Sunita Williams : ಭೂಮಿಯಿಂದ ಸುಮಾರು 400 ಕಿಲೋಮೀಟರ್ ಎತ್ತರದಲ್ಲಿರುವ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಕೆಲಸದ ನಿಮಿತ್ತ ಹೋಗಿದ್ದ ನಾಸಾ ಗಗನಯಾತ್ರಿಗಳಾದ ಭಾರತೀಯ ಮೂಲದ ಸುನೀತಾ ವಿಲಿಯಮ್ಸ್ ಮತ್ತು ಬುಚ್ ವಿಲ್ಮೋರ್, ಯಾರೂ ನಿರೀಕ್ಷೆ ಮಾಡದಂತೆ ಅಲ್ಲಿಯೇ ಸಿಲುಕಬೇಕಾಯಿತು. ಹೋಗಿದ್ದು ಕೇವಲ ಒಂದು ವಾರದ ಕೆಲಸಕ್ಕಾಗಿ ಆದರೆ, ಒಂದೇ ಒಂದು ಮಿಸ್ಟೇಕ್ ಅವರಿಬ್ಬರನ್ನು 9 ತಿಂಗಳು ಅಲ್ಲಿಯೇ ಸಿಲುಕಿಸಿತು. ಅಷ್ಟಕ್ಕೂ ಏನಾಯ್ತು ಅಂದ್ರೆ ಅವರು ಹೋಗಿದ್ದ ಸ್ಟಾರ್ಲೈನರ್ ಕ್ಯಾಪ್ಸುಲ್ನಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದರಿಂದ ವಾಪಸ್ ಬರಲು ಸಾಧ್ಯವಾಗಲಿಲ್ಲ. ಸಾಕಷ್ಟು ಬಾರಿ ಪ್ರಯತ್ನಿಸಿದ್ರೂ ಒಂದಲ್ಲ ಒಂದು ಸಮಸ್ಯೆ ಎದುರಾಗುತ್ತಲೇ ಇತ್ತು. ಇತ್ತ ಭೂಮಿಗೆ ಬರುವ ಆಸೆ ಅನೇಕ ಬಾರಿ ನಿರಾಸೆಯಾಗಿ, ಗಗನಯಾತ್ರಿಗಳ ನಿರೀಕ್ಷೆ ಹೆಚ್ಚಾಗುತ್ತಲೇ ಇತ್ತು. ಆದರೆ, ಈಗ ಒಳ್ಳೆಯ ಸಮಯ ಬಂದಿದೆ. ಗಗನಯಾತ್ರಿಗಳಿಬ್ಬರು ಭೂಮಿಗೆ ಮರಳುತ್ತಿದ್ದಾರೆ. ಈ ಸಂದರ್ಭದಲ್ಲಿ ಇಡೀ ಘಟನೆಯ ಬಗ್ಗೆ ನಾವೊಂದು ಮೆಲಕು ಹಾಕಿ ಬರೋಣ.
ಹವಾಮಾನ ಅನುಕೂಲಕರವಾಗಿದ್ದರೆ ಮತ್ತು ಎಲ್ಲವೂ ಯೋಜಿಸಿದಂತೆ ನಡೆದರೆ, ಸುನೀತಾ ವಿಲಿಯಮ್ಸ್ (59) ಮತ್ತು ಬುಚ್ ವಿಲ್ಮೋರ್ (62) ಮಂಗಳವಾರ ಸಂಜೆ 5.57 ಕ್ಕೆ (ಭಾರತೀಯ ಕಾಲಮಾನದ ಪ್ರಕಾರ ಬುಧವಾರ ಬೆಳಗಿನ ಜಾವ 3.27) ಅಮೆರಿಕದ ಫ್ಲೋರಿಡಾ ಕರಾವಳಿಯಲ್ಲಿ ಇಳಿಯಲಿದ್ದಾರೆ. ಈ ಸಂಗತಿಯನ್ನು ನಾಸಾ ಭಾನುವಾರ ಘೋಷಿಸಿತು. ಅನುಕೂಲಕರ ಹವಾಮಾನದಿಂದಾಗಿ, ಹಿಂದಿರುಗುವ ಪ್ರಯಾಣವನ್ನು ನಿರೀಕ್ಷೆಗಿಂತ ಒಂದು ದಿನ ಮುಂಚಿತವಾಗಿ ಮಾಡಲಾಗುತ್ತಿದೆ. ಕಳೆದ ವರ್ಷ ಸೆಪ್ಟೆಂಬರ್‌ನಲ್ಲಿ ISSಗೆ ಹೋಗಿದ್ದ ಇತರ ಇಬ್ಬರು ಗಗನಯಾತ್ರಿಗಳಾದ ನಿಕ್ ಹೇಗ್ (ಯುಎಸ್ಎ) ಮತ್ತು ಅಲೆಕ್ಸಾಂಡರ್ ಗುರ್ಬನೋವ್ (ರಷ್ಯಾ) ಸಹ ಸ್ಪೇಸ್‌ಎಕ್ಸ್ ಡ್ರ್ಯಾಗನ್ -10 ಬಾಹ್ಯಾಕಾಶ ನೌಕೆಯಲ್ಲಿ ಸುನೀತಾ ಮತ್ತು ವಿಲ್ಮೋರ್ ಅವರೊಂದಿಗೆ ಹಿಂತಿರುಗುತ್ತಿದ್ದಾರೆ. ಇಡೀ ಜಗತ್ತು ಅವರ ಆಗಮನಕ್ಕಾಗಿ ಕಾತರದಿಂದ ಕಾಯುತ್ತಿದೆ.
ಬೋಯಿಂಗ್‌ನ ಮೊದಲ ಮಾನವಸಹಿತ ಬಾಹ್ಯಾಕಾಶ ಹಾರಾಟದ ಭಾಗವಾಗಿ 2024, ಜೂನ್ 5 ರಂದು ಉಡಾವಣೆಯಾದ ಸ್ಟಾರ್ಲೈನರ್ ಬಾಹ್ಯಾಕಾಶ ನೌಕೆಯಲ್ಲಿ ಸುನೀತಾ ಮತ್ತು ವಿಲ್ಮೋರ್ ISS ಅನ್ನು ತಲುಪಿದರು. ವೇಳಾಪಟ್ಟಿಯ ಪ್ರಕಾರ ಅವರು ಎಂಟು ದಿನಗಳಲ್ಲಿ ಹಿಂತಿರುಗಬೇಕಿತ್ತು. ಆದರೆ, ಸ್ಟಾರ್‌ಲೈನರ್‌ನ ತಾಂತ್ರಿಕ ಸಮಸ್ಯೆಗಳಿಂದಾಗಿ ಅದು ಸಾಧ್ಯವಾಗಲಿಲ್ಲ. ಅದನ್ನು ದುರಸ್ತಿ ಮಾಡುವ ಪ್ರಯತ್ನಗಳು ಸಹ ಸಂಪೂರ್ಣವಾಗಿ ಯಶಸ್ವಿಯಾಗಲಿಲ್ಲ. ಆದ್ದರಿಂದ NASA ಅಪಾಯವನ್ನು ತೆಗೆದುಕೊಳ್ಳದಿರಲು ನಿರ್ಧರಿಸಿತು. ಪರಿಣಾಮವಾಗಿ, ಸೆಪ್ಟೆಂಬರ್ 7 ರಂದು ಸ್ಟಾರ್ಲೈನರ್, ಗಗನಯಾತ್ರಿಗಳನ್ನು ಅಲ್ಲಿಯೇ ಬಿಟ್ಟು ಭೂಮಿಗೆ ಮರಳಿತು.
ಸುನೀತಾ ಮತ್ತು ವಿಲ್ಮೋರ್ ಅವರನ್ನು ಮರಳಿ ಕರೆತರಲು ಒಂದು ಅಥವಾ ಎರಡು ಪ್ರಯತ್ನಗಳು ವಿಫಲವಾದವು. ಸುನೀತಾ 9 ತಿಂಗಳಿನಿಂದ ಐಎಸ್ಎಸ್ ಕಮಾಂಡರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಅಂತಿಮವಾಗಿ, ಅವರನ್ನು ಮತ್ತು ವಿಲ್ಮೋರ್ ಅವರನ್ನು ಮರಳಿ ಕರೆತರಲು ಸ್ಪೇಸ್‌ಎಕ್ಸ್ ನಾಸಾ ಸಹಯೋಗದೊಂದಿಗೆ ಉಡಾಯಿಸಿದ ಡ್ರ್ಯಾಗನ್ -10 ಬಾಹ್ಯಾಕಾಶ ನೌಕೆ, ಭಾನುವಾರ ಐಎಸ್ಎಸ್ಗೆ ಯಶಸ್ವಿಯಾಗಿ ತಲುಪಿತು. ಅದರಲ್ಲಿ ಬಂದ ನಾಲ್ವರು ಗಗನಯಾತ್ರಿಗಳು ಸುನೀತಾ ಅವರ ತಂಡದಿಂದ ಔಪಚಾರಿಕವಾಗಿ ಅಧಿಕಾರ ವಹಿಸಿಕೊಂಡರು. ಸುನೀತಾ ರಷ್ಯಾದ ಅಲೆಕ್ಸಿ ಒಚಿನಿನ್ ಅವರಿಗೆ ಕಮಾಂಡರ್ ಜವಾಬ್ದಾರಿಗಳನ್ನು ಹಸ್ತಾಂತರಿಸಿದರು. ಮುಂದಿನ ಆರು ತಿಂಗಳ ಕಾಲ ಎಲ್ಲಾ ಐಎಸ್ಎಸ್ ಕಾರ್ಯಾಚರಣೆಗಳು ಅವರ ಮೇಲ್ವಿಚಾರಣೆಯಲ್ಲಿ ನಡೆಯಲಿವೆ.
ಅನಿರೀಕ್ಷಿತವಾಗಿ 9 ತಿಂಗಳು ಐಎಸ್ಎಸ್ನಲ್ಲಿ ಕಳೆಯಬೇಕಾಗಿ ಬಂದರೂ, ಸುನೀತಾ ಅವರು ಅದನ್ನು ಬಿಟ್ಟುಕೊಡಲಿಲ್ಲ. ಅಲ್ಲಿದ್ದಷ್ಟು ದಿನ ತಮ್ಮ ಧೈರ್ಯವನ್ನು ಪ್ರದರ್ಶಿಸಿದರು. ಅವರು ಆಗಾಗ ತಮ್ಮ ಸ್ಥಿತಿಯ ಬಗ್ಗೆ ಹಾಸ್ಯ ಮಾಡುತ್ತಿದ್ದರು. ಕಳೆದ ಜನವರಿಯಲ್ಲಿ ಅವರು ನಾಸಾ ಕೇಂದ್ರದೊಂದಿಗೆ ತಮಾಷೆ ಮಾಡಿದರು. ಭೂಮಿಯ ಮೇಲೆ ಹೇಗೆ ನಡೆಯಬೇಕೆಂದು ನೆನಪಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದೇನೆ ಎನ್ನುವ ಮೂಲಕ ನಗೆಚಟಾಕಿ ಹಾರಿಸಿದರು. ಅಂದಹಾಗೆ ಸುನೀತಾ ಅವರು ತನ್ನ ಎಲ್ಲ ದಿನಗಳನ್ನು ಐಎಸ್ಎಸ್ನಲ್ಲಿ ಬಹಳಷ್ಟು ಜವಾಬ್ದಾರಿಗಳೊಂದಿಗೆ ಕಳೆದರು. ಸಣ್ಣಪುಟ್ಟ ಮೋಜಿನ ಕ್ಷಣಗಳನ್ನು ಆನಂದಿಸಿದರು. ಸುನೀತಾ ಮತ್ತು ವಿಲ್ಮೋರ್ ತಮ್ಮ ಸಹೋದ್ಯೋಗಿಗಳೊಂದಿಗೆ ಕ್ರಿಸ್‌ಮಸ್ ಆಚರಿಸಿದರು. ಅವರು ವಿಡಿಯೋ ಕರೆಗಳ ಮೂಲಕ ತಮ್ಮ ಕುಟುಂಬಗಳೊಂದಿಗೆ ಸಂಪರ್ಕದಲ್ಲಿದ್ದರು.
ಸುನೀತಾ ವಿಲಿಯಮ್ಸ್ ಪರಿಚಯ
ಗಗನಯಾತ್ರಿಯಾಗಿ ಯಶಸ್ಸು ಕಂಡ ಸುನೀತಾ ವಿಲಿಯಮ್ಸ್ ಭಾರತೀಯ ಮೂಲದವರು. ಅವರ ಪೂರ್ಣ ಹೆಸರು ಸುನೀತಾ ಲಿನ್ ವಿಲಿಯಮ್ಸ್. ಅವರು 1965 ರಲ್ಲಿ ಅಮೆರಿಕದ ಓಹಿಯೋದಲ್ಲಿ ಜನಿಸಿದರು. ಅವರ ತಂದೆ ದೀಪಕ್ ಪಾಂಡ್ಯ ಗುಜರಾತಿ ಮತ್ತು ತಾಯಿ ಬೋನಿ ಜಲೋಕರ್ ಸ್ಲೊವೇನಿಯನ್ ಮೂಲದವರು. ದಂಪತಿಯ ಮೂವರು ಮಕ್ಕಳಲ್ಲಿ ಸುನೀತಾ ಅವರು ಕಿರಿಯರು. ಅವರು ಯುಎಸ್ ನೇವಲ್ ಅಕಾಡೆಮಿಯಿಂದ ಭೌತಶಾಸ್ತ್ರದಲ್ಲಿ ಪದವಿ ಮತ್ತು ಫ್ಲೋರಿಡಾ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಿಂದ ಇಂಜಿನಿಯರಿಂಗ್ ನಿರ್ವಹಣೆಯಲ್ಲಿ ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ತನ್ನ ತಂದೆಯ ಸಲಹೆಯ ಮೇರೆಗೆ ಸುನೀತಾ ನೌಕಾಪಡೆಯಲ್ಲಿ ಮೂಲ ಡೈವಿಂಗ್ ಅಧಿಕಾರಿಯಾಗಿ ಸೇರಿದರು. ಯುದ್ಧ ಜೆಟ್‌ಗಳನ್ನು ಹಾರಿಸಲು ನೌಕಾ ವಿಮಾನ ಚಾಲಕರಾಗಿ ತರಬೇತಿ ಪಡೆದಿದ್ದಾರೆ. ಯುದ್ಧ ಹೆಲಿಕಾಪ್ಟರ್ ಸ್ಕ್ವಾಡ್ರನ್‌ನಲ್ಲಿ ಸೇವೆ ಸಲ್ಲಿಸಿದ್ದಾರೆ. ಅವರು 30 ವರ್ಷಗಳ ವೃತ್ತಿಜೀವನದಲ್ಲಿ 30ಕ್ಕೂ ಹೆಚ್ಚು ವಿವಿಧ ರೀತಿಯ ವಿಮಾನಗಳಲ್ಲಿ 3,000 ಗಂಟೆಗಳಿಗೂ ಹೆಚ್ಚು ಕಾಲ ಹಾರಾಟ ನಡೆಸಿದ ಪೈಲಟ್ ಆಗಿ ವ್ಯಾಪಕ ಅನುಭವ ಹೊಂದಿದ್ದಾರೆ. ನೌಕಾಪಡೆಯಿಂದ ನಿವೃತ್ತರಾದ ನಂತರ, ಸುನೀತಾ 1998 ಜೂನ್ ತಿಂಗಳಲ್ಲಿ ನಾಸಾ ಗಗನಯಾತ್ರಿಯಾಗಿ ಆಯ್ಕೆಯಾದರು. ಅವರು 2006ರಲ್ಲಿ ತಮ್ಮ ಮೊದಲ ಬಾಹ್ಯಾಕಾಶ ಹಾರಾಟವನ್ನು ಮಾಡಿದರು. ಅವರು ISS ನಲ್ಲಿ ಆರು ತಿಂಗಳಿಗಿಂತ ಹೆಚ್ಚು ಕಾಲ ಕಳೆದರು. ಅದರ ನಿರ್ವಹಣೆ, ದುರಸ್ತಿ ಇತ್ಯಾದಿಗಳಲ್ಲಿ ಅನುಭವವನ್ನು ಪಡೆದರು. ಬಳಿಕ 2012ರಲ್ಲಿ ಎರಡನೇ ಬಾರಿಗೆ ISSಗೆ ಹೋದರು ಮತ್ತು ನಾಲ್ಕು ತಿಂಗಳಿಗಿಂತ ಹೆಚ್ಚು ಕಾಲ ಅಲ್ಲಿಯೇ ಇದ್ದರು.
ಸುನೀತಾ ಅವರ ಪತಿ ಮೈಕೆಲ್ ಜೆ. ವಿಲಿಯಮ್ಸ್, ನಿವೃತ್ತ ಫೆಡರಲ್ ಮಾರ್ಷಲ್. ಅವರಿಗೆ ಮಕ್ಕಳಿಲ್ಲ. ಸಾಕು ನಾಯಿಗಳು ಈ ದಂಪತಿಗಳ ಜೀವಾಳ. ಅವುಗಳನ್ನೇ ತಮ್ಮ ಮಕ್ಕಳೆಂದು ಪರಿಗಣಿಸುತ್ತಾರೆ. ಸುನೀತಾ ಓರ್ವ ಧರ್ಮನಿಷ್ಠ ಹಿಂದೂ. ಅವರು ಭಗವದ್ಗೀತೆಯನ್ನು ನಿಯಮಿತವಾಗಿ ಓದುತ್ತಾರೆ. ಈ ವಿಚಾರವನ್ನು ಸ್ವತಃ ಸುನೀತಾ ಅವರೇ ಹಿಂದೊಮ್ಮೆ ಹೇಳಿಕೊಂಡಿದ್ದಾರೆ.
ಹೆಚ್ಚುವರಿ ಹಣ ಸಿಗುತ್ತಾ?
ಸುನೀತಾ ಮತ್ತು ವಿಲ್ಮೋರ್ 9 ತಿಂಗಳಿಗೂ ಹೆಚ್ಚು ಕಾಲ ISS ನಲ್ಲಿ ಸಿಲುಕಿಕೊಂಡಿದ್ದಾರೆ. ಹೀಗಾಗಿ ಅವರಿಗೆ ಪರಿಹಾರದ ರೂಪದಲ್ಲಿ ಯಾವುದಾದರೂ ಹೆಚ್ಚುವರಿ ಮೊತ್ತ ಸಿಗುತ್ತದೆಯೇ? ಇಲ್ಲ, ಅವರಿಗೆ ಯಾವುದೇ ವಿಶೇಷ ಓವರ್‌ಟೈಮ್ ವೇತನ ಸಿಗುವುದಿಲ್ಲ ಎಂದು ನಾಸಾ ಗಗನಯಾತ್ರಿ ಕ್ಯಾಡಿ ಕೋಲ್ಮನ್ ಹೇಳಿದ್ದಾರೆ. ಬಾಹ್ಯಾಕಾಶ ಕಾರ್ಯಾಚರಣೆಗಳನ್ನು ಅಧಿಕೃತ ಪ್ರವಾಸಗಳಲ್ಲಿ ಇತರ ಸರ್ಕಾರಿ ನೌಕರರಂತೆ ಪರಿಗಣಿಸಲಾಗುತ್ತದೆ. ಈ ಸಂದರ್ಭದಲ್ಲಿ, ನಾವು ದಿನಕ್ಕೆ ಹೆಚ್ಚುವರಿಯಾಗಿ $ 4 (ರೂ. 347) ಮಾತ್ರ ಪಡೆಯುತ್ತೇವೆ ಎಂದು ಕೋಲ್ಮನ್ ಹೇಳಿದ್ದಾರೆ. ಸುನೀತಾ ಮತ್ತು ವಿಲ್ಮೋರ್ ಹೆಚ್ಚುವರಿ $ 1,148 (ಸುಮಾರು 1 ಲಕ್ಷ ರೂಪಾಯಿ) ಪಡೆಯುತ್ತಾರೆ. ಅವರಿಬ್ಬರು ಅಮೆರಿಕ ಸರ್ಕಾರಿ ನೌಕರರಲ್ಲಿ ಅತ್ಯಧಿಕ GS-15 ವೇತನ ಶ್ರೇಣಿಯಲ್ಲಿದ್ದಾರೆ. ಆ ಆಧಾರದ ಮೇಲೆ, ಅವರು ವಾರ್ಷಿಕವಾಗಿ $ 1.25 ಲಕ್ಷದಿಂದ $ 1.62 ಲಕ್ಷ ( ಭಾರತೀಯ ಕರೆನ್ಸಿ ಪ್ರಕಾರ 1 ಕೋಟಿಯಿಂದ 1.41 ಕೋಟಿ ರೂಪಾಯಿ) ಸಂಬಳ ಪಡೆಯುತ್ತಾರೆ.
ಹೇಗಿರಲಿದೆ ಹಿಂದಿರುಗುವ ಪ್ರಯಾಣ?
ಸುನೀತಾ ವಿಲಿಯಮ್ಸ್ ತಮ್ಮ ತಂಡದ ಜೊತೆ ಹಿಂದಿರುಗುವ ಪ್ರಯಾಣದ ಕ್ಷಣಗಣನೆ ಭಾರತೀಯ ಕಾಲಮಾನದ ಪ್ರಕಾರ ಮಂಗಳವಾರವೇ ಆರಂಭವಾಗಲಿದೆ. ಕ್ರೂ ಡ್ರ್ಯಾಗನ್ -10 ಬಾಹ್ಯಾಕಾಶ ನೌಕೆಯ ಹ್ಯಾಚ್ ಮುಚ್ಚುವ ಪ್ರಕ್ರಿಯೆಯು ಮಂಗಳವಾರ ಬೆಳಗ್ಗೆ 8.15 ಕ್ಕೆ ಪ್ರಾರಂಭವಾಗುತ್ತದೆ. ISS ನಿಂದ ಬಾಹ್ಯಾಕಾಶ ನೌಕೆಯ ಬೇರ್ಪಡುವ ಪ್ರಕ್ರಿಯೆಯು ಮಂಗಳವಾರ ಬೆಳಗ್ಗೆ 10.35 ಕ್ಕೆ ಪ್ರಾರಂಭವಾಗುತ್ತದೆ. ಅದರ ನಂತರ, NASA ದ ನೇರ ಪ್ರಸಾರವು ಆಡಿಯೋಗೆ ಸೀಮಿತವಾಗಿರುತ್ತದೆ. ಎಲ್ಲವೂ ಸರಿಯಾಗಿ ನಡೆದರೆ, ಬುಧವಾರ ಬೆಳಗ್ಗೆ 2.15ಕ್ಕೆ ನೇರ ಪ್ರಸಾರವು ಮತ್ತೆ ಪ್ರಾರಂಭವಾಗುತ್ತದೆ. ಬಾಹ್ಯಾಕಾಶ ನೌಕೆ ಬುಧವಾರ ಬೆಳಗ್ಗೆ 2.41 ಕ್ಕೆ ಭೂಮಿಯ ಕಕ್ಷೆಯನ್ನು ಪ್ರವೇಶಿಸುತ್ತದೆ. ಕ್ಯಾಪ್ಸುಲ್ ಬುಧವಾರ ಬೆಳಗ್ಗೆ 3.27 ರ ಸುಮಾರಿಗೆ ಫ್ಲೋರಿಡಾ ಕರಾವಳಿಯ ಬಳಿ ಸಮುದ್ರದ ನೀರಿನಲ್ಲಿ ಇಳಿಯುತ್ತದೆ. ಅದರ ನಂತರ, NASA ಸಿಬ್ಬಂದಿ ಎಲ್ಲ ನಾಲ್ವರು ಗಗನಯಾತ್ರಿಗಳನ್ನು ಒಬ್ಬೊಬ್ಬರಾಗಿ ಹೊರತರುತ್ತಾರೆ. ಇಲ್ಲಿ ಪ್ರಯಾಣದ ಸಮಯವನ್ನು ನಿರ್ಧರಿಸಿದರು ಕೂಡ ಕೊನೆಯ ಕ್ಷಣದವರೆಗೆ ಎಲ್ಲವನ್ನೂ ಸರಿಹೊಂದಿಸಲೇಬೇಕು. ಹವಾಮಾನ ಸೇರಿದಂತೆ ಇತರ ಎಲ್ಲಾ ಪರಿಸ್ಥಿತಿಗಳು ಸುಗಮವಾಗಿದ್ದರೆ ಮಾತ್ರ ಹಿಂದಿರುಗುವ ಪ್ರಯಾಣವು ನಿಗದಿತ ರೀತಿಯಲ್ಲಿ ಮುಂದುವರಿಯುತ್ತದೆ. ಇನ್ನು ಭಾರತೀಯ ಕಾಲಮಾನ ಪ್ರಕಾರ, ಮಂಗಳವಾರ ಬೆಳಗ್ಗೆ 8.30ಕ್ಕೆ ಸುನೀತಾ ವಿಲಿಯಮ್ಸ್ ತಮ್ಮ ತಂಡದೊಂದಿಗೆ ಸ್ಪೇಸ್‌ಎಕ್ಸ್ ಡ್ರ್ಯಾಗನ್ ಕ್ರೂ-10 ಬಾಹ್ಯಾಕಾಶ ನೌಕೆಯಿಂದ ಹಿಂದಿರುಗುವ ಪ್ರಯಾಣವನ್ನು ನಾಸಾ ನೇರ ಪ್ರಸಾರ ಮಾಡಲಿದೆ.
ಸುನೀತಾ ಮತ್ತು ವಿಲ್ಮೋರ್ ಐಎಸ್ಎಸ್ನಲ್ಲಿ ಸತತ 9 ತಿಂಗಳು (287 ದಿನಗಳು) ಕಳೆದಿದ್ದಾರೆ. ಆದರೆ, ಇದು ವಿಶ್ವ ದಾಖಲೆಯಲ್ಲ. ರಷ್ಯಾದ ಗಗನಯಾತ್ರಿ ವ್ಯಾಲೆರಿ ಪಾಲಿಯಕೋವ್ ತಮ್ಮ ದೇಶದ ಮಿರ್ ಬಾಹ್ಯಾಕಾಶ ನಿಲ್ದಾಣದಲ್ಲಿ 437 ದಿನಗಳನ್ನು ಕಳೆದು ದಾಖಲೆ ನಿರ್ಮಿಸಿದ್ದಾರೆ. ಸುನೀತಾ ಅವರು ಮೂರು ಬಾಹ್ಯಾಕಾಶ ಯಾತ್ರೆಗಳಲ್ಲಿ ಒಟ್ಟು 583 ದಿನಗಳನ್ನು ಐಎಸ್ಎಸ್ನಲ್ಲಿ ಕಳೆದರು. ಸುನೀತಾ ತುಂಬಾ ಶಿಸ್ತುಬದ್ಧರು. ಐಎಸ್‌ಎಸ್‌ನಲ್ಲಿದ್ದ ಸಮಯದಲ್ಲಿ ಅವರು ಒಂದೇ ಒಂದು ದಿನ ವ್ಯಾಯಾಮವನ್ನು ತಪ್ಪಿಸಿಕೊಂಡಿಲ್ಲ!
ಇದನ್ನೂ ಓದಿ: ನಾನು ಈವರೆಗೂ ಎದುರಿಸಿದ ಭಯಾನಕ ವೇಗದ ಬೌಲರ್ ಈತನೇ… ಆಡೋದು ತುಂಬಾ ಕಷ್ಟ ಅಂದ್ರು ಕೊಹ್ಲಿ! Virat Kohli
ಘಟನೆಯ ಟೈಮ್‌ಲೈನ್
* 2024 ಜೂನ್ 5: ಸುನೀತಾ ಮತ್ತು ವಿಲ್ಮೋರ್ ಅವರೊಂದಿಗೆ ಬೋಯಿಂಗ್ ಸ್ಟಾರ್ಲೈನರ್ ಬಾಹ್ಯಾಕಾಶ ನೌಕೆ ಐಎಸ್ಎಸ್ಗೆ ಹೊರಟಿತು
* ಜೂನ್ 6: ಸ್ಟಾರ್ಲೈನರ್ ಐಎಸ್ಎಸ್ನೊಂದಿಗೆ ಯಶಸ್ವಿಯಾಗಿ ಡಾಕ್ ಮಾಡಿತು. ಆದರೆ ಈ ಪ್ರಕ್ರಿಯೆಯಲ್ಲಿ, ಸ್ಟಾರ್‌ಲೈನರ್‌ನ ಥ್ರಸ್ಟರ್‌ಗಳು ಕಾರ್ಯನಿರ್ವಹಿಸದಿರುವುದು ಮತ್ತು ಪ್ರೊಪಲ್ಷನ್ ಸಿಸ್ಟಮ್‌ನಲ್ಲಿ ಹೀಲಿಯಂ ಸೋರಿಕೆಯಂತಹ ತಾಂತ್ರಿಕ ಸಮಸ್ಯೆಗಳು ಮುನ್ನೆಲೆಗೆ ಬಂದವು. ಇದರೊಂದಿಗೆ, ಗಗನಯಾತ್ರಿಗಳ ಸುರಕ್ಷಿತ ವಾಪಸಾತಿಯ ಬಗ್ಗೆ ಕಳವಳ ಉಂಟಾಯಿತು.
* ಜೂನ್ 12: ಸ್ಟಾರ್ಲೈನರ್ ಪ್ರಯಾಣಕ್ಕೆ ಸಿದ್ಧವಾಗಿಲ್ಲದ ಕಾರಣ ಸುನೀತಾ ಮತ್ತು ವಿಲ್ಮೋರ್ ಅವರ ವಾಪಸಾತಿ ಪ್ರವಾಸವನ್ನು ಅನಿರ್ದಿಷ್ಟವಾಗಿ ಮುಂದೂಡಲಾಗಿದೆ ಎಂದು ನಾಸಾ ಘೋಷಿಸಿತು.
* ಜುಲೈ–ಆಗಸ್ಟ್: ವಾಪಸಾತಿಯ ಬಗ್ಗೆ ಅನಿಶ್ಚಿತತೆ ಮತ್ತಷ್ಟು ಹೆಚ್ಚಾಯಿತು. ಇದರೊಂದಿಗೆ, ಸುನೀತಾ ಮತ್ತು ವಿಲ್ಮೋರ್ ಐಎಸ್ಎಸ್ ಸಿಬ್ಬಂದಿಯನ್ನು ಸೇರಿಕೊಂಡರು ಮತ್ತು ಅದರ ನಿರ್ವಹಣಾ ಜವಾಬ್ದಾರಿಗಳು, ಸಂಶೋಧನೆ ಇತ್ಯಾದಿಗಳನ್ನು ಸಂಪೂರ್ಣವಾಗಿ ವಹಿಸಿಕೊಂಡರು. ಈ ಪ್ರಕ್ರಿಯೆಯಲ್ಲಿ, ಸುನೀತಾ ಅವರ ಆರೋಗ್ಯ ಸ್ವಲ್ಪ ಹದಗೆಟ್ಟಿತು. ಮೂಳೆ ಸಾಂದ್ರತೆ ಕಡಿಮೆಯಾಗುವಂತಹ ಹಲವಾರು ಸಮಸ್ಯೆಗಳು ಉದ್ಭವಿಸಿದವು.
* ಸೆಪ್ಟೆಂಬರ್: ಸುನೀತಾ ಐಎಸ್ಎಸ್ ಕಮಾಂಡರ್ ಆಗಿ ಅಧಿಕಾರ ವಹಿಸಿಕೊಂಡರು.
* ನವೆಂಬರ್: ಸುನೀತಾ ಐಎಸ್ಎಸ್ನಲ್ಲಿ ತನ್ನ ಸಹೋದ್ಯೋಗಿಗಳೊಂದಿಗೆ ದೀಪಾವಳಿ ಮತ್ತು ಥ್ಯಾಂಕ್ಸ್ಗಿವಿಂಗ್ ಆಚರಿಸುತ್ತಾರೆ.
* ಡಿಸೆಂಬರ್: ಸುನೀತಾ ವಿದ್ಯಾರ್ಥಿಗಳೊಂದಿಗೆ ಚಾಟ್ ಮಾಡುತ್ತಾರೆ ಮತ್ತು ತಮ್ಮ ಅನುಭವಗಳನ್ನು ಹಂಚಿಕೊಳ್ಳುತ್ತಾರೆ. ಬಾಹ್ಯಾಕಾಶದಲ್ಲಿನ ಜೀವನವು ತುಂಬಾ ತಮಾಷೆಯಾಗಿದೆ ಎಂದು ಹೇಳುತ್ತಾರೆ.
* 2025, ಜನವರಿ 30: ಸುನೀತಾ ತಮ್ಮ ಮೊದಲ ಬಾಹ್ಯಾಕಾಶ ನಡಿಗೆಯನ್ನು ಕೈಗೊಂಡರು. ಅದರ ಭಾಗವಾಗಿ, ಅವರು ಐಎಸ್ಎಸ್ನ ಹೊರಗೆ ಪ್ರಮುಖ ದುರಸ್ತಿ ಕಾರ್ಯಗಳಲ್ಲಿ ಭಾಗವಹಿಸಿದರು.
* ಫೆಬ್ರವರಿ: ಸುನೀತಾ ಮತ್ತು ವಿಲ್ಮೋರ್ ಅವರು ಹಿಂದಿರುಗುವ ಪ್ರಯಾಣದ ಬಗ್ಗೆ ಅನಿಶ್ಚಿತತೆ ಹೆಚ್ಚುತ್ತಿರುವಾಗ ಅವರು ಚೆನ್ನಾಗಿದ್ದೇವೆ ಎಂದು ಸಂದೇಶಗಳನ್ನು ಕಳುಹಿಸಿದರು.
* ಮಾರ್ಚ್ 12: ಸ್ಪೇಸ್‌ಎಕ್ಸ್ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆಯಿಂದ ಅವರನ್ನು ಮರಳಿ ತರಲಾಗುತ್ತಿದೆ ಎಂದು ನಾಸಾ ಘೋಷಿಸಿತು.
* ಮಾರ್ಚ್ 16: ಕ್ರೂ ಡ್ರ್ಯಾಗನ್ -10 ಬಾಹ್ಯಾಕಾಶ ನೌಕೆ ISS ನೊಂದಿಗೆ ಯಶಸ್ವಿಯಾಗಿ ಡಾಕ್ ಆಯಿತು.
* ಮಾರ್ಚ್ 17: ಸುನೀತಾ, ವಿಲ್ಮೋರ್ ಮತ್ತು ಇತರ ಇಬ್ಬರು ಗಗನಯಾತ್ರಿಗಳನ್ನು ಹೊಂದಿರುವ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆ ಮಾರ್ಚ್ 18 ರಂದು ಭೂಮಿಗೆ ಮರಳಲಿದೆ ಎಂದು ನಾಸಾ ಘೋಷಿಸಿದೆ.