ಐಪಿಎಲ್​ ಬಹುಮಾನ ಮೊತ್ತದ ದಾಖಲೆಯನ್ನು ಹಿಂದಿಕ್ಕಿದ ಟಿ20 ವಿಶ್ವಕಪ್​!

ನ್ಯೂಯಾರ್ಕ್​: ವಿಶ್ವದ ಎಲ್ಲ ಟಿ20 ಟೂರ್ನಿಗಳ ಪೈಕಿ ವಿಜೇತ ತಂಡಕ್ಕೆ ಅತ್ಯಧಿಕ ಬಹುಮಾನ ಮೊತ್ತ ನೀಡುವ ಟೂರ್ನಿ ಎಂಬ ಹೆಗ್ಗಳಿಕೆ ಐಪಿಎಲ್​ನದ್ದಾಗಿತ್ತು. ಆದರೆ ಇದೀಗ ಟಿ20 ವಿಶ್ವಕಪ್​ ಆ ಸಾಧನೆಯನ್ನು ಹಿಮ್ಮೆಟ್ಟಿಸಿದೆ. ಇತ್ತೀಚೆಗೆ 17ನೇ ಆವೃತ್ತಿಯ ಐಪಿಎಲ್​ ಟ್ರೋಫಿ ಗೆದ್ದ ಕೆಕೆಆರ್​ ತಂಡ 20 ಕೋಟಿ ರೂ. ಬಹುಮಾನ ಪಡೆದಿತ್ತು. ಇದೀಗ ಟಿ20 ವಿಶ್ವಕಪ್​ ಟೂರ್ನಿಯ ವಿಜೇತರು ಅದಕ್ಕಿಂತ 36 ಲಕ್ಷ ರೂ. ಅಧಿಕ ಪಡೆಯಲಿದ್ದಾರೆ.

ಹಾಲಿ 9ನೇ ಆವೃತ್ತಿಯ ಟಿ20 ವಿಶ್ವಕಪ್​ ಟೂರ್ನಿಯ ವಿಜೇತ ತಂಡ ದಾಖಲೆಯ 20.36 ಕೋಟಿ ರೂ. (2.45 ದಶಲಕ್ಷ ಡಾಲರ್​) ಬಹುಮಾನ ಮೊತ್ತವನ್ನು ಪಡೆಯಲಿದೆ ಎಂದು ಐಸಿಸಿ ಸೋಮವಾರ ಘೋಷಿಸಿದೆ. 93.51 ಕೋಟಿ ರೂ. (11.25 ದಶಲಕ್ಷ ಡಾಲರ್​) ಟೂರ್ನಿಯ ಒಟ್ಟು ಬಹುಮಾನ ಮೊತ್ತವಾಗಿದ್ದು, ರನ್ನರ್​ಅಪ್​ ತಂಡ 10.64 ಕೋಟಿ ರೂ. (1.28 ದಶಲಕ್ಷ ಡಾಲರ್​) ಬಹುಮಾನ ಪಡೆಯಲಿದೆ. ಸೆಮಿೈನಲ್​ನಲ್ಲಿ ಸೋತ ಎರಡು ತಂಡಗಳು 6.54 ಕೋಟಿ ರೂ. (7,87,500 ಡಾಲರ್​) ಬಹುಮಾನ ಪಡೆಯಲಿವೆ.

ಹಿಂದಿನ 2022ರ ಆವೃತ್ತಿಯಲ್ಲಿ ಒಟ್ಟು ಬಹುಮಾನ ಮೊತ್ತ 46.55 ಕೋಟಿ ರೂ. ಆಗಿದ್ದರೆ, ಈ ಬಾರಿ ದುಪ್ಪಟ್ಟು ಏರಿಕೆ ಮಾಡಲಾಗಿದೆ. 2022ರಲ್ಲಿ ವಿಜೇತ ಇಂಗ್ಲೆಂಡ್​ ತಂಡ 13.30 ಕೋಟಿ ರೂ. ಪಡೆದಿತ್ತು.

ಸೂಪರ್​-8 ಹಂತದಲ್ಲಿ ಹೊರಬೀಳುವ 4 ತಂಡಗಳು ತಲಾ 3.17 ಕೋಟಿ ರೂ. ಪಡೆಯಲಿವೆ. 9, 10, 11, 12ನೇ ಸ್ಥಾನಿ ತಂಡಗಳು ತಲಾ 2.05 ಕೋಟಿ ರೂ. ಮತ್ತು ಉಳಿದ 13ರಿಂದ 20ನೇ ಸ್ಥಾನ ಪಡೆವ ತಂಡಗಳು ತಲಾ 1.87 ಕೋಟಿ ರೂ. ಗಳಿಸಲಿವೆ.

ಇದಲ್ಲದೆ ಲೀಗ್​ ಮತ್ತು ಸೂಪರ್-8 ಹಂತದಲ್ಲಿ ಪ್ರತಿ ಪಂದ್ಯದ ವಿಜೇತ ತಂಡ 25.89 ಲಕ್ಷ ರೂ. ಬಹುಮಾನ ಪಡೆಯಲಿವೆ. ಟೂರ್ನಿಯಲ್ಲಿ ಆಡುವ ತಂಡಗಳ ಸಂಖ್ಯೆ 20ಕ್ಕೆ ಏರಿರುವಂತೆಯೇ ಬಹುಮಾನ ಮೊತ್ತವೂ ದಾಖಲೆಯ ಏರಿಕೆ ಕಂಡಿದ್ದು, ಇದುವರೆಗಿನ ಅತ್ಯಧಿಕ ಬಹುಮಾನ ಮೊತ್ತದ ಟಿ20 ವಿಶ್ವಕಪ್​ ಟೂರ್ನಿ ಇದಾಗಿದೆ ಎಂದು ಐಸಿಸಿ ತಿಳಿಸಿದೆ.

https://www.vijayavani.net/former-india-batter-gautam-gambhir-has-said-he-would-love-to-coach-the-national-team-amid-speculation-that-he-is-front-runner-for-the-high-profile-job