ಕೊಹ್ಲಿ, ದ್ರಾವಿಡ್​ ಸಾಧನೆ ಸರಿಗಟ್ಟಿದ ಯಶಸ್ವಿ ಜೈಸ್ವಾಲ್​; ಸೆಹ್ವಾಗ್ ದಾಖಲೆ ಪತನ!

ರಾಂಚಿ: ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿಯಲ್ಲಿ 4ನೇ ಬಾರಿಗೆ 50 ರನ್​ ಕಲೆಹಾಕಿದ ಯಶಸ್ವಿ ಜೈಸ್ವಾಲ್​ ಒಟ್ಟಾರೆ 618 ರನ್​ ಕಲೆಹಾಕಿದ್ದಾರೆ. ಈ ಮೂಲಕ ಟೆಸ್ಟ್​ ಸರಣಿಯೊಂದರಲ್ಲಿ 600 ರನ್​ ಕಲೆಹಾಕಿದ 5ನೇ ಭಾರತೀಯ ಮತ್ತು 2ನೇ ಭಾರತೀಯ ಆರಂಭಿಕರೆನಿಸಿದ್ದಾರೆ. ಸುನೀಲ್​ ಗಾವಸ್ಕರ್​ (2 ಬಾರಿ) ಈ ಸಾಧನೆ ಮಾಡಿರುವ ಮೊದಲ ಭಾರತೀಯರಾಗಿದ್ದಾರೆ.

ವಿರಾಟ್​ ಕೊಹ್ಲಿ, ರಾಹುಲ್​ ದ್ರಾವಿಡ್​ (ತಲಾ 2 ಬಾರಿ) ಮತ್ತು ದಿಲೀಪ್​ ಸರ್ದೇಸಾಯಿ ಈ ಸಾಧನೆ ಮಾಡಿರುವ ಇತರ ಭಾರತೀಯರಾಗಿದ್ದಾರೆ. 1970&71ರಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧ ಸರಣಿಯಲ್ಲಿ ಸುನೀಲ್​ ಗಾವಸ್ಕರ್​ 774 ರನ್​ ಕಲೆಹಾಕಿರುವುದು ಭಾರತೀಯ ದಾಖಲೆಯಾಗಿದೆ. ಸರಣಿಯಲ್ಲಿ ಇನ್ನೂ 3 ಇನಿಂಗ್ಸ್​ ಬಾಕಿ ಉಳಿದಿರುವುದರಿಂದ ಜೈಸ್ವಾಲ್​ಗೆ ಈ ದಾಖಲೆಯನ್ನು ಮುರಿಯುವ ಅವಕಾಶವೂ ಎದುರಾಗಿದೆ. 1930ರಲ್ಲಿ ಇಂಗ್ಲೆಂಡ್​ ವಿರುದ್ಧ ಸರಣಿಯಲ್ಲಿ ಆಸೀಸ್​ ದಂತಕಥೆ ಡಾನ್​ ಬ್ರಾಡ್ಮನ್​ 974 ರನ್​ ಸಿಡಿಸಿರುವುದು ವಿಶ್ವದಾಖಲೆಯಾಗಿದೆ.

ಸೆಹ್ವಾಗ್​ ದಾಖಲೆ ಪತನ

ಕ್ಯಾಲೆಂಡರ್​ ವರ್ಷವೊಂದರಲ್ಲಿ ಟೆಸ್ಟ್​ ಕ್ರಿಕೆಟ್​ನಲ್ಲಿ ಗರಿಷ್ಠ ಸಿಕ್ಸರ್​ ಸಿಡಿಸಿದ ವೀರೇಂದ್ರ ಸೆಹ್ವಾಗ್​ರ 16 ವರ್ಷ ಹಿಂದಿನ ದಾಖಲೆಯನ್ನು ಯಶಸ್ವಿ ಜೈಸ್ವಾಲ್​ ಮುರಿದರು. ಸೆಹ್ವಾಗ್​ 2008ರಲ್ಲಿ 22 ಸಿಕ್ಸರ್​ ಸಿಡಿಸಿದ್ದರೆ, ಜೈಸ್ವಾಲ್​ ಹಾಲಿ ವರ್ಷದ 2 ತಿಂಗಳಲ್ಲೇ 23 ಸಿಕ್ಸರ್​ ಸಿಡಿಸಿದ್ದಾರೆ.

https://www.vijayavani.net/akash-deep-made-his-cricket-dream-come-true-amid-fathers-opposition