ಮೆಗಾ ಹರಾಜಿಗೂ ಮುನ್ನ ಆರ್​ಸಿಬಿಯಿಂದ ಮೆಗಾ ಪ್ಲಾನ್​! ಈ ಯುವ ಕ್ರಿಕೆಟಿಗನಿಗೆ ನಾಯಕತ್ವ ಫಿಕ್ಸ್​!?

ನವದೆಹಲಿ: ಐಪಿಎಲ್ 2025ರ ಆರಂಭಕ್ಕೆ ಇನ್ನೂ ಬಹಳ ಸಮಯವಿದ್ದರು ಕೂಡ ಐಪಿಎಲ್ ತಂಡಗಳಿಗೆ ಸಂಬಂಧಿಸಿದ ಕೆಲವು ವಿಷಯಗಳು ಆಗಾಗ ವರದಿಯಾಗುತ್ತಲೇ ಇವೆ. ಮುಂಬರುವ ಸೀಸನ್​ಗೂ ಮುನ್ನ ಮೆಗಾ ಹರಾಜು ನಡೆಯುವುದರಿಂದ ಎಲ್ಲ ಫ್ರಾಂಚೈಸಿಗಳು ಬಲಿಷ್ಠ ತಂಡಗಳನ್ನು ನಿರ್ಮಿಸಲು ಯೋಜಿಸುತ್ತಿವೆ. ಕೆಲವು ತಂಡಗಳು ತಮ್ಮ ನಾಯಕರನ್ನು ಕೂಡ ಬದಲಾಯಿಸುತ್ತಿವೆ. ಐಪಿಎಲ್‌ನಲ್ಲಿ ಅತಿ ಹೆಚ್ಚು ಕ್ರೇಜ್ ಹೊಂದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್​ಸಿಬಿ) ಕೂಡ ತನ್ನ ಹೊಸ ನಾಯಕನನ್ನು ಅಂತಿಮಗೊಳಿಸಿದೆ ಎಂದು ಹೇಳಲಾಗುತ್ತಿದೆ.

ದಕ್ಷಿಣ ಆಫ್ರಿಕಾದ ಸ್ಟಾರ್ ಕ್ರಿಕೆಟಿಗ ಫಾಫ್ ಡುಪ್ಲೆಸಿಸ್ ಅವರನ್ನು ಮುಂದಿನ ಸೀಸನ್‌ಗೆ ಉಳಿಸಿಕೊಳ್ಳಲು ಆರ್‌ಸಿಬಿ ಮ್ಯಾನೇಜ್‌ಮೆಂಟ್ ಆಸಕ್ತಿ ಹೊಂದಿಲ್ಲದಿರುವಂತೆ ತೋರುತ್ತದೆ. ಹೀಗಾಗಿ, ಹೊಸ ನಾಯಕನನ್ನು ಹರಾಜಿನಿಂದ ಹೊರಗಿಡಲು ಆರ್​ಸಿಬಿ ಫಿಕ್ಸ್ ಆಗಿದೆಯಂತೆ.

ಮೆಗಾ ಹರಾಜಿಗೂ ಮೊದಲು ಆರ್​ಸಿಬಿ ಮ್ಯಾನೇಜ್​ಮೆಂಟ್​ ವಿರಾಟ್ ಕೊಹ್ಲಿ, ವಿಲ್ ಜಾಕ್ಸ್ ಮತ್ತು ರಜತ್ ಪಾಟಿದಾರ್ ಅವರನ್ನು ಉಳಿಸಿಕೊಳ್ಳಲಿದೆ ಎಂದು ವರದಿಯಾಗಿದೆ. ರಜತ್ ಪಾಟಿದಾರ್ ಅವರಿಗೆ ನಾಯಕತ್ವದ ಜವಾಬ್ದಾರಿಯನ್ನು ಹಸ್ತಾಂತರಿಸಲಿದ್ದಾರೆ ಎಂಬ ಮಾತುಗಳು ಕ್ರಿಕೆಟ್​ ವಲಯದಲ್ಲಿ ಕೇಳಿಬರುತ್ತಿವೆ. ಹಾಗೇನಾದರೂ ನಡೆದರೆ, ಪಾಟಿದಾರ್ ಮೇಲೆ ಭಾರಿ ಹೊರೆ ಬೀಳಲಿದೆ.

ವಿರಾಟ್​​ ಕೊಹ್ಲಿ ಜೊತೆಗೆ ತಂಡಕ್ಕೆ ಬರುವ ಸ್ಟಾರ್ ಆಟಗಾರರನ್ನು ಮ್ಯಾನೇಜ್ ಮಾಡುವುದು ಅಷ್ಟು ಸುಲಭದ ಮಾತಲ್ಲ. ವಿರಾಟ್ ಕೊಹ್ಲಿ ಕಳೆದ ಮೂರು ಸೀಸನ್‌ಗಳಿಂದ ನಾಯಕತ್ವದಿಂದ ದೂರ ಉಳಿದಿದ್ದರೂ ಫಾಫ್ ಡುಪ್ಲೆಸಿಸ್​ಗೆ ಸಲಹೆ ನೀಡುತ್ತಾ ಬಂದಿದ್ದಾರೆ. ಇನ್ನೂ ರಜತ್ ಪಾಟಿದಾರ್ ನಾಯಕನಾದರೆ ಅವರಿಗೂ ಕೊಹ್ಲಿ ನೆರವಾಗಲಿದ್ದಾರೆ. ಏಕೆಂದರೆ, ಪಾಟಿದಾರ್​ಗೆ ಅಷ್ಟೊಂದು ಅನುಭವ ಇಲ್ಲ. ಕೊಹ್ಲಿಯ ಸಲಹೆಗಳು ಪಾಟಿದಾರ್​ ಅವರಿಗೆ ಪ್ಲಸ್ ಆಗಲಿದೆ.

ಮತ್ತೊಂದೆಡೆ ವಿರಾಟ್​ ಕೊಹ್ಲಿಗೆ ಮತ್ತೊಮ್ಮೆ ನಾಯಕತ್ವದ ಜವಾಬ್ದಾರಿಯನ್ನು ಹಸ್ತಾಂತರಿಸುವ ಸಾಧ್ಯತೆಯೂ ಇದೆ ಎನ್ನಲಾಗಿದೆ. ಆರ್‌ಸಿಬಿ ಪರ ಕಪ್​ ಗೆಲ್ಲಲು ಕೊಹ್ಲಿ ಶತಪ್ರಯತ್ನ ನಡೆಸುತ್ತಿದ್ದಾರೆ. ಆದರೆ, ಆಟಗಾರನಾಗಿ ಮತ್ತು ನಾಯಕನಾಗಿಯೂ ಅದು ಈಡೇರಲಿಲ್ಲ. ಆದರೆ, ಕೊನೆಯ ಬಾರಿಗೆ ನಾಯಕನಾಗಿ ಕಪ್‌ಗಾಗಿ ಪ್ರಯತ್ನಿಸಿದರೆ ಉತ್ತಮ ಎಂಬ ಅಭಿಪ್ರಾಯಗಳು ಕೇಳಿಬಂದಿವೆ. ಆದರೆ, ಆರ್​ಸಿಬಿ ನಾಯಕ ಯಾರಾಗುತ್ತಾರೆ ಎಂಬ ಕುತೂಹಲಕ್ಕೆ ಇನ್ನು ಕೆಲವೇ ತಿಂಗಳುಗಳಲ್ಲಿ ಉತ್ತರ ಸಿಗಲಿದೆ. (ಏಜೆನ್ಸೀಸ್​)

https://www.vijayavani.net/doctor-prescription-in-kannada-language-goes-viral-and-people-appreciates

https://www.vijayavani.net/wwe-actor-dave-bautista-whose-body-has-become-slimmer-fans-are-in-shock