ದಾಖಲೆಯ 24ನೇ ಗ್ರಾಂಡ್ ಸ್ಲಾಂ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿರುವ ಅಮೆರಿಕದ ತಾರೆ ಸೆರೇನಾ ವಿಲಿಯಮ್ಸ್, ಆಸ್ಟ್ರೇಲಿಯನ್ ಓಪನ್ ಮಾಜಿ ಚಾಂಪಿಯನ್ ಸೋಫಿಯಾ ಕೆನಿನ್, ಸ್ವಿಸ್ ತಾರೆ ಬೆಲಿಂಡಾ ಬೆನ್ಸಿಕ್ ಶುಭಾರಂಭ ಕಂಡಿದ್ದಾರೆ. 7ನೇ ಶ್ರೇಯಾಂಕಿತೆ ಸೆರೇನಾ ವಿಲಿಯಮ್ಸ್ ಮೊದಲ ಸುತ್ತಿನಲ್ಲಿ ರೊಮೇನಿಯಾದ ಇರಿನಾ ಕ್ಯಾಮೆಲಿಯ ಬೆಗು ವಿರುದ್ಧ 7-6 (6), 6-2 ಸೆಟ್ಗಳಿಂದ ಸ್ವಲ್ಪಮಟ್ಟಿಗೆ ತಿಣುಕಾಡಿ ಗೆದ್ದರು. ಸೆರೇನಾ ತಾಯಿಯಾದ ಬಳಿಕ 4 ಗ್ರಾಂಡ್ ಸ್ಲಾಂಗಳಲ್ಲಿ ಫೈನಲ್ಗೇರಿದ್ದರೂ, ರನ್ನರ್ಅಪ್ ಸ್ಥಾನಕ್ಕೆ ತೃಪ್ತಿಪಡುತ್ತ ಬಂದಿದ್ದಾರೆ. ಅಮೆರಿಕದ ಮತ್ತೋರ್ವ ತಾರೆ ಸೋಫಿಯಾ ಕೆನಿನ್ 6-4, 4-6, 6-3ರಿಂದ ಮಾಜಿ ಚಾಂಪಿಯನ್ ಜೆಲೆನಾ ಒಸ್ತಾಪೆಂಕೊ ವಿರುದ್ಧ ಜಯಿಸಿದರೆ, 10ನೇ ಶ್ರೇಯಾಂಕಿತೆ ಬೆನ್ಸಿಕ್ 6-0, 6-3ರಿಂದ ಅರ್ಜೆಂಟೀನಾದ ನಾಡಿಯಾ ಪೊಡೊರೊಸ್ಕಾ ವಿರುದ್ಧ ಗೆಲುವು ಸಾಧಿಸಿದರು.
