ರಾವಲ್ಪಿಂಡಿ: ಪಾಕಿಸ್ತಾನ ಕ್ರಿಕೆಟ್ನಲ್ಲಿ (Pakistan Cricket) ಸದ್ಯ ಯಾವುದು ಸರಿಯಿಲ್ಲ ಅನ್ನೋದು ಕೆಲವು ತಿಂಗಳಿನಿಂದ ಒಂದಲ್ಲ ಒಂದು ಸುದ್ದಿಯಿಂದ ಮತ್ತಷ್ಟು ಸ್ಪಷ್ಟವಾಗುತ್ತಿದೆ. ಬಾಬರ್ ಆಜಂ ನಾಯಕತ್ವದಲ್ಲಿ ಹೀನಾಯ ಸೋಲು ಕಂಡಿರುವ ಪಾಕ್ ತಂಡ, ಇದೀಗ ಕೇವಲ ಟಿ20 ಮಾತ್ರವಲ್ಲದೇ ಏಕದಿನ, ಟೆಸ್ಟ್ ಫಾರ್ಮೆಟ್ಗಳನ್ನು ವಶಪಡಿಸಿಕೊಳ್ಳುವಲ್ಲಿಯೂ ಸಹ ವಿಫಲವಾಗಿದೆ. ಸದ್ಯ ಈ ಎಲ್ಲಾ ವಿಷಯಗಳಿಂದ ತತ್ತರಿಸಿರುವ ಪಾಕಿಸ್ತಾನ ಕ್ರಿಕೆಟ್ ಬೋರ್ಡ್ (Pakistan Cricket Board), ಇತ್ತೀಚೆಗಷ್ಟೇ ಆಯ್ಕೆಗಾರ ಸ್ಥಾನಕ್ಕೆ ಮಾಜಿ ಹಿರಿಯ ಕ್ರಿಕೆಟಿಗ ಮೊಹಮ್ಮದ್ ಯೂಸಫ್ ನೀಡಿದ ರಾಜೀನಾಮೆಯಿಂದ ಸಂಪೂರ್ಣವಾಗಿ ಕುಸಿದು ಹೋಗಿದೆ. ಇಲ್ಲಿ ಪಿಸಿಬಿಯ ಆಡಳಿತ ಸರಿಯಿಲ್ಲವೋ ಅಥವಾ ಆಟಗಾರರ ಶ್ರಮದಲ್ಲಿ ಕೊರತೆಯಿದೆಯೋ ಎಂಬುದು ತಿಳಿಯದಂತಾಗಿದೆ. ಸದ್ಯ ಪಾಕ್ ಕ್ರಿಕೆಟ್ನ ಈ ಪರಿಸ್ಥಿತಿಗೆ ಹಿರಿಯ ಮಾಜಿ ಆಟಗಾರರು ಬಾಬರ್ ಆಜಂ ಕಾರಣ ಎಂದು ನೇರವಾಗಿ ಬೆರಳ ತೋರಿಸಿ ಆರೋಪಿಸುತ್ತಿದ್ದಾರೆ. ಇದೀಗ ಈ ವಿಷಯಕ್ಕೆ ಪ್ರತಿಕ್ರಿಯಿಸಿರುವ ಇಂಗ್ಲೆಂಡ್ನ ಮಾಜಿ ಕ್ರಿಕೆಟಿಗ ನಾಸರ್ ಹುಸೈನ್ (Nasser Hussain), ಇದಕ್ಕೆಲ್ಲ ಬಾಬರ್ ಮಾತ್ರವೇ ಕಾರಣ ಅಲ್ಲ ಎಂದು ಸ್ಪಷ್ಟನೆ ಜತೆ ಸೂಕ್ತ ಕಾರಣ ನೀಡಿದ್ದಾರೆ.
