ಆಂಗ್ಲರ ಬಜ್​ಬಾಲ್​ ಆಟಕ್ಕೆ ಟೀಮ್​ ಇಂಡಿಯಾ ಹೆದರುವುದಿಲ್ಲ ಎಂದ ಕೋಚ್​ ದ್ರಾವಿಡ್​

ಹೈದರಾಬಾದ್: ಆಂಗ್ಲರ ಬಜ್​ಬಾಲ್​ ಆಟಕ್ಕೆ ಅದೇ ರೀತಿಯ ಆಕ್ರಮಣಕಾರಿ ಪ್ರತಿತಂತ್ರಕ್ಕೆ ಭಾರತ ಮೊರೆ ಹೋಗುವುದಿಲ್ಲ. ಹಾಗೆಂದು ಹಿಂದೆಯೂ ಸರಿಯುವುದಿಲ್ಲ. ಭಾರತ ತಂಡ ಪರಿಸ್ಥಿತಿಗೆ ತಕ್ಕಂತೆ ಯೋಜನೆಗಳನ್ನು ಕಾರ್ಯಗತಗೊಳಿಸಲಿದೆ ಎಂದು ದ್ರಾವಿಡ್​ ಹೇಳಿದರು. "ನಾವೂ ಅಲ್ಟ್ರಾ ಆಕ್ರಮಣಕಾರಿ ಆಟಕ್ಕಿಳಿಯುವುದಿಲ್ಲ. ಪರಿಸ್ಥಿತಿಗೆ ತಕ್ಕಂತೆ ಆಟವಾಡುತ್ತೇವೆ. ಆದರೆ ನಮ್ಮ ಬ್ಯಾಟಿಂಗ್​ ಸರದಿಯ ಅಗ್ರ 6-7 ಬ್ಯಾಟರ್​ಗಳೂ ಸ್ವಾಭಾವಿಕವಾಗಿಯೇ ಸಕಾರಾತ್ಮಕ ಆಟ ಆಡಬಲ್ಲವರಾಗಿದ್ದಾರೆ. ದೀರ್ಘಕಾಲ ಬ್ಯಾಟಿಂಗ್​ ಮಾಡುವುದೇ ನಮ್ಮ ಆದ್ಯತೆ ಆಗಿರಲಿದೆ. ಹಾಗೆಂದು ರಕ್ಷಣಾತ್ಮಕ ತಂತ್ರಕ್ಕೆ ಮೊರೆ ಹೋಗುವುದಿಲ್ಲ' ಎಂದು ದ್ರಾವಿಡ್​ ತಿಳಿಸಿದರು.

ಬ್ರೆಂಡನ್​ ಮೆಕ್ಕಲಂ ಕೋಚ್​ ಮತ್ತು ಬೆನ್​ ಸ್ಟೋಕ್ಸ್​ ನಾಯಕರಾದ ಬಳಿಕ ಟೆಸ್ಟ್​ನಲ್ಲೂ ಆಕ್ರಮಣಕಾರಿಯಾಗಿ ಆಡುತ್ತಿರುವ ಇಂಗ್ಲೆಂಡ್​ ಕೊನೇ 18 ಟೆಸ್ಟ್​ಗಳಲ್ಲಿ 13ರಲ್ಲಿ ಗೆಲುವು ಸಾಧಿಸಿದೆ. "ಪಾಕಿಸ್ತಾನ, ನ್ಯೂಜಿಲೆಂಡ್​, ಆಸ್ಟ್ರೆಲಿಯಾದಲ್ಲಿ ಇಂಗ್ಲೆಂಡ್​ ತಂಡ ಬಜ್​ಬಾಲ್​ ಮೂಲಕವೇ ಯಶಸ್ಸು ಕಂಡಿದೆ. ಹೀಗಾಗಿ ನಾವು ಅವರ ತಂತ್ರವನ್ನು ಗೌರವಿಸುತ್ತೇವೆ. ಆದರೆ ಭಾರತದ ಪಿಚ್​ಗಳು ಅವರಿಗೆ ಸವಾಲು ಒಡ್ಡಲಿವೆ. ನಮ್ಮ ಬೌಲರ್​ಗಳೂ ಅನುಭವಿಗಳಾಗಿದ್ದು, ಆಂಗ್ಲರ ಆಕ್ರಮಣಕ್ಕೆ ಯಾವ ರೀತಿ ತಿರುಗೇಟು ನೀಡಲಿದ್ದಾರೆ ಎಂಬ ಕುತೂಹಲ ನನಗೂ ಇದೆ' ಎಂದು ದ್ರಾವಿಡ್​ ಹೇಳಿದರು.

ಬುಮ್ರಾಗೆ ವಿಕೆಟ್​ ಬೇಟೆ ವಿಶ್ವಾಸ

ಆಂಗ್ಲರ ಆಕ್ರಮಣಕಾರಿ ಬಜ್​ಬಾಲ್​ ಕಾರ್ಯತಂತ್ರವೂ ತನಗೆ ಹೆಚ್ಚಿನ ವಿಕೆಟ್​ ಕಬಳಿಸುವ ಅವಕಾಶಗಳನ್ನು ಸೃಷ್ಟಿಸಲಿವೆ ಎಂದು ಭಾರತ ಟೆಸ್ಟ್​ ತಂಡದ ಉಪನಾಯಕ ಹಾಗೂ ವೇಗಿ ಜಸ್​ಪ್ರೀತ್​ ಬುಮ್ರಾ ಹೇಳಿದ್ದಾರೆ. ಟೆಸ್ಟ್​ ಕ್ರಿಕೆಟ್​ಅನ್ನು ಆಡುವ ಮತ್ತೊಂದು ಹೊಸ ಆಕ್ರಮಣಕಾರಿ ಪ್ರಕಾರವನ್ನು ಇಂಗ್ಲೆಂಡ್​ ತಂಡ ತೋರಿಸಿಕೊಟ್ಟಿದೆ ಎಂದಿರುವ ಬುಮ್ರಾ, ಓರ್ವ ಬೌಲರ್​ ಆಗಿ ನಾನು ಈ ಆಕ್ರಮಣಕಾರಿ ಆಟದ ಲಾಭ ಪಡೆದು ಹೆಚ್ಚಿನ ವಿಕೆಟ್​ಗಳನ್ನು ಬಾಚಿಕೊಳ್ಳಲು ಪ್ರಯತ್ನಿಸಲಿದ್ದೇನೆ ಎಂದಿದ್ದಾರೆ.

ಹೈದರಾಬಾದ್​ನಲ್ಲಿ ಸ್ಪಿನ್​ ಸ್ನೇಹಿ ಪಿಚ್​

ಇಂಗ್ಲೆಂಡ್​ ವಿರುದ್ಧ ಗುರುವಾರದಿಂದ ನಡೆಯಲಿರುವ ಮೊದಲ ಟೆಸ್ಟ್​ ಪಂದ್ಯಕ್ಕೆ ಹೈದರಾಬಾದ್​ನಲ್ಲಿ ನಿರೀಕ್ಷೆಯಂತೆಯೇ ಸ್ಪಿನ್​ ಸ್ನೇಹಿ ಪಿಚ್​ ಸಿದ್ಧಪಡಿಸಲಾಗಿದೆ. ಪಿಚ್​ ಸ್ಪಿನ್​ ಸ್ನೇಹಿಯಾಗಿರಲಿದೆ ಎಂದು ಕೋಚ್​ ದ್ರಾವಿಡ್​ ಕೂಡ ಲೆಕ್ಕಾಚಾರ ಹಾಕಿದ್ದಾರೆ. ಆದರೆ ಮೊದಲ ದಿನದಿಂದಲೇ ಪಿಚ್​ ಸ್ಪಿನ್ನರ್​ಗಳಿಗೆ ನೆರವಾಗಬಹುದೇ ಎಂಬುದನ್ನು ಹೇಳಲಾಗದು ಎಂದಿದ್ದಾರೆ.

https://www.vijayavani.net/bcci-plans-to-hold-ipl-2024-from-march-22-to-may-26