ಮುಂಬೈ ಮೂಲದ ಸುನೀಲ್ ಗಾವಸ್ಕರ್, 1970, 80ರ ದಶಕದಲ್ಲಿ ಭಾರತೀಯ ಕ್ರಿಕೆಟ್ನ ಅವಿಭಾಜ್ಯ ಅಂಗವಾಗಿದ್ದರು. ಲಿಟಲ್ ಮಾಸ್ಟರ್ ಖ್ಯಾತಿಯ ಸುನೀಲ್ ಗಾವಸ್ಕರ್ ಇಂದಿನ ಯುವಪೀಳಿಗೆಗೂ ಮಾದರಿಯಾಗಿದ್ದಾರೆ. 125 ಟೆಸ್ಟ್ ಪಂದ್ಯಗಳಿಂದ 34 ಶತಕ, 45 ಅರ್ಧಶತಕ ಒಳಗೊಂಡಂತೆ 10122 ರನ್ಗಳಿಸಿದ್ದಾರೆ. ಅವರ ಸಾಧನೆ ಕುರಿತು ಮೆಲುಕು ಹಾಕಿರುವ ಇಂಜಮಾಮ್, ಟೆಸ್ಟ್ ಕ್ರಿಕೆಟ್ನಲ್ಲಿ 10 ಸಾವಿರ ರನ್ ಗಳಿಸುವುದು ಸಲುಭವಲ್ಲ. ಸುನೀಲ್ ಗಾವಸ್ಕರ್ ಗಳಿಸಿರುವ 10 ಸಾವಿರ ರನ್ ಇಂದಿನ ಕ್ರಿಕೆಟ್ಗೆ 15-16 ಸಾವಿರ ರನ್ಗಳಿಗೆ ಸಮ ಎಂದು ಯೂಟ್ಯೂಬ್ ಚಾನೆಲ್ವೊಂದರಲ್ಲಿ ಹೇಳಿಕೊಂಡಿದ್ದಾರೆ. ಇಂದು ಒಬ್ಬ ಬ್ಯಾಟ್ಸ್ಮನ್ ಉತ್ತಮ ಫಾರ್ಮ್ನಲ್ಲಿದ್ದರೆ ಒಂದು ಅವಧಿಗೆ 1000 ರಿಂದ 1500 ರನ್ ಪೇರಿಸಬಹುದು. ಆದರೆ, ಸುನೀಲ್ ಗಾವಸ್ಕರ್ ಆಡುವ ವೇಳೆ ಇಂಥ ಪರಿಸ್ಥಿತಿ ಇರಲಿಲ್ಲ. ಇಂದು ಸಂಪೂರ್ಣ ಬ್ಯಾಟಿಂಗ್ ಪಿಚ್ ತಯಾರಿಸಲಾಗುತ್ತದೆ. ಇದಕ್ಕೆ ಐಸಿಸಿ ಕೂಡ ಪ್ರೋತ್ಸಾಹ ನೀಡುತ್ತದೆ ಎಂದು ಹೇಳಿದ್ದಾರೆ.
