ಕಾಂಗರೂ ನೆಲದಲ್ಲಿ ನಿಗದಿಯಾಗಿದ್ದ ಟೀಮ್​ ಇಂಡಿಯಾದ ಅಭ್ಯಾಸ ಪಂದ್ಯ ರದ್ದು; ಹೀಗಿದೆ ಕಾರಣ...

ನವದೆಹಲಿ: ಭಾರತ ತಂಡ ಮುಂಬರುವ ಆಸ್ಟ್ರೆಲಿಯಾ ಪ್ರವಾಸದ ಆರಂಭದಲ್ಲಿ ಬಾರ್ಡರ್​&ಗಾವಸ್ಕರ್​ ಟ್ರೋಫಿ ಟೆಸ್ಟ್​ ಸರಣಿಗೆ ಮುನ್ನ ಭಾರತ ಎ ತಂಡದ ವಿರುದ್ಧ ಪರ್ತ್​ನಲ್ಲಿ ಆಡಬೇಕಾಗಿದ್ದ ತ್ರಿದಿನ ಅಭ್ಯಾಸ ಪಂದ್ಯವನ್ನು ರದ್ದುಗೊಳಿಸಲಾಗಿದೆ. 5 ಟೆಸ್ಟ್​ ಪಂದ್ಯಗಳ ಸುದೀರ್ ಸರಣಿಗೆ ಮುನ್ನ ಆಟಗಾರರು ಹೆಚ್ಚುವರಿ ನೆಟ್​ ಅಭ್ಯಾಸದತ್ತ ಗಮನಹರಿಸಬೇಕೆಂದು ಟೀಮ್​ ಮ್ಯಾನೇಜ್​ಮೆಂಟ್​ ಬಯಸಿರುವುದು ಇದಕ್ಕೆ ಕಾರಣವಾಗಿದೆ.

ಈ ಹಿಂದಿನ ವೇಳಾಪಟ್ಟಿಯ ಪ್ರಕಾರ, ರೋಹಿತ್​ ಶರ್ಮ ಸಾರಥ್ಯದ ಭಾರತ ಟೆಸ್ಟ್​ ತಂಡ ನವೆಂಬರ್​ 15ರಿಂದ 17ರವರೆಗೆ ಋತುರಾಜ್​ ಗಾಯಕ್ವಾಡ್​ ಸಾರಥ್ಯದ ಭಾರತ ಎ ತಂಡದ ವಿರುದ್ಧ ವಾಕಾದಲ್ಲಿ ಅಭ್ಯಾಸ ಪಂದ್ಯ ಆಡಬೇಕಾಗಿತ್ತು. ಭಾರತ ಎ ತಂಡ ಸದ್ಯ ಆಸ್ಟ್ರೆಲಿಯಾ ಪ್ರವಾಸದಲ್ಲೇ ಇರುವುದರಿಂದ ಈ ಪಂದ್ಯ ಆಯೋಜಿಸಲಾಗಿತ್ತು. ಆದರೆ ಮುಖ್ಯ ಕೋಚ್​ ಗೌತಮ್​ ಗಂಭೀರ್​ ಜತೆಗೆ ಭಾರತ ತಂಡದ ಕೆಲ ಹಿರಿಯ ಆಟಗಾರರು ಆಸೀಸ್​ನಲ್ಲಿ ನೆಟ್ಸ್​ನಲ್ಲೇ ಹೆಚ್ಚಿನ ಅಭ್ಯಾಸ ನಡೆಸಲು ಬಯಸಿದ್ದಾರೆ. ನವೆಂಬರ್​ 22ರಿಂದ ಪರ್ತ್​ನಲ್ಲೇ ಟೆಸ್ಟ್​ ಸರಣಿ ಶುರುವಾಗಲಿದೆ.

ತವರಿನಲ್ಲಿ ಕಿವೀಸ್​ ವಿರುದ್ಧ ಸರಣಿ ಸೋತಿರುವುದರಿಂದ ಭಾರತ ತಂಡವೀಗ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಫೈನಲ್​ಗೇರಲು ಆಸೀಸ್​ ನೆಲದಲ್ಲಿ 3ರಿಂದ 4 ಪಂದ್ಯ ಗೆಲ್ಲುವ ಸವಾಲು ಎದುರಿಸುತ್ತಿದೆ. ಅಭ್ಯಾಸ ಪಂದ್ಯದಲ್ಲಿ ಬ್ಯಾಟರ್​ ಬೇಗನೆ ಔಟಾದರೆ ಹೆಚ್ಚಿನ ಬ್ಯಾಟಿಂಗ್​ ಅಭ್ಯಾಸ ನಡೆಸುವ ಅವಕಾಶ ತಪ್ಪಿಹೋಗುತ್ತದೆ. ಆದರೆ ನೆಟ್ಸ್​ನಲ್ಲಾದರೆ ಬೇಕಾದಷ್ಟು ಸಮಯ ಬ್ಯಾಟಿಂಗ್​ ನಡೆಸಬಹುದಾಗಿರುತ್ತದೆ.

https://www.vijayavani.net/hardik-pandya-continues-as-mumbai-captain-rohits-justification-for-being-retained-in-the-4th-position