ಪೀಠಕ್ಕೆ ಲಕ್ಷ್ಮಣರಾವ್ ವಿವರಣೆ: ಕಿಕ್ಕೇರಿ ಕೃಷ್ಣಮೂರ್ತಿ ಪರವಾಗಿ ಹಾಜರಾಗಿದ್ದ ಹಿರಿಯ ಕವಿ ಬಿ.ಆರ್.ಲಕ್ಷ್ಮಣ ರಾವ್, ಅಶ್ವತ್ಥ್ ಧಾಟಿಯು ವೃಂದಗಾನಕ್ಕೆ ಹೇಳಿ ಮಾಡಿಸಿದಂತಿದ್ದು, ಅವರ ಧಾಟಿಯನ್ನೇ ಮುಂದುವರಿಸುವುದು ಸೂಕ್ತ ಎಂಬ ಅಭಿಪ್ರಾಯಪಟ್ಟರು. ಸುಗುಮ ಸಂಗೀತ ಹಾಡುಗಾರ ವೈ.ಕೆ.ಮುದ್ದುಕೃಷ್ಣ, ಅಶ್ವತ್ಥ್ 1993ರಲ್ಲೇ ಜಯ ಭಾರತ ಜನನಿಯ ತನುಜಾತೆಯ ಹಾಡಿನ ಎಲ್ಲ ಚರಣಗಳಿಗೆ ರಾಗ ಸಂಯೋಜಿಸಿದ್ದಾರೆ. ಮೈಸೂರು ಅನಂತಸ್ವಾಮಿ 3 ಚರಣಗಳಿಗೆ ಮಾತ್ರ ರಾಗ ಸಂಯೋಜಿಸಿದ್ದಾರೆ. ಹೀಗಾಗಿ ಅಶ್ವತ್ಥ್ ರಾಗದಲ್ಲೇ ಹಾಡುವುದು ಸೂಕ್ತ ಎಂದರು. ಮೃತ್ಯುಂಜಯ ದೊಡ್ಡವಾಡ ಅವರೂ, ಅನಂತಸ್ವಾಮಿ ಧಾಟಿಯಲ್ಲಿ ಶಾಂತಭಾವ ಅಡಗಿದೆ. ನಾಡಗೀತೆಯನ್ನು ಯುದ್ಧೋನ್ಮಾದದಲ್ಲಿ ಹಾಡುವುದು ಸಲ್ಲದು. ರಾಗ ಸಂಯೋಜನೆ ಎಂದರೆ ನಮ್ಮಲ್ಲಿ ತ್ಯಾಗರಾಜರು, ಪುರಂದರದಾಸರಂತಹ ದಿಗ್ಗಜರು ನಮಗೆ ಅಡಿಪಾಯ ಹಾಕಿಕೊಟ್ಟಿದ್ದಾರೆ. ಆದರೆ, ಸುಗಮ ಸಂಗೀತದಲ್ಲಿ ರಾಗ ಸಂಯೋಜನೆ ಎಂಬುದು ಕಲ್ಪನೆ ಅಷ್ಟೇ. ನಾಡಗೀತೆ ವಿಚಾರದಲ್ಲಿ ಸಾಹಿತ್ಯಕ್ಕೆ ಹೆಚ್ಚು ಆದ್ಯತೆ ನೀಡಬೇಕು ಎಂದು ಪ್ರತಿಪಾದಿಸಿದರು.
