ನಿಮಗೇನಾದ್ರೂ ಮಾನವೀಯತೆ ಇದೆಯಾ? ಸ್ಟೇಡಿಯಂನಲ್ಲಿ ಗಿಲ್​-ಇಶಾನ್​ ವರ್ತನೆಗೆ ನೆಟ್ಟಿಗರ ಆಕ್ರೋಶ! SRH vs GT

SRH vs GT : ಗುಜರಾತ್ ಟೈಟಾನ್ಸ್ ತಂಡದ ನಾಯಕ ಶುಭಮನ್ ಗಿಲ್ ಹಾಗೂ ಸನ್​ ರೈಸರ್ಸ್​ ಹೈದರಾಬಾದ್​ ತಂಡದ ಆಟಗಾರ ಇಶಾನ್​ ಕಿಶಾನ್​ ಭಾರೀ ಟೀಕೆಗಳನ್ನು ಎದುರಿಸುತ್ತಿದ್ದಾರೆ. ಒಬ್ಬರು ನೋವಿನಲ್ಲಿದ್ದರೂ ಇಬ್ಬರು ನಗುತ್ತಾ ಮಾತನಾಡುವುದು ಎಷ್ಟು ಸರಿ ಎಂದು ನೆಟ್ಟಿಗರು ಪ್ರಶ್ನೆ ಮಾಡುತ್ತಿದ್ದಾರೆ. ಅಷ್ಟಕ್ಕೂ ನಿನ್ನೆ ನಡೆದಿದ್ದೇನು ಎಂಬುದನ್ನು ಕಂಪ್ಲೀಟ್​ ಆಗಿ ನಾವಿಂದು ತಿಳಿದುಕೊಳ್ಳೋಣ.

ನಿನ್ನೆ (ಏಪ್ರಿಲ್​ 06) ಗುಜರಾತ್ ಟೈಟಾನ್ಸ್​ ತಂಡವು ಐಪಿಎಲ್-2025ರ ಭಾಗವಾಗಿ ಸನ್‌ರೈಸರ್ಸ್ ಹೈದರಾಬಾದ್ ತಂಡವನ್ನು ಎದುರಿಸಿತು. ಉಪ್ಪಲ್ ಮೈದಾನದಲ್ಲಿ ನಡೆದ ಈ 19ನೇ ಐಪಿಎಲ್​ ಪಂದ್ಯದಲ್ಲಿ, ಟಾಸ್ ಗೆದ್ದ ಗುಜರಾತ್ ನಾಯಕ ಗಿಲ್ ಮೊದಲು ಬೌಲಿಂಗ್ ಮಾಡಲು ಆಯ್ಕೆ ಮಾಡಿಕೊಂಡರು. ಅದರಂತೆ ಬೌಲರ್‌ಗಳು ಗಿಲ್​ ನಂಬಿಕೆಯನ್ನು ಉಳಿಸಿಕೊಂಡರು. ಎರಡನೇ ಓವರ್‌ನ ಮೊದಲ ಎಸೆತದಲ್ಲಿ ಓಪನರ್ ಟ್ರಾವಿಸ್ ಹೆಡ್ (8) ಅವರನ್ನು ಪೆವಿಲಿಯನ್‌ಗೆ ಕಳುಹಿಸಿದ್ದ ಟೈಟಾನ್ಸ್ ವೇಗಿ ಮೊಹಮ್ಮದ್ ಸಿರಾಜ್, ಮುಂದಿನ ಐದನೇ ಓವರ್‌ನ ನಾಲ್ಕನೇ ಎಸೆತದಲ್ಲಿ ಮತ್ತೊಬ್ಬ ಓಪನರ್ ಅಭಿಷೇಕ್ ಶರ್ಮ (18) ಅವರನ್ನು ಔಟ್ ಮಾಡಿದರು.

ಈ ವೇಳೆ ಒನ್-ಡೌನ್ ಬ್ಯಾಟರ್ ಇಶಾನ್ ಕಿಶನ್ ಕ್ರೀಸ್​ನಲ್ಲಿ ನೆಲೆ ನಿಲ್ಲಲು ಪ್ರಯತ್ನಿಸಿದರು. ಆದರೆ ಅದು ವಿಫಲವಾಯಿತು. ಎಂಟನೇ ಓವರ್‌ನ ಎರಡನೇ ಎಸೆತದಲ್ಲಿ, ಟೈಟಾನ್ಸ್‌ನ ಮತ್ತೊಬ್ಬ ವೇಗಿ ಪ್ರಸಿದ್ಧ್ ಕೃಷ್ಣಗೆ ಇಶಾನ್​ (17) ವಿಕೆಟ್​ ಒಪ್ಪಿಸಿದರು. ಆದಾಗ್ಯೂ, ಅದಕ್ಕೂ ಮೊದಲು ಆರನೇ ಓವರ್‌ನಲ್ಲಿ, ಪ್ರಸಿದ್ಧ ಕೃಷ್ಣ ಬೌಲಿಂಗ್‌ನ ನಾಲ್ಕನೇ ಎಸೆತವನ್ನು ಇಶಾನ್ ಎದುರಿಸಿದರು.

ಇದನ್ನೂ ಓದಿ: ಇಂದಿಗೂ ಬಿಡುಗಡೆಯಾಗದ ಅತ್ಯಂತ ದುಬಾರಿ ಚಿತ್ರ: ಇದಕ್ಕೆಲ್ಲ ಕಾರಣ ಅಬ್ದುಲ್​ ಕಲಾಂ, ವಿಷ್ಣು ಕೂಡ ನಟಿಸಬೇಕಿತ್ತು! Kamal haasan

ಪ್ರಸಿದ್ಧ ಕೃಷ್ಣ ಅವರು ಆಫ್ ಕಡೆಗೆ ಶಾರ್ಟ್ ಬಾಲ್ ಎಸೆದಾಗ, ಅದನ್ನು ಪಾಯಿಂಟ್ ಕಡೆಗೆ ಇಶಾನ್​ ಬಾರಿಸಿದರು. ಈ ವೇಳೆ ಅಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ಗ್ಲೆನ್ ಫಿಲಿಪ್ಸ್ ಚೆಂಡನ್ನು ನಿಲ್ಲಿಸಲು ಪ್ರಯತ್ನಿಸುವಾಗ ಗಾಯಗೊಂಡರು. ಅವರು ಮೈದಾನದಲ್ಲಿ ಕುಸಿದುಬಿದ್ದು, ನೋವಿನಿಂದ ನರಳುತ್ತಿದ್ದರು. ಅಲ್ಲದೆ, ವಾಷಿಂಗ್ಟನ್ ಸುಂದರ್ ಬಳಿಗೆ ಓಡಿಹೋದರು. ಅಷ್ಟರಲ್ಲಿ, ಫಿಸಿಯೋ ಕೂಡ ಬಂದು ಫಿಲಿಪ್ಸ್ ಅನ್ನು ಪರೀಕ್ಷಿಸಿ ಅವರನ್ನು ಮೈದಾನದಿಂದ ಕರೆದೊಯ್ದರು.

ಇಶಾನ್-ಗಿಲ್ ನಗುತ್ತಿದ್ದರು

ಆದರೆ ಆ ಸಮಯದಲ್ಲಿ, ನಿತೀಶ್ ರೆಡ್ಡಿ ಜೊತೆ ಸಿಂಗಲ್ ಮುಗಿಸಿದ್ದ ಇಶಾನ್ ಕಿಶನ್, ಗಿಲ್ ಬಳಿ ಬಂದು ನಗುತ್ತಾ ಹರಟೆ ಹೊಡೆಯುತ್ತಿದ್ದರು. ಇಶಾನ್, ಗಿಲ್​ ಅವರ ಭುಜದ ಮೇಲೆ ಕೈ ಹಾಕಿದರು ಮತ್ತು ಗಿಲ್ ಕೂಡ ನಗುತ್ತಾ ಹರಟೆ ಹೊಡೆಯುತ್ತಿದ್ದರು. ಈ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಗಿಲ್ ವರ್ತನೆಯ ಬಗ್ಗೆ ನೆಟ್ಟಿಗರು ತೀವ್ರ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ನಿಮಗೆ ಮಾನವೀಯತೆ ಇದೆಯೇ?

ನಿಮ್ಮದೇ ತಂಡದ ಆಟಗಾರನೊಬ್ಬ ಗಾಯಗೊಂಡು ನೋವಿನಿಂದ ಬಳಲುತ್ತಿರುವಾಗ, ನಾಯಕನಾದವನು ಆ ಆಟಗಾರನನ್ನು ಸಂತೈಸುವುದನ್ನು ಬಿಟ್ಟು ಎದುರಾಳಿ ತಂಡದ ಆಟಗಾರನೊಂದಿಗೆ ಈ ರೀತಿ ನಗುತ್ತಾ ಹರಟೆ ಹೊಡೆಯುವುದು ಸರಿಯೇ? ಆಟಗಾರರ ನಡುವಿನ ಸ್ನೇಹ ತಪ್ಪಲ್ಲ. ಆದರೆ, ನೀವು ಪರಿಸ್ಥಿತಿಗೆ ಅನುಗುಣವಾಗಿ ಶಾಂತವಾಗಿ ಮತ್ತು ಸ್ವಲ್ಪ ಮಾನವೀಯತೆಯಿಂದ ವರ್ತಿಸಬೇಕು. ಪಂದ್ಯದ ನಂತರ ನೀವು ಎಷ್ಟು ಬೇಕಾದರೂ ತಮಾಷೆ ಮಾಡಬಹುದು ಎಂದು ಗಿಲ್ ಅವರನ್ನು ನೆಟ್ಟಿಗರು ತರಾಟೆಗೆ ತೆಗೆದುಕೊಂಡಿದ್ದಾರೆ. ಇಶಾನ್​ ವಿರುದ್ಧ ನೆಟ್ಟಿಗರು ಕಿಡಿಕಾರಿದ್ದಾರೆ.

ಅಂದಹಾಗೆ, ಇಶಾನ್ ಮತ್ತು ಶುಭಮನ್ ಗಿಲ್ ಅಂಡರ್ -19 ಮಟ್ಟದಿಂದ ಅಂತಾರಾಷ್ಟ್ರೀಯ ಮಟ್ಟದವರೆಗೆ ಆರಂಭಿಕ ಜೋಡಿಯಾಗಿ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಇಬ್ಬರ ನಡುವೆ ಆಳವಾದ ಸ್ನೇಹ ಸಂಬಂಧವಿದೆ. ಹೀಗಾಗಿ ಟೈಟಾನ್ಸ್-ರೈಸರ್ಸ್ ನಡುವಿನ ಪಂದ್ಯದಲ್ಲಿ, ಆಟಗಾರನೊಬ್ಬ ಗಾಯಗೊಂಡಾಗ, ಇಬ್ಬರು ನಗುತ್ತಾ ಮಾತನಾಡಿದ್ದು ಸರಿಯಲ್ಲ. ಹೀಗಾಗಿ ಇದು ಟೀಕೆಗೆ ಕಾರಣವಾಯಿತು.

ಬೇಕಂತ ಮಾಡಿದ್ದಲ್ಲ

ಆದರೆ, ಆ ಸಮಯದಲ್ಲಿ ಗಿಲ್ ಅವರು ಫಿಲಿಪ್ಸ್ ಪರಿಸ್ಥಿತಿಯನ್ನು ನೋಡಲಿಲ್ಲ ಎಂಬುದು ಗಮನಾರ್ಹ ಸಂಗತಿ. ವಿಷಯ ತಿಳಿದ ತಕ್ಷಣ ಅವರು ತಮ್ಮ ಫೀಲ್ಡರ್ ಬಳಿ ಹೋದರು. ಹೀಗಾಗಿ ಪೂರ್ತಿ ತಿಳಿಯದೇ ಮಾತನಾಡಬೇಡಿ ಎಂದು ಗಿಲ್ ಅವರ ಪರ ಅಭಿಮಾನಿಗಳು ಬ್ಯಾಟ್​ ಬೀಸಿದ್ದಾರೆ.

ಇನ್ನು ಪಂದ್ಯದ ವಿಚಾರಕ್ಕೆ ಬಂದರೆ, ಸನ್‌ರೈಸರ್ಸ್‌ನ ಅಗ್ರ ಕ್ರಮಾಂಕದ ಅಭಿಷೇಕ್ ಶರ್ಮ (18), ಟ್ರಾವಿಸ್ ಹೆಡ್ (8) ಮತ್ತು ಇಶಾನ್ ಕಿಶನ್ (17) ಮತ್ತೊಮ್ಮೆ ವಿಫಲರಾದರು, ಆದರೆ ನಿತೀಶ್ ರೆಡ್ಡಿ 34 ಎಸೆತಗಳಲ್ಲಿ 31 ರನ್ ಗಳಿಸಿದರು. ಇತರರಲ್ಲಿ, ಹೆನ್ರಿಕ್ ಕ್ಲಾಸೆನ್ (19 ಎಸೆತಗಳಲ್ಲಿ 27) ಮತ್ತು ನಾಯಕ ಪ್ಯಾಟ್ ಕಮ್ಮಿನ್ಸ್ (9 ಎಸೆತಗಳಲ್ಲಿ 22 ನಾಟೌಟ್) ಸ್ವಲ್ಪ ವೇಗವಾಗಿ ಆಡಿದರು. ಪರಿಣಾಮವಾಗಿ, ಸನ್‌ರೈಸರ್ಸ್ ನಿಗದಿತ 20 ಓವರ್‌ಗಳಲ್ಲಿ ಎಂಟು ವಿಕೆಟ್‌ಗಳ ನಷ್ಟಕ್ಕೆ 152 ರನ್ ಗಳಿಸಿತು.

ಗಿಲ್ ಅವರ ಅತ್ಯುತ್ತಮ ಬ್ಯಾಟಿಂಗ್

ಟೈಟಾನ್ಸ್ ವೇಗಿ ಮೊಹಮ್ಮದ್ ಸಿರಾಜ್ ಸನ್​ ರೈಸರ್ಸ್‌ನ ಬ್ಯಾಟಿಂಗ್ ಕ್ರಮಾಂಕವನ್ನು ಆಳಲು ಬಿಡದೇ ಪ್ರಮುಖ ನಾಲ್ಕು ವಿಕೆಟ್‌ಗಳನ್ನು ಪಡೆದರೆ, ಪ್ರಸಿದ್ಧ ಕೃಷ್ಣ ಮತ್ತು ಸಾಯಿ ಕಿಶೋರ್ ತಲಾ ಎರಡು ವಿಕೆಟ್‌ಗಳನ್ನು ಪಡೆದರು. ರೈಸರ್ಸ್ ನೀಡಿದ ಸಾಧಾರಣ ಗುರಿಯನ್ನು ಟೈಟಾನ್ಸ್ ಕೇವಲ 16.4 ಓವರ್‌ಗಳಲ್ಲಿ ತಲುಪಿತು.

ಆರಂಭಿಕ ಆಟಗಾರ ಶುಭಮನ್ ಗಿಲ್ (43 ಎಸೆತಗಳಲ್ಲಿ ಅಜೇಯ 61 ರನ್​) ಅದ್ಭುತ ಅರ್ಧಶತಕ ಗಳಿಸಿದರೆ, ವಾಷಿಂಗ್ಟನ್ ಸುಂದರ್ (29 ಎಸೆತಗಳಲ್ಲಿ 49) ಮತ್ತು ಶೆರ್ಫೇನ್ ರುದರ್ಫೋರ್ಡ್ (16 ಎಸೆತಗಳಲ್ಲಿ 35 ನಾಟೌಟ್) ಅದ್ಭುತ ರನ್ ಗಳಿಸಿದರು. ಪರಿಣಾಮವಾಗಿ, ಗುಜರಾತ್ ಟೈಟಾನ್ಸ್ ಏಳು ವಿಕೆಟ್‌ಗಳಿಂದ ಜಯಗಳಿಸಿತು. ಸನ್​ ರೈಸರ್ಸ್ ಬೌಲರ್‌ಗಳಲ್ಲಿ ಮೊಹಮ್ಮದ್ ಶಮಿ ಎರಡು ವಿಕೆಟ್ ಮತ್ತು ಪ್ಯಾಟ್​ ಕಮ್ಮಿನ್ಸ್ ಒಂದು ವಿಕೆಟ್ ಪಡೆದರು. (ಏಜೆನ್ಸೀಸ್​)

https://www.vijayavani.net/unknown-facts-a-animal-that-can-survive-without-food-or-water-for-30-years

https://www.vijayavani.net/mohammed-siraj-i-was-upset-i-couldnt-digest-it-i-struggled-siraj