ಲಖನೌ: ಮೂರನೇ ಆವೃತ್ತಿಯ ವುಮೆನ್ಸ್ ಪ್ರೀಮಿಯರ್ ಲೀಗ್ನ (ಡಬ್ಲುಪಿಎಲ್) ರೋಚಕ ಪ್ಲೇಆಫ್ ಪೈಪೋಟಿಗೆ ವೇದಿಕೆ ಸಜ್ಜಾಗಿದೆ. ಟೂರ್ನಿಯ ಮೂರನೇ ಚರಣದ ಪಂದ್ಯಗಳು ಲಖನೌದಲ್ಲಿ ಸೋಮವಾರ ಆರಂಭವಾಗಲಿದ್ದು, ಆತಿಥೇಯ ಯುಪಿ ವಾರಿಯರ್ಸ್ ಹಾಗೂ ಗುಜರಾತ್ ಜೈಂಟ್ಸ್ ತಂಡಗಳು ಕಾದಾಟ ನಡೆಸಲಿವೆ. ಟೂರ್ನಿಯ ರೌಂಡ್ ರಾಬಿನ್ನಲ್ಲಿ 6 ಲೀಗ್ ಪಂದ್ಯಗಳಷ್ಟೇ ಬಾಕಿಯಿದ್ದು, ಪ್ಲೇಆಫ್ನ ಉಳಿದೆರಡು 2 ಸ್ಥಾನಗಳಿಗೆ 4 ತಂಡಗಳ ನಡುವೆ ನೇರ ಸ್ಪರ್ಧೆ ಇದೆ. ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮೊದಲ ತಂಡವಾಗಿ ಉಪಾಂತ್ಯದ ಸ್ಥಾನ ಖಾತ್ರಿಪಡಿಸಿಕೊಂಡರೂ, ಅಗ್ರಸ್ಥಾನದೊಂದಿಗೆ ಫೈನಲ್ಗೆ ನೇರ ಅರ್ಹತೆ ಪಡೆಯುವ ಲೆಕ್ಕಾಚಾರದಲ್ಲಿದೆ. ಐದು ತಂಡಗಳು ತಲಾ 8 ಲೀಗ್ ಪಂದ್ಯ ಆಡಲಿದ್ದು, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದ ತಂಡ ನೇರವಾಗಿ ಪ್ರಶಸ್ತಿ ಸುತ್ತಿಗೇರಿದರೆ, 2-3ನೇ ಸ್ಥಾನಿ ಎಲಿಮಿನೇಟರ್ನಲ್ಲಿ ಫೈನಲ್ ಸ್ಥಾನಕ್ಕೆ ಹೋರಾಟ ನಡೆಸಲಿವೆ. ಎಲಿಮಿನೇಟರ್ ಹಾಗೂ ಫೈನಲ್ ಮುಂಬೈನಲ್ಲಿ ನಿಗದಿಯಾಗಿದೆ.
