ಚೆಸ್​ ವಿಶ್ವಕಪ್​ನಲ್ಲಿ ಸೆಮಿಫೈನಲ್​ ಪ್ರವೇಶಿಸಿ ಇತಿಹಾಸ ಬರೆದ ಭಾರತದ ಪ್ರಜ್ಞಾನಂದ

ಬಾಕು (ಅಜರ್​ಬೈಜಾನ್​): ಭಾರತದ ಯುವ ಗ್ರಾಂಡ್​ ಮಾಸ್ಟರ್​ ಆರ್​. ಪ್ರಜ್ಞಾನಂದ ಚೆಸ್​ ವಿಶ್ವಕಪ್​ನಲ್ಲಿ ಉಪಾಂತ್ಯ ಪ್ರವೇಶಿಸುವ ಮೂಲಕ ಹೊಸ ಇತಿಹಾಸ ಬರೆದಿದ್ದಾರೆ. 18 ವರ್ಷದ ಪ್ರಜ್ಞಾನಂದ ಅವರು ಜಿದ್ದಾಜಿದ್ದಿನ ಕ್ವಾರ್ಟರ್​ಫೈನಲ್​ ಪಂದ್ಯದಲ್ಲಿ ದೇಶಬಾಂಧವ ಅರ್ಜುನ್​ ಎರಿಗೈಸಿ ವಿರುದ್ಧ 5-4ರಿಂದ ರೋಚಕ ಗೆಲುವು ದಾಖಲಿಸುವ ಮೂಲಕ ಈ ಸಾಧನೆ ಮಾಡಿದರು.

ದಿಗ್ಗಜ ವಿಶ್ವನಾಥನ್​ ಆನಂದ್​ ಅವರು 2000 ಮತ್ತು 2002ರಲ್ಲಿ ಚೆಸ್​ ವಿಶ್ವಕಪ್​ ಗೆದ್ದಿದ್ದರು. ನಂತರದಲ್ಲಿ ಈ ಪ್ರಶಸ್ತಿಯ ಸನಿಹ ತಲುಪಿದ ಮೊದಲ ಭಾರತೀಯ ಎಂಬ ಹೆಗ್ಗಳಿಕೆ ಪ್ರಜ್ಞಾನಂದ ಅವರದಾಗಿದೆ.

ಅಂತಿಮ ಎಂಟರ ಘಟ್ಟದ ಮೊದಲೆರಡು ಪಂದ್ಯಗಳಲ್ಲಿ 1-1 ಸಮಬಲ ಸಾಧಿಸಿದ ಬಳಿಕ ಅರ್ಜುನ್​-ಪ್ರಜ್ಞಾನಂದ ಗುರುವಾರ ಟೈ-ಬ್ರೇಕರ್​ನಲ್ಲೂ ನಿಕಟ ಪೈಪೋಟಿ ನಡೆಸಿದರು. ಟೈಬ್ರೇಕರ್​ನಲ್ಲಿ ಇಬ್ಬರು ಆಟಗಾರರು 7 ಪಂದ್ಯಗಳಲ್ಲಿ ಸೆಣಸಿ ಅಂತಿಮವಾಗಿ ಸಡನ್​ಡೆತ್​ನಲ್ಲಿ ಪ್ರಜ್ಞಾನಂದ 19 ವರ್ಷದ ಅರ್ಜುನ್​ ವಿರುದ್ಧ ರೋಚಕ ಗೆಲುವು ಒಲಿಸಿಕೊಂಡರು. ಪ್ರಜ್ಞಾನಂದ ಸೆಮೀಸ್​ನಲ್ಲಿ ಅಮೆರಿಕದ ಫ್ಯಾಬಿಯಾನೊ ಕರುವಾನಾ ವಿರುದ್ಧ ಕಾದಾಡಲಿದ್ದಾರೆ. ಉಪಾಂತ್ಯ ಪ್ರವೇಶದೊಂದಿಗೆ ಪ್ರಜ್ಞಾನಂದ 2024ರ ಕ್ಯಾಂಡಿಡೇಟ್​ ಚೆಸ್​ ಟೂರ್ನಿಗೂ ಅರ್ಹತೆ ಪಡೆಯುವ ನಿರೀಕ್ಷೆ ಇದೆ.

https://www.vijayavani.net/ipl-took-15-years-to-set-up-wpl-pkl-facing-commercial-challenge-for-womens-league