ವಿಜಯ್​ ಹಜಾರೆ ಟ್ರೋಫಿ: ಇಂದು ಕರ್ನಾಟಕ-ವಿದರ್ಭ ಫೈನಲ್; ​ಐದನೇ ಪ್ರಶಸ್ತಿ ನಿರೀಕ್ಷೆಯಲ್ಲಿ ಮಯಾಂಕ್​ ಪಡೆ

ವಡೋದರ: ಟೂರ್ನಿಯುದ್ದಕ್ಕೂ ಬಲಿಷ್ಠ ನಿರ್ವಹಣೆ ತೋರುತ್ತ ಬಂದಿರುವ ಮತ್ತು ಭರ್ಜರಿ ಫಾರ್ಮ್​ನಲ್ಲಿರುವ ಬ್ಯಾಟರ್​ಗಳ ನೇತೃತ್ವ ಹೊಂದಿರುವ ಕರ್ನಾಟಕ ಮತ್ತು ವಿದರ್ಭ ತಂಡಗಳು ವಿಜಯ್​ ಹಜಾರೆ ಟ್ರೋಫಿಯಲ್ಲಿ ಶನಿವಾರ ನಡೆಯಲಿರುವ ಫೈನಲ್​ ಪಂದ್ಯದಲ್ಲಿ ಮುಖಾಮುಖಿ ಆಗಲಿವೆ. ಮಯಾಂಕ್​ ಅಗರ್ವಾಲ್​ ಬಳಗ 5 ವರ್ಷಗಳ ಬಳಿಕ ಮತ್ತು 5ನೇ ಬಾರಿಗೆ ದೇಶೀಯ ಏಕದಿನ ಕ್ರಿಕೆಟ್​ ಚಾಂಪಿಯನ್​ ಪಟ್ಟ ಅಲಂಕರಿಸುವ ಹಂಬಲದಲ್ಲಿದೆ.

ಟೂರ್ನಿಯಲ್ಲಿ 5 ಶತಕ ಸಹಿತ 752ರ ಸರಾಸರಿಯಲ್ಲಿ ರನ್​ ಸುನಾಮಿ ಹರಿಸಿರುವ ಕನ್ನಡಿಗ ಕರುಣ್​ ನಾಯರ್​ ಎದುರಾಳಿ ವಿದರ್ಭ ತಂಡದ ಸಾರಥ್ಯ ವಹಿಸಿಕೊಂಡಿದ್ದು, ಅವರನ್ನು ಕಟ್ಟಿಹಾಕುವುದು ಕರ್ನಾಟಕದ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿದೆ. ಇದೇ ಮೊದಲ ಬಾರಿಗೆ ಫೈನಲ್​ಗೇರಿರುವ ವಿದರ್ಭ ಚೊಚ್ಚಲ ಪ್ರಶಸ್ತಿ ಗೆಲುವಿನ ಕನಸಿನಲ್ಲಿದೆ.

ಕರ್ನಾಟಕ ಈ ಹಿಂದೆ 4 ಬಾರಿ ವಿಜಯ್​ ಹಜಾರೆ ಟ್ರೋಫಿ ಗೆದ್ದಾಗಲೂ ಮಯಾಂಕ್​-ಕರುಣ್​ ಇಬ್ಬರೂ ತಂಡದಲ್ಲಿದ್ದರು. ಆದರೆ ಶನಿವಾರ ಕೋಟಂಬಿ ಸ್ಟೇಡಿಯಂನಲ್ಲಿ ಇಬ್ಬರಲ್ಲಿ ಒಬ್ಬರಿಗೆ ಮಾತ್ರ ಟ್ರೋಫಿ ಎತ್ತಿಹಿಡಿಯುವ ಅದೃಷ್ಟ ಒಲಿಯಲಿದೆ.

ಬ್ಯಾಟಿಂಗ್​ನಲ್ಲಿ ರಾಜ್ಯಕ್ಕೆ ಯುವ ಬ್ಯಾಟರ್​ಗಳಾದ ಆರ್​. ಸ್ಮರಣ್​ (340), ಕೆವಿ ಅನೀಶ್​ (417) ಮತ್ತು ವಿಕೆಟ್​ ಕೀಪರ್​&ಬ್ಯಾಟರ್​ ಕೆಎಲ್​ ಶ್ರೀಜಿತ್​ (225) ಬಲ ತುಂಬಿರುವ ನಡುವೆ ಬೌಲಿಂಗ್​ನಲ್ಲಿ ವೇಗಿಗಳಾದ ವಾಸುಕಿ ಕೌಶಿಕ್​ (15 ವಿಕೆಟ್​), ಎಡಗೈ ವೇಗಿ ಅಭಿಲಾಷ್​ ಶೆಟ್ಟಿ (14) ಮತ್ತು ಸ್ಪಿನ್ನರ್​ ಶ್ರೇಯಸ್​ ಗೋಪಾಲ್​ (18) ಶಕ್ತಿ ತುಂಬಿದ್ದಾರೆ. ಆಸೀಸ್​ ಪ್ರವಾಸದ ನಂತರ ದೇವದತ್​ ಪಡಿಕ್ಕಲ್​ (188) ಮತ್ತು ವೇಗಿ ಪ್ರಸಿದ್ಧ ಕೃಷ್ಣ ನಾಕೌಟ್​ಗೆ ಲಭ್ಯರಾಗಿರುವುದು ಕೂಡ ರಾಜ್ಯದ ಬಲ ಹೆಚ್ಚಿಸಿದೆ.

ಮಯಾಂಕ್​-ಕರುಣ್​ ಕಾದಾಟ

ಮಾಜಿ ಸಹ-ಆಟಗಾರರಾದ ಕರುಣ್​ ನಾಯರ್​ (752) ಮತ್ತು ಮಯಾಂಕ್​ ಅಗರ್ವಾಲ್​ (619) ಟೂರ್ನಿಯಲ್ಲಿ ಅಗ್ರ ಇಬ್ಬರು ಗರಿಷ್ಠ ರನ್​ಸ್ಕೋರರ್​ಗಳಾಗಿದ್ದು, ಫೈನಲ್​ನಲ್ಲೂ ಇವರಿಬ್ಬರು ರನ್​ಪ್ರವಾಹ ಮುಂದುವರಿಸುವ ಹಂಬಲದಲ್ಲಿದ್ದಾರೆ. ಕಳೆದ ವರ್ಷ ಸೆಪ್ಟೆಂಬರ್​ನಲ್ಲಿ ರಾಜ್ಯದ ಟಿ20 ಟೂರ್ನಿ ಮಹಾರಾಜ ಟ್ರೋಫಿಯಲ್ಲೂ ಕರುಣ್​ (ಮೈಸೂರು ವಾರಿಯರ್ಸ್​) ಮತ್ತು ಮಯಾಂಕ್​ (ಬೆಂಗಳೂರು ಬ್ಲಾಸ್ಟರ್ಸ್​) ನಾಯಕತ್ವದ ತಂಡಗಳೇ ಫೈನಲ್​ನಲ್ಲಿ ಮುಖಾಮುಖಿ ಆಗಿದ್ದವು. ಆಗ ಕರುಣ್​ ಗೆದ್ದಿದ್ದರೆ, ಈ ಬಾರಿ ರಾಜ್ಯ ತಂಡವನ್ನು ಗೆಲ್ಲಿಸಿ ಸೇಡು ತೀರಿಸಿಕೊಳ್ಳುವ ಅವಕಾಶ ಮಯಾಂಕ್​ ಮುಂದಿದೆ.

*ಆರಂಭ: ಮಧ್ಯಾಹ್ನ 1.30.

*ನೇರಪ್ರಸಾರ: ಜಿಯೋಸಿನಿಮಾ.

*79: ಕರುಣ್​ ನಾಯರ್ ಫೈನಲ್​ನಲ್ಲಿ 79 ರನ್​ ಗಳಿಸಿದರೆ, ವಿಜಯ್​ ಹಜಾರೆ ಟ್ರೋಫಿಯ ಆವೃತ್ತಿಯೊಂದರಲ್ಲಿ (2022&23) ಸರ್ವಾಧಿಕ 830 ರನ್​ ಗಳಿಸಿದ ತಮಿಳುನಾಡಿನ ಎನ್​. ಜಗದೀಶನ್​ ದಾಖಲೆ ಮುರಿಯಲಿದ್ದಾರೆ.

https://www.vijayavani.net/the-future-of-virat-kohlis-career-is-in-the-hands-of-shubman-gill-do-you-know-why