ಗುಕೇಶ್​ ಎಂದರೆ ಏನರ್ಥ? ನೂತನ ಚೆಸ್​ ವಿಶ್ವ ಚಾಂಪಿಯನ್ ಪಡೆದ ಬಹುಮಾನವೆಷ್ಟು?

ಸಿಂಗಾಪುರ: ಭಾರತದ ಚದುರಂಗ ಚತುರ ದೊಮ್ಮರಾಜು ಗುಕೇಶ್​ ಈಗ ಜಾಗತಿಕ ಚೆಸ್​ ರಾಜನಾಗಿ ಹೊಸ ಇತಿಹಾಸ ನಿರ್ಮಿಸಿದ್ದಾರೆ. 18 ವರ್ಷದ ಗ್ರಾಂಡ್​ ಮಾಸ್ಟರ್​ ಡಿ. ಗುಕೇಶ್​ ವಿಶ್ವ ಚೆಸ್​ ಚಾಂಪಿಯನ್​ ಪಟ್ಟವೇರಿದ ಅತಿಕಿರಿಯ ಆಟಗಾರ ಮತ್ತು ಎರಡನೇ ಭಾರತೀಯರೆಂಬ ದಾಖಲೆ ಬರೆದಿದ್ದಾರೆ. ಈ ಮೂಲಕ ವಿಶ್ವ ಚೆಸ್​ನಲ್ಲಿ ಭಾರತದ ಪ್ರಾಬಲ್ಯವನ್ನು ಮರುಸ್ಥಾಪಿಸಿದ್ದಾರೆ. ಗುಕೇಶ್​ 18ನೇ ವಯಸ್ಸಿನಲ್ಲೇ ವಿಶ್ವದ 18ನೇ ವಿಶ್ವ ಚಾಂಪಿಯನ್​ ಎನಿಸಿರುವುದು ವಿಶೇಷವಾಗಿದೆ. ಜತೆಗೆ ಗುಕೇಶ್​ ತನ್ನ ಹೆಸರಿಗೆ ತಕ್ಕಂತೆ ಸಾಧನೆ ಮೆರೆದಿರುವುದ ಗಮನಾರ್ಹ.

ಗುಕೇಶ್​ ಎಂದರೆ...

ಗುಕೇಸ್​ ಎಂದರೆ ಸದ್ಗುಣ, ಶಿವ (ಕಪ್ಪು ಕೇಶ ಹೊಂದಿರುವವ) ಅಥವಾ "ಜಗತ್ತನ್ನೇ ಗೆದ್ದವನು' ಎಂದರ್ಥ. ಗುಕೇಶ್​ ಈಗ ತನ್ನ ಹೆಸರಿಗೆ ತಕ್ಕಂತೆ ಚೆಸ್​ನಲ್ಲಿ ವಿಶ್ವವಿಜೇತರಾಗಿದ್ದಾರೆ. ಮಗನಿಗೆ "ಜಿ' ಅಥವಾ "ಗು'ನಿಂದ ಶುರುವಾಗುವ ಅಕ್ಷರದ ಹೆಸರಿಡಲು ಜ್ಯೋತಿಷಿ ಸೂಚಿಸಿದ್ದರಿಂದ ಗುಕೇಶ್​ ಪೋಷಕರು ಈ ವಿಶೇಷ ಹೆಸರನ್ನು ಆಯ್ದುಕೊಂಡಿದ್ದರಂತೆ.

ಅತಿಕಿರಿಯ ಸಾಧಕ

18 ವರ್ಷ, 8 ತಿಂಗಳು, 14 ದಿನ ವಯಸ್ಸಿನ ಡಿ. ಗುಕೇಶ್​ ಅತಿ ಕಿರಿಯ ವಿಶ್ವ ಚೆಸ್​ ಚಾಂಪಿಯನ್​ ಎನಿಸಿದ್ದಾರೆ. ರಷ್ಯಾದ ಗ್ಯಾರಿ ಕ್ಯಾಸ್ಪರೋವ್​ 1985ರಲ್ಲಿ 22 ವರ್ಷ, 6 ತಿಂಗಳು, 27 ದಿನ ವಯಸ್ಸಿನಲ್ಲಿ ಈ ಸಾಧನೆ ಮಾಡಿದ್ದು ಹಿಂದಿನ ದಾಖಲೆ. ಮ್ಯಾಗ್ನಸ್​ ಕಾರ್ಲ್​ಸೆನ್​ 2013ರಲ್ಲಿ 22 ವರ್ಷ 11 ತಿಂಗಳು, 24 ದಿನ ವಯಸ್ಸಿನಲ್ಲಿ ಈ ಸಾಧನೆ ಮಾಡಿ ಕ್ಯಾಸ್ಪರೋವ್​ ದಾಖಲೆ ಮುರಿಯುವ ಸನಿಹ ಹೋಗಿದ್ದರು. 1988ರಲ್ಲಿ 18ನೇ ವಯಸ್ಸಿನಲ್ಲೇ ಭಾರತದ ಮೊದಲ ಗ್ರಾಂಡ್​ ಮಾಸ್ಟರ್​ ಎನಿಸಿದ್ದ ವಿಶ್ವನಾಥನ್​ ಆನಂದ್​, 2000ದಲ್ಲಿ ಮೊದಲ ಬಾರಿ ವಿಶ್ವ ಚಾಂಪಿಯನ್​ ಆದಾಗ 30 ವರ್ಷ ವಯಸ್ಸಾಗಿತ್ತು.

11.03 ಕೋಟಿ ರೂ. ಬಹುಮಾನ

ಒಟ್ಟಾರೆ ಬಹುಮಾನ ಮೊತ್ತ 21.21 ಕೋಟಿ ರೂ.ಗಳಲ್ಲಿ ಚಾಂಪಿಯನ್​ ಗುಕೇಶ್​ಗೆ 11.03 ಕೋಟಿ ರೂ. ಮತ್ತು ರನ್ನರ್​ಅಪ್​ ಲಿರೆನ್​ಗೆ 10.18 ಕೋಟಿ ರೂ. ದೊರೆಯಲಿದೆ.

ವಿಶ್ವ ಗೆದ್ದ ಚೆನ್ನೈನ ಚದುರಂಗ ಚತುರ

ಏಳನೇ ವಯಸ್ಸಿನಲ್ಲೇ ಚೆಸ್​ ಆಡಲಾರಂಭಿಸಿದ ಡಿ. ಗುಕೇಶ್​ ಅವರ ತಂದೆ ಡಾ. ರಜನಿಕಾಂತ್​ ಇಎನ್​ಟಿ ಸರ್ಜನ್​ ಮತ್ತು ತಾಯಿ ಡಾ. ಪದ್ಮಾ ಮೈಕ್ರೋ ಬಯೋಲಾಜಿಸ್ಟ್​. ಗುಕೇಶ್​ 2006ರ ಮೇ 29ರಂದು ತಮಿಳುನಾಡಿನ ಚೆನ್ನೈನಲ್ಲಿ ಜನಿಸಿ ಅಲ್ಲೇ ಬೆಳೆದಿದ್ದರೂ, ಅವರ ಮಾತೃಭಾಷೆ ತೆಲುಗು. ಯಾಕೆಂದರೆ ಅವರ ಕುಟುಂಬದ ಮೂಲ ಆಂಧ್ರ ಪ್ರದೇಶದ ಗೋದಾವರಿ ಆಗಿದೆ. ಮಗನ ಚೆಸ್​ ಕನಸು ನನಸಾಗಿಸುವ ಸಲುವಾಗಿ ತಂದೆ ರಜನಿಕಾಂತ್​ ವೈದ್ಯ ವೃತ್ತಿಯನ್ನೇ ತೊರೆದು ಮಗನೊಂದಿಗೆ ವಿವಿಧ ಚೆಸ್​ ಟೂರ್ನಿಗಳಿಗೆ ಪ್ರಯಾಣಿಸಲಾರಂಭಿಸಿದ್ದರು. 2015ರಲ್ಲಿ 9ನೇ ವಯಸ್ಸಿನಲ್ಲೇ ಏಷ್ಯನ್​ ಸ್ಕೂಲ್​ ಚೆಸ್​ ಚಾಂಪಿಯನ್​ಷಿಪ್​ ಮತ್ತು 2018ರಲ್ಲಿ ವಿಶ್ವ ಯೂತ್​ ಚೆಸ್​ ಚಾಂಪಿಯನ್​ಷಿಪ್​ ಗೆದ್ದಿರುವ ಗುಕೇಶ್​ 2017ರಲ್ಲೇ ಅಂತಾರಾಷ್ಟ್ರೀಯ ಮಾಸ್ಟರ್​ ಆಗಿದ್ದರು. 2019ರಲ್ಲಿ 12 ವರ್ಷ, 7 ತಿಂಗಳು, 17 ದಿನ ವಯಸ್ಸಿನಲ್ಲೇ ಗ್ರಾಂಡ್​ ಮಾಸ್ಟರ್​ ಪಟ್ಟವೇರುವ ಮೂಲಕ ಈ ಸಾಧನೆ ಮಾಡಿದ ವಿಶ್ವದ 2ನೇ ಅತ್ಯಂತ ಕಿರಿಯರೆನಿಸಿದ್ದರು. ಕೇವಲ 17 ದಿನಗಳ ಅಂತರದಿಂದ ಅವರು ರಷ್ಯಾದ ಸೆರ್ಗಿ ಕರಿಜಕಿನ್​ ದಾಖಲೆಯಿಂದ ಹಿಂದುಳಿದಿದ್ದರು. ನಂತರದಲ್ಲಿ ಭಾರತದವರೇ ಆದ ಅಭಿಮನ್ಯು ಮಿಶ್ರಾ 12 ವರ್ಷ, 4 ತಿಂಗಳು ವಯಸ್ಸಲ್ಲೇ ಈ ಸಾಧನೆ ಮಾಡಿ ಗುಕೇಶ್​ರನ್ನು 3ನೇ ಸ್ಥಾನಕ್ಕೆ ತಳ್ಳಿದ್ದರು. ಫಿಡೆ ಚೆಸ್​ ರೇಟಿಂಗ್​ನಲ್ಲಿ 2,700 ಅಂಕ ಕಲೆಹಾಕಿರುವ 3ನೇ ಅತಿ ಕಿರಿಯ ಎನಿಸಿರುವ ಗುಕೇಶ್​, 2,750 ಅಂಕ ಕಲೆಹಾಕಿದ ಅತಿಕಿರಿಯರೂ ಆಗಿದ್ದಾರೆ. ಕಳೆದ ವರ್ಷ ಹಾಂಗ್​ರೆೌ ಏಷ್ಯನ್​ ಗೇಮ್ಸ್​ನಲ್ಲಿ ಗುಕೇಶ್​ ರಜತ ಪದಕ ಒಲಿಸಿಕೊಂಡಿದ್ದರು. ಹಾಲಿ ವರ್ಷ ಭಾರತ ತಂಡ ಚೊಚ್ಚಲ ಚೆಸ್​ ಒಲಿಂಪಿಯಾಡ್​ ಜಯಿಸುವಲ್ಲೂ ಗುಕೇಶ್​ ನಿರ್ಣಾಯಕ ಪಾತ್ರ ನಿರ್ವಹಿಸಿದ್ದರು. ಟೂರ್ನಿಯ 10 ಪಂದ್ಯಗಳಲ್ಲಿ 8ರಲ್ಲಿ ಗೆದ್ದು, 2ರಲ್ಲಿ ಡ್ರಾ ಸಾಧಿಸಿದ್ದ ಗುಕೇಶ್​, ಇದೀಗ ವಿಶ್ವ ಚಾಂಪಿಯನ್​ ಪಟ್ಟವೇರಿ ಇತಿಹಾಸ ಬರೆದಿದ್ದಾರೆ.

18 ವಿಶ್ವ ಚೆಸ್​ ಚಾಂಪಿಯನ್ಸ್​

1. ವಿಲ್ಲೆಲ್ಮ್​ ಸ್ಟೀನಿಟ್ಜ್​ (ಅಮೆರಿಕ), 2. ಇಮ್ಯಾನ್ಯುಯೆಲ್​ ಲಾಸ್ಕರ್​ (ಜರ್ಮನಿ), 3. ಜೋಸ್​ ರೌಲ್​ ಕ್ಯಾಪಬ್ಲಾಂಕಾ (ಕ್ಯುಬಾ), 4. ಅಲೆಕ್ಸಾಂಡರ್​ ಅಲೆಖೈನ್​ (ಫ್ರಾನ್ಸ್​), 5. ಮ್ಯಾಕ್ಸ್​ ಯುವೆ (ನೆದರ್ಲೆಂಡ್​), 6. ಮಿಖಾಯಿಲ್​ ಬೋಟ್ವಿನಿಕ್​ (ರಷ್ಯಾ), 7. ವಾಸಿಲಿ ಸ್ಮಿಸ್ಲೋವ್​ (ರಷ್ಯಾ), 8. ಮಿಖಾಯಿಲ್​ ತಾಲ್​ (ಲಾತ್ವಿಯಾ), 9. ಟೈಗ್ರಾನ್​ ವಿ. ಪೆಟ್ರೋಸಿಯನ್​ (ಅಮೆರಿಕ), 10. ಬೋರಿಸ್​ ಸ್ಪಾಸ್ಕಿ (ರಷ್ಯಾ), 11. ಬಾಬಿ ಫಿಶರ್​ (ಅಮೆರಿಕ), 12. ಅನಾಟೊಲಿ ಕಾಪೋರ್ವ್​ (ರಷ್ಯಾ), 13. ಗ್ಯಾರಿ ಕ್ಯಾಸ್ಪರೋವ್​ (ರಷ್ಯಾ), 14. ವ್ಲಾದಿಮಿರ್​ ಕ್ರಾಮ್ನಿಕ್​ (ರಷ್ಯಾ), 15. ವಿಶ್ವನಾಥನ್​ ಆನಂದ್​ (ಭಾರತ), 16. ಮ್ಯಾಗ್ನಸ್​ ಕಾರ್ಲ್​ಸೆನ್​ (ನಾರ್ವೆ), 17. ಡಿಂಗ್​ ಲಿರೆನ್​ (ಚೀನಾ), 18. ಡಿ. ಗುಕೇಶ್​ (ಭಾರತ).

ಭಾರತೀಯ ಚದುರಂಗದ ಸ್ವರ್ಣಯುಗ

ಚದುರಂಗ ಆಟ ಹುಟ್ಟಿದ್ದು ಭಾರತದಲ್ಲೇ. ಪುರಾಣದಲ್ಲೂ ಇದರ ಉಲ್ಲೇಖಗಳಿವೆ. ಆದರೆ ಚೆಸ್​ ಒಂದು ವೃತ್ತಿಪರ ಕ್ರೀಡೆಯೂ ಆಗಬಹುದು ಎಂಬುದನ್ನು ಭಾರತೀಯರಿಗೆ ತೋರಿಸಿಕೊಟ್ಟಿದ್ದು ವಿಶ್ವನಾಥನ್​ ಆನಂದ್​. 1988ರಲ್ಲಿ ಅವರು ಭಾರತದ ಮೊದಲ ಗ್ರಾಂಡ್​ ಮಾಸ್ಟರ್​ ಆದಾಗ ವಿಶ್ವ ಚೆಸ್​ನಲ್ಲಿ ಒಂದು ಹನಿಯಷ್ಟೇ ಆಗಿದ್ದರು. ಆದರೆ ಈಗ ಭಾರತ ಅದನ್ನು ಸಾಗರವಾಗಿ ಪರಿವರ್ತಿಸಿದೆ. ಈಗ ಅವರದೇ ಸ್ಫೂರ್ತಿಯಲ್ಲಿ ದೇಶದಲ್ಲಿ 85 ಗ್ರಾಂಡ್​ ಮಾಸ್ಟರ್​ಗಳು, 124 ಅಂತಾರಾಷ್ಟ್ರೀಯ ಮಾಸ್ಟರ್​ಗಳಿದ್ದಾರೆ. ಓರ್ವ ವಿಶ್ವನಾಥನ್​ ಆನಂದ್​ ತುಂಬಿದ ಸ್ಫೂರ್ತಿಯಿಂದ ಇಂದು ಪ್ರತಿಭಾವಂತ ಚೆಸ್​ ಆಟಗಾರರ ದೊಡ್ಡ ಬಲವೇ ಭಾರತಕ್ಕೆ ಸಿಕ್ಕಿದೆ. ರಷ್ಯಾ ಸೇರಿ ಸೋವಿಯತ್​ ಒಕ್ಕೂಟಕ್ಕೆ ಆನಂದ್​ ಮೊದಲಿಗರಾಗಿ ಸೆಡ್ಡು ಹೊಡೆದಿದ್ದರೆ, ಇದೀಗ ಗುಕೇಶ್​ ವಿಶ್ವ ಚೆಸ್​ನಲ್ಲಿ ಭಾರತದ ಪ್ರಾಬಲ್ಯವನ್ನು ಮರುಸ್ಥಾಪಿಸಿದ್ದಾರೆ. ಕಳೆದ ವರ್ಷ ಆರ್​. ಪ್ರಜ್ಞಾನಂದ ಚೆಸ್​ ವಿಶ್ವಕಪ್​ ಗೆಲುವಿನ ಸನಿಹ ತಲುಪಿ ರನ್ನರ್​ಅಪ್​ ಆಗಿದ್ದರೆ, ಕಳೆದ ಸೆಪ್ಟೆಂಬರ್​ನಲ್ಲಿ ಹಂಗೆರಿಯ ಬುಡಾಪೆಸ್ಟ್​ನಲ್ಲಿ ನಡೆದ 45ನೇ ಚೆಸ್​ ಒಲಿಂಪಿಯಾಡ್​ನಲ್ಲಿ ಮೊಟ್ಟಮೊದಲ ಬಾರಿಗೆ ಭಾರತದ ಪುರುಷರ ಮತ್ತು ಮಹಿಳಾ ತಂಡಗಳು ಸ್ವರ್ಣ ಪದಕ ಗೆದ್ದು ಇತಿಹಾಸ ರಚಿಸಿತ್ತು. ಇದೀಗ ಗುಕೇಶ್​ ವಿಶ್ವ ಚಾಂಪಿಯನ್​ ಪಟ್ಟವೇರುವುದರೊಂದಿಗೆ ಭಾರತೀಯ ಚದುರಂಗದ ಸ್ವರ್ಣಯುಗವನ್ನು ಸಾರಿದ್ದಾರೆ.

ನೆರವಾದ ಆನಂದ್​

ಸೋವಿಯತ್​ ಯೂನಿಯನ್​ನಲ್ಲಿ ಶಾಲೆಗಳಲ್ಲಿ ಚೆಸ್​ ಕಲಿಸುವುದನ್ನು ತಾನು 3 ದಶಕಗಳ ಹಿಂದೆಯೇ ನೋಡಿದ್ದ ಸ್ಫೂರ್ತಿಯಿಂದ ವಿಶ್ವನಾಥನ್​ ಆನಂದ್​ ಚೆನ್ನೆ$ನಲ್ಲಿ ಸ್ಥಾಪಿಸಿರುವ ಚೆಸ್​ ಅಕಾಡೆಮಿ (ವೆಸ್ಟ್​ಬ್ರಿಡ್ಜ್​ ಆನಂದ್​ ಚೆಸ್​ ಅಕಾಡೆಮಿ) ದೇಶದ ಚೆಸ್​ ಕ್ರಾಂತಿಯಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಆರನೇ ವಯಸ್ಸಿನಲ್ಲೇ ಅಮ್ಮ ಸುಶೀಲಾರಿಂದ ಚೆಸ್​ ಆಟವನ್ನು ಕಲಿತಿದ್ದ ವಿಶ್ವನಾಥನ್​ ಆನಂದ್​, ಭವಿಷ್ಯದ ಚೆಸ್​ ತಾರೆಯರನ್ನು ಬೆಳೆಸುವಲ್ಲಿ ವಿಶೇಷ ಕೊಡುಗೆ ನೀಡುತ್ತ ಬಂದಿದ್ದಾರೆ. ಈಗ 55ನೇ ವಯಸ್ಸಿನಲ್ಲಿ ಆನಂದ್​ ವೃತ್ತಿಪರ ಚೆಸ್​ ಆಟದಿಂದ ಸ್ವಲ್ಪ ವಿರಾಮಯಲ್ಲಿದ್ದರೂ, ಇನ್ನೂ ನಿವೃತ್ತಿ ಪಡೆದಿಲ್ಲ. ಚೆಸ್​ ಒಲಿಂಪಿಯಾಡ್​ ನಂತರ ವಿಶ್ವ ಚೆಸ್​ ಚಾಂಪಿಯನ್​ಷಿಪ್​ನಲ್ಲೂ ಗುಕೇಶ್​ಗೆ ತಂದೆಯ ಸ್ಥಾನದಲ್ಲಿ ನಿಂತು ಮಾರ್ಗದರ್ಶನ ನೀಡಿದ್ದಾರೆ.

https://www.vijayavani.net/jaiswal-who-came-late-team-india-bus-left-at-the-hotel