ಗಂಗೂಲಿಗೆ ವಿರಾಟ್ ಕೊಹ್ಲಿ ಬೌನ್ಸರ್! ಆಫ್ರಿಕಾ ಪ್ರವಾಸಕ್ಕೆ ಮುನ್ನ ಅಸಮಾಧಾನ

ಮುಂಬೈ: ಸೀಮಿತ ಓವರ್ ಕ್ರಿಕೆಟ್ ತಂಡದ ನಾಯಕತ್ವ ಬದಲಾವಣೆಗೆ ಸಂಬಂಧಿಸಿದಂತೆ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ನೀಡಿದ್ದ ವಿವರಣೆಗಳಿಗೆ ವ್ಯತಿರಿಕ್ತವಾದ ಹೇಳಿಕೆಗಳನ್ನು ನೀಡುವ ಮೂಲಕ ಭಾರತ ಟೆಸ್ಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಹೊಸ ಬಾಂಬ್ ಸಿಡಿಸಿದ್ದಾರೆ.

ಟಿ20 ನಾಯಕತ್ವ ತೊರೆಯುವ ನಿರ್ಧಾರವನ್ನು ಮರುಪರಿಶೀಲಿಸುವಂತೆ ಬಿಸಿಸಿಐ ನನಗೆ ಸೂಚಿಸಿರಲಿಲ್ಲ. ಏಕದಿನ ತಂಡದ ನಾಯಕತ್ವದಿಂದ ವಜಾಗೊಳಿಸುವ ಬಗ್ಗೆಯೂ ಮಂಡಳಿ ಅಥವಾ ಆಯ್ಕೆ ಸಮಿತಿಯಿಂದ ನನಗೆ ಮೊದಲೇ ಮಾಹಿತಿಯೂ ಬಂದಿರಲಿಲ್ಲ ಎಂದು ವಿರಾಟ್ ಕೊಹ್ಲಿ ದಕ್ಷಿಣ ಆಫ್ರಿಕಾ ಪ್ರವಾಸಕ್ಕೆ ತೆರಳುವ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದಾರೆ. ಈ ಮೂಲಕ ಬಿಸಿಸಿಐ ಮತ್ತು ಆಯ್ಕೆ ಸಮಿತಿ ವಿರುದ್ಧ ಪರೋಕ್ಷವಾಗಿ ಅಸಮಾಧಾನ ಹೊರಹಾಕಿದ್ದು, ಭಾರತೀಯ ಕ್ರಿಕೆಟ್​ನಲ್ಲಿ ದೊಡ್ಡ ವಿವಾದವೊಂದು ಸೃಷ್ಟಿಯಾಗಿದೆ.

ಸವಾಲಿನ ಪ್ರವಾಸಕ್ಕೆ ತೆರಳುವ ಮುನ್ನ ಸುದ್ದಿಗೋಷ್ಠಿಯಲ್ಲಿ ಹಲವು ಕಠಿಣ ಪ್ರಶ್ನೆಗಳನ್ನು ಎದುರಿಸಿದ ಕೊಹ್ಲಿ ಕೆಲವು ಗೊಂದಲಗಳನ್ನು ಬಗೆಹರಿಸಿದರೆ, ಮತ್ತೆ ಕೆಲವು ಹೊಸ ಗೊಂದಲಗಳನ್ನು ಎಬ್ಬಿಸುವ ಹೇಳಿಕೆಗಳನ್ನು ನೀಡಿದರು. ‘ನಾಯಕತ್ವ ಬದಲಾವಣೆಯ ನಿರ್ಧಾರದ ಬಗ್ಗೆ ನನಗೆ ಮೊದಲೇ ಮಾಹಿತಿ ನೀಡಲಾಗಿತ್ತು ಎಂಬ ಹೇಳಿಕೆಗಳು ನಿಜವಲ್ಲ’ ಎನ್ನುವ ಮೂಲಕ ಕೊಹ್ಲಿ, ಗಂಗೂಲಿ ಹೇಳಿಕೆಯನ್ನು ಸಾರಸಗಟಾಗಿ ತಳ್ಳಿಹಾಕಿದರು.

‘ದಕ್ಷಿಣ ಆಫ್ರಿಕಾ ಪ್ರವಾಸದ ಟೆಸ್ಟ್ ಸರಣಿಗೆ ತಂಡ ಆಯ್ಕೆಗಾಗಿ ಡಿಸೆಂಬರ್ 8ರಂದು ಆಯ್ಕೆ ಸಮಿತಿ ಸಭೆಗೆ ಒಂದೂವರೆ ಗಂಟೆ ಮುನ್ನ ನನ್ನನ್ನು ಸಂರ್ಪಸಲಾಗಿತ್ತು. ಮುಖ್ಯ ಆಯ್ಕೆಗಾರರು (ಚೇತನ್ ಶರ್ಮ) ಟೆಸ್ಟ್ ತಂಡದ ಬಗ್ಗೆ ರ್ಚಚಿಸಿದರು. ಕರೆಯನ್ನು ಮುಕ್ತಾಯಗೊಳಿಸುವುದಕ್ಕೆ ಮುನ್ನ, ನಾನು ಏಕದಿನ ತಂಡದ ನಾಯಕನಾಗಿ ಮುಂದುವರಿಯುವುದಿಲ್ಲ ಮತ್ತು ಐವರೂ ಆಯ್ಕೆಗಾರರು ಈ ನಿರ್ಧಾರ ತೆಗೆದುಕೊಂಡಿದ್ದೇವೆ ಎಂದು ತಿಳಿಸಿದರು. ನಾನದಕ್ಕೆ, ಆಯಿತು ಒಳ್ಳೆಯದು ಎಂದೆ. ಟಿ20 ನಾಯಕತ್ವ ತ್ಯಜಿಸುವ ನಿರ್ಧಾರ ಪ್ರಕಟಿಸಿದ ಬಳಿಕ ಯಾರೂ ನನ್ನೊಂದಿಗೆ ಏಕದಿನ ನಾಯಕತ್ವದ ಬಗ್ಗೆ ಮಾತನಾಡಿರಲಿಲ್ಲ’ ಎಂದು ಕೊಹ್ಲಿ ವಿವರಿಸಿದ್ದಾರೆ.

‘ನಾನು ಟಿ20 ತಂಡದ ನಾಯಕತ್ವ ತ್ಯಜಿಸುವ ನಿರ್ಧಾರವನ್ನು ಮಂಡಳಿಯ ಪದಾಧಿಕಾರಿಗಳಿಗೆ ತಿಳಿಸಿದಾಗ ಅವರು ಅದನ್ನು ಉತ್ತಮವಾಗಿಯೇ ತೆಗೆದುಕೊಂಡಿದ್ದರು. ನನ್ನ ಕಾರಣಗಳನ್ನು ಸ್ಪಷ್ಟವಾಗಿ ಅವರಿಗೆ ವಿವರಿಸಿದ್ದೆ. ಅದನ್ನು ಸ್ವೀಕರಿಸುವಲ್ಲಿ ಯಾವುದೇ ಹಿಂಜರಿಕೆ ತೋರಿರಲಿಲ್ಲ. ಟಿ20 ನಾಯಕತ್ವ ತ್ಯಜಿಸಬೇಡ ಎಂದು ಯಾರೂ ಹೇಳಿರಲಿಲ್ಲ’ ಎಂದು ಕೊಹ್ಲಿ ಹೇಳಿದ್ದಾರೆ. 2023ರವರೆಗೆ ಮುಂದುವರಿಯುವ ಆಸೆ ಇತ್ತು: 2023ರ ವಿಶ್ವಕಪ್​ವರೆಗೆ ಏಕದಿನ ತಂಡದ ನಾಯಕನಾಗಿ ಮುಂದುವರಿಯುವ ಆಸೆ ಇತ್ತು ಎಂಬುದನ್ನು ಒಪ್ಪಿಕೊಂಡಿರುವ ಕೊಹ್ಲಿ, ಆಯ್ಕೆ ಸಮಿತಿ ಮತ್ತು ಮಂಡಳಿ ಅಧಿಕಾರಿಗಳ ಯೋಚನೆ ಬೇರೆ ಇತ್ತು ಎಂದಿದ್ದಾರೆ.

ಸುಳ್ಳು ಹೇಳುತ್ತಿರುವವರಾರು?: ಗಂಗೂಲಿ-ಕೊಹ್ಲಿ ಅವರ ವ್ಯತಿರಿಕ್ತ ಹೇಳಿಕೆಗಳು ಕ್ರಿಕೆಟ್ ಪ್ರೇಮಿಗಳಿಗೆ ಗೊಂದಲಗಳನ್ನು ಸೃಷ್ಟಿಸಿವೆ. ನಿಜಕ್ಕೂ ಸುಳ್ಳು ಹೇಳುತ್ತಿರುವವರು ಯಾರು? ಯಾರ ಮಾತು ಸತ್ಯವಾದುದು ಎಂಬ ಗೊಂದಲ ಕಾಡಲಾರಂಭಿಸಿದೆ. ಇಬ್ಬರಲ್ಲಿ ಒಬ್ಬರಷ್ಟೇ ಸತ್ಯ ಹೇಳುತ್ತಿದ್ದಾರೆ. ಇಬ್ಬರೂ ಭಾರತೀಯ ಕ್ರಿಕೆಟ್ ಕಂಡ ಆಕ್ರಮಣಕಾರಿ ನಾಯಕರು. ಸವಾಲಿನ ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿ ಐತಿಹಾಸಿಕ ಸಾಧನೆ ತೋರುವತ್ತ ಗಮನಹರಿಸಬೇಕಾದ ಸಮಯದಲ್ಲಿ ಈ ಅನಗತ್ಯ ವಿವಾದ ಭಾರತೀಯ ಕ್ರಿಕೆಟ್​ಗೆ ದೊಡ್ಡ ಹಿನ್ನಡೆಯಾಗಿದೆ. ಎದುರಾಳಿಯ ಸವಾಲು ಹಿಮ್ಮೆಟ್ಟಿಸುವ ಬದಲಾಗಿ ತಮ್ಮೊಳಗೇ ಬಡಿದಾಡಿಕೊಳ್ಳುತ್ತಿರುವುದು ಭಾರತೀಯ ಕ್ರಿಕೆಟ್​ಗೆ ಶೋಭೆ ತರುತ್ತಿಲ್ಲ ಎಂಬುದು ಕ್ರಿಕೆಟ್ ಪ್ರೇಮಿಗಳ ಅಭಿಪ್ರಾಯವಾಗಿದೆ.

ರೋಹಿತ್ ಸಾರಥ್ಯಕ್ಕೆ ಶೇ.100 ಬೆಂಬಲ: ಏಕದಿನ ತಂಡದ ಹೊಸ ನಾಯಕ ರೋಹಿತ್ ಶರ್ಮ ಜತೆಗೆ ಯಾವುದೇ ಮನಸ್ತಾಪವಿಲ್ಲವೆಂದು ಭಿನ್ನಮತದ ವರದಿಯನ್ನು ಸಾರಸಗಟಾಗಿ ತಳ್ಳಿಹಾಕಿರುವ ವಿರಾಟ್ ಕೊಹ್ಲಿ, ತಮ್ಮ ಉತ್ತರಾಧಿಕಾರಿಗೆ ಶೇ. 100 ಬೆಂಬಲ ನೀಡುವುದಾಗಿ ಹೇಳಿದ್ದಾರೆ. ‘ರೋಹಿತ್ ಶರ್ಮ ಸಮರ್ಥ ನಾಯಕ. ಕಾರ್ಯತಂತ್ರ ನಿಪುಣ. ಭಾರತ ಪರ ಮತ್ತು ಐಪಿಎಲ್​ನಲ್ಲಿ ಅದನ್ನು ನೋಡಿದ್ದೇವೆ. ಅವರೊಂದಿಗೆ ದ್ರಾವಿಡ್ ಭಾಯ್ಗೂ (ಕೋಚ್ ರಾಹುಲ್ ದ್ರಾವಿಡ್) ನನ್ನ ಪೂರ್ಣ ಬೆಂಬಲವಿದೆ. ದ್ರಾವಿಡ್ ಅತ್ಯಂತ ಸಮತೋಲನದ ಕೋಚ್, ಶ್ರೇಷ್ಠ ಮ್ಯಾನ್ ಮ್ಯಾನೇಜರ್. ಇಲ್ಲಿಂದ ತಂಡವನ್ನು ಸರಿಯಾದ ದಿಕ್ಕಿನಲ್ಲಿ ಮುನ್ನಡೆಸಲು ನಾನೂ ಪ್ರಯತ್ನಿಸುವೆ’ ಎಂದಿದ್ದಾರೆ.

ಸೌರವ್ ಗಂಗೂಲಿ ಹೇಳಿದ್ದೇನು?: ಟಿ20 ನಾಯಕತ್ವವನ್ನು ತೊರೆಯದಂತೆ ಕೊಹ್ಲಿಯನ್ನು ಕೇಳಿಕೊಂಡಿದ್ದೆವು. ಆದರೆ ಅವರು ಒಪ್ಪಿರಲಿಲ್ಲ. ಆದರೆ ಏಕದಿನ-ಟಿ20ಗೆ ಪ್ರತ್ಯೇಕ ನಾಯ ಕತ್ವ ಆಯ್ಕೆಗಾರರಿಗೆ ಇಷ್ಟವಿಲ್ಲದ ಕಾರಣ, ರೋಹಿತ್ ಅವರನ್ನೇ ಏಕದಿನ ತಂಡಕ್ಕೂ ನಾಯಕರನ್ನಾಗಿ ಆರಿಸ ಲಾಯಿತು. ನಾನು ವಿರಾಟ್ ಜತೆಗೆ ವೈಯಕ್ತಿಕವಾಗಿ ಮಾತನಾಡಿದ್ದೆ. ಆಯ್ಕೆ ಸಮಿತಿ ಅಧ್ಯಕ್ಷ ಚೇತನ್ ಶರ್ಮ ಕೂಡ ಈ ಬಗ್ಗೆ ಮಾತನಾಡಿದ್ದರು.

ಏಕದಿನ ಸರಣಿಗೆ ಲಭ್ಯ, ವಿಶ್ರಾಂತಿ ಕೇಳಿಲ್ಲ: ದಕ್ಷಿಣ ಆಫ್ರಿಕಾ ಪ್ರವಾಸದ ಏಕದಿನ ಸರಣಿಯಲ್ಲಿ ಆಡಲು ನಾನು ಲಭ್ಯನಿದ್ದೇನೆ. ಬಿಸಿಸಿಐ ಬಳಿ ವಿಶ್ರಾಂತಿಯನ್ನು ಕೇಳಿಲ್ಲ ಎಂದು ಕೊಹ್ಲಿ ಸ್ಪಷ್ಟಪಡಿಸಿದ್ದಾರೆ. ಈ ಮೂಲಕ, ಏಕದಿನ ನಾಯಕತ್ವ ಕಳೆದುಕೊಂಡ ಬಗ್ಗೆ ಸಿಟ್ಟಾಗಿರುವುದು ಅಥವಾ ರೋಹಿತ್ ಸಾರಥ್ಯದಲ್ಲಿ ಆಡಲು ಹಿಂದೇಟು ಹಾಕಿರುವ ವರದಿ ತಳ್ಳಿಹಾಕಿದ್ದಾರೆ. ‘ಭಾರತ ಪರ ಆಡಲು ನಾನು ಯಾವಾಗಲೂ ಲಭ್ಯನಿರುತ್ತೇನೆ. ನನಗೆ ವಿಶ್ರಾಂತಿ ಬೇಕೆಂದು ಬಿಸಿಸಿಐ ಬಳಿ ಕೇಳಿಲ್ಲ’ ಎಂದು ಕೊಹ್ಲಿ ಹೇಳಿದ್ದಾರೆ. ಕೊಹ್ಲಿ ಪುತ್ರಿಯ ಜನ್ಮದಿನದ ಕಾರಣ ನೀಡಿ ಏಕದಿನ ಸರಣಿ ತಪ್ಪಿಸಿಕೊಳ್ಳಲಿದ್ದಾರೆ ಎಂದು ವರದಿಯಾಗಿತ್ತು.

ಈ ಬಾರಿ ಆಫ್ರಿಕಾದಲ್ಲಿ ವಿಶೇಷ ಸಾಧನೆ: ದಕ್ಷಿಣ ಆಫ್ರಿಕಾ ಹೊರತಾಗಿ ಟೆಸ್ಟ್ ಆಡುವ ಎಲ್ಲ ದೇಶಗಳಲ್ಲಿ ಭಾರತ ತಂಡ ಟೆಸ್ಟ್ ಸರಣಿ ಜಯಿಸಿದೆ. ಈ ಬಾರಿ ದಕ್ಷಿಣ ಆಫ್ರಿಕಾದಲ್ಲಿ ವಿಶೇಷ ಸಾಧನೆ ತೋರಲಿದ್ದೇವೆ ಎನ್ನುವ ಮೂಲಕ ವಿರಾಟ್ ಕೊಹ್ಲಿ, ಹರಿಣಗಳ ನಾಡಿನಲ್ಲಿ ಚೊಚ್ಚಲ ಟೆಸ್ಟ್ ಸರಣಿ ಜಯಿಸುವ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಡಿಸೆಂಬರ್ 26ರಿಂದ ದಕ್ಷಿಣ ಆಫ್ರಿಕಾದಲ್ಲಿ 3 ಪಂದ್ಯಗಳ ಟೆಸ್ಟ್ ಸರಣಿ ನಡೆಯಲಿದ್ದು, ಭಾರತ ತಂಡ ಗುರುವಾರ ಜೊಹಾನ್ಸ್​ಬರ್ಗ್​ಗೆ ಪ್ರಯಾಣ ಬೆಳೆಸಲಿದೆ. ‘ನಾವು ಈ ಬಾರಿ ಅನುಭವಿ ಮತ್ತು ಆತ್ಮವಿಶ್ವಾಸದ ತಂಡ ಹೊಂದಿದ್ದೇವೆ. ತಂಡವಾಗಿ ನಾವು ಬಯಸಿದ ಫಲಿತಾಂಶವನ್ನು ಪಡೆಯಲಿದ್ದೇವೆ. ಅತ್ಯಂತ ಕಠಿಣ ವಾತಾವರಣದಲ್ಲೂ ಸರಣಿ ಗೆದ್ದು ತೋರಿಸಲಿದ್ದೇವೆ. ನಾವೀಗ ಬರೀ ಟೆಸ್ಟ್ ಪಂದ್ಯವನ್ನು ಗೆಲ್ಲುವ ಬಗ್ಗೆ ಯೋಚಿಸುತ್ತಿಲ್ಲ’ ಎಂದು ಕೊಹ್ಲಿ ಹೇಳಿದ್ದಾರೆ. ದಕ್ಷಿಣ ಆಫ್ರಿಕಾದಲ್ಲಿ ಇದುವರೆಗೆ 20 ಟೆಸ್ಟ್ ಆಡಿರುವ ಭಾರತ ಕೇವಲ 3ರಲ್ಲಿ ಗೆದ್ದು, 10ರಲ್ಲಿ ಸೋತಿದೆ. 7ರಲ್ಲಿ ಡ್ರಾ ಸಾಧಿಸಿದೆ. ಇದುವರೆಗೆ 3 ಪ್ರವಾಸಿ ತಂಡಗಳಷ್ಟೇ (ಇಂಗ್ಲೆಂಡ್, ಆಸ್ಟ್ರೇಲಿಯಾ, ಶ್ರೀಲಂಕಾ) ದಕ್ಷಿಣ ಆಫ್ರಿಕಾದಲ್ಲಿ ಟೆಸ್ಟ್ ಸರಣಿ ಜಯಿಸಿವೆ.

ಬಿಸಿಸಿಐಗೆ ಸೆಡ್ಡು ಹೊಡೆಯುವಂಥ ಹೇಳಿಕೆ ಯಿಂದ ಕೊಹ್ಲಿ ತಮ್ಮ ಅಭಿಮಾನಿಗಳ ಮೆಚ್ಚುಗೆಗೂ ಪಾತ್ರರಾಗಿದ್ದಾರೆ. ‘ಇದನ್ನು ಕೊಹ್ಲಿ ಅವರ 71ನೇ ಶತಕವೆಂದು ಪರಿಗಣಿಸಬೇಕು’ ಎಂಬುದಾಗಿಯೂ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಅವರ ದಿಟ್ಟ ನುಡಿಯನ್ನು ಪ್ರಶಂಸಿಸಿದ್ದಾರೆ. ಜತೆಗೆ ಗಂಗೂಲಿ ಮೇಲೆಯೂ ಕೊಹ್ಲಿ ಅಭಿಮಾನಿಗಳು ಕಿಡಿಕಾರಿದ್ದಾರೆ. ಏಕದಿನ ಸರಣಿ ತಪ್ಪಿಸಿಕೊಳ್ಳುವರು ಎಂಬ ವರದಿಯಿಂದ ಕೊಹ್ಲಿ ‘ಅಹಂಕಾರಿ’ಯಂತೆ ಕಂಡಿದ್ದರೆ, ಬುಧವಾರದ ಸುದ್ದಿಗೋಷ್ಠಿಯ ಬಳಿಕ ಮತ್ತೆ ‘ಕಿಂಗ್ ಕೊಹ್ಲಿ’ಯಾಗಿ ತಮ್ಮ ಅಭಿಮಾನಿಗಳ ಮನಗೆದ್ದಿದ್ದಾರೆ.

https://www.vijayavani.net/isa-guhas-double-meaning-comment-leaves-bbl-commentators-stunned/

https://www.vijayavani.net/complaint-aginst-bengaluru-stand-up-comedian/