ಇಂಗ್ಲೆಂಡ್​ ತಂಡಕ್ಕೆ ರೋಹಿತ್​ಗಿಂತ ಈ ಆಟಗಾರನನ್ನು ಕಂಡರೆ ಭಯವಂತೆ: ನಾಯಕ ಬಟ್ಲರ್​ ಹೇಳಿಕೆ ವೈರಲ್​

ನವದೆಹಲಿ: ಟೀಮ್​ ಇಂಡಿಯಾ ಸದ್ಯ ನಿಜವಾದ ಸವಾಲಿಗೆ ತಯಾರಿ ನಡೆಸುತ್ತಿದೆ. ಟಿ20 ವಿಶ್ವಕಪ್​ನಲ್ಲಿ ಸೆಮಿಫೈನಲ್‌ ತಲುಪಿದೆ. ನಿರ್ಣಾಯಕ ಪಂದ್ಯದಲ್ಲಿ ಆಸ್ಟ್ರೇಲಿಯಾವನ್ನು ಸೋಲಿಸಿ ನಾಕೌಟ್ ಹೋರಾಟಕ್ಕೆ ಅರ್ಹತೆ ಪಡೆದಿದೆ. ಇದೀಗ ಇಂಗ್ಲೆಂಡ್ ತಂಡವನ್ನು ಎದುರಿಸಲು ರೋಹಿತ್​ ಪಡೆ ಸಿದ್ಧತೆ ನಡೆಸಿದೆ. ಜಾಸ್​ ಬಟ್ಲರ್ ಪಡೆಯನ್ನು ಸೋಲಿಸಿದರೆ ಫೈನಲ್​ಗೆ ಲಗ್ಗೆ ಇಡಲಿದೆ. ಅದಕ್ಕಾಗಿಯೇ ಟೀಮ್​ ಇಂಡಿಯಾ ಭರ್ಜರಿ ತಯಾರಿ ಮಾಡಿಕೊಳ್ಳುತ್ತಿದೆ.

ಭಾರತದ ನಾಯಕ ರೋಹಿತ್ ಶರ್ಮ ಸೆಮಿಸ್‌ಗೂ ಮುನ್ನ ತಮ್ಮ ಬತ್ತಳಿಕೆಯಲ್ಲಿರುವ ಎಲ್ಲ ಅಸ್ತ್ರಗಳನ್ನು ಹೊರತೆಗೆಯುತ್ತಿದ್ದಾರೆ. ಸದ್ಯ ಅವರು ಬಿರುಸಿನ ಫಾರ್ಮ್‌ನಲ್ಲಿದ್ದಾರೆ. ಸೂಪರ್ ಬ್ಯಾಟಲ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ವಿಧ್ವಂಸಕ ಆಟವಾಡಿದರು. ಅದೇ ಆಟವನ್ನು ಸೆಮಿಸ್‌ನಲ್ಲೂ ಮುಂದುವರಿಸುವ ತವಕದಲ್ಲಿದ್ದಾರೆ. ಆದರೆ, ಹಿಟ್‌ಮ್ಯಾನ್‌ಗೆ ಅಷ್ಟು ಹೆದರುವುದಿಲ್ಲ ಎಂದು ಆಂಗ್ಲರ ತಂಡ ಹೇಳುತ್ತದೆ.

ಭಾರತ ತಂಡದಲ್ಲಿ ರೋಹಿತ್‌ಗಿಂತಲೂ ಅಪಾಯಕಾರಿ ಬ್ಯಾಟ್ಸ್‌ಮನ್ ಒಬ್ಬರಿದ್ದಾರೆ ಎಂದು ಇಂಗ್ಲೆಂಡ್ ಆಟಗಾರರು ಹೇಳಿದ್ದಾರೆ. ಆತ ಕ್ರೀಸ್​ಗೆ ಬಂದರೆ ಆಟದ ದಿಕ್ಕನ್ನೇ ಬದಲಾಯಿಸುತ್ತಾನೆ ಎಂಬ ಒತ್ತಡದಲ್ಲಿದ್ದಾರೆ. ಆಂಗ್ಲ ಆಟಗಾರರನ್ನು ಇಷ್ಟು ಹೆದರಿಸಿರುವ ಬ್ಯಾಟ್ಸ್‌ಮನ್ ಬೇರೆ ಯಾರೂ ಅಲ್ಲ, ವಿರಾಟ್ ಕೊಹ್ಲಿ.

ಐಸಿಸಿ ಟೂರ್ನಿಗಳಲ್ಲಿ ರನ್​ಗಳ ಮಹಾಪೂರವನ್ನೇ ಹರಿಸುವ ಕಿಂಗ್ ಕೊಹ್ಲಿ ಇದೀಗ ಕಳಪೆ ಫಾರ್ಮ್​ನಿಂದ ಬಳಲುತ್ತಿದ್ದಾರೆ. ಅತ್ಯಧಿಕ ರನ್ ಗಳಿಸಿದವರ ಪಟ್ಟಿಯಲ್ಲಿ ಯಾವಾಗಲೂ ಅಗ್ರಸ್ಥಾನದಲ್ಲಿರುತ್ತಿದ್ದ ಈ ಅಗ್ರ ಬ್ಯಾಟರ್, ಈಗ ಎಲ್ಲೋ ತಳದಲ್ಲಿದ್ದಾರೆ. ಆದರೂ, ಇಂಗ್ಲೆಂಡ್ ಆಟಗಾರರು ಕೊಹ್ಲಿಗೆ ಹೆದರುತ್ತಿದ್ದಾರೆ. ವಿರಾಟ್ ಅವರ ಆಟದ ಶೈಲಿಯನ್ನು ಹಲವು ವರ್ಷಗಳಿಂದ ಗಮನಿಸುತ್ತಿದ್ದೇನೆ, ಅವರಂತಹ ಸ್ಪರ್ಧಿ ಮತ್ತೊಬ್ಬರಿಲ್ಲ ಎಂದು ಜಾಸ್​ ಬಟ್ಲರ್ ಹೇಳಿದ್ದಾರೆ.

ಕೊಹ್ಲಿ ಯಾವಾಗಲೂ ಅತ್ಯುತ್ತಮವಾದುದನ್ನು ನೀಡುವ ಬಯಕೆಯೊಂದಿಗೆ ಆಡುತ್ತಾರೆ ಮತ್ತು ಆಟದ ಬಗ್ಗೆ ಅವರ ಬದ್ಧತೆ ಅದ್ಭುತವಾಗಿದೆ ಎಂದು ಬಟ್ಲರ್ ಶ್ಲಾಘಿಸಿದರು. ಅವರು ಅಪಾಯಕಾರಿ ಬ್ಯಾಟರ್ ಎಂದು ಹೇಳಿದರು. ವಿರಾಟ್ ಅವರನ್ನು ಕಡಿಮೆ ಅಂದಾಜು ಮಾಡಬಾರದು ಎಂದು ಇಂಗ್ಲೆಂಡ್ ವೇಗಿ ಜೋಫ್ರಾ ಆರ್ಚರ್ ಹೇಳಿದ್ದಾರೆ. ಕೊಹ್ಲಿ ತುಂಬಾ ಒಳ್ಳೆಯ ವ್ಯಕ್ತಿ ಎಂದು ಜಾಕ್ಸ್ ಹೇಳಿದ್ದಾರೆ. ಸೋಲನ್ನು ಒಪ್ಪಿಕೊಳ್ಳದೆ ಕಣಕ್ಕೆ ಇಳಿದಾಗ ಶೇ.150 ರಷ್ಟು ಶ್ರಮ ಹಾಕುವುದು ವಿರಾಟ್ ಕೊಹ್ಲಿ ಫಿಲಾಸಫಿ ಎಂದು ಜಾಕ್ಸ್ ಪ್ರತಿಕ್ರಿಯಿಸಿದ್ದಾರೆ.

ಸೆಮಿಸ್‌ನಲ್ಲಿ ಕೊಹ್ಲಿ ಫಾರ್ಮ್‌ಗೆ ಬಂದರೆ ಅದು ತಂಡಕ್ಕೆ ಆಘಾತವಾಗಲಿದೆ. ಭಾರತೀಯ ಅಭಿಮಾನಿಗಳು ಬಯಸುವುದು ಇದನ್ನೇ. ಕೊಹ್ಲಿ ಸೆಮಿಸ್‌ನಲ್ಲಿ ಮಿಂಚುತ್ತಾರೆ ಎಂದು ನೀವು ಭಾವಿಸಿದರೆ ಕಾಮೆಂಟ್ ಮಾಡಿ. (ಏಜೆನ್ಸೀಸ್​)

https://www.vijayavani.net/shoaib-akhtar-predicts-the-winner-of-t20-world-cup-2024

https://www.vijayavani.net/serious-work-was-done-on-ball-inzamam-ul-haq-accuses-arshdeep-singh-of-ball-tampering-during-aus-vs-ind-t20-wc-2024-super-8-match-video