VIDEO| ಮತ್ತೊಮ್ಮೆ ಹಾರ್ದಿಕ್​​ರಿಂದ ಸ್ಫೋಟಕ ಶತಕ: 55 ಎಸೆತ, 158 ರನ್, ಬರೋಬ್ಬರಿ 20 ಸಿಕ್ಸರ್ ಸಿಡಿಸಿದ ಆಲ್ರೌಂಡರ್!

ಮುಂಬೈ: ಗಾಯದ ಸಮಸ್ಯೆಯಿಂದಾಗಿ ಟೀಮ್​ ಇಂಡಿಯಾದಿಂದ ವಿರಾಮ ಪಡೆದು ಸದ್ಯ ಚೇತರಿಸಿಕೊಂಡಿರುವ ಆಲ್​ರೌಂಡರ್ ಹಾರ್ದಿಕ್ ಪಾಂಡ್ಯ 16ನೇ ಆವೃತ್ತಿಯ ಡಿವೈ ಪಾಟೀಲ್ ಟಿ20 ಕ್ರಿಕೆಟ್ ಟೂರ್ನಿಯಲ್ಲಿ ಸ್ಫೋಟಕ ಬ್ಯಾಟಿಂಗ್ ಮುಂದುವರಿಸಿದ್ದು, ಎರಡನೇ ಬಾರಿಗೆ ಶತಕ ಸಿಡಿಸಿದ್ದಾರೆ.

ರಿಲಯೆನ್ಸ್-1 ತಂಡದ ಪರ ಆಡುತ್ತಿರುವ ಪಾಂಡ್ಯ ಶುಕ್ರವಾರ ನಡೆದ ಬಿಪಿಸಿಎಲ್ ಎದುರಿನ ಸೆಮಿಫೈನಲ್ ಪಂದ್ಯದಲ್ಲಿ 55 ಎಸೆತಗಳಲ್ಲಿ 158 ರನ್ ಸಿಡಿಸಿ ಗಮನಸೆಳೆದಿದ್ದಾರೆ. ಇದರಲ್ಲಿ 6 ಬೌಂಡರಿ ಮತ್ತು 20 ಸಿಕ್ಸರ್​ಗಳಿದ್ದವು.

ಹಾರ್ದಿಕ್​ ಟೂರ್ನಿಯಲ್ಲಿ ಸಿಡಿಸಿದ 2ನೇ ಶತಕ ಇದಾಗಿದೆ. ಇದಕ್ಕೂ ಮೊದಲು ಮಂಗಳವಾರ ನಡೆದ ಪಂದ್ಯದಲ್ಲಿ ಸಿಎಜಿ ತಂಡದ ವಿರುದ್ಧ 7 ಬೌಂಡರಿ, 10 ಸಿಕ್ಸರ್​ ನೆರವಿನಿಂದ 39 ಎಸೆತಗಳಲ್ಲಿ ಬರೋಬ್ಬರಿ 105 ರನ್ ಸಿಡಿಸಿದ್ದರು.

ಇದನ್ನೂ ಓದಿ: VIDEO| 37 ಎಸೆತಗಳಲ್ಲಿ ಶತಕ ಸಿಡಿಸಿದ ಹಾರ್ದಿಕ್​: ಆಲ್ರೌಂಡರ್​ ಆಟಗಾರನ ಸ್ಫೋಟಕ ಬ್ಯಾಟಿಂಗ್ ವಿಡಿಯೋ ವೈರಲ್​!

ಚೇತರಿಕೆಯೊಂದಿಗೆ ಭರ್ಜರಿ ಫಾರ್ಮ್​ಗೆ ಮರಳಿರುವ ಹಾರ್ದಿಕ್​ ಮುಂಬೈ ಇಂಡಿಯನ್ಸ್ ಪರ ಐಪಿಎಲ್​ನಲ್ಲಿ ಕಣಕ್ಕಿಳಿಯಲು ಸಿದ್ಧತೆ ಕೈಗೊಂಡಿದ್ದಾರೆ. ಇನ್ನು ಮುಂಬೈ ಇಂಡಿಯನ್ಸ್​ ಕೂಡ ತನ್ನ ಯೂಟ್ಯೂಬ್​ ಚಾನೆಲ್​ನಲ್ಲಿ ಹಾರ್ದಿಕ್​ ವಿಡಿಯೋ ಅಪ್​ಲೋಡಿ ಮೆಚ್ಚುಗೆ ವ್ಯಕ್ತಪಡಿಸಿದೆ. ಪಾಂಡ್ಯ ಬ್ಯಾಟಿಂಗ್​ ಮೆಚ್ಚಿಕೊಂಡಿರುವ ಭಾವಿ ಪತ್ನಿ ನತಾಶಾ ಸ್ಟಾಂಕೋವಿಕ್​ ಹಾರ್ದಿಕ್​ರನ್ನು ಕುಂಗ್​ ಫೂ ಪಾಂಡ್ಯ ಎಂದು ಕರೆದಿದ್ದಾರೆ.

ಪಾಂಡ್ಯ ಸ್ಫೋಟಕ ಬ್ಯಾಟಿಂಗ್ ನೆರವಿನಿಂದ ರಿಲಯೆನ್ಸ್ ತಂಡ 238 ರನ್ ಪೇರಿಸಿತು. ಪ್ರತಿಯಾಗಿ ಬಿಪಿಸಿಎಲ್ ತಂಡ 134 ರನ್​ಗೆ ಕುಸಿದು 104 ರನ್​ಗಳಿಂದ ಶರಣಾಯಿತು. ಪಾಂಡ್ಯ 1 ವಿಕೆಟ್ ಕಬಳಿಸಿ ಬೌಲಿಂಗ್​ನಲ್ಲೂ ಮಿಂಚಿದರು.

ಇದನ್ನೂ ಓದಿ: ಕೇವಲ 37 ಎಸೆತಗಳಲ್ಲೇ ಸೆಂಚುರಿ ಬಾರಿಸಿದ ಹಾರ್ದಿಕ್​ ಪಾಂಡ್ಯಗೆ ಹೊಸ ಹೆಸರಿಟ್ಟ ಭಾವಿ ಪತ್ನಿ ನತಾಶಾ ಸ್ಟಾಂಕೋವಿಕ್

5 ತಿಂಗಳ ಹಿಂದಷ್ಟೇ ಬೆನ್ನು ನೋವು ಶಸ್ತ್ರ ಚಿಕಿತ್ಸೆಗೆ ಒಳಗಾಗಿದ್ದರು. ಆದರೆ, ಫಿಟ್ನೆಸ್ ಪರೀಕ್ಷೆಯಲ್ಲಿ ವಿಫಲರಾದ ಕಾರಣ ನ್ಯೂಜಿಲೆಂಡ್ ಪ್ರವಾಸಕ್ಕೆ ಅಲಭ್ಯರಾಗಿದ್ದರು. ಬಳಿಕ ಬೆಂಗಳೂರಿನಲ್ಲಿ ಎನ್​ಸಿಎಯಲ್ಲಿ ಪುನಶ್ಚೇತನ ಶಿಬಿರದಲ್ಲಿ ಪಾಲ್ಗೊಂಡಿದ್ದರು. ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿಗೆ ಪಾಂಡ್ಯ ಭಾರತ ತಂಡಕ್ಕೆ ಮರಳುವ ನಿರೀಕ್ಷೆ ಹೆಚ್ಚಾಗಿದೆ. (ಏಜೆನ್ಸೀಸ್​)