲಿ Team India ಪ್ರದರ್ಶನಕ್ಕೆ ಕಿಡಿಕಾರಿದ ಮಾಜಿ ಕ್ರಿಕೆಟಿಗ

ಅಮೃತಸರ: ಭಾರತದ ಆತಿಥ್ಯದಲ್ಲಿ ನಡೆಯುತ್ತಿರುವ ನ್ಯೂಜಿಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ ಟೀಮ್​ ಇಂಡಿಯಾ (Team India) ಸೋಲುಂಡಿದ್ದು, ಭಾರೀ ಮುಖಭಂಗವನ್ನುಅನುಭವಿಸಿದೆ. 4331 ದಿನಗಳು ಅಂದರೆ 12 ವರ್ಷಗಳ ಬಳಿಕ ತವರು ನೆಲದಲ್ಲಿ ಭಾರತ (Team India) ಟೆಸ್ಟ್​ ಸರಣಿಯಲ್ಲಿ ಸೋತಿದ್ದು, ರೋಹಿತ್​ ಪಡೆ ವಿರುದ್ಧ ಮಾಜಿ ಕ್ರಿಕೆಟಿಗರು ಗರಂ ಆಗಿದ್ದಾರೆ. ಇದಲ್ಲದೆ ಕೋಚ್​ ಗೌತಮ್​ ಗಂಭೀರ್​ ಕಾರ್ಯವೈಖರಿ ಬಗ್ಗೆಯೂ ಅಸಮಾಧಾನ ಹೊರಹಾಕಿರುವ ಕ್ರೀಡಾ ತಜ್ಞರು ಮುಂಬರುವ ಟೂರ್ನಿಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ.

ಬೆಂಗಳೂರು ಟೆಸ್ಟ್​ನಲ್ಲಿ ಆದ ಎಡವಟ್ಟನ್ನು ಸರಿಮಾಡಿಕೊಂಡು ಎರಡನೇ ಪಂದ್ಯದಲ್ಲಿ ಕಮ್​ಬ್ಯಾಕ್​ ಮಾಡಲಾಗುತ್ತದೆ ಎಂಬ ನಿರೀಕ್ಷೆ ಇತ್ತಾದರೂ ಟೀಮ್​ ಇಂಡಿಯಾ (Team India) ಬ್ಯಾಟ್ಸ್​ಮನ್​ಗಳ ವೈಫಲ್ಯದಿಂದಾಗಿ ಅದು ಹುಸಿಯಾಯಿತು. ಆಫ್​ಸ್ಪಿನ್​ ಜೋಡಿಗಳಾದ ಅಶ್ವಿನ್​ ಹಾಗೂ ಸುಂದರ್​ ಕಮಾಲ್​ ಮಾಡಿದರಾದರೂ ನಿರೀಕ್ಷಿತ ಮಟ್ಟದಲ್ಲಿ ತಂಡ ಪ್ರದರ್ಶನ ನೀಡದೆ ಇರುವುದು ಹಲವರ ಕೆಂಗಣ್ಣಿಗೆ ಗುರಿಯಾಗಿದ್ದು, ಈ ಬಗ್ಗೆ ಮಾಜಿ ಕ್ರಿಕೆಟಿಗ ಮದನ್​ ಲಾಲ್​ ಮಾತನಾಡಿದ್ದಾರೆ.

ಸುದ್ದಿ ಸಂಸ್ಥೆ ಎಎನ್​ಐಗೆ ನೀಡಿರುವ ಸಂದರ್ಶನದಲ್ಲಿ ಈ ಬಗ್ಗೆ ಮಾತನಾಡಿರುವ ಮದನ್​ ಲಾಲ್​, ನನ್ನ ಪ್ರಕಾರ ರಿಷಭ್​ ಪಂತ್​ ರನೌಟ್​ ಪಂದ್ಯಕ್ಕೆ ಮಹತ್ವದ ತಿರುವು ಎಂದು ಹೇಳುತ್ತೇನೆ. ಆತ ಎಂತಹ ಆಟಗಾರನೆಂದರೆ ಪಂದ್ಯವನ್ನು ಯಾವ ದಿಕ್ಕಿಗೆ ಬೇಕಾದರೂ ತಿರುಗಿಸಬಲ್ಲ ಸಾಮರ್ಥ್ಯವನ್ನು ಹೊಂದಿದ್ದಾನೆ. ಕೆಲವೊಮ್ಮೆ ನಾವು ತೆಗೆದುಕೊಳ್ಳುವ ತಪ್ಪು ನಿರ್ಣಯಗಳಿಗೆ ಬೆಲೆ ತೆರಬೇಕಾಗುತ್ತದೆ. ಟಾಸ್​ ಎಲ್ಲವನ್ನು ನಿರ್ಣಯಿಸುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.

ಸ್ಪಿನ್ನಿಂಗ್ ಟ್ರ್ಯಾಕ್‌ನಲ್ಲಿ 200-250 ರನ್ ಗಳಿಸುವುದು ಕಷ್ಟವಾಗುತ್ತದೆ. ಆದ್ದರಿಂದ, ನೀವು ಉತ್ತಮ ಬೌಲರ್​ಗಳನ್ನು ಹೊಂದಿರುವುದರಿಂದ ಗೆಲುವು ಸುಲಭವಾಗುತ್ತದೆ. ಇಲ್ಲಿ ನಮ್ಮ ವಿಶ್ವದರ್ಜೆಯ ಐದು ಬ್ಯಾಟ್ಸ್​ಮನ್​ಗಳು ಸಂಪೂರ್ಣವಾಗಿ ವಿಫಲರಾಗಿದ್ದಾರೆ. ನಮ್ಮ ಸೋಲಿಗೆ ಇವರೇ ಕಾರಣ ಎಂದು ನಾನು ಹೇಳುತ್ತೇನೆ. ನಾವು ಪ್ರಸ್ತುತ ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್​ ಬಗ್ಗೆ ಯೋಚಿಸಿಲ್ಲ. ಪ್ರಸ್ತುತ ನಮ್ಮ ಕೈಯಲ್ಲಿ ಏನಿದೆ ನಾವು ಅದರ ಬಗ್ಗೆ ಹೆಚ್ಚು ಯೋಚಿಸಬೇಕಿದೆ. ವಾಂಖೆಡೆಯಲ್ಲಿ ಮುಂದಿನ ಪಂದ್ಯ ನಡೆಯಲಿದ್ದು, ನಾವು ಅದರ ಬಗ್ಗೆ ಹೆಚ್ಚು ಯೋಚಿಸಬೇಕಿದೆ. ಅಂತಿಮವಾಗಿ ಗೆಲುವೇ ನಮ್ಮ ಗುರಿಯಾಗಿದೆ ಎಂದು ಟೀಮ್​ ಇಂಡಿಯಾದ (Team India) ಮಾಜಿ ಆಟಗಾರ ಮದನ್​ ಲಾಲ್​ ಅಭಿಪ್ರಾಯಪಟ್ಟಿದ್ದಾರೆ. 

https://www.vijayavani.net/talking-star-srujan-lokesh-gives-entry-to-bigg-boss-house

https://www.vijayavani.net/gautam-gambhir-in-firing-line-india-head-coach-suffers-second-shock-series-defeat-inside-3-months-with-painful-nz-loss