ತರಕಾರಿ ಮಾರಲು ಬಲು ದೂರ ಸೈಕಲ್​ ತುಳಿಯುತ್ತಿದ್ದ ಯುವತಿಗೆ ಪೊಲೀಸರು ನೀಡಿದರೊಂದು ಶಾಕ್​!

ಗುವಾಹಾಟಿ: ಈಕೆ 20ರ ಯುವತಿ ಜನ್ಮೋನಿ ಗೊಗೊಯ್. ಅಸ್ಸಾಂನ ದಿಬ್ರುಘರ್​ ಗ್ರಾಮದವಳು. ಈಕೆ 2 ವರ್ಷದವಳಿದ್ದಾಗಿನಂದ ತಂದೆಗೆ ಅನಾರೋಗ್ಯ. ಹಾಗೀಗೂ ಮಾಡಿ ಪ್ರಾಥಮಿಕ ಶಾಲೆ ಪೂರೈಸಿದಳು ಈ ಹುಡುಗಿ.

ಆದರೆ ಹೈಸ್ಕೂಲ್​ಗೆ ಹೋಗುವಷ್ಟರಲ್ಲಿಯೇ ತಂದೆಯ ಆರೋಗ್ಯ ತೀರಾ ಹದಗೆಟ್ಟಿತ್ತು. ತಾಯಿ ಕೂಲಿ ನಾಲಿ ಮಾಡಿದರಷ್ಟೇ ಮೂವರ ಹೊಟ್ಟೆ ತುಂಬುವಂಥಾಯಿತು ಪರಿಸ್ಥಿತಿ.

ಇದನ್ನೂ ಓದಿ: ಕರೊನಾ ಗಲಾಟೆ: ಮೇ 17ರಂದು ಇಂಟರ್​ನೆಟ್​ ಸೇವೆ ಸ್ಥಗಿತ

ತಾಯಿಯ ಕಷ್ಟ ನೋಡಲಾಗದೇ ಈ ಬಾಲಕಿ ತರಕಾರಿ ಮಾರುವ ನಿರ್ಧಾರಕ್ಕೆ ಬಂದಳು.ಸರಿ. ಅಪ್ಪನ ಹಳೆಯ ಸೈಕಲ್​ ಮೇಲೇರಿ ದಿನವೂ ಹತ್ತಾರು ಕಿ.ಮೀ. ದೂರ ಪಟ್ಟಣಕ್ಕೆ ಹೋಗಿ ತರಕಾರಿ ಮಾರಿ ಬರುತ್ತಿದ್ದಳು. ಹಾಗೂ ಹೀಗೂ ಸಂಸಾರ ಸಾಗುತ್ತಿತ್ತು.

ಆದರೆ ಲಾಕ್​ಡೌನ್​ ಇವರ ಜೀವನವನ್ನು ಅಕ್ಷರಶಃ ಕಸಿದುಕೊಂಡು ಬಿಟ್ಟಿತು. ಆದರೆ ಧೃತಿಗೆಡದ ಜನ್ಮೋನಿ, ತರಕಾರಿಗಳನ್ನು ಪ್ಯಾಕ್​ ಮಾಡಿಕೊಂಡು, ತಾನೂ ವೈರಸ್​ ತಗುಲದಂತೆ ಎಲ್ಲಾ ಎಚ್ಚರಿಕೆ ತೆಗೆದುಕೊಂಡು ಸೈಕಲ್​ ಏರಿ ಹೊರಟು ನಿಂತಳು. ಈ ಸಮಯದಲ್ಲಿ ಅಮ್ಮನಿಗೆ ಹೊರಗಡೆ ಹೋಗುವುದು ಸಾಧ್ಯವಾಗಿರಲಿಲ್ಲ. ಆದ್ದರಿಂದ ಒಬ್ಬಳೇ ಸೈಕಲ್​ ಏರಿ ಬಹುದೂರದವರೆಗೆ ಹೋಗಿ ತರಕಾರಿ ಮಾರಿ ಬರುತ್ತಿದ್ದಳು.

ಇದನ್ನೂ ಓದಿ:  ವಿಮಾನ ಪ್ರಯಾಣಿಕರಿಗೆ ಗುಡ್​ ನ್ಯೂಸ್​: ಹಾರಾಟಕ್ಕೆ ಮುಹೂರ್ತ ಫಿಕ್ಸ್​- ಇಲ್ಲಿದೆ ನೋಡಿ ಸಂಪೂರ್ಣ ವಿವರ

ಲಾಕ್​ಡೌನ್​ನಿಂದಾಗಿ ತಮ್ಮ ಸಮಸ್ಯೆಗಳನ್ನೇ ಹೇಳಿಕೊಳ್ಳುತ್ತಾ ಸರ್ಕಾರ ನೀಡುವ ಸೌಲಭ್ಯಗಳಿಗೆ ಕಾಯುತ್ತಾ ಕುಳಿತ ಪುರುಷರು ಒಂದೆಡೆಯಾದರೆ, ಕಷ್ಟಪಟ್ಟು, ಕಿಲೋಮೀಟರ್​ಗಟ್ಟಲೆ ಒಂಟಿಯಾಗಿ ಜೀವ ಸವೆಸುತ್ತಿರುವ ಈ ಯುವತಿ ಇನ್ನೊಂದೆಡೆ. ಈಕೆಯ ಇಂಥ ಪ್ರಯತ್ನವನ್ನು ಕಂಡ ಕೆಲವು ಮಾಧ್ಯಮದವರು ಇವಳ ಬಗ್ಗೆ ವರದಿ ಮಾಡಿದವು.

ಪತ್ರಿಕೆಗಳಲ್ಲಿ ಬಂದಿರುವ ವರದಿಯನ್ನು ಪೊಲೀಸ್​ ಇಲಾಖೆ ಗಮನಿಸಿತು. ಯುವತಿಯ ಶ್ರಮಕ್ಕೆ ಪೊಲೀಸ್​ ಇಲಾಖೆಯ ಅಧಿಕಾರಿಗಳು ಭಾರಿ ಪ್ರಶಂಸೆ ವ್ಯಕ್ತಪಡಿಸಿದರು. ಇದು ಅಸ್ಸಾಂ ಪೊಲೀಸ್​ ಆಯು್ತಕ ಭಾಸ್ಕರ್​ ಜ್ಯೋತಿ ಮಹಂತಾ ಅವರ ಗಮನಕ್ಕೂ ಬಂತು. ಈ ಯುವತಿಯ ಸಾಹಸಕ್ಕೆ ಕಂಡ ಅವರು, ಈಕೆಗೆ ಸಹಾಯಹಸ್ತ ಚಾಚಬೇಕೆಂದುಕೊಂಡರು.

ಇದನ್ನೂ ಓದಿ: VIDEO: ಕೋಲಿನಿಂದ ಮರುಜೀವ ಪಡೆದ ಯುವಕ! ವೀಡಿಯೋ ಭಾರಿ ವೈರಲ್​

ಅದೊಂದು ದಿನ ಯುವತಿಯ ಮನೆಯ ಮುಂದೆ ಪೊಲೀಸರು ನಿಂತಿದ್ದರು. ಆಕೆಗೋ ಅಕ್ಷರಶಃ ಬೆವರಿದಳು. ನಂತರ ವಿಚಾರಿಸಿದಾಗ ಪೊಲೀಸ್​ ಅಧಿಕಾರಿಗಳು ಅವಳಿಗೆ ಮೊಪೆಡ್ ಬೈಕು ಉಡುಗೊರೆಯಾಗಿ ನೀಡುವ ಬಗ್ಗೆ ವಿವರಿಸಿದರು. ಕುಟುಂಬದ ಮೇಲೆ ಆಕೆಗಿರುವ ಕಾಳಜಿ ಬಗ್ಗೆ ಪ್ರಶಂಸಿಸಿದರು. ಇದರಿಂದ ಯುವತಿ ಕಣ್ಣೀರಾದಳು. ಬಹುಬೇಗನೆ ಅದನ್ನು ಓಡಿಸಲು ಕಲಿತಿರುವ ಯುವತಿ ಅದರಲ್ಲಿಯೇ ಈಗ ತರಕಾರಿ ಮಾರಾಟ ಮಾಡಿ ಬರುತ್ತಿದ್ದಾಳೆ. ಇದಕ್ಕೆ ಪೊಲೀಸ್​ ಇಲಾಖೆ ಕೂಡ ನೆರವಾಗುತ್ತಿದೆ (ಏಜೆನ್ಸೀಸ್​)