ವೈದ್ಯಕೀಯ ವಿದ್ಯಾರ್ಥಿಗಳಿಗೆ ಜಿಲ್ಲಾಸ್ಪತ್ರೆಗಳಲ್ಲಿ 3 ತಿಂಗಳ ಸೇವೆ ಕಡ್ಡಾಯ

ನವದೆಹಲಿ: ವೈದ್ಯಕೀಯ ವಿದ್ಯಾರ್ಥಿಗಳು ಇನ್ನು ಮುಂದೆ ಜಿಲ್ಲಾಸ್ಪತ್ರೆಗಳಲ್ಲಿ ಮೂರು ತಿಂಗಳ ಸೇವೆ ಮಾಡುವುದು ಕಡ್ಡಾಯ. ಇಂಥದ್ದೊಂದು ನಿಯಮವನ್ನು ಭಾರತೀಯ ವೈದ್ಯಕೀಯ ಪರಿಷತ್ (ಎಂಸಿಐ) ರೂಪಿಸಿದೆ.

ಮೆಡಿಕಲ್​ ಕೌನ್ಸಿಲ್ ಆಫ್ ಇಂಡಿಯಾ(ಎಂಸಿಐ)ದ ಬೋರ್ಡ್​ ಆಫ್ ಗವರ್ನರ್ಸ್ ಈ ನಿರ್ಧಾರ ತಳೆದಿದೆ. ಯಾವುದೇ ವೈದ್ಯಕೀಯ ಕಾಲೇಜು ಅಥವಾ ಸಂಸ್ಥೆಗಳಲ್ಲಿ ಎಂಡಿ ಅಥವಾ ಎಂಎಸ್​ ವ್ಯಾಸಂಗ ಮಾಡುತ್ತಿರುವ ಎಲ್ಲ ಸ್ನಾತಕೋತ್ತರ ವಿದ್ಯಾರ್ಥಿಗಳಿಗೆ ಈ ನಿಯಮ ಕಡ್ಡಾಯವಾಗಿ ಅನ್ವಯಿಸಲಿದೆ.

3, 4 ಅಥವಾ 5ನೇ ಸೆಮಿಸ್ಟರ್​ನಲ್ಲಿ ರೊಟೇಷನ್​ ಮೂಲಕ ವೈದ್ಯಕೀಯ ವಿದ್ಯಾರ್ಥಿಗಳನ್ನು ಈ ರೀತಿ ಜಿಲ್ಲಾಸ್ಪತ್ರೆಗಳಿಗೆ ನಿಯೋಜಿಸಲಿದ್ದು, ಇದನ್ನು ಡಿಸ್ಟ್ರಿಕ್ಟ್​ ರೆಸಿಡೆನ್ಸಿ ಪ್ರೋಗ್ರಾಮ್​ ಎಂದು ಕರೆಯಲಾಗಿದೆ. ವ್ಯಾಸಂಗದ ಹಂತದಲ್ಲೇ ವಿದ್ಯಾರ್ಥಿಗಳಿಗೆ ಆಸ್ಪತ್ರೆಗಳು ನಡೆಯುವ ರೀತಿ ಹಾಗೂ ಕೇಂದ್ರ ಸರ್ಕಾರದ ಯೋಜನೆಗಳು ಜಿಲ್ಲಾಮಟ್ಟದಲ್ಲಿ ಹೇಗೆ ಅನುಷ್ಠಾನಗೊಳ್ಳುತ್ತಿವೆ ಎಂಬುದನ್ನು ತಿಳಿಯಲು ಅನುಕೂಲವಾಗುವಂತೆ ಮಾಡುವುದು ಇದರ ಉದ್ದೇಶ. ಮತ್ತೊಂದೆಡೆ ಇದಕ್ಕಾಗಿ ಜಿಲ್ಲಾಸ್ಪತ್ರೆಗಳು ಕನಿಷ್ಠ ನೂರು ಹಾಸಿಗೆಗಳನ್ನು ಹೊಂದಿರಬೇಕು. (ಏಜೆನ್ಸೀಸ್​)