ಬೇರೆ ದೇಶಗಳ ಪರ ಆಡಿ ಸಖತ್​ ಹೆಸರು ಮಾಡಿದ ಭಾರತೀಯ ಮೂಲದ ಟಾಪ್​ 10 ಕ್ರಿಕೆಟಿಗರಿವರು... Indian Origin Cricketers

Indian Origin Cricketers : ಮಾರ್ಚ್​ 9ರಂದು ಮುಕ್ತಾಯಗೊಂಡ ಚಾಂಪಿಯನ್ಸ್ ಟ್ರೋಫಿಯಲ್ಲಿ ರಾಚಿನ್ ರವೀಂದ್ರ ಅವರನ್ನು ಪಂದ್ಯಾವಳಿಯ ಆಟಗಾರ ಎಂದು ಐಸಿಸಿ ಹೆಸರಿಸಿರುವುದು ನಿಮಗೆಲ್ಲರಿಗೂ ಗೊತ್ತೇ ಇದೆ. ನ್ಯೂಜಿಲೆಂಡ್​ ಪರ ಆಡುತ್ತಿರುವ ರಾಚಿನ್​ ರವೀಂದ್ರ ಮೂಲತಃ ಭಾರತದವರು. ರಾಚಿನ್​ ಮಾತ್ರವಲ್ಲ ಭಾರತೀಯ ಮೂಲದ ಅನೇಕ ಕ್ರಿಕೆಟಿಗರು ಇತರ ದೇಶಗಳ ಪರ ಆಡುವ ಮೂಲಕ ಒಳ್ಳೆಯ ಹೆಸರು ಮಾಡಿದ್ದಾರೆ. ಆ 10 ಕ್ರಿಕೆಟಿಗರ ಬಗ್ಗೆ ನಾವೀಗ ತಿಳಿದುಕೊಳ್ಳೋಣ.

ರಾಚಿನ್ ರವೀಂದ್ರ: ರಾಚಿನ್ ಅವರು 1999 ನವೆಂಬರ್ 18ರಂದು ನ್ಯೂಜಿಲೆಂಡ್‌ನ ವೆಲ್ಲಿಂಗ್ಟನ್‌ನಲ್ಲಿ ಬೆಂಗಳೂರು ಮೂಲದ ದಂಪತಿಗೆ ಜನಿಸಿದರು. ಐದನೇ ವಯಸ್ಸಿನಲ್ಲಿ ಕ್ರಿಕೆಟ್ ಆಡಲು ಪ್ರಾರಂಭಿಸಿದ ರಾಚಿನ್, ಅವರ ತಂದೆ ರವಿ ಕೃಷ್ಣಮೂರ್ತಿ (ಬೆಂಗಳೂರಿನ ಮಾಜಿ ಕ್ಲಬ್ ಆಟಗಾರ) ಅವರಿಂದ ಪ್ರಭಾವಿತರಾಗಿದ್ದರು. ಕೃಷ್ಣಮೂರ್ತಿ ಅವರು ಭಾರತೀಯ ಕ್ರಿಕೆಟ್ ದಂತಕತೆಗಳಾದ ಸಚಿನ್ ತೆಂಡೂಲ್ಕರ್ ಮತ್ತು ರಾಹುಲ್ ದ್ರಾವಿಡ್ ಅವರ ಗೌರವಾರ್ಥವಾಗಿ ರಾಚಿನ್ ಎಂದು ಹೆಸರಿಟ್ಟಿದ್ದಾರೆ. ರಾಚಿನ್ 2021ರಲ್ಲಿ ನ್ಯೂಜಿಲೆಂಡ್ ಪರ ಪಾದಾರ್ಪಣೆ ಮಾಡಿದರು. ಸ್ಪಿನ್ ಬೌಲಿಂಗ್ ಆಲ್‌ರೌಂಡರ್ ಆಗಿರುವ ರಾಚಿನ್ ಬಹು ಬೇಗನೆ ಸ್ಟಾರ್​ ಆಟಗಾರ ಪಟ್ಟವನ್ನು ಪಡೆದಿದ್ದಾರೆ.

ಕೇಶವ್ ಮಹಾರಾಜ್: 1990, ಫೆಬ್ರವರಿ 7ರಂದು ದಕ್ಷಿಣ ಆಫ್ರಿಕಾದ ಡರ್ಬನ್‌ನಲ್ಲಿ ಜನಿಸಿದ ಕೇಶವ್ ಮಹಾರಾಜ್, ಭಾರತೀಯ ಕುಟುಂಬದಿಂದ ಬಂದವರು. ಕೇಶವ್ ಮಹಾರಾಜ್ ಅವರ ಪೂರ್ವಜರು ಉತ್ತರ ಪ್ರದೇಶದವರು ಎಂದು ತಿಳಿದುಬಂದಿದೆ. ಕೇಶವ್ 2016ರಲ್ಲಿ ದಕ್ಷಿಣ ಆಫ್ರಿಕಾ ಪರ ಟೆಸ್ಟ್ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡಿದರು. ಅವರು ಬೇಗನೆ ಅಗ್ರ ಎಡಗೈ ಸ್ಪಿನ್ನರ್‌ಗಳಲ್ಲಿ ಒಬ್ಬರಾದರು. ದಕ್ಷಿಣ ಆಫ್ರಿಕಾದ ಅನೇಕ ಟೆಸ್ಟ್ ವಿಜಯಗಳಲ್ಲಿ ಮಹಾರಾಜ್ ಪ್ರಮುಖ ಪಾತ್ರ ವಹಿಸಿದ್ದಾರೆ. 2021ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಮಹಾರಾಜ್ ಅವರ ಹ್ಯಾಟ್ರಿಕ್ ಅವಿಸ್ಮರಣೀಯ.

ಐಶ್ ಸೋಧಿ: ಇಂದರ್ಬೀರ್ ಸಿಂಗ್ ಸೋಧಿ ಅಥವಾ ಇಶ್ ಸೋಧಿ 1992, ಅಕ್ಟೋಬರ್ 31 ರಂದು ಪಂಜಾಬ್‌ನ ಲುಧಿಯಾನದಲ್ಲಿ ಜನಿಸಿದರು. ಸೋಧಿ ತಮ್ಮ ಆರಂಭಿಕ ದಿನಗಳನ್ನು ನ್ಯೂಜಿಲೆಂಡ್‌ನಲ್ಲಿ ಕಳೆದರು. ಸೋಧಿ 2013ರಲ್ಲಿ ನ್ಯೂಜಿಲೆಂಡ್ ಪರ ಪಾದಾರ್ಪಣೆ ಮಾಡಿದರು. ಸೀಮಿತ ಓವರ್‌ಗಳ ಸ್ವರೂಪದಲ್ಲಿ ಸೋಧಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ಖ್ಯಾತಿ ಗಳಿಸಿದ್ದಾರೆ. ಸೋಧಿ ವಿಶೇಷವಾಗಿ ಟಿ20 ಸ್ವರೂಪದಲ್ಲಿ ಒಳ್ಳೆಯ ಪ್ರದರ್ಶನ ನೀಡಿದ್ದಾರೆ.

ಶಿವನಾರಾಯಣ್ ಚಂದ್ರಪಾಲ್ : ವೆಸ್ಟ್ ಇಂಡೀಸ್ ಕ್ರಿಕೆಟ್‌ನ ಅತ್ಯಂತ ವಿಶ್ವಾಸಾರ್ಹ ಬ್ಯಾಟ್ಸ್‌ಮನ್‌ಗಳಲ್ಲಿ ಒಬ್ಬರಾದ ಶಿವನಾರಾಯಣ್ ಚಂದ್ರಪಾಲ್, 1974 ಆಗಸ್ಟ್ 16ರಂದು ಗಯಾನಾದಲ್ಲಿ ಭಾರತೀಯ ಕುಟುಂಬದಲ್ಲಿ ಜನಿಸಿದರು. 1994ರಲ್ಲಿ ವೆಸ್ಟ್ ಇಂಡೀಸ್ ಪರ ಪಾದಾರ್ಪಣೆ ಮಾಡಿದ ಚಂದ್ರಪಾಲ್, ತಮ್ಮ ವಿಶಿಷ್ಟ ಬ್ಯಾಟಿಂಗ್ ನಿಲುವಿಗೆ ಹೆಸರುವಾಸಿಯಾಗಿದ್ದಾರೆ. ಚಂದ್ರಪಾಲ್ ತಮ್ಮ ವೃತ್ತಿಜೀವನದಲ್ಲಿ 20,000ಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ. ಚಂದ್ರಪಾಲ್ ಅವರು ವೆಸ್ಟ್ ಇಂಡೀಸ್ ಕ್ರಿಕೆಟ್ ಇತಿಹಾಸದಲ್ಲಿ ತನ್ನದೇಯಾದ ವಿಶೇಷ ಸ್ಥಾನವನ್ನು ಸ್ಥಾಪಿಸಿದ್ದಾರೆ.

ಮಾಂಟಿ ಪನೇಸರ್: ಮದ್ಸುದೇನ್ ಸಿಂಗ್ ಪನೇಸರ್​ ಅಥವಾ ಮಾಂಟಿ ಪನೇಸರ್ 1982ರ ಏಪ್ರಿಲ್ 25ರಂದು ಇಂಗ್ಲೆಂಡ್‌ನ ಲುಟನ್‌ನಲ್ಲಿ ಪಂಜಾಬಿ ದಂಪತಿಗೆ ಜನಿಸಿದರು. ಮಾಂಟಿ 2006ರಲ್ಲಿ ಇಂಗ್ಲೆಂಡ್ ಪರ ಟೆಸ್ಟ್ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡಿದರು. ಎಡಗೈ ಸ್ಪಿನ್ನರ್ ಆಗಿರುವ ಮಾಂಟಿ, ಇಂಗ್ಲೆಂಡ್ ಪರ ಟೆಸ್ಟ್ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಇಂಗ್ಲೆಂಡ್‌ನ ಆಶಸ್ ಸರಣಿಯ ವಿಜಯಗಳಲ್ಲಿ ಮಾಂಟಿ ಪ್ರಮುಖ ಪಾತ್ರ ವಹಿಸಿದ್ದಾರೆ.

ರವಿ ಬೋಪರಾ: 1985 ಮೇ 4ರಂದು ಲಂಡನ್‌ನಲ್ಲಿ ಭಾರತೀಯ ದಂಪತಿಗೆ ಜನಿಸಿದ ರವಿ ಬೋಪರಾ, ಎಲ್ಲ ಸ್ವರೂಪಗಳಲ್ಲಿ ಇಂಗ್ಲೆಂಡ್ ಅನ್ನು ಪ್ರತಿನಿಧಿಸಿದ್ದಾರೆ. 2007 ರಲ್ಲಿ ಇಂಗ್ಲೆಂಡ್ ಪರ ಪಾದಾರ್ಪಣೆ ಮಾಡಿದ ಬೋಪರಾ, ತಮ್ಮ ಸ್ಟೈಲಿಶ್ ಬ್ಯಾಟಿಂಗ್ ಮತ್ತು ಮಧ್ಯಮ ವೇಗದ ಬೌಲಿಂಗ್‌ಗೆ ಹೆಸರುವಾಸಿಯಾಗಿದ್ದಾರೆ. ಬೋಪರಾ ಏಕದಿನ ಮತ್ತು ಟೆಸ್ಟ್‌ಗಳಲ್ಲಿ ಉತ್ತಮ ಟ್ರ್ಯಾಕ್ ರೆಕಾರ್ಡ್ ಹೊಂದಿದ್ದಾರೆ.

ಸುನಿಲ್ ನಾರಾಯಣ್​: 1988, ಮೇ 26ರಂದು ಟ್ರಿನಿಡಾಡ್ ಮತ್ತು ಟೊಬಾಗೋದಲ್ಲಿ ಭಾರತೀಯ ಮೂಲದ ದಂಪತಿಗೆ ಜನಿಸಿದ ಸುನಿಲ್ ನರೈನ್ ತಮ್ಮ ನಿಗೂಢ ಸ್ಪಿನ್ ಬೌಲಿಂಗ್‌ಗೆ ಹೆಸರುವಾಸಿಯಾಗಿದ್ದಾರೆ. 2011ರಲ್ಲಿ ವೆಸ್ಟ್ ಇಂಡೀಸ್ ಪರ ಪಾದಾರ್ಪಣೆ ಮಾಡಿದ ನಾರಾಯಣ್​, 2012ರ ಟಿ20 ವಿಶ್ವಕಪ್‌ನಲ್ಲಿ ವೆಸ್ಟ್ ಇಂಡೀಸ್ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ನಾರಾಯಣ್​ ಪ್ರಪಂಚದಾದ್ಯಂತದ ಬಹುತೇಕ ಎಲ್ಲಾ ಲೀಗ್‌ಗಳಲ್ಲಿ ಆಡುತ್ತಾರೆ. ಐಪಿಎಲ್​ನಲ್ಲಿ ಕೋಲ್ಕತ ನೈಟ್​ ರೈಡರ್ಸ್​ ಪರ ಆಡುತ್ತಿದ್ದಾರೆ. ಬೌಲಿಂಗ್​ ಮಾತ್ರವಲ್ಲದೆ, ಸ್ಫೋಟಕ ಬ್ಯಾಟ್ಸ್​​ಮನ್​ ಕೂಡ ಹೌದು.

ತೇಜ ನಿಡಮನೂರು : ಆಂಧ್ರಪ್ರದೇಶದ ವಿಜಯವಾಡದಲ್ಲಿ ಜನಿಸಿದ ತೇಜ ನಿಡಮನೂರು ನೆದರ್ಲ್ಯಾಂಡ್ಸ್ ಪರ ಆಡುತ್ತಾರೆ. ತೇಜ ಅವರು ಸೀಮಿತ ಓವರ್‌ಗಳ ಸ್ವರೂಪಗಳಲ್ಲಿ ಉತ್ತಮ ಪ್ರದರ್ಶನ ನೀಡುವವರಾಗಿ ತಮ್ಮನ್ನು ತಾವು ಗುರುತಿಸಿಕೊಂಡಿದ್ದಾರೆ. ತೇಜ, ನೆದರ್ಲ್ಯಾಂಡ್ಸ್ ಗೆದ್ದ ಅನೇಕ ಪಂದ್ಯಗಳಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ನೆದರ್ಲ್ಯಾಂಡ್ಸ್‌ಗೆ ಬರುವ ಮೊದಲು, ತೇಜ ಕ್ರಿಕೆಟ್ ಅವಕಾಶಗಳನ್ನು ಹುಡುಕುತ್ತಾ ನ್ಯೂಜಿಲೆಂಡ್‌ನಲ್ಲಿ ಸಮಯ ಕಳೆದರು. ಆಲ್‌ರೌಂಡರ್ ಆಗಿರುವ ತೇಜ ಐಸಿಸಿ ಪಂದ್ಯಾವಳಿಗಳಲ್ಲಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ಉತ್ತಮ ಹೆಸರು ಗಳಿಸಿದ್ದಾರೆ.

ಮೋನಾಂಕ್ ಪಟೇಲ್: 1993, ಮೇ 1ರಂದು ಗುಜರಾತ್‌ನಲ್ಲಿ ಜನಿಸಿದ ಮೋನಾಂಕ್ ಪಟೇಲ್ ಅಮೆರಿಕಕ್ಕೆ ವಲಸೆ ಹೋಗಿ ಅಮೆರಿಕನ್ ಕ್ರಿಕೆಟ್‌ನಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡರು. ಪಟೇಲ್ ಯುಎಸ್ಎ ತಂಡದಲ್ಲಿ ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್ ಮತ್ತು ವಿಕೆಟ್ ಕೀಪರ್ ಆಗಿ ಆಡುತ್ತಾರೆ. ಇತ್ತೀಚಿನ ಟಿ20 ವಿಶ್ವಕಪ್ ಮತ್ತು ಹಿಂದಿನ ಮೇಜರ್ ಲೀಗ್ ಕ್ರಿಕೆಟ್‌ನಲ್ಲಿ ಮೋನಾಂಕ್ ಅದ್ಭುತ ಪ್ರದರ್ಶನ ನೀಡಿದರು.

ಮಿಲಿಂದ್ ಕುಮಾರ್: 1991, ಫೆಬ್ರವರಿ 15ರಂದು ದೆಹಲಿಯಲ್ಲಿ ಜನಿಸಿದ ಮಿಲಿಂದ್ ಕುಮಾರ್ ಭಾರತೀಯ ದೇಶೀಯ ಕ್ರಿಕೆಟ್‌ನಲ್ಲಿ ಸಾಕಷ್ಟು ರನ್ ಗಳಿಸಿದ್ದಾರೆ. ನಂತರ, ಅವರು ಅಮೆರಿಕಕ್ಕೆ ತೆರಳಿ ಯುಎಸ್ ರಾಷ್ಟ್ರೀಯ ತಂಡಕ್ಕಾಗಿ ಆಡಲು ಪ್ರಾರಂಭಿಸಿದರು. ಮಿಲಿಂದ್ ಬೇಗನೆ ಯುಎಸ್ಎ ತಂಡದಲ್ಲಿ ಪ್ರಮುಖ ಆಟಗಾರನಾಗಿ ತನ್ನನ್ನು ತಾನು ಸ್ಥಾಪಿಸಿಕೊಂಡರು.

https://www.vijayavani.net/team-of-the-tourney-2025-icc-announces-the-champions-trophy-team-rohit-misses-out

https://www.vijayavani.net/rohit-sharma-walks-out-leaving-champions-trophy