ಟ್ರೋಫಿ ಕೈಚೆಲ್ಲಿದ ಮಹಿಳಾ ಭಾರತ ಟಿ20; ವಿಶ್ವಕಪ್ ಗೆಲ್ಲುವ ಭಾರತದ ಆಸೆ ಭಗ್ನ, ಆಸ್ಟ್ರೇಲಿಯಾ 5ನೇ ಬಾರಿ ಚಾಂಪಿಯನ್

ಮೆಲ್ಬೋರ್ನ್: ಟೂರ್ನಿಯ ತನ್ನ ಅತ್ಯಂತ ಕೆಟ್ಟ ದಿನವನ್ನು ಫೈನಲ್​ನಲ್ಲಿ ಎದುರಿಸಿದ ಭಾರತ ತಂಡ ಟಿ20 ಮಹಿಳಾ ವಿಶ್ವಕಪ್​ನಲ್ಲಿ ರನ್ನರ್​ಅಪ್ ಆಗಿದೆ. ತನ್ನ ಸರ್ವಾಂಗೀಣ ನಿರ್ವಹಣೆಯ ಮೂಲಕ ಮಹಿಳಾ ಭಾರತ ತಂಡವನ್ನು ಮಣಿಸಿದ ಆಸ್ಟ್ರೇಲಿಯಾ ತಂಡ 5ನೇ ಬಾರಿಗೆ ಟಿ20 ವಿಶ್ವಕಪ್ ಟ್ರೋಫಿಗೆ ಮುತ್ತಿಟ್ಟಿದೆ.

ಅಂತಾರಾಷ್ಟ್ರೀಯ ಮಹಿಳಾ ದಿನವಾದ ಭಾನುವಾರ ಮೆಲ್ಬೋರ್ನ್ ಕ್ರಿಕೆಟ್ ಗ್ರೌಂಡ್​ನಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡ ಅಗಾಧ ಶಕ್ತಿಯನ್ನು ಪರಿಚಯಿಸಿತು. 2003ರ ಪುರುಷರ ಏಕದಿನ ಕ್ರಿಕೆಟ್ ವಿಶ್ವಕಪ್​ನ ಭಾರತ-ಆಸ್ಟ್ರೇಲಿಯಾ ಫೈನಲ್ ಪಂದ್ಯವನ್ನೇ ನೆನಪಿಸಿದಂತಿದ್ದ ಪಂದ್ಯದಲ್ಲಿ ಯಾವುದೂ ಭಾರತ ಮಹಿಳಾ ತಂಡ ಎಣಿಸಿದಂತೆ ಸಾಗಲಿಲ್ಲ.

ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಆಸ್ಟ್ರೇಲಿಯಾ, ಆರಂಭಿಕ ಬ್ಯಾಟುಗಾರ್ತಿ ಅಲೀಸಾ ಹೀಲಿಯ ಧೈರ್ಯಶಾಲಿ ಇನಿಂಗ್ಸ್ (75ರನ್, 39 ಎಸೆತ, 7 ಬೌಂಡರಿ, 5 ಸಿಕ್ಸರ್) ಹಾಗೂ ಬೆಥ್ ಮೂನಿಯ (78 ರನ್, 54 ಎಸೆತ, 10 ಬೌಂಡರಿ) ಜವಾಬ್ದಾರಿಯುತ ಆಟದ ಮೂಲಕ 4 ವಿಕೆಟ್​ಗೆ 184 ರನ್​ಗಳ ಬೃಹತ್ ಮೊತ್ತ ಪೇರಿಸಿತು.

ಪ್ರತಿಯಾಗಿ ಟೂರ್ನಿಯಲ್ಲಿ ತಂಡದ ಬ್ಯಾಟಿಂಗ್ ಶಕ್ತಿಯಾಗಿದ್ದ 16ರ ಹರೆಯದ ಬ್ಯಾಟುಗಾರ್ತಿ ಶೆಫಾಲಿ ವರ್ಮರನ್ನು ಮೊದಲ ಓವರ್​ನಲ್ಲಿಯೇ ಕಳೆದುಕೊಂಡ ಭಾರತ, ಒಮ್ಮೆಯೂ ಆಸೀಸ್​ಗೆ ಸವಾಲೊಡ್ಡುವ ಪ್ರಯತ್ನವನ್ನೇ ಮಾಡಲಿಲ್ಲ. 19.1 ಓವರ್​ಗಳಲ್ಲಿ ಭಾರತ ತಂಡ 99 ರನ್​ಗೆ ಆಲೌಟ್ ಆಯಿತು. ಮೇಗನ್ ಸ್ಕಟ್ (18ಕ್ಕೆ 4) ಹಾಗೂ ಜೆಸ್ ಜೊನಾಸೆನ್ (20ಕ್ಕೆ 3) ಯೋಜನಾಬದ್ಧ ದಾಳಿಯ ಮೂಲಕ ಭಾರತದ ಬ್ಯಾಟಿಂಗ್ ವಿಭಾಗದ ಬೆನ್ನೆಲುಬು ಮುರಿದರು.

4ನೇ ಓವರ್ ಮುಗಿಯುವ ವೇಳೆಗಾಗಲೇ ಜೆಮೀಮಾ ರೋಡ್ರಿಗಸ್ (0) ಹಾಗೂ ಸ್ಮೃತಿ ಮಂದನಾ ಎಡಗೈ ಆಫ್​ಸ್ಪಿನ್ ದಾಳಿಯಲ್ಲಿ ಮಿಡ್​ಆನ್ ಬಳಿ ಕ್ಯಾಚ್ ನೀಡಿ ಹೊರನಡೆದರು. ಆ ನಂತರ ಆಸೀಸ್ ಎಷ್ಟು ಬೇಗ ಗೆಲುವು ದಾಖಲಿಸಲಿದೆ ಎನ್ನುವ ಲೆಕ್ಕಾಚಾರ ಮಾತ್ರವೇ ಉಳಿದುಕೊಂಡಿತ್ತು.

ಹರ್ವನ್​ಪ್ರೀತ್ ಮತ್ತೆ ಫೇಲ್

ಇಡೀ ಟೂರ್ನಿಯಲ್ಲಿ ಕಳಪೆ ಫಾಮರ್್​ನಲ್ಲಿದ್ದ ಹರ್ವನ್​ಪ್ರೀತ್ ಫೈನಲ್​ನಲ್ಲಾದರೂ ಫಾಮರ್್​ಗೆ ಬರುವ ಆಸೆ ಸುಳ್ಳಾಯಿತು. ಅಪಾಯಕಾರಿ ಸ್ಲಾಗ್ ಸ್ಲೀಪ್ ಮಾಡುವ ಯತ್ನದಲ್ಲಿ ವಿಕೆಟ್ ಕೈಚೆಲ್ಲುವುದರೊಂದಿಗೆ ಭಾರತ 30 ರನ್​ಗೆ 4 ವಿಕೆಟ್ ಕಳೆದುಕೊಂಡಿತ್ತು.

ಒಂದು ಬೌಂಡರಿಯೊಂದಿಗೆ ಕೆಲ ಹೊತ್ತು ಕ್ರೀಸ್​ನಲ್ಲಿದ್ದ ವೇದಾ ಕೃಷ್ಣಮೂರ್ತಿ 19 ರನ್ ಬಾರಿಸಿದರು. ಗಮನಸೆಳೆಯುವ ಆಟವಾಡಿದ ದೀಪ್ತಿ ಶರ್ಮ (33ರನ್, 35 ಎಸೆತ, 2 ಬೌಂಡರಿ) ಭಾರತದ ಪರವಾಗಿ ಗರಿಷ್ಠ ರನ್ ಬಾರಿಸಿದರು. ಕೊನೇ 13 ಎಸೆತಗಳಲ್ಲಿ ಭಾರತದ ನಾಲ್ಕು ವಿಕೆಟ್ ಪತನವಾಗುವುದರೊಂದಿಗೆ ಭಾರತ ತಂಡ 100 ರನ್​ಗಳ ಗಡಿ ದಾಟಲು ಸಾಧ್ಯವಾಗಲಿಲ್ಲ.

ಟ್ರೋಫಿ ತಪ್ಪಿಸಿದ ಕೆಟ್ಟ ಫೀಲ್ಡಿಂಗ್

ದೀಪ್ತಿ ಶರ್ಮ ಎಸೆದ ಮೊದಲ ಎಸೆತವನ್ನೇ ಬೌಂಡರಿಗಟ್ಟಿದ್ದ ಅಲೀಸಾ ಹೀಲಿ, 9 ರನ್ ಬಾರಿಸಿದ್ದ ವೇಳೆ ಜೀವದಾನ ಪಡೆದರು. ಮೊದಲ ಓವರ್​ನ 5ನೇ ಎಸೆತವನ್ನು ಹೀಲಿ ಕವರ್ಸ್​ನತ್ತ ಅಟ್ಟಿದ್ದರು. ಆದರೆ, ಅನಗತ್ಯವಾಗಿ ಡೈವ್ ಮಾಡಿ ಕ್ಯಾಚ್ ಹಿಡಿಯುವ ಪ್ರಯತ್ನ ಮಾಡಿದ ಶೆಫಾಲಿ ಕ್ಯಾಚ್ ಕೈಚೆಲ್ಲಿದರು. ಆ ಓವರ್​ನಲ್ಲಿ ದೀಪ್ತಿ 14 ರನ್ ಬಿಟ್ಟುಕೊಟ್ಟರು.ಆ ಬಳಿಕ 8 ರನ್ ಬಾರಿಸಿದ್ದ ವೇಳೆ ಬೆಥ್ ಮೂನಿಯ ರಿಟರ್ನ್ ಕ್ಯಾಚ್​ಅನ್ನು ಪಡೆಯುವ ಯತ್ನದಲ್ಲಿ ರಾಜೇಶ್ವರಿ ಗಾಯಕ್ವಾಡ್ ವಿಫಲರಾದರು.

ಆರಂಭದಲ್ಲಿಯೇ ಸಿಕ್ಕ ಜೀವದಾನದ ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಂಡ ಹೀಲಿ-ಮೂನಿ ಜೋಡಿ ಮೊದಲ ವಿಕೆಟ್​ಗೆ 70 ಎಸೆತದಲ್ಲಿ 115 ರನ್ ಜತೆಯಾಟವಾಡುವ ಮೂಲಕ ಭದ್ರಬುನಾದಿ ಹಾಕಿದರು. 30 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಹೀಲಿ, ಶಿಖಾ ಪಾಂಡೆ ಎಸೆದ 11ನೇ ಓವರ್​ನ 3ನೇ ಎಸೆತವನ್ನು ಸಿಕ್ಸರ್​ಗಟ್ಟಿ ತಂಡದ ಮೊತ್ತವನ್ನು ಶತಕದ ಗಡಿ ದಾಟಿಸಿದರು.

ನಂತರದ ಎರಡೂ ಎಸೆತವನ್ನು ಸಿಕ್ಸರ್​ಗಟ್ಟಿದ್ದರಿಂದ ಆ ಓವರ್​ನಲ್ಲಿ 23 ರನ್ ಆಸೀಸ್​ಗೆ ಸೇರಿತು. ಮರು ಓವರ್​ನಲ್ಲಿ ಹೀಲಿ ಔಟಾದರೂ, ಆಸೀಸ್​ಗೆ ಸುಲಭವಾಗಿ 200 ರನ್​ಗಳ ಗಡಿ ದಾಟುವ ಅವಕಾಶವಿತ್ತು. ಒಂದೆಡೆ ಬೆಥ್ ಮೂನಿ ಅದೇ ಪ್ರಯತ್ನದಲ್ಲಿ ವೇಗವಾಗಿ ರನ್ ಕಲೆಹಾಕಿದರೆ, 17ನೇ ಓವರ್​ನಲ್ಲಿ ದೀಪ್ತಿ ಶರ್ಮ ನಾಯಕಿ ಮೆಗ್ ಲ್ಯಾನಿಂಗ್ (16) ಹಾಗೂ ಆಶ್ಲೆಗ್ ಗಾರ್ಡನರ್ (2) ವಿಕೆಟ್ ಉರುಳಿಸಿ ಕಡಿವಾಣ ಹಾಕಿದರು. ಕೊನೆ ಮೂರು ಓವರ್​ಗಳಲ್ಲಿ ಭಾರತ ಕೇವಲ 27 ರನ್ ನೀಡುವ ಮೂಲಕ ಆಸೀಸ್​ನ 200 ರನ್ ಆಸೆಯನ್ನು ಹಾಳು ಮಾಡಿತ್ತು.

ಆಸ್ಟ್ರೇಲಿಯಾ: 4 ವಿಕೆಟ್​ಗೆ 184

• ಅಲೀಸಾ ಹೀಲಿ ಸಿ ವೇದಾ ಬಿ ರಾಧಾ ಯಾದವ್ 75
• ಬೆಥ್ ಮೂನಿ ಔಟಾಗದೆ 78
• ಮೆಗ್ ಲ್ಯಾನಿಂಗ್ ಸಿ ಶಿಖಾ ಬಿ ದೀಪ್ತಿ 16
• ಗಾರ್ಡ್​ನರ್ ಸ್ಟಂಪ್ಡ್ ತಾನಿಯಾ ಬಿ ದೀಪ್ತಿ 2
• ರಾಚೆಲ್ ಹೇನ್ಸ್ ಬಿ ಪೂನಮ್ ಯಾದವ್ 4
• ನಿಕೋಲಾ ಕ್ಯಾರಿ ಔಟಾಗದೆ 5

ಇತರ: 4. ವಿಕೆಟ್ ಪತನ: 1-115, 2-154, 3-156, 4-176. ಬೌಲಿಂಗ್: ದೀಪ್ತಿ ಶರ್ಮ 4-0-38-2, ಶಿಖಾ ಪಾಂಡೆ 4-0-52-0, ರಾಜೇಶ್ವರಿ ಗಾಯಕ್ವಾಡ್ 4-0-29-0, ಪೂನಮ್ ಯಾದವ್ 4-0-30-1, ರಾಧಾ 4-0-34-1. ಭಾರತ: 19. 1 ಓವರ್​ಗಳಲ್ಲಿ 99

• ಶೆಫಾಲಿ ವರ್ಮ ಸಿ ಹೀಲಿ ಬಿ ಸ್ಕಟ್ 2
• ಸ್ಮೃತಿ ಮಂದನಾ ಸಿ ನಿಕೋಲಾ ಬಿ ಮೊಲಿನೆಕ್ಸ್ 11
• ತಾನಿಯಾ ಭಾಟಿಯಾ ನಿವೃತ್ತಿ (ಬದಲಿ) 2
• ಜೆಮೀಮಾ ಸಿ ನಿಕೋಲಾ ಬಿ ಜೊನಾಸೆನ್ 0
• ಹರ್ವನ್​ಪ್ರೀತ್ ಸಿ ಗಾರ್ಡ್​ನರ್ ಬಿ ಜೊನಾಸೆನ್ 4
• ದೀಪ್ತಿ ಶರ್ಮ ಸಿ ಮೂನಿ ಬಿ ನಿಕೋಲಾ 33
• ವೇದಾ ಸಿ ಜೊನಾಸೆನ್ ಬಿ ಕಿಮ್ಮೆನ್ಸ್ 19
• ರಿಚಾ ಘೋಷ್ ಸಿ ನಿಕೋಲಾ ಬಿ ಸ್ಕಟ್ 18
• ಶಿಖಾ ಪಾಂಡೆ ಸಿ ಮೂನಿ ಬಿ ಸ್ಕಟ್ 2
• ರಾಧಾ ಯಾದವ್ ಸಿ ಮೂನಿ ಬಿ ಜೊನಾಸೆನ್ 1
• ಪೂನಮ್ ಸಿ ಗಾರ್ಡ್​ನರ್ ಬಿ ಸ್ಕಟ್ 1
• ರಾಜೇಶ್ವರಿ ಗಾಯಕ್ವಾಡ್ ಔಟಾಗದೆ 1

ಇತರ: 5. ವಿಕೆಟ್ ಪತನ: 1-2, 2-8, 3-18, 4-30, 5-58, 6-88, 7-92, 8-96, 9-97. ಬೌಲಿಂಗ್: ಮೇಗನ್ ಸ್ಕಟ್ 3.1-0-18-4, ಜೆಸ್ ಜೊನಾಸೆನ್ 4-0-20-3, ಸೋಫಿ ಮೊಲಿನೆಕ್ಸ್ 4-0-21-1, ಕಿಮ್ಮೆನ್ಸ್ 4-0-17-1, ನಿಕೋಲಾ 4-0-23-1.

https://www.vijayavani.net/hardik-pandya-keeps-up-scintillating-form-with-55-ball-158-in-dy-patil-t20-cup/