ಉಪರಾಷ್ಟ್ರಪತಿಯವರು ವಿಪಕ್ಷದ ನಿಲುವಳಿಯನ್ನು ಅಂಗೀಕರಿಸಿದ ನಂತರ, ಪ್ರಧಾನಿ ನರೇಂದ್ರ ಮೋದಿಯವರೊಂದಿಗೆ ಹಿರಿಯ ಸಚಿವರ ಸಭೆ ನಡೆಸಲಾಯಿತು. ನಂತರ ಸಚಿವರು, ಸಂಪುಟದ ಹಿರಿಯ ಸದಸ್ಯರಲ್ಲಿ ಒಬ್ಬರಾದ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರ ಕಚೇರಿಯಲ್ಲಿ ಒಟ್ಟಿಗೆ ಕುಳಿತು, ಆಡಳಿತ ಪಕ್ಷದ ಎಲ್ಲಾ ರಾಜ್ಯಸಭಾ ಸಂಸದರನ್ನು ಅಲ್ಲಿಗೆ ಕರೆಯುವಂತೆ ಬಿಜೆಪಿಯ ಮುಖ್ಯ ಸಚೇತಕರನ್ನು ಕೇಳಿಕೊಂಡರು. ಬಳಿಕ ಹತ್ತು ಜನರ ಗುಂಪುಗಳಾಗಿ ಬಿಜೆಪಿ ಸಂಸದರನ್ನು ಕರೆದು, ಸಿದ್ಧವಾಗಿರಿಸಲಾಗಿದ್ದ ಮಹತ್ವದ ನಿರ್ಣಯಕ್ಕೆ ಸಹಿ ಹಾಕುವಂತೆ ಕೇಳಲಾಯಿತು. ಈ ಗುಂಪುಗಳು ಹೊರಟುಹೋದ ನಂತರ, ಬಿಜೆಪಿ ನೇತೃತ್ವದ ಎನ್ಡಿಎಯ ಇತರ ಸಂಸದರ ಸಹಿಗಳನ್ನು ಸಹ ಕೋರಲಾಯಿತು. ಎಲ್ಲ ಸಂಸದರು ಈ ನಿಲುವಳಿ ಸೂಚನೆಯ ಬಗ್ಗೆ ಮೌನ ವಹಿಸುವಂತೆ ಮತ್ತು ಮುಖ್ಯವಾಗಿ, ಮುಂದಿನ ನಾಲ್ಕು ದಿನಗಳ ಕಾಲ ದೆಹಲಿಯಲ್ಲಿಯೇ ಇರುವಂತೆ ಮತ್ತು ಒಂದು ವೇಳೆ ಅದರ ಮೇಲೆ ಕ್ರಮ ಕೈಗೊಳ್ಳಬೇಕಾದರೆ ಹಾಜರಿರುವಂತೆ ಸೂಚಿಸಲಾಯಿತು. ನಂತರ ಉಪರಾಷ್ಟ್ರಪತಿ ಧನಕರ್ ಅವರಿಗೆ ಈ ಪ್ರಸ್ತಾವನೆಯ ಬಗ್ಗೆ ಮತ್ತು ಸಂಸದರು ಈಗಾಗಲೇ ಅದಕ್ಕೆ ಸಹಿ ಹಾಕಿರುವ ಬಗ್ಗೆ ತಿಳಿಸಲಾಯಿತು. ಇದಾದ ಬಳಿಕ ಹಿರಿಯ ಸಚಿವರು, ಮತ್ತೆ ಸಂಸದರನ್ನು ಗುಂಪುಗಳಾಗಿ ಕರೆದು, ಧನಕರ್ ಅವರು ತಮ್ಮ ಗಡಿಯನ್ನು ದಾಟಿದ್ದಾರೆ ಎಂದು ವಿವರಿಸಿದರು. ಅವರು ಸರ್ಕಾರವನ್ನು ಟೀಕಿಸಿದ ಅಥವಾ ಅವರ ಕಾರಣದಿಂದಾಗಿ ಸರ್ಕಾರ ಮುಜುಗರವನ್ನು ಎದುರಿಸಬೇಕಾದ ಸಂದರ್ಭಗಳ ಬಗ್ಗೆಯೂ ಸಂಸದರಿಗೆ ತಿಳಿಸಲಾಯಿತು. ತಮ್ಮ ವಿರುದ್ಧ ಸರ್ಕಾರ ಹೆಚ್ಚಿನ ಕ್ರಮ ತೆಗೆದುಕೊಳ್ಳಬಹುದೆಂಬುದನ್ನು ಅರಿತು ಧನಕರ್ ಅವರು ದಿಢೀರ್ ರಾಜೀನಾಮೆ ನೀಡಿದ್ದಾರೆ ಎಂದು ಹೇಳಲಾಗಿದೆ.
