ತಡವಾಗಿ ಬಂದ ಯಶಸ್ವಿ ಜೈಸ್ವಾಲ್​; ಹೋಟೆಲ್​ನಲ್ಲೇ ಬಿಟ್ಟುಹೋದ ಟೀಮ್​ ಇಂಡಿಯಾ ಬಸ್​!

ಬ್ರಿಸ್ಬೇನ್: ಭಾರತ ತಂಡ ಬುಧವಾರ ಬೆಳಗ್ಗೆ ಬ್ರಿಸ್ಬೇನ್​ಗೆ ಪ್ರಯಾಣಿಸಲು ಅಡಿಲೇಡ್​ ಹೋಟೆಲ್​ನಿಂದ ವಿಮಾನ ನಿಲ್ದಾಣಕ್ಕೆ ಬಸ್​ನಲ್ಲಿ ಪ್ರಯಾಣಿಸಲು ಯುವ ಆರಂಭಿಕ ಯಶಸ್ವಿ ಜೈಸ್ವಾಲ್​ ಸರಿಯಾದ ಸಮಯಕ್ಕೆ ಬರಲಿಲ್ಲ. ಆಟಗಾರರು ಎರಡು ಬಸ್​ಗಳಲ್ಲಿ ವಿಮಾನ ನಿಲ್ದಾಣಕ್ಕೆ ತೆರಳಬೇಕಾಗಿತ್ತು.

ಮೊದಲ ಬಸ್​ ಬೇಗನೆ ತೆರಳಿದ್ದರೆ, 2ನೇ ಬಸ್​ನಲ್ಲಿ ನಾಯಕ ರೋಹಿತ್​ ಶರ್ಮ, ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್​ ಅಗರ್ಕರ್​ ಜತೆಗೆ ಮುಖ್ಯ ಕೋಚ್​ ಗೌತಮ್​ ಗಂಭೀರ್​ ಸಹಿತ ತಂಡದ ತರಬೇತಿ ಸಿಬ್ಬಂದಿಯೊಂದಿಗೆ ಜೈಸ್ವಾಲ್​ ಕೂಡ ವಿಮಾನನಿಲ್ದಾಣಕ್ಕೆ ಹೋಗಬೇಕಿತ್ತು. ಆದರೆ ಜೈಸ್ವಾಲ್​ಗಾಗಿ ಇತರರು ಹೋಟೆಲ್​ ಲಾಬಿಯಲ್ಲಿ ಎಷ್ಟು ಕಾದರೂ ಅವರು ಬರುವುದು ಕಾಣಿಸಲಿಲ್ಲ. ಯುವ ಆಟಗಾರನ ಈ ಅಶಿಸ್ತಿನ ವರ್ತನೆಯಿಂದ ಸಿಟ್ಟಾದ ನಾಯಕ ರೋಹಿತ್​ ಶರ್ಮ, ಜೈಸ್ವಾಲ್​ರನ್ನು ಬಿಟ್ಟೇ ವಿಮಾನ ನಿಲ್ದಾಣಕ್ಕೆ ತೆರಳಲು ಬಸ್​ ಡೆವರ್​ಗೆ ಸೂಚಿಸಿದರು.

ಆದರೆ ಆಗ ತಂಡದ ಮ್ಯಾನೇಜರ್​ ಮತ್ತು ಭದ್ರತಾ ಅಧಿಕಾರಿ ಬಸ್​ನಿಂದ ಇಳಿದರು. 20 ನಿಮಿಷಗಳ ಬಳಿಕ ಜೈಸ್ವಾಲ್​ ಬಂದಾಗ ಬಸ್​ ತನ್ನನ್ನು ಬಿಟ್ಟು ತೆರಳಿರುವುದನ್ನು ನೋಡಿ ಗಲಿಬಿಲಿಗೊಂಡರು. ಬಳಿಕ ಮ್ಯಾನೇಜರ್​ ಮತ್ತು ಭದ್ರತಾ ಅಧಿಕಾರಿಯೊಂದಿಗೆ ಜೈಸ್ವಾಲ್​ ಕಾರಿನಲ್ಲಿ ವಿಮಾನ ನಿಲ್ದಾಣಕ್ಕೆ ತೆರಳಿದರು. ಇನ್ನು ವಿರಾಟ್​ ಕೊಹ್ಲಿ ಮತ್ತು ಜಸ್​ಪ್ರೀತ್​ ಬುಮ್ರಾ ಪ್ರವಾಸಕ್ಕೆ ಕುಟುಂಬದೊಂದಿಗೆ ತೆರಳಿರುವುದರಿಂದ ಪ್ರತ್ಯೇಕವಾಗಿ ಬಾಡಿಗೆ ವಿಮಾನದಲ್ಲಿ ಬ್ರಿಸ್ಬೇನ್​ಗೆ ತೆರಳಿದರು.

https://www.vijayavani.net/manish-pandey-gets-kok-from-karnataka-team-for-vijay-hazare-trophy-a-closed-door-for-an-experienced-batter