ಗ್ರಾಮಸ್ಥರ ಪ್ರತಿಭಟನೆಗೆ ಬೆಚ್ಚಿ 5 ತಾಸು ಬಸ್​ನಲ್ಲೇ ಕುಳಿತರು!

ದಾವಣಗೆರೆ (ಮಲೇಬೆನ್ನೂರು): ಮಹಾರಾಷ್ಟ್ರದಿಂದ ಕರೆತಂದವರನ್ನು ನಮ್ಮೂರಲ್ಲಿ ಕ್ವಾರಂಟೈನ್​ ಮಾಡಲು ಬಿಡಲ್ಲ ಎಂದು ಹರಿಹರ ತಾಲೂಕಿನ ನಂದಿಗುಡಿ ಮತ್ತು ವಾಸನ ಗ್ರಾಮಸ್ಥರು ಗುರುವಾರ ಬೆಳಗ್ಗೆಯಿಂದ ಸಂಜೆವರೆಗೂ ಬಸ್​ ತಡೆದು ಪ್ರತಿಭಟನೆ ನಡೆಸಿದ್ದಾರೆ.

ಬೆಳಗ್ಗೆ 11ರ ಸುಮಾರಿಗೆ ಹರಿಹರ ತಾಲೂಕಿಗೆ ಮಹಾರಾಷ್ಟ್ರದಿಂದ 13 ಜನರು ಬಸ್​ನಲ್ಲಿ ಬಂದಿದ್ದರು. ಅವರಿಗೆ ಇಲ್ಲಿನ ಮುರಾರ್ಜಿ ದೇಸಾಯಿ ವಸತಿ ಶಾಲೆಯಲ್ಲಿ 14 ದಿನ ಕ್ವಾರಂಟೈನ್​ ಮಾಡಲು ವ್ಯವಸ್ಥೆಯಾಗಿತ್ತು. ಇದಕ್ಕೆ ವಿರೋಧಿಸಿದ ನಂದಿಗುಡಿ ಮತ್ತು ವಾಸನ ಗ್ರಾಮಸ್ಥರು, ಕರ್ನಾಟಕದಲ್ಲಿ ಕರೊನಾ ಸೋಂಕಿತರ ಸಂಖ್ಯೆ ಹೆಚ್ಚಳಕ್ಕೆ ಕಾರಣ ಮುಂಬೈ ನಂಟು. ಹಾಗಾಗಿ ಅಲ್ಲಿಂದ ಬಂದವರನ್ನು ನಮ್ಮೂರಲ್ಲಿ ಕ್ವಾರಂಟೈನ್​ ಮಾಡಬಾರದು. ಅವರನ್ನು ಬೇರೆಡೆಗೆ ಕರೆದೊಯ್ಯಬೇಕು ಎಂದು ಬಸ್​ ತಡೆದು ನೂರಾರು ಮಂದಿ ಧರಣಿ ಕುಳಿತರು. ಬಸ್​ನಲ್ಲಿದ್ದ ಕಾರ್ಮಿಕರನ್ನು ಕೆಳಗೆ ಇಳಿಯಲೂ ಬಿಡಲಿಲ್ಲ.

ಇದನ್ನೂ ಓದಿರಿ 109 ವರ್ಷದ ಸಾಲುಮರದ ತಿಮ್ಮಕ್ಕ ಆಸ್ಪತ್ರೆಗೆ ದಾಖಲು

ಸ್ಥಳಕ್ಕೆ ಬಂದ ತಹಸೀಲ್ದಾರ್​ ರಾಮಚಂದ್ರ ಮತ್ತು ಸಿಪಿಐ ಶಿವಪ್ರಸಾದ್​, ಈಗ ಕ್ವಾರಂಟೈನ್​ಗೆಂದು ಬಂದಿರುವ 14 ಜನರೂ ಹರಿಹರ ತಾಲೂಕಿನವರೆ. ಉದ್ಯೋಗ ಅರಸಿ ನಿಪ್ಪಾಣಿ ಮತ್ತು ಮಹಾರಾಷ್ಟ್ರಕ್ಕೆ ತೆರಳಿದ್ದರು. ಈಗ ವಾಪಸ್​ ಬಂದಿದ್ದಾರೆ. ಪ್ರತಿಭಟನೆ ಬಿಟ್ಟು ಕ್ವಾರಂಟೈನ್​ಗೆ ಸಹಕರಿಸಿ ಎಂದು ಮನವಿ ಮಾಡಿದರೂ ಗ್ರಾಮಸ್ಥರು ಒಪ್ಪಲಿಲ್ಲ.

ಸಂಜೆ 4ರ ವರೆಗೂ ಗ್ರಾಮಸ್ಥರ ಮನವೊಲಿಸಲು ನಡೆಸಿದ ಯತ್ನ ವಿಫಲವಾಯಿತು. ಕೊನೆಗೆ ಸಿಪಿಐ ಶಿವಪ್ರಸಾದ್​ ನೇತೃತ್ವದ ತಂಡ ಗ್ರಾಮಸ್ಥರನ್ನು ಚದುರಿಸಿ ಪೊಲೀಸ್​ ಬಂದೋಬಸ್ತ್ ಮೂಲಕ 5 ತಾಸುಗಳ ಬಳಿಕ ಕ್ವಾರಂಟೈನ್​ ಕೇಂದ್ರಕ್ಕೆ ಕಾರ್ಮಿಕರನ್ನು ಸೇರಿಸಿತು. ಇದಾದ ಬಳಿಕವೂ ಗ್ರಾಮಸ್ಥರು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದರು.

ಇದನ್ನೂ ಓದಿರಿ 32 ವರ್ಷದವರೂ ಎಸ್​ಐ ಹುದ್ದೆಗೆ ಅರ್ಜಿ ಸಲ್ಲಿಸಬಹುದು, ನೇಮಕಾತಿಗೆ ವಯೋಮಿತಿ ಹೆಚ್ಚಳ