ದಕ್ಷಿಣ ಆಫ್ರಿಕಾ ಪ್ರವಾಸದ ಟಿ20 ಸರಣಿಗೆ ವಿವಿಎಸ್​ ಲಕ್ಷ್ಮಣ್​ ಭಾರತ ತಂಡದ ಹಂಗಾಮಿ​ ಕೋಚ್​

ನವದೆಹಲಿ: ಮುಂಬರುವ ದಕ್ಷಿಣ ಆಫ್ರಿಕಾ ಪ್ರವಾಸದ ಟಿ20 ಸರಣಿಗೆ ವಿವಿಎಸ್​ ಲಕ್ಷ್ಮಣ್​ ಅವರನ್ನು ಮತ್ತೊಮ್ಮೆ ಭಾರತ ತಂಡದ ಹಂಗಾಮಿ ಕೋಚ್​ ಆಗಿ ನೇಮಕಗೊಳಿಸಲಾಗಿದೆ. ನವೆಂಬರ್​ 8ರಿಂದ ನಡೆಯಲಿರುವ ಸರಣಿಯಲ್ಲಿ ಭಾರತ ತಂಡ 4 ಟಿ20 ಪಂದ್ಯಗಳನ್ನು ಆಡಲಿದೆ.

ನವೆಂಬರ್​ 22ರಿಂದ ನಡೆಯಲಿರುವ ಆಸ್ಟ್ರೆಲಿಯಾ ಪ್ರವಾಸದ ಬಾರ್ಡರ್​-ಗಾವಸ್ಕರ್​ ಟ್ರೋಫಿ ಟೆಸ್ಟ್​ ಸರಣಿಗಾಗಿ ಭಾರತ ತಂಡ ನವೆಂಬರ್​ 10ರಂದೇ ತೆರಳಲಿದೆ. ಮುಖ್ಯ ಕೋಚ್​ ಗೌತಮ್​ ಗಂಭೀರ್​ ಕೂಡ ಟೆಸ್ಟ್​ ತಂಡದೊಂದಿಗೆ ಆಸ್ಟ್ರೆಲಿಯಾಕ್ಕೆ ತೆರಳಲಿದ್ದಾರೆ. ಹೀಗಾಗಿ ಅದೇ ಸಮಯದಲ್ಲಿ ನಡೆಯಲಿರುವ ದಕ್ಷಿಣ ಆಫ್ರಿಕಾ ಪ್ರವಾಸದ ಟಿ20 ಸರಣಿಯಲ್ಲಿ ಬಿಸಿಸಿಐ, ಲಕ್ಷ್ಮಣ್​ಗೆ ತಾತ್ಕಾಲಿಕ ಜವಾಬ್ದಾರಿ ನೀಡಿದೆ.

ಲಕ್ಷ್ಮಣ್​ ಭಾರತ ತಂಡದ ಹಂಗಾಮಿ ಕೋಚ್​ ಆಗಿ ಕಾರ್ಯನಿರ್ವಹಿಸುತ್ತಿರುವುದು ಇದೇ ಮೊದಲಲ್ಲ. ಈ ಹಿಂದೆ ಜಿಂಬಾಬ್ವೆ, ಐರ್ಲೆಂಡ್​ ಪ್ರವಾಸಗಳಿಗೆ ತೆರಳಿದ ಭಾರತದ 2ನೇ ದರ್ಜೆ ತಂಡಗಳಿಗೂ ಮಾರ್ಗದರ್ಶನ ನೀಡಿದ್ದರು.

ದ. ಆಫ್ರಿಕಾ ವಿರುದ್ಧದ ಟಿ20 ಸರಣಿಯನ್ನು ಬಿಸಿಸಿಐ ಇತ್ತೀಚೆಗಷ್ಟೇ ವ್ಯವಸ್ಥೆಗೊಳಿಸಿದೆ. ದ. ಆಫ್ರಿಕಾ ಕ್ರಿಕೆಟ್​ ಮಂಡಳಿಯ (ಸಿಎಸ್​ಎ) ಕೋರಿಕೆಯ ಮೇರೆಗೆ ಸರಣಿ ನಿಗದಿಗೊಳಿಸಲಾಗಿದೆ. ಭಾರತ-ದ. ಆಫ್ರಿಕಾ ತಂಡಗಳೇ ಇತ್ತೀಚೆಗೆ ಟಿ20 ವಿಶ್ವಕಪ್ ಫೈನಲ್​ನಲ್ಲಿ ಮುಖಾಮುಖಿ ಆಗಿದ್ದರಿಂದ ಈ ಕಾದಾಟ ಕುತೂಹಲ ಕೆರಳಿಸಿದೆ. ಆತಿಥೇಯ ದ. ಆಫ್ರಿಕಾ ವಿಶ್ವಕಪ್ ಫೈನಲ್​ ಸೋಲಿಗೆ ಸೇಡು ತೀರಿಸಿಕೊಳ್ಳಲು ಪ್ರಯತ್ನಿಸಲಿದೆ.

ಸರಣಿಯ 4 ಪಂದ್ಯಗಳು ಕ್ರಮವಾಗಿ ಡರ್ಬನ್​ (ನ.8), ಗೆರ್ಬಹ (ನ.10), ಸೆಂಚುರಿಯನ್​ (ನ.13) ಮತ್ತು ಜೊಹಾನ್ಸ್​ರ್ಬಗ್​ನಲ್ಲಿ (ನ.15) ನಡೆಯಲಿವೆ. ಸೂರ್ಯಕುಮಾರ್​ ಸಾರಥ್ಯದ ಭಾರತ ತಂಡ ನವೆಂಬರ್​ 3ರಂದು ದ. ಆಫ್ರಿಕಾಕ್ಕೆ ಪ್ರಯಾಣಿಸಲಿದೆ.

ಎನ್​ಸಿಎ ಸಿಬ್ಬಂದಿಗೆ ಹೊಣೆ

ರಾಷ್ಟ್ರೀಯ ಕ್ರಿಕೆಟ್​ ಅಕಾಡೆಮಿ (ಎನ್​ಸಿಎ) ಅಧ್ಯಕ್ಷ ವಿವಿಎಸ್​ ಲಕ್ಷ್ಮಣ್​ ಜತೆಗೆ ಎನ್​ಸಿಎಯ ಇತರ ಸಿಬ್ಬಂದಿಯಾದ ಸಾಯಿರಾಜ್​ ಬಹುತುಳೆ, ಹೃಷಿಕೇಶ್​ ಕಾನಿಟ್ಕರ್​ ಮತ್ತು ಸುಭದೀಪ್​ ಘೋಷ್​ ಕೂಡ ದಣ ಆಫ್ರಿಕಾದಲ್ಲಿ ತರಬೇತಿ ಬಳಗದಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ. ಬಹುತುಳೆ, ಕಾನಿಟ್ಕರ್​ ಮತ್ತು ಘೋಷ್​ ಇತ್ತೀಚೆಗೆ ಭಾರತ ಎ ತಂಡದ ತರಬೇತುದಾರರಾಗಿ ಎಮರ್ಜಿಂಗ್​ ಏಷ್ಯಾಕಪ್​ಗೂ ತೆರಳಿದ್ದರು. ಎನ್​ಸಿಎಯ ಇನ್ನಿಬ್ಬರು ತರಬೇತುದಾರರಾದ ಸೌರಾಷ್ಟ್ರ ಸಿತಾಂಶು ಕೋಟಕ್​ ಮತ್ತು ಕೇರಳದ ಮಜಾರ್​ ಮೋಯಿದು ಆಸ್ಟ್ರೆಲಿಯಾ ಪ್ರವಾಸಕ್ಕೆ ತೆರಳಿರುವ ಋತುರಾಜ್​ ಗಾಯಕ್ವಾಡ್​ ಸಾರಥ್ಯದ ಭಾರತ ಎ ತಂಡದೊಂದಿಗೆ ಇದ್ದಾರೆ.

ಐಪಿಎಲ್​ ಹರಾಜಿಗೆ ಮುನ್ನ ಟ್ರಯಲ್ಸ್​

ದ. ಆಫ್ರಿಕಾ ಪ್ರವಾಸದ ಟಿ20 ಸರಣಿಯು ಮುಂಬರುವ ಐಪಿಎಲ್​ ಆಟಗಾರರ ಹರಾಜಿಗೆ ಮುನ್ನ ಫ್ರಾಂಚೈಸಿಗಳ ಗಮನಸೆಳೆಯಲು ಯುವ ಕ್ರಿಕೆಟಿಗರಿಗೆ ಉತ್ತಮ ವೇದಿಕೆ ಎನಿಸಿದೆ. ಐಪಿಎಲ್​ ತಂಡಗಳು ರಿಟೇನ್​ ಮಾಡಿಕೊಳ್ಳದ ಆಟಗಾರರು ನವೆಂಬರ್​ನಲ್ಲೇ ನಡೆಯಲಿರುವ ಹರಾಜಿನಲ್ಲಿ ಕಾಣಿಸಿಕೊಳ್ಳಲಿದ್ದು, ಈ ಸರಣಿಯಲ್ಲಿ ಮಿಂಚಿದರೆ ಹರಾಜಿನಲ್ಲಿ ಉತ್ತಮ ಬೆಲೆಗೆ ಮಾರಾಟವಾಗುವ ಅವಕಾಶ ಹೊಂದಿದ್ದಾರೆ.

ದಿಢೀರ್​ ಸರಣಿ ಬಗ್ಗೆ ಟೀಕೆ!

ದೇಶೀಯ ಕ್ರಿಕೆಟ್​ ಟೂರ್ನಿ ಭರದಿಂದ ಸಾಗುತ್ತಿರುವ ನಡುವೆ ಭಾರತ ಟೆಸ್ಟ್​ ತಂಡ 18 ಆಟಗಾರರೊಂದಿಗೆ ಆಸ್ಟ್ರೆಲಿಯಾಕ್ಕೆ ಸಾಗುತ್ತಿದ್ದರೆ, 15 ಆಟಗಾರರ ಭಾರತ ಎ ತಂಡ ಈಗಾಗಲೆ ಕಾಂಗರೂ ನಾಡಿಗೆ ತೆರಳಿದೆ. ಇತ್ತ ಇನ್ನು 15 ಆಟಗಾರರ ಟಿ20 ತಂಡ ದಣ ಆಫ್ರಿಕಾಕ್ಕೆ ತೆರಳುತ್ತಿದೆ. ಆಸೀಸ್​ಗೆ ಮೂವರು ವೇಗಿಗಳು ಟೆಸ್ಟ್​ ತಂಡದೊಂದಿಗೆ ಮೀಸಲು ಆಟಗಾರರಾಗಿಯೂ ತೆರಳುತ್ತಿದ್ದಾರೆ. ಇದರಿಂದಾಗಿ ಸುಮಾರು 50 ಪ್ರಮುಖ ಆಟಗಾರರು ದೇಶೀಯ ಕ್ರಿಕೆಟ್​ನಿಂದ ದೂರ ಉಳಿಯುವಂತಾಗಿದೆ. ಹೀಗಾಗಿ ದ. ಆಫ್ರಿಕಾ ವಿರುದ್ಧದ ಸರಣಿಯ ಅಗತ್ಯತೆಯ ಬಗ್ಗೆ ಪ್ರಶ್ನೆಗಳು ಎದ್ದಿವೆ. ಮಾಜಿ ನಾಯಕ ಸುನೀಲ್​ ಗಾವಸ್ಕರ್​ ಇತ್ತೀಚೆಗೆ ತನ್ನ ಅಂಕಣವೊಂದರಲ್ಲಿ ಈ ಬಗ್ಗೆ ಟೀಕೆಯನ್ನೂ ಮಾಡಿದ್ದಾರೆ.

https://www.vijayavani.net/kannadiga-vaishak-who-worked-hard-to-lose-his-fat-body-got-the-prize-of-playing-for-india