ಅಫ್ಘಾನಿಸ್ತಾನ ವಿರುದ್ಧ ಭರ್ಜರಿ ಗೆಲುವು: ಟಿ20 ವಿಶ್ವಕಪ್​ನಲ್ಲಿ ಮೊದಲ ಬಾರಿ ಫೈನಲ್​ಗೆ​​ ಲಗ್ಗೆಯಿಟ್ಟ ಹರಿಣ ಪಡೆ

ಟ್ರಿನಿಡಾಡ್​: ವೆಸ್ಟ್​ಇಂಡೀಸ್​ನಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್​ ಟೂರ್ನಿಯ ಸೆಮಿಫೈನಲ್​-1ರಲ್ಲಿ ದಕ್ಷಿಣ ಆಫ್ರಿಕಾ ತಂಡದ ಬೌಲಿಂಗ್​ ದಾಳಿಗೆ ತತ್ತರಿಸಿದ ಅಫ್ಘಾನಿಸ್ತಾನ ಹೀನಾಯವಾಗಿ ಸೋತು ಮೆಗಾ ಟೂರ್ನಮೆಂಟ್​ನಿಂದ ಹೊರಬಿದ್ದಿತು. ನಿರ್ಣಾಯಕ ಪಂದ್ಯದಲ್ಲಿ ಭರ್ಜರಿ ಜಯ ದಾಖಲಿಸಿದ ಹರಿಣ ಪಡೆ ಮೊದಲ ಬಾರಿಗೆ ಟಿ20 ವಿಶ್ವಕಪ್​ನಲ್ಲಿ ಫೈನಲ್​ಗೆ ಲಗ್ಗೆ ಇಟ್ಟಿದೆ.

ವೆಸ್ಟ್​ಇಂಡೀಸ್​ ಟ್ರಿನಿಡಾಡ್​ನ ತರೌಬಾದಲ್ಲಿರುವ ಬ್ರಿಯಾನ್​ ಲಾರಾ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ನಡೆದ ಸೆಮಿಫೈನಲ್​-1 ಪಂದ್ಯದಲ್ಲಿ ಟಾಸ್​ ಗೆದ್ದು ಮೊದಲು ಬ್ಯಾಟಿಂಗ್​ ಮಾಡಿದ  ಅಫ್ಘಾನಿಸ್ತಾನ ಕೇವಲ 11.5 ಓವರ್​ಗಳಲ್ಲಿ ತನ್ನೆಲ್ಲಾ ವಿಕೆಟ್​ ಕೆಳೆದುಕೊಂಡು 56 ರನ್​ಗಳ ಅಲ್ಪ ಮೊತ್ತವನ್ನು ಕಲೆಹಾಕಿತು. ಆಫ್ಘಾನ್​ ಪರ ಅಜ್ಮತುಲ್ಲಾ ಒಮರ್ಜಾಯ್ (10) ಎರಡಂಕಿ ರನ್​ ಗಳಿಸಿದ್ದನ್ನು ಬಿಟ್ಟರೆ ಯಾವೊಬ್ಬ ಬ್ಯಾಟ್ಸ್​ಮನ್​ ಕೂಡ ಎರಡಂಕಿಯನ್ನು ದಾಟಲಿಲ್ಲ. ಇಡೀ ಬ್ಯಾಟಿಂಗ್​ ವಿಭಾಗವೇ ವೈಫಲ್ಯ ಅನುಭವಿಸಿತು.

ದಕ್ಷಿಣ ಆಫ್ರಿಕಾ ವಿರುದ್ಧ ಬಿರುಸಿನ ಬೌಲಿಂಗ್​ ದಾಳಿ ಮಾಡಿದ ಮ್ಯಾಕ್ರೋ ಜನಸೇನ್​ ಮತ್ತು ಶಮ್ಸಿ ತಲಾ ಮೂರು ವಿಕೆಟ್​ಗಳನ್ನು ಪಡೆದು ಮಿಂಚಿದರು. ಉಳಿದಂತೆ ರಬಾಡ ಮತ್ತು ನೋರ್ಟ್ಜೆ ತಲಾ ಎರಡು ವಿಕೆಟ್​ ಪಡೆದರು. ಹರಿಣ ಪಡೆಯ ಸಮರ್ಥ ಬೌಲಿಂಗ್​ ದಾಳಿಗೆ ಅಫ್ಘಾನ್​ ಬ್ಯಾಟ್ಸ್​ಮನ್​ಗಳು ತರೆಗೆಲೆಗಳಂತೆ ಉದುರಿದರು.

ಆಫ್ಘಾನ್​ ನೀಡಿದ 57 ರನ್​ಗಳ ಅಲ್ಪ ಗುರಿಯನ್ನು ಬೆನ್ನತ್ತಿದ ದಕ್ಷಿಣ ಆಫ್ರಿಕಾ ಕೇವಲ 8.5 ಓವರ್​ಗಳಲ್ಲಿ ಕೇವಲ 1 ವಿಕೆಟ್​ ನಷ್ಟಕ್ಕೆ ಗುರಿ ಮುಟ್ಟಿತು. ಆಫ್ರಿಕಾ ಪರ ರೀಜಾ ಹೆಂಡ್ರಿಕ್ಸ್​ 29​ ಮತ್ತು ನಾಯಕ ಐಡೆನ್ ಮಕ್ರಾಮ್​ 23 ರನ್​ ಗಳಿಸಿ ಅಜೇಯರಾಗಿ ಉಳಿದರು.

ಅಫ್ಘಾನ್​ ಪರ ಫಜಲ್ಹಕ್ ಫಾರೂಕಿ ಒಂದು ವಿಕೆಟ್​ ಪಡೆದರು. ಉಳಿದಂತೆ ಯಾವೊಬ್ಬ ಬೌಲರ್​ ಕೂಡ ಹರಿಣ ಪಡೆಗೆ ಸವಾಲಾಗಲಿಲ್ಲ. ಅಂತಿಮವಾಗಿ ಅಫ್ಘಾನ್​ ಪಡೆ ಆಫ್ರಿಕಾ ತಂಡಕ್ಕೆ ಸುಲಭ ತುತ್ತಾಯಿತು.​ (ಏಜೆನ್ಸೀಸ್​)

https://www.vijayavani.net/sonakshis-husband-gifted-an-expensive-car-are-they-all-crores

https://www.vijayavani.net/not-rohit-englands-fear-is-about-that-one-butler-comments