ಟಿ20 ವಿಶ್ವಕಪ್​ಗೆ ವರುಣನ ಅವಕೃಪೆ? ಭಾರತ-ಪಾಕ್ ಹೈವೋಲ್ಟೇಜ್ ಪಂದ್ಯಕ್ಕೂ ಮಳೆ ಭೀತಿ

ಬ್ರಿಸ್ಬೇನ್/ಮೆಲ್ಬೋರ್ನ್: ಬಹುನಿರೀಕ್ಷಿತ ಟಿ20 ವಿಶ್ವಕಪ್ 8ನೇ ಆವೃತ್ತಿಯ ಅಸಲಿ ಹೋರಾಟ ಸೂಪರ್-12 ಹಂತದಿಂದ ಶುರುವಾಗಲಿದೆ. ಆದರೆ ಪ್ರಧಾನ ಸುತ್ತಿನ ಪ್ರಮುಖ ಪಂದ್ಯಗಳಿಗೆ ಮಳೆ ಅಡಚಣೆ ತರುವ ಸಾಧ್ಯತೆ ಇದ್ದು, ಟೂರ್ನಿಯ ಅಸಲಿ ಮಜಾವನ್ನು ಇದು ಕಸಿಯುವ ಭೀತಿ ಎದುರಾಗಿದೆ. ಆತಿಥೇಯ ಹಾಗೂ ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ ಮತ್ತು ಹಾಲಿ ರನ್ನರ್​ಅಪ್ ನ್ಯೂಜಿಲೆಂಡ್ ತಂಡಗಳ ನಡುವೆ ಶನಿವಾರ ಸಿಡ್ನಿಯಲ್ಲಿ ನಡೆಯಲಿರುವ ಸೂಪರ್-12 ಹಂತದ ಮೊದಲ ಮುಖಾಮುಖಿ ಮತ್ತು ಭಾನುವಾರ ಮೆಲ್ಬೋರ್ನ್​ನಲ್ಲಿ ನಡೆಯಲಿರುವ ಭಾರತ-ಪಾಕಿಸ್ತಾನ ನಡುವಿನ ಹೈವೋಲ್ಟೇಜ್ ಪಂದ್ಯಗಳಿಗೂ ಮಳೆ ಅಡಚಣೆ ತರುವ ಭೀತಿ ಇದೆ. ಪೂರ್ವ ಮತ್ತು ಆಗ್ನೇಯ ಆಸ್ಟ್ರೇಲಿಯಾದ ಭಾಗದಲ್ಲಿ ಮಳೆಗಾಲ ಇನ್ನೂ ಮುಗಿದಿಲ್ಲ. ಹೀಗಾಗಿ ಸೂಪರ್-12 ಹಂತದ ಕೆಲ ಆರಂಭಿಕ ಪಂದ್ಯಗಳು ಮಳೆಯಿಂದ ತೊಂದರೆ ಎದುರಿಸಬೇಕಾಗುತ್ತದೆ.

ಸಿಡ್ನಿ ಹವಾಮಾನ ಇಲಾಖೆಯ ಮುನ್ಸೂಚನೆಯ ಪ್ರಕಾರ, ಕಳೆದ ಆವೃತ್ತಿಯ ಫೈನಲ್ ಪಂದ್ಯದ ಪುನರಾವರ್ತನೆ ಆಗಿರುವ ಆಸ್ಟ್ರೇಲಿಯಾ-ನ್ಯೂಜಿಲೆಂಡ್ ನಡುವಿನ ಪಂದ್ಯಕ್ಕೆ ಮಳೆ ಅಡಚಣೆ ತರುವ ಸಾಧ್ಯತೆ ಶೇ. 80ರಷ್ಟಿದೆ. ಪಂದ್ಯ ಸ್ಥಳೀಯ ಕಾಲಮಾನ ಪ್ರಕಾರ ಸಂಜೆ 6 ಗಂಟೆಗೆ ಶುರುವಾಗಲಿದ್ದು, ಅದೇ ದಿನ ಮಧ್ಯಾಹ್ನದ ನಂತರ ಮತ್ತು ಸಂಜೆ ಮಳೆ ಸುರಿಯುವ ಸಾಧ್ಯತೆ ಹೆಚ್ಚಿದೆ.

ಭಾರತ-ಪಾಕಿಸ್ತಾನ ಪಂದ್ಯಕ್ಕೆ ಶೇ. 90 ಮಳೆ ಅಡ್ಡಿ ಸಾಧ್ಯತೆ

ಭಾರತ-ಪಾಕಿಸ್ತಾನ ತಂಡಗಳ ನಡುವೆ ಭಾನುವಾರ ಸ್ಥಳೀಯ ಕಾಲಮಾನ ಪ್ರಕಾರ ಸಂಜೆ 7 ಗಂಟೆಗೆ (ಭಾರತೀಯ ಕಾಲಮಾನ ಮಧ್ಯಾಹ್ನ 1.30) ಪಂದ್ಯ ಶುರುವಾಗಲಿದ್ದು, ಆ ದಿನ ಮೆಲ್ಬೋರ್ನ್​ನಲ್ಲಿ ಮಳೆ ಸುರಿಯುವ ಸಾಧ್ಯತೆ ಶೇ. 90ರಷ್ಟಿದೆ. ಐಸಿಸಿ ನಿಯಮಾವಳಿ ಪ್ರಕಾರ, ಫಲಿತಾಂಶಕ್ಕೆ ಕನಿಷ್ಠ 5 ಓವರ್​ಗಳ ಪಂದ್ಯ ಅಗತ್ಯವಿದೆ ಮತ್ತು ಲೀಗ್ ಹಂತದ ಪಂದ್ಯಗಳಿಗೆ ಮೀಸಲು ದಿನವೂ ಇರುವುದಿಲ್ಲ. ಹೀಗಾಗಿ ಮಳೆಯಿಂದ ಪಂದ್ಯ ರದ್ದಾದರೆ ಉಭಯ ತಂಡಗಳು ತಲಾ 1 ಅಂಕ ಹಂಚಿಕೊಳ್ಳಬೇಕಾಗುತ್ತದೆ.

ಹೋಬರ್ಟ್​ನಲ್ಲೂ ಮಳೆಯ ಭಯ

ವಿಶ್ವಕಪ್ ಮೊದಲ ಸುತ್ತಿನ ಬಿ ಗುಂಪಿನ ಪಂದ್ಯಗಳು ಹೋಬರ್ಟ್​ನಲ್ಲಿ ನಡೆಯುತ್ತಿದ್ದು, ಎಲ್ಲ ಪಂದ್ಯಗಳು ತಲಾ 1ರಲ್ಲಿ ಗೆದ್ದಿರುವ ಈ ಗುಂಪಿನಲ್ಲಿ ಶುಕ್ರವಾರದ ಕೊನೇ ಲೀಗ್ ಪಂದ್ಯಗಳು ನಿರ್ಣಾಯಕವಾಗಿವೆ. ಆದರೆ ಶುಕ್ರವಾರ ಹೋಬರ್ಟ್​ನಲ್ಲಿ ಮಳೆ ಸುರಿಯುವ ಸಾಧ್ಯತೆ ಶೇ. 60ರಷ್ಟಿದೆ. ನಂತರದಲ್ಲಿ ಶನಿವಾರ-ಭಾನುವಾರ ಟೂರ್ನಿಯ ಸೂಪರ್-12 ಹಂತದ 3 ಪಂದ್ಯಗಳೂ ಹೋಬರ್ಟ್​ನಲ್ಲಿ ನಡೆಯಲಿದ್ದು, ಅದಕ್ಕೂ ಮಳೆ ಭೀತಿ ಇದೆ.

ಭಾರತ-ನ್ಯೂಜಿಲೆಂಡ್ ಅಭ್ಯಾಸ ಪಂದ್ಯ ರದ್ದು

ಬ್ರಿಸ್ಬೇನ್​ನ ಬುಧವಾರ ನಿಗದಿಯಾಗಿದ್ದ ಭಾರತ-ನ್ಯೂಜಿಲೆಂಡ್ ನಡುವಿನ ಅಭ್ಯಾಸ ಪಂದ್ಯ ಮಳೆಯಿಂದಾಗಿ ಒಂದೂ ಎಸೆತವನ್ನು ಕಾಣದೆ ರದ್ದುಗೊಂಡಿತು. ಪಾಕಿಸ್ತಾನ-ಅಫ್ಘಾನಿಸ್ತಾನ ನಡುವೆ ಗಾಬಾ ಕ್ರೀಡಾಂಗಣದಲ್ಲಿ ನಡೆದ ದಿನದ ಮೊದಲ ಪಂದ್ಯದ ನಡುವೆ ಮಳೆ ಶುರುವಾಯಿತು. ಮೊದಲು ಬ್ಯಾಟಿಂಗ್ ಮಾಡಿದ ಆಫ್ಘನ್ 6 ವಿಕೆಟ್​ಗೆ 154 ರನ್ ಗಳಿಸಿದರೆ, ಪ್ರತಿಯಾಗಿ ಪಾಕ್ 2.2 ಓವರ್​ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 19 ರನ್ ಗಳಿಸಿದ್ದಾಗ ಮಳೆ ಕಾಡಿತು. ನಂತರ ಪಂದ್ಯ ಮುಂದುವರಿಯದೆ ರದ್ದುಗೊಂಡಿತು. ನಂತರ ಬಾಂಗ್ಲಾದೇಶ-ದಕ್ಷಿಣ ಆಫ್ರಿಕಾ ನಡುವಿನ ದಿನದ 2ನೇ ಪಂದ್ಯವೂ ಒಂದೂ ಎಸೆತ ಕಾಣದೆ ರದ್ದುಗೊಂಡಿತು. ಇದರಿಂದಾಗಿ ಭಾರತ-ಕಿವೀಸ್ ತಂಡಗಳು ದಿನದ 3ನೇ ಪಂದ್ಯಕ್ಕಾಗಿ ಕನಿಷ್ಠ ಕ್ರೀಡಾಂಗಣಕ್ಕೂ ತೆರಳಲಿಲ್ಲ. ವಿಶ್ವಕಪ್​ನಲ್ಲಿ ಸೂಪರ್-12 ಹಂತದ ಆರಂಭಕ್ಕೆ ಮುನ್ನ ಭಾರತಕ್ಕೆ ಇದು ಕೊನೇ ಅಭ್ಯಾಸ ಪಂದ್ಯವಾಗಿತ್ತು. ಇನ್ನೀಗ ನೇರವಾಗಿ ವಿಶ್ವಕಪ್ ಅಭಿಯಾನ ಆರಂಭಿಸಬೇಕಾಗಿದೆ.

6 ಪಂದ್ಯ ಕ್ಯಾನ್ಸಲ್! ಟೂರ್ನಿಯ ಮೊದಲ ಸುತ್ತು ಮತ್ತು ಸೂಪರ್-12ಕ್ಕೆ ಮುನ್ನ 15 ಅಭ್ಯಾಸ ಪಂದ್ಯಗಳು ನಿಗದಿಯಾಗಿದ್ದವು. ಈ ಪೈಕಿ 7 ಪಂದ್ಯಗಳು ರದ್ದುಗೊಂಡಿವೆ. ಅದರಲ್ಲೂ ಅ. 12-13ರಂದು ಮೆಲ್ಬೋರ್ನ್​ನಲ್ಲಿ 4 ಪಂದ್ಯಗಳು ಒಂದೂ ಎಸೆತ ಕಾಣದೆ ರದ್ದುಗೊಂಡಿದ್ದವು.

https://www.vijayavani.net/r-man-turns-cooler-on-woman-loses-cool-then-this-happens/

https://www.vijayavani.net/r-neuroparasite-shocks-internet-turns-dead-bug-into-zombie-after-taking-control-of-brain/

https://www.vijayavani.net/r-ramanagara-dk-shivakumar-kanakapur-jesus-photos-ration-card/