ವಿಶ್ವಕಪ್​ನಲ್ಲಿ ಗೆಲುವಿನ ಓಟ ಮುಂದುವರಿಸಿದ ನ್ಯೂಜಿಲೆಂಡ್; ಸುಲಭ ತುತ್ತಾದ ಬಾಂಗ್ಲಾದೇಶ

ಚೆನ್ನೈ: ಹಾಲಿ ರನ್ನರ್​ಅಪ್​ ನ್ಯೂಜಿಲೆಂಡ್​ ತಂಡ ಏಕದಿನ ವಿಶ್ವಕಪ್​ ಟೂರ್ನಿಯಲ್ಲಿ ಸರ್ವಾಂಗೀಣ ನಿರ್ವಹಣೆ ಮುಂದುವರಿಸುವ ಮೂಲಕ ಸತತ ಮೂರನೇ ಗೆಲುವಿನ ಸಂಭ್ರಮ ಕಂಡಿದೆ. ವೇಗಿಗಳ ಮಾರಕ ಬೌಲಿಂಗ್​ ದಾಳಿ ಮತ್ತು ನಾಯಕ ಕೇನ್​ ವಿಲಿಯಮ್ಸನ್​ (78 ರನ್​, 107 ಎಸೆತ, 8 ಬೌಂಡರಿ, 1 ಸಿಕ್ಸರ್​), ಡೆರಿಲ್​ ಮಿಚೆಲ್​ (89*ರನ್​, 67 ಎಸೆತ, 6 ಬೌಂಡರಿ, 4 ಸಿಕ್ಸರ್​) ಉಪಯುಕ್ತ ಬ್ಯಾಟಿಂಗ್​ ನಿರ್ವಹಣೆಯ ಬಲದಿಂದ ನ್ಯೂಜಿಲೆಂಡ್​ ತಂಡ ತನ್ನ 3ನೇ ಪಂದ್ಯದಲ್ಲಿ ಬಾಂಗ್ಲಾದೇಶ ತಂಡವನ್ನು 8 ವಿಕೆಟ್​ಗಳಿಂದ ಮಣಿಸಿತು.

ಚಿದಂಬರಂ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಬಾಂಗ್ಲಾ, ಆರಂಭಿಕ ಆಘಾತದ ನಡುವೆ 9 ವಿಕೆಟ್​ಗೆ 245 ರನ್​ ಪೇರಿಸಲಷ್ಟೇ ಶಕ್ತವಾಯಿತು. ಪ್ರತಿಯಾಗಿ ಕಿವೀಸ್​ 42.5 ಓವರ್​ಗಳಲ್ಲಿ 2 ವಿಕೆಟ್​ಗೆ 248 ರನ್​ ಪೇರಿಸಿ ಗೆಲುವಿನ ಓಟ ಮುಂದುವರಿಸಿತು. ವಿಲಿಯಮ್ಸನ್​ 2ನೇ ವಿಕೆಟ್​ಗೆ ಡೆವೊನ್​ ಕಾನ್​ವೇ (45) ಜತೆ 80 ಮತ್ತು ಮಿಚೆಲ್​ ಜತೆ 108 ರನ್​ ಸೇರಿಸಿ ಜಯದ ಹಾದಿ ಸುಲಭಗೊಳಿಸಿದರು.

ಕಿವೀಸ್​ ವೇಗಿಗಳಿಂದ ಕಡಿವಾಣ

ಪಂದ್ಯದ ಮೊದಲ ಎಸೆತದಲ್ಲೇ ಲಿಟನ್​ ದಾಸ್​ (0) ವಿಕೆಟ್​ ಕಬಳಿಸಿದ ವೇಗಿ ಟ್ರೆಂಟ್​ ಬೌಲ್ಟ್​ (45ಕ್ಕೆ 2) ಕಿವೀಸ್​ಗೆ ಕನಸಿನ ಆರಂಭ ಒದಗಿಸಿದರು. ಬಳಿಕ ಇನ್ನಿಬ್ಬರು ವೇಗಿಗಳಾದ ಮ್ಯಾಟ್​ ಹೆನ್ರಿ (58ಕ್ಕೆ 2) ಮತ್ತು ಲಾಕಿ ಫಗ್ಯುರ್ಸನ್​ (49ಕ್ಕೆ 3) ಕೂಡ ಬಿಗಿ ದಾಳಿ ಸಂಟಿಸಿದರು. ಇದರಿಂದ ಒಂದು ಹಂತದಲ್ಲಿ 56 ರನ್​ಗಳಿಗೆ 4 ವಿಕೆಟ್​ ಕಳೆದುಕೊಂಡು ಪರದಾಡಿದ ಬಾಂಗ್ಲಾ, ನಾಯಕ ಶಕೀಬ್​ ಅಲ್​ ಹಸನ್​ (40), ಮುಶ್ಫೀಕರ್​ ರಹೀಂ (66) ಹೋರಾಟದಿಂದ ಗೌರವಯುತ ಮೊತ್ತ ಪೇರಿಸುವಲ್ಲಿ ಸಫಲವಾಯಿತು.

ಬಾಂಗ್ಲಾದೇಶ: 9 ವಿಕೆಟ್​ಗೆ 245 (ಮೆಹಿದಿ ಹಸನ್​ 30, ಶಾಂಟೊ 7, ಶಕೀಬ್​ 40, ಮುಶ್ಫೀಕರ್​ 66, ಹೃದಯ್​ 13, ಮಹಮುದುಲ್ಲಾ 41*, ಟಸ್ಕಿನ್​ 17, ಫಗ್ಯುರ್ಸನ್​ 49ಕ್ಕೆ 3, ಹೆನ್ರಿ 58ಕ್ಕೆ 2, ಬೌಲ್ಟ್​ 45ಕ್ಕೆ 2, ಸ್ಯಾಂಟ್ನರ್​ 31ಕ್ಕೆ 1), ನ್ಯೂಜಿಲೆಂಡ್​: 42.5 ಓವರ್​ಗಳಲ್ಲಿ 2 ವಿಕೆಟ್​ಗೆ 248 (ಕಾನ್​ವೇ 45, ರಚಿನ್​ 9, ವಿಲಿಯಮ್ಸನ್​ 78, ಮಿಚೆಲ್​ 89*, ಫಿಲಿಪ್ಸ್​ 16*, ಮುಸ್ತಾಫಿಜುರ್​ 36ಕ್ಕೆ 1, ಶಕೀಬ್​ 54ಕ್ಕೆ 1). ಪಂದ್ಯಶ್ರೇಷ್ಠ: ಲಾಕಿ ಫಗ್ಯುರ್ಸನ್​.

ವಿಲಿಯಮ್ಸನ್​ಗೆ ಮತ್ತೆ ಗಾಯ

ಮೊಣಕಾಲು ಗಾಯದಿಂದ ಚೇತರಿಸಿಕೊಂಡು ಸುಮಾರು 7 ತಿಂಗಳ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಮರಳಿದ ಕಿವೀಸ್​ ನಾಯಕ ಕೇನ್​ ವಿಲಿಯಮ್ಸನ್​ ಅರ್ಧಶತಕ ಬಾರಿಸುವ ಮೂಲಕ ಯಶಸ್ವಿ ಪುನರಾಗಮನ ಕಂಡರು. ಆದರೆ ವೇಗಿ ಟಸ್ಕಿನ್​ ಅಹ್ಮದ್​ ಓವರ್​ನಲ್ಲಿ ಮಿಡ್​&ಆನ್​ನತ್ತ ಚೆಂಡು ಬಾರಿಸಿ ಸಿಂಗಲ್ಸ್​ ಕಸಿಯುವ ವೇಳೆ ಬಂದ ಥ್ರೋ ಅವರ ಎಡಕೈಗೆ ತಾಗಿತು. ಇದರಿಂದ ಅವರ ಮೊಣಕೈಗೆ ಗಾಯವಾಯಿತು. ಬಳಿಕ ನೋವಿನ ನಡುವೆ ಕೆಲ ಎಸೆತ ಎದುರಿಸಿದ ಬಳಿಕ ನಿವೃತ್ತಿ ಹೊಂದಿ ಡ್ರೆಸ್ಸಿಂಗ್​ ರೂಂಗೆ ಮರಳಿ ಹೆಚ್ಚಿನ ಚಿಕಿತ್ಸೆ ಪಡೆದರು.

https://www.vijayavani.net/many-records-broken-in-world-cup-cricket-in-first-week-itself