ಈಲ್ಗಳು ಮೀನಿನ ಜಾತಿಯಲ್ಲಿಯೇ ದೊಡ್ಡ ಗಾತ್ರಕ್ಕೆ, ಉದ್ದಕ್ಕೆ ಹಾವಿನ ಹಾಗೆ ಇರುವ ಜೀವಿಗಳು. ಉಪ್ಪುನೀರಿನಲ್ಲಿ ಇವುಗಳ ಸಾಮಾನ್ಯ ವಾಸ. ಬಾಯಿ ತುಂಬಾ ನೂರಾರು ಹಲ್ಲುಗಳು, ಕಿವಿರುಳ ಮೂಲಕ ಉಸಿರಾಟ. ಈಗ ಇಲೆಕ್ಟ್ರಿಕ್ ಈಲ್ಗಳ ಪ್ರಸ್ತಾಪಕ್ಕೆ ಬಂದರೆ, ಮೊದಲಿಗೆ ಇವುಗಳು ಈಲ್ಗಳೇ ಅಲ್ಲ! ನೋಡಲು ತದ್ರೂಪಿ ಈಲ್ಗಳ ಹಾಗೆ ಕಾಣಿಸಿದರೂ, ತಮ್ಮ ಹೆಸರಿನ ಕೊನೆಯಲ್ಲಿ ಈಲ್ ಎಂಬ ಪದನಾಮ ಹೊಂದಿದ್ದರೂ, ಇವುಗಳಿಗೂ ಈಲ್ಗಳಿಗೂ ಯಾವುದೇ ಸಂಬಂಧವಿಲ್ಲ! ಹೆಚ್ಚೇಕೆ, ಈಲ್ಗಳಂತೆಯೇ ಇಲೆಕ್ಟ್ರಿಕ್ ಈಲ್ಗಳೂ ಮೀನುಗಳೆಂಬುದನ್ನು ಹೊರತುಪಡಿಸಿದರೆ, ಇವೆರಡರ ನಡುವೆ ಯಾವುದೇ ಸಾಮ್ಯತೆಗಳಿಲ್ಲ! ಈಲ್ಗಳು ಉಪ್ಪುನೀರಿನ ಆಳದಲ್ಲಿ ವಾಸ ಮಾಡಿದರೆ, ಇಲೆಕ್ಟ್ರಿಲ್ ಈಲ್ಗಳು ವಾಸ ಮಾಡುವುದು ಸಂಪೂರ್ಣವಾಗಿ ಸಿಹಿ ನೀರನಲ್ಲಿ, ಅದೂ ಆಳವೇ ಇಲ್ಲದ, ಹೆಚ್ಚು ಹರಿಯದ ನಿಂತ ನೀರಿನಲ್ಲಿ ಮಾತ್ರ! ಅದರಲ್ಲೂ ಇವುಗಳಿಗೆ ಮಡುಗಟ್ಟಿದ ಕೆಸರಿನಂತಹ ನೀರಾದರೆ ಪಂಚಪ್ರಾಣ! ಇಂಥ ಮಡುಗಟ್ಟಿದ ಕೆಸರಿನಲ್ಲಿ ಈಲ್ಗಳು ಬದುಕುವುದನ್ನು ಕಲ್ಪನೆ ಕೂಡ ಮಾಡಲಾಗದು! ಇನ್ನು ಉಸಿರಾಟದ ವಿಚಾರಕ್ಕೆ ಬಂದರೆ, ಈಲ್ಗಳು ಎಲ್ಲಾ ಸಾಮಾನ್ಯ ಮೀನುಗಳಂತೆ ತಮ್ಮ ಕಿವಿರಿನ ಮೂಲಕ ಉಸಿರಾಡಿದರೆ, ಇಲೆಕ್ಟ್ರಿಕ್ ಈಲ್ಗಳಿಗೆ ಉಸಿರಾಡಲು ಕಿವಿರುಗಳೇ ಇಲ್ಲ! ಅವುಗಳೇನಿದ್ದರೂ ಗಾಳಿಯನ್ನು ಮಾತ್ರ ಉಸಿರಾಡುತ್ತವೆ! ಹೀಗಾಗಿ ಇಲೆಕ್ಟ್ರಿಕ್ ಈಲ್ಗಳು ಉಸಿರು ತೆಗೆದುಕೊಳ್ಳುವ ಇಪ್ಪತ್ತರಿಂದ ಮೂವತ್ತು ನಿಮಿಷಗಳಿಗೊಮ್ಮೆ ಆಗಾಗ ನೀರಿನ ಮೇಲ್ಮೈಗೆ ಬರುತ್ತಲೇ ಇರುತ್ತವೆ. ಅದಕ್ಕಿಂತ ಹೆಚ್ಚು ಅವಧಿಗೆ ನೀರಿನೊಳಗೆ ಅವುಗಳು ಮುಳುಗಿಕೊಂಡಿದ್ದರೆ, ಈಜಾಡಲು ಬಾರದೆ ನೀರಿಗೆ ಬಿದ್ದ ನಮ್ಮ-ನಿಮ್ಮ ಸ್ಥಿತಿಯೇ ಅವುಗಳಿಗೂ ಆಗುತ್ತದೆ! ಈಲ್ ಮೀನುಗಳಲ್ಲಿ ಯಾವ ಜಾತಿಗೂ ಕರೆಂಟ್ ಹೊಡೆಯುವ ಅಭ್ಯಾಸವೂ ಇಲ್ಲ, ಆ ಶಕ್ತಿಯೂ ಇಲ್ಲ! ಅದೇ ಇಲೆಕ್ಟ್ರಿಕ್ ಈಲ್ಗಳಿಗೆ -ಹೆಸರೇ ಹೇಳುವಂತೆ- ಅವುಗಳ ಬಂಡವಾಳವೇ ‘ಶಾಕ್ ನೀಡುವ’ ವಿಶಿಷ್ಟ ಶಕ್ತಿ! ಇನ್ನು ಸಂತಾನೋತ್ಪತ್ತಿ ವಿಚಾರದಲ್ಲಿ -ಗಂಡು ಇಲೆಕ್ಟ್ರಿಕ್ ಈಲ್ಗಳು ಹೆಣ್ಣಿಗಾಗಿ- ಮೀನುಗಳ ವಂಶದಲ್ಲೇ ಅತ್ಯಂತ ವಿಶೇಷವಾದ ತಮ್ಮ ಜೊಲ್ಲಿನಿಂದ ಗೂಡು ಕಟ್ಟುತ್ತವೆ! ಇದು ಸಾಮಾನ್ಯ ಈಲ್ಗಳಿಗೆ ಗೊತ್ತೇ ಇಲ್ಲ! ಹೀಗೆ ಈಲ್ಗಳಿಗೂ ಇಲೆಕ್ಟ್ರಿಕ್ ಈಲ್ಗಳಿಗೂ ಯಾವುದೇ ಸಂಬಂಧವಿಲ್ಲ. ಇಲೆಕ್ಟ್ರಿಕ್ ಈಲ್ಗಳು ಸಂಪೂರ್ಣವಾಗಿ ಈಲ್ ಮೀನುಗಳ ಹಾಗೆ ಕಾಣುತ್ತವೆ ಎಂಬೊಂದು ಕಾರಣಕ್ಕಾಗಿ ಇವುಗಳಿಗೂ ‘ಈಲ್’ ಎಂದು ಕರೆಯುತ್ತಾರೆ, ಅಷ್ಟೇ! ಹಾಗೆ ನೋಡಿದರೆ, ಇಲೆಕ್ಟ್ರಿಕ್ ಈಲ್ಗಳು ಚಾಕುಮೀನುಗಳೆಂಬ ಮೀನಿನ ಜಾತಿಯವುಗಳು. ನಮ್ಮೂರ ಕೆರೆಕೊಳ್ಳಗಳಲ್ಲಿ ಸಿಗುವ ಮುಗುಡು ಮೀನಿಗೆ ಹತ್ತಿರದ ಸಂಬಂಧಿ!
