ವಿಜಯ್​ ಹಜಾರೆ ಟ್ರೋಫಿ: ದೇವದತ್​ ಪಡಿಕ್ಕಲ್​ ಶತಕದಾಸರೆ, ಸೆಮಿಫೈನಲ್​ಗೇರಿದ ಕರ್ನಾಟಕ

ವಡೋದರ: ಎಡಗೈ ಬ್ಯಾಟರ್​ ದೇವದತ್​ ಪಡಿಕ್ಕಲ್​ (102 ರನ್​, 99 ಎಸೆ, 15 ಬೌಂಡರಿ, 2 ಸಿಕ್ಸರ್​) ಆಸ್ಟ್ರೆಲಿಯಾ ಪ್ರವಾಸದಿಂದ ಮರಳಿದ ಬಳಿಕ ಆಡಿದ ಮೊದಲ ಪಂದ್ಯದಲ್ಲೇ ಸಿಡಿಸಿದ ಶತಕ ಮತ್ತು ಬೌಲರ್​ಗಳ ಸಂಟಿತ ದಾಳಿಯ ಬಲದಿಂದ 4 ಬಾರಿಯ ಚಾಂಪಿಯನ್​ ಕರ್ನಾಟಕ ತಂಡ ವಿಜಯ್​ ಹಜಾರೆ ಟ್ರೋಫಿ ದೇಶೀಯ ಏಕದಿನ ಕ್ರಿಕೆಟ್​ ಟೂರ್ನಿಯಲ್ಲಿ ಸತತ 3ನೇ ಬಾರಿಗೆ ಸೆಮಿಫೈನಲ್​ ಪ್ರವೇಶಿಸಿದೆ. ಶನಿವಾರ ನಡೆದ ಕ್ವಾರ್ಟರ್​ಫೈನಲ್​ ಪಂದ್ಯದಲ್ಲಿ ಮಯಾಂಕ್​ ಅಗರ್ವಾಲ್​ ಬಳಗ ಆತಿಥೇಯ ಬರೋಡ ವಿರುದ್ಧ 5 ರನ್​ಗಳಿಂದ ರೋಚಕ ಗೆಲುವು ದಾಖಲಿಸಿತು.

ಮೋತಿಬಾಗ್​ ಸ್ಟೇಡಿಯಂನಲ್ಲಿ ನಡೆದ ಕಾದಾಟದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಕರ್ನಾಟಕ, 8 ವಿಕೆಟ್​ಗೆ 281 ರನ್​ ಪೇರಿಸಿತು. ಪ್ರತಿಯಾಗಿ ಬರೋಡ ಒಂದು ಹಂತದಲ್ಲಿ 2 ವಿಕೆಟ್​ಗೆ 185 ರನ್​ ಗಳಿಸಿ ಗೆಲುವಿನ ಹಾದಿಯಲ್ಲಿತ್ತು. ಆದರೆ ನಂತರ ರಾಜ್ಯದ ಬೌಲರ್​ಗಳು ನೀಡಿದ ತಿರುಗೇಟಿನಿಂದಾಗಿ, ಯುವ ಆರಂಭಿಕ ಶಾಶ್ವತ್​ ರಾವತ್​ (104) ಸಿಡಿಸಿದ ಶತಕದ ನಡುವೆಯೂ 49.5 ಓವರ್​ಗಳಲ್ಲಿ 276 ರನ್​ಗಳಿಗೆ ಆಲೌಟ್​ ಆಗಿ ಶರಣಾಯಿತು.

ಶಾಶ್ವತ್​ ಮತ್ತು ಅತಿತ್​ ಸೇಥ್​ (56) 2ನೇ ವಿಕೆಟ್​ಗೆ 99 ರನ್​ ಸೇರಿಸಿ ಬರೋಡ ಚೇಸಿಂಗ್​ಗೆ ಬಲ ತುಂಬಿದ್ದರು. ನಂತರ ನಾಯಕ ಕೃನಾಲ್​ ಪಾಂಡ್ಯ ಜತೆಗೆ ಶಾಶ್ವತ್​ 3ನೇ ವಿಕೆಟ್​ಗೆ ಮತ್ತೆ 55 ರನ್​ ಸೇರಿಸಿದರು. ಈ ಜೋಡಿ ಬೇರ್ಪಟ್ಟ ಬಳಿಕ ರಾಜ್ಯದ ಬೌಲರ್​ಗಳಾದ ವಾಸುಕಿ ಕೌಶಿಕ್​ (39ಕ್ಕೆ 2), ಪ್ರಸಿದ್ಧ ಕೃಷ್ಣ (60ಕ್ಕೆ 2), ಅಭಿಲಾಷ್​ ಶೆಟ್ಟಿ (70ಕ್ಕೆ 2), ಶ್ರೇಯಸ್​ ಗೋಪಾಲ್​ (38ಕ್ಕೆ 2) ಬರೋಡಗೆ ಕಡಿವಾಣ ಹಾಕಿದರು. ಕೊನೇ ಓವರ್​ನಲ್ಲಿ ಬರೋಡಗೆ 13 ರನ್​ ಬೇಕಿತ್ತು. ಆಗ ದಾಳಿಗಿಳಿದ ಎಡಗೈ ವೇಗಿ ಅಭಿಲಾಷ್​ ಶೆಟ್ಟಿ 5 ಎಸೆತಗಳಲ್ಲಿ 7 ರನ್​ (1, ರನೌಟ್​, 1, 4, 1+ರನೌಟ್​) ಮಾತ್ರ ನೀಡಿದರೆ, ಬರೋಡ ರನೌಟ್​ ಮೂಲಕ ಕೊನೇ 2 ವಿಕೆಟ್​ ಕಳೆದುಕೊಂಡು ಮಣಿಯಿತು. ಆಲ್ರೌಂಡರ್​ ಹಾರ್ದಿಕ್​ ಪಾಂಡ್ಯ ಕಣಕ್ಕಿಳಿಯದ ಕಾರಣ ಬರೋಡ ಹಿನ್ನಡೆ ಅನುಭವಿಸಿತು.

ಪಡಿಕ್ಕಲ್​ ಸೆಂಚುರಿ ಕಮಾಲ್​

ಬಾರ್ಡರ್​-ಗಾವಸ್ಕರ್​ ಟ್ರೋಫಿಯ ಮೊದಲ ಪಂದ್ಯದ ಬಳಿಕ ಉಳಿದ 4 ಪಂದ್ಯಗಳಿಗೆ ಬೆಂಚು ಕಾಯಿಸಿದ್ದರೂ, ಉತ್ತಮ ಲಯದಲ್ಲಿ ಕಾಣಿಸಿದ 24 ವರ್ಷದ ದೇವದತ್​ ಪಡಿಕ್ಕಲ್​ ಶತಕ ಸಿಡಿಸಿ ಆಸರೆಯಾದರು. ಟೂರ್ನಿಯ ಲೀಗ್​ ಹಂತದಲ್ಲಿ 4 ಶತಕ ಸಹಿತ 613 ರನ್​ ಸಿಡಿಸಿ ಮಿಂಚಿದ್ದ ನಾಯಕ ಮಯಾಂಕ್​ ಅಗರ್ವಾಲ್​ (6) ನಾಕೌಟ್​ನಲ್ಲಿ ಬೇಗನೆ ಔಟಾದರು. ಆಗ ಜತೆಗೂಡಿದ ಪಡಿಕ್ಕಲ್​ ಮತ್ತು ಕೆವಿ ಅನೀಶ್​ (52) 2ನೇ ವಿಕೆಟ್​ಗೆ 133 ರನ್​ ಜತೆಯಾಟವಾಡಿ ಚೇತರಿಕೆ ಒದಗಿಸಿದರು. 94 ಎಸೆತಗಳಲ್ಲಿ ಶತಕ ಪೂರೈಸಿದ ಬಳಿಕ ಪಡಿಕ್ಕಲ್​ ಯುವ ವೇಗಿ ರಾಜ್​ ಲಿಂಬಾನಿ ಎಸೆತದಲ್ಲಿ ಔಟಾದರು. ನಂತರದಲ್ಲಿ ಆರ್​. ಸ್ಮರಣ್​ (28), ಕೆಎಲ್​ ಶ್ರೀಜಿತ್​ (28), ಅಭಿನವ್​ ಮನೋಹರ್​ (21) ಉಪಯುಕ್ತ ಕೊಡುಗೆ ನೀಡಿ ಮೊತ್ತ ಏರಿಸಿದರು. ಕೊನೆಯಲ್ಲಿ 51 ರನ್​ ಅಂತರದಲ್ಲಿ 5 ವಿಕೆಟ್​ ಕಳೆದುಕೊಂಡ ಕರ್ನಾಟಕ 300ರ ಗಡಿ ದಾಟುವ ಆಸೆ ಕೈಚೆಲ್ಲಿತು.

ಕರ್ನಾಟಕ: 8 ವಿಕೆಟ್​ಗೆ 281 (ಮಯಾಂಕ್​ 6, ಪಡಿಕ್ಕಲ್​ 102, ಅನೀಶ್​ 52, ಸ್ಮರಣ್​ 28, ಶ್ರೀಜಿತ್​ 28, ಅಭಿನವ್​ 21, ಹಾರ್ದಿಕ್​ ರಾಜ್​ 0, ಶ್ರೇಯಸ್​ 16, ಪ್ರಸಿದ್ಧ 12*, ಲಿಂಬಾನಿ 47ಕ್ಕೆ 3, ಸೇಥ್​ 41ಕ್ಕೆ 3, ಕೃನಾಲ್​ 42ಕ್ಕೆ 1). ಬರೋಡ: 49.5 ಓವರ್​ಗಳಲ್ಲಿ 276 (ಶಾಶ್ವತ್​ ರಾವತ್​ 104, ಅತಿತ್​ ಸೇಥ್​ 56, ಕೃನಾಲ್​ ಪಾಂಡ್ಯ 30, ವಿಷ್ಣು ಸೋಲಂಕಿ 1, ಭಾನು ಪುನಿಯಾ 22, ಲಿಂಬಾನಿ 10, ಭಾರ್ಗವ್​ ಭಟ್​ 20, ವಿ ಕೌಶಿಕ್​ 39ಕ್ಕೆ 2, ಪ್ರಸಿದ್ಧ ಕೃಷ್ಣ 60ಕ್ಕೆ 2, ಅಭಿಲಾಷ್​ ಶೆಟ್ಟಿ 70ಕ್ಕೆ 2, ಶ್ರೇಯಸ್​ 38ಕ್ಕೆ 2). ಪಂದ್ಯಶ್ರೇಷ್ಠ: ದೇವದತ್​ ಪಡಿಕ್ಕಲ್​

*9: ಲಿಸ್ಟ್​ ಎ ಏಕದಿನ ಕ್ರಿಕೆಟ್​ನಲ್ಲಿ ಆಡಿದ 30ನೇ ಇನಿಂಗ್ಸ್​ನಲ್ಲಿ ದೇವದತ್​ ಪಡಿಕ್ಕಲ್​ 9ನೇ ಶತಕ ಸಿಡಿಸಿದರು. 30 ಇನಿಂಗ್ಸ್​ಗಳಲ್ಲಿ ಒಟ್ಟಾರೆ 20ನೇ ಬಾರಿ ಅವರು 50 ಪ್ಲಸ್​ ರನ್​ ಬಾರಿಸಿದರು.

ಇಂದಿನ ಕ್ವಾರ್ಟರ್​ಫೈನಲ್ಸ್​

ಗುಜರಾತ್​-ಹರಿಯಾಣ

ವಿದರ್ಭ-ರಾಜಸ್ಥಾನ

ಆರಂಭ: ಬೆಳಗ್ಗೆ 9.00

ನೇರಪ್ರಸಾರ: ಜಿಯೋಸಿನಿಮಾ

ಹರಿಯಾಣ/ಗುಜರಾತ್​ ಸೆಮೀಸ್​ ಎದುರಾಳಿ

ಕರ್ನಾಟಕ ತಂಡ ಇನ್ನು ಜನವರಿ 15ರಂದು ವಡೋದರದ ಕೋಟಂಬಿ ಸ್ಟೇಡಿಯಂನಲ್ಲಿ ನಡೆಯಲಿರುವ ಮೊದಲ ಸೆಮಿಫೈನಲ್​ ಪಂದ್ಯದಲ್ಲಿ ಹರಿಯಾಣ ಅಥವಾ ಗುಜರಾತ್​ ತಂಡವನ್ನು ಎದುರಿಸಲಿದೆ. 2ನೇ ಸೆಮಿಫೈನಲ್​ ಜ.16ಕ್ಕೆ ನಡೆಯಲಿದೆ. ಜ.18ಕ್ಕೆ ಫೈನಲ್​ ನಿಗದಿಯಾಗಿದೆ.

3: ಕರ್ನಾಟಕ ತಂಡ ವಿಜಯ್​ ಹಜಾರೆ ಟ್ರೋಫಿಯಲ್ಲಿ ಸತತ 3ನೇ ಬಾರಿ ಸೆಮಿಫೈನಲ್​ ಪ್ರವೇಶಿಸಿದೆ. ಆದರೆ ಹಿಂದಿನ 2 ಬಾರಿ ಸೆಮೀಸ್​ನಲ್ಲೇ ಹೊರಬಿದ್ದಿತ್ತು.

ಅರ್ಷದೀಪ್​ ಆಲ್ರೌಂಡ್​ ಆಟ ವ್ಯರ್ಥ, ಪಂಜಾಬ್​ಗೆ ಸೋಲು

ಟೀಮ್​ ಇಂಡಿಯಾ ಆಟಗಾರ ಅರ್ಷದೀಪ್​ ಸಿಂಗ್​ (56ಕ್ಕೆ 3 ವಿಕೆಟ್​, 49 ರನ್​, 39 ಎಸೆತ, 3 ಬೌಂಡರಿ, 3 ಸಿಕ್ಸರ್​) ಆಲ್ರೌಂಡ್​ ನಿರ್ವಹಣೆಯ ನಡುವೆಯೂ ಪಂಜಾಬ್​ ತಂಡ ದಿನದ ಮತ್ತೊಂದು ಕ್ವಾರ್ಟರ್​ಫೈನಲ್​ ಪಂದ್ಯದಲ್ಲಿ ಮಹಾರಾಷ್ಟ್ರ ಎದುರು 70 ರನ್​ಗಳಿಂದ ಪರಾಭವಗೊಂಡಿತು. ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಋತುರಾಜ್​ ಗಾಯಕ್ವಾಡ್​ ಸಾರಥ್ಯದ ಮಹಾರಾಷ್ಟ್ರ, ಅರ್ಶಿನ್​ ಕುಲಕರ್ಣಿ (107) ಶತಕದ ನೆರವಿನಿಂದ 6 ವಿಕೆಟ್​ಗೆ 275 ರನ್​ ಪೇರಿಸಿತು. ಪ್ರತಿಯಾಗಿ ಮುಕೇಶ್​ ಚೌಧರಿ (44ಕ್ಕೆ 3) ದಾಳಿಗೆ ಕುಸಿದ ಪಂಜಾಬ್​, 123 ರನ್​ಗಳಿಗೆ 7 ವಿಕೆಟ್​ ಕಳೆದುಕೊಂಡು ಸೋಲಿನ ಸುಳಿಗೆ ಸಿಲುಕಿತು. ಆಗ 9ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಇಳಿದ ಅರ್ಷದೀಪ್​ ಬಿರುಸಿನ ಆಟವಾಡಿದರೂ, ಅಂತಿಮವಾಗಿ ಪಂಜಾಬ್​ 44.4 ಓವರ್​ಗಳಲ್ಲಿ 205 ರನ್​ಗಳಿಗೆ ಸರ್ವಪತನ ಕಂಡು ಶರಣಾಯಿತು.

https://www.vijayavani.net/pratika-rawal-a-psychology-student-who-is-interested-in-womens-cricket