ಅಂತಹ ಶಕ್ತಿಯನ್ನು ನಾನೆಂದೂ ಅನುಭವಿಸಿರಲಿಲ್ಲ… ಪಾಕಿಸ್ತಾನ ವಿರುದ್ಧದ ಪಂದ್ಯವನ್ನು ಮೆಲುಕು ಹಾಕಿದ ವಿರಾಟ್ ಕೊಹ್ಲಿ

ನವದೆಹಲಿ: ಇತ್ತೀಚೆಗೆ ಮುಕ್ತಾಯವಾದ ಟಿ-20 ವಿಶ್ವಕಪ್​ನಲ್ಲಿ ಭಾರತ ತಂಡ ತನ್ನ ಮೊದಲ ಪಂದ್ಯವನ್ನು ಪಾಕಿಸ್ತಾನ ವಿರುದ್ಧ ಆಡಿತ್ತು. ಈ ಪಂದ್ಯದಲ್ಲಿ ಭಾರತ ಅಭೂತಪೂರ್ವ ಗೆಲುವ ಸಾಧಿಸಿತ್ತು. ವಿರಾಟ್​​ ಕೊಹ್ಲಿ ತೋರಿದ ಜವಾಬ್ದಾರಿಯುತ ಇನ್ನಿಂಗ್ಸ್​ ಕಾರಣದಿಂದ ಭಾರತ, ಪಾಕಿಸ್ತಾನ ವಿರುದ್ಧ ಗೆಲುವಿನ ನಗೆ ಬೀರಲು ಕಾರಣವಾಗಿತ್ತು. ರೋಚಕ ರೀತಿಯ ಈ ಪಂದ್ಯ ನಡೆದು ತಿಂಗಳುಗಳೇ ಕಳೆದರೂ, ಕ್ರಿಕೆಟ್ ಪ್ರೇಮಿಗಳು ಮಾತ್ರ ಈ ಪಂದ್ಯದ ಗುಂಗಿನಿಂದ ಇನ್ನೂ ಹೊರಬಂದಿಲ್ಲ. ಇಂದಿಗೂ ಕೂಡಾ ಪಾಕಿಸ್ತಾನ ವಿರುದ್ಧದ ಪಂದ್ಯ ಹಾಗೂ ಅದರಲ್ಲಿ ಕೊಹ್ಲಿಯ ಆಟದ ಬಗ್ಗೆ ಒಂದಲ್ಲಾ ಒಂದು ರೀತಿಯಲ್ಲಿ ಜನರು ಮಾತನಾಡಿಕೊಳ್ಳುತ್ತಿದ್ದಾರೆ.

ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಭಾರತ ಜಯ ಗಳಿಸಲು ಸಾಧ್ಯವಾಗಿದ್ದು ವಿರಾಟ್ ಕೊಹ್ಲಿ ಬ್ಯಾಟಿಂಗ್​ನಿಂದ. ಇದೀಗ ಕೊಹ್ಲಿ ಈ ಪಂದ್ಯದ ತಮ್ಮ ಇನ್ಸ್​ಟಾಗ್ರಾಂ ಖಾತೆಯಲ್ಲಿ ಪೋಸ್ಟ್​ ಒಂದನ್ನು ಮಾಡಿದ್ದಾರೆ. ಜತೆಗೆ '2022ರ ಅಕ್ಟೋಬರ್​ 23 ನನ್ನ ಹೃದಯದಲ್ಲಿ ಯಾವತ್ತಿಗೂ ವಿಶೇಷವಾದ ದಿನ. ಮೈದಾನದಲ್ಲಿ ಈ ಹಿಂದೆ ಇಷ್ಟೊಂದು ಶಕ್ತಿಯನ್ನು ನಾನು ಅನುಭವಿಸಿರಲಿಲ್ಲ. ಅಂದಿನ ಸಂಜೆಯ ಕ್ರಿಕೆಟ್ ಪ್ರೇಮಿಗಳ ಆಶೀರ್ವಾದ ವ್ಯಾಖ್ಯಾನಕ್ಕೆ ನಿಲುಕದ್ದು' ಎಂದು ಕೊಹ್ಲಿ ಬರೆದುಕೊಂಡಿದ್ದಾರೆ.

ಮೆಲ್ಬೋರ್ನ್​ನಲ್ಲಿ ನಡೆದ ಪಾಕಿಸ್ತಾನ ವಿರುದ್ಧ ರೋಚಕ ಪಂದ್ಯದಲ್ಲಿ ಕೊಹ್ಲಿಗೆ ಹಾರ್ದಿಕ್ ಪಾಂಡ್ಯಾ ಉತ್ತಮ ಸಾಥ್ ನೀಡಿದ್ದರು. ಭಾರತ ಆರಂಭದಲ್ಲಿಯೇ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡು ಸಂಕಷ್ಟ ಸಿಲುಕಿತ್ತು. ಈ ವೇಳೆ ಒಂದಾದ ಕೊಹ್ಲಿ ಹಾಗೂ ಪಾಂಡ್ಯಾ 113ರನ್​ಗಳ ಜವಾಬ್ದಾರಿಯುತ ಜೊತೆಯಾಟದ ಮೂಲಕ ಜಯದ ಹಾದಿಯ ಸುಗಮಗೊಳಿಸುತ್ತಾ ಹೋದರು. ಕೊನೆಗೆ 19ನೇ ಓವರ್​ನಲ್ಲಿ ಕೊಹ್ಲಿ ಅದ್ಭುತವಾದ ಎರಡು ಸಿಕ್ಸರ್​ ಸಿಡಿಸುವ ಮೂಲಕ ಭಾರತದ ಜಯವನ್ನು ಇನ್ನಷ್ಟು ಹತ್ತಿರವಾಗಿಸಿದ್ದರು. ಈ ಪಂದ್ಯದಲ್ಲಿ ಕೊಹ್ಲಿ 82 ರನ್ ಸಿಡಿಸಿ ಮಿಂಚಿದ್ದರು.

https://www.vijayavani.net/ias-officer-shares-5-learnings-from-virat-kohlis-knock-against-pakistan/

https://www.vijayavani.net/virat-kohli-gets-emotional-after-epic-match-winning-knock/