ಮುಂಬೈ: ದಕ್ಷಿಣ ಭಾರತದ ಸಿನಿಮಾಗಳ ಗೆಲುವು ಹಾಗೂ ಬಾಲಿವುಡ್ ಸರಣಿ ಸೋಲಿನ ಕುರಿತು ಇತ್ತೀಚೆಗೆ ಚರ್ಚೆ ಶುರುವಾಗಿದೆ. ನಮ್ಮಲ್ಲಿ ಅಂತಹ ಪ್ರತಿಭಾನ್ವಿತ ನಿರ್ದೇಶಕರಿಲ್ಲ ಎಂದು ಸ್ಟಾರ್ ನಟರೇ ಹೇಳಿಕೊಂಡಿದ್ದರೆ, ಮತ್ತೆ ಕೆಲವರು ಬಾಲಿವುಡ್ ಎಂದಿಗೂ ಬಾಲಿವುಡ್ ಎಂದೂ ಸಮರ್ಥಿಸಿಕೊಂಡವರೂ ಇದ್ದಾರೆ.
ಈ ನಡುವೆ ಇತ್ತೀಚೆಗೆ ಅಕ್ಷಯ್ ಕುಮಾರ್ ಸಹ ದಕ್ಷಿಣ ಭಾರತದ ಹಿಟ್ ಸಿನಿಮಾಗಳನ್ನು ನಾವು ರೀಮೇಕ್ ಮಾಡುವುದರಲ್ಲಿ ತಪ್ಪೇನಿದೆ, ಅದರಲ್ಲೂ ಬಾಲಿವುಡ್ ಹಾಗೂ ದಕ್ಷಿಣ ಭಾರತ ಎಂದು ಇಬ್ಭಾಗಿಸಿದರೆ ನನಗೆ ಕೋಪ ಬರುತ್ತೆ ಎಂದು ಹೇಳಿದ್ದರು.ಇದೀಗ ಈ ಬಗ್ಗೆ ಹೇಳಿಕೆ ನೀಡಿರುವ ನಟಿ ರವೀನಾ ಟಂಡನ್ ಬಾಲಿವುಡ್ ಹಾಗೂ ದಕ್ಷಿಣ ಭಾರತ ಸಿನಿಮಾಗಳು ಎಂದೇನಿಲ್ಲ. ಎಲ್ಲವೂ ನಮ್ಮ ಸಿನಿಮಾಗಳೇ ಆಗಿವೆ ಇದರಲ್ಲಿ ಸ್ಪರ್ಧೆ ಏನೂ ಇಲ್ಲ ಎಂದು ಹೇಳಿದ್ದಾರೆ.
ಕೆಜಿಎಫ್-2, ಆರ್ಆರ್ಆರ್ ಹಾಗೂ ಪುಷ್ಪ ಸಿನಿಮಾಗಳ ಗೆಲುವಿನ ಬಳಿಕ ಜನರು ಬಾಲಿವುಡ್ ಹಾಗೂ ದಕ್ಷಿಣ ಭಾರತದ ಸಿನಿಮಾ ಎಂದೇ ಚರ್ಚೆ ನಡೆಸುತ್ತಿದ್ದಾರೆ. ನನಗೆ ಆ ರೀತಿ ಅನ್ನಿಸುವುದಿಲ್ಲ, ಏಕೆಂದರೆ ನನಗೆ ಎಲ್ಲಾ ಭಾಷೆಯ ಸಿನಿಮಾಗಳು ಒಂದೇ ಆಗಿವೆ ಎಂದಿದ್ದಾರೆ.
ರವೀನಾ ಟಂಡನ್ ಕೆಜಿಎಫ್-2 ಸಿನಿಮಾದಲ್ಲಿ ಪ್ರಮುಖ ಪಾತ್ರವೊಂದನ್ನು ನಿರ್ವಹಿಸಿದ್ದು, ಈ ಹಿಂದೆಯೂ ಕನ್ನಡ ಸಿನಿಮಾದಲ್ಲಿ ರವೀನಾ ಕಾಣಿಸಿಕೊಂಡಿದ್ದಾರೆ. (ಏಜೆನ್ಸೀಸ್)