ಮೈಸೂರಿನಲ್ಲಿ ಮೂರು ಅಂಕಕ್ಕೆ ತೃಪ್ತಿಪಟ್ಟ ಕರ್ನಾಟಕ; ಮಯಾಂಕ್​ ಬಳಗದ ಗೆಲುವಿಗೆ ಅಡ್ಡಿಯಾದ ಸುಯಶ್​ ಪ್ರಭುದೇಸಾಯಿ ಶತಕ

ಮೈಸೂರು: ಮೊದಲ ಇನಿಂಗ್ಸ್​ನಲ್ಲಿ ಬೃಹತ್​ ಮುನ್ನಡೆ ಸಾಧಿಸಿ ಗೆಲುವಿನ ಮೇಲೆ ಕಣ್ಣಿಟ್ಟಿದ್ದ ಕರ್ನಾಟಕ ತಂಡ ರಣಜಿ ಟ್ರೋಫಿ ದೇಶೀಯ ಕ್ರಿಕೆಟ್​ ಟೂರ್ನಿಯ ತನ್ನ 3ನೇ ಪಂದ್ಯದಲ್ಲಿ ಪ್ರವಾಸಿ ಗೋವಾ ಎದುರು ಪೂರ್ಣ ಅಂಕ ಸಂಪಾದಿಸಲು ಸುಯಶ್​ ಪ್ರಭುದೇಸಾಯಿ (143 ರನ್​*, 289 ಎಸೆತ, 11 ಬೌಂಡರಿ) ಅಡ್ಡಿಯಾದರು. 2ನೇ ಇನಿಂಗ್ಸ್​ನಲ್ಲಿ 436 ನಿಮಿಷ ಕ್ರೀಸ್​ನಲ್ಲಿ ನಿಂತು ಆತಿಥೇಯ ಬೌಲರ್​ಗಳಿಗೆ ಕಗ್ಗಂಟಾದ ಸುಯಶ್​, ಸಮಯೋಚಿತ ಶತಕ ದಾಖಲಿಸುವ ಕರ್ನಾಟಕ ತಂಡ ಕೇವಲ 3 ಅಂಕಗಳಿಗೆ ತೃಪ್ತಿಪಡುವಂತೆ ಮಾಡಿದರು.

ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್​(ಗ್ಲೇಡ್ಸ್​) ಮೈದಾನದಲ್ಲಿ ಸೋಮವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ ಅಂತಿಮ ದಿನವಾದ ಸೋಮವಾರ ಬೆಳಗ್ಗೆ 1 ವಿಕೆಟ್​ಗೆ 93 ರನ್​ಗಳಿಂದ ದ್ವೀತಿಯ ಇನಿಂಗ್ಸ್​ ಮುಂದುವರಿಸಿದ ಗೋವಾ, 100 ಓವರ್​ಗಳಲ್ಲಿ 6 ವಿಕೆಟ್​ಗೆ 282 ರನ್​ ದಾಖಲಿಸಿ ಡ್ರಾ ಸಾಧಿಸಿತು. ಮೊದಲ ಇನಿಂಗ್ಸ್​ ಮುನ್ನಡೆ ಆಧಾರದಲ್ಲಿ 3 ಅಂಕ ಗಳಿಸಿದ ಕರ್ನಾಟಕ, ಸಿ ಗುಂಪಿನ ಅಂಕಪಟ್ಟಿಯಲ್ಲಿ ಒಟ್ಟು 9 ಅಂಕ ಕಲೆಹಾಕಿ 3ನೇ ಸ್ಥಾನದಲ್ಲಿದೆ. ಸೋಲಿನಿಂದ ಪಾರಾದ ಗೋವಾ 1 ಅಂಕ ಗಳಿಸಿ ಒಟ್ಟು 4 ಅಂಕಗಳೊಂದಿಗೆ 6 ಸ್ಥಾನದಲ್ಲಿದೆ.

ಕಾಡಿದ ದೀಪರಾಜ್​-ಸುಯಶ್​ ಜೋಡಿ

ಮೊದಲ ಇನಿಂಗ್ಸ್​ನಲ್ಲಿ ಪೆವಿಲಿಯನ್​ ಪರೇಡ್​ ನಡೆಸಿದ್ದ ಗೋವಾ ಬ್ಯಾಟರ್​ಗಳು 2ನೇ ಸರದಿಯಲ್ಲಿ ಕರ್ನಾಟಕದ ಬೌಲರ್​ಗಳನ್ನು ಕಾಡಿದರು. 3ನೇ ದಿನ 2ನೇ ವಿಕೆಟ್​ಗೆ 92 ರನ್​ ಸೇರಿಸಿ ಅಂತಿಮ ದಿನಕ್ಕೆ ಬ್ಯಾಟಿಂಗ್​ ಕಾಯ್ದುಕೊಂಡಿದ್ದ ಕರ್ನಾಟಕ ಮೂಲದ ಬ್ಯಾಟರ್​ ಕೆ.ವಿ.ಸಿದ್ದಾರ್ಥ್​(57) ಹಾಗೂ ಸುಯಶ್​ ಪ್ರಭುದೇಸಾಯಿ ಜೋಡಿ ಕೇವಲ ಒಂದು ರನ್​ಗಳಿಸಿ ಬೇರ್ಪಟ್ಟಿತು. ವೈಶಾಕ್​ ಬೌಲಿಂಗ್​ನಲ್ಲಿ ದೇವದತ್​ ಪಡಿಕಲ್​ಗೆ ಸಿದ್ದಾರ್ಥ್​ ಕ್ಯಾಚ್​ ನೀಡಿದರು. ಬಳಿಕ ಆಗಮಿಸಿದ ಸ್ನೇಹಲ್​ ಕೌತಾಂಕರ್​(8) ಎಂ.ವೆಂಕಟೇಶ್​ ಬೌಲಿಂಗ್​ನಲ್ಲಿ ಎಲ್​ಬಿಗೆ ಬಲಿಯಾದರು. ನಂತರ ಪ್ರಭುದೇಸಾಯಿ ಜತೆಗೂಡಿದ ದೀಪರಾಜ್​ ಗಾಂವ್ಕರ್​(36) ಜವಾಬ್ದಾರಿಯುತ ಬ್ಯಾಟಿಂಗ್​ ಪ್ರದರ್ಶನ ನೀಡುವ ಮೂಲಕ ಗೋವಾ ತಂಡ ಡ್ರಾ ಸಾಧಿಸಲು ನೆರವಾದರು. ಈ ಜೋಡಿ 175 ನಿಮಿಷಗಳ ಕಾಲ ಕ್ರೀಸ್​ನಲ್ಲಿದ್ದು 4ನೇ ವಿಕೆಟ್​ಗೆ 246 ಎಸೆತದಲ್ಲಿ 97 ರನ್​ ಪೇರಿಸಿತು. ಸುಯಶ್​ ಪ್ರಭುದೇಸಾಯಿ ತಾಳ್ಮೆಯ ಬ್ಯಾಟಿಂಗ್​ ಮೂಲಕ ಶತಕ ಸಿಡಿಸಿ ಮಿಂಚಿದರು.

ಗೋವಾ: 321 ಮತ್ತು 100 ಓವರ್​ಗಳಲ್ಲಿ 6 ವಿಕೆಟ್​ಗೆ 282 (ಪ್ರಭುದೇಸಾಯಿ 143*, ಕೆ.ವಿ.ಸಿದ್ದಾರ್ಥ್​ 57, ಸ್ನೇಹಲ್​ 8, ದೀಪರಾಜ್​ 36, ದರ್ಶನ್​ ಮಿಸಾಲ್​ 13, ಅರ್ಜುನ್​ 6, ವೈಶಾಕ್​ 35ಕ್ಕೆ 2, ರೋಹಿತ್​ 67ಕ್ಕೆ 2, ಶುಭಾಂಗ್​ 77ಕ್ಕೆ 1, ವೆಂಕಟೇಶ್​ 29ಕ್ಕೆ 1). ಕರ್ನಾಟಕ: 9 ವಿಕೆಟ್​ಗೆ 498 ಡಿಕ್ಲೇರ್​.

ಕರ್ನಾಟಕಕ್ಕೆ ಮುಂದಿನ ಪಂದ್ಯ

ಯಾವಾಗ: ಜ.26&29

ಎದುರಾಳಿ: ತ್ರಿಪುರ

ಸ್ಥಳ: ಅಗರ್ತಲ

https://www.vijayavani.net/england-batsman-brook-to-miss-india-series-returns-home-for-personal-reasons