ಪ್ರೊ ಕಬಡ್ಡಿ ಲೀಗ್-8 ಆತಿಥ್ಯಕ್ಕೆ ಲಂಕಾ ಆಸಕ್ತಿ

ಕೊಲಂಬೊ: ಮುಂಬರುವ ಪ್ರೊ ಕಬಡ್ಡಿ ಲೀಗ್ 8ನೇ ಆವೃತ್ತಿಗೆ ಆತಿಥ್ಯ ವಹಿಸಲು ಶ್ರೀಲಂಕಾ ಆಸಕ್ತಿ ತೋರಿದೆ. ಶ್ರೀಲಂಕಾದಲ್ಲಿ ಕಬಡ್ಡಿಗೆ ಉತ್ತೇಜನ ಸಿಗುವ ದೃಷ್ಟಿಯಿಂದ 8ನೇ ಆವೃತ್ತಿಯ ಪಿಕೆಎಲ್​ಗೆ ಆತಿಥ್ಯ ವಹಿಸಿಕೊಳ್ಳಲು ಸಿದ್ಧವಿರುವುದಾಗಿ ಶ್ರೀಲಂಕಾ ಕಬಡ್ಡಿ ಸಂಸ್ಥೆ ಅಧ್ಯಕ್ಷ ಅನುರಾ ಪಥಿರಾಣಾ ಹೇಳಿದ್ದಾರೆ.

ಕರೊನಾ ಭೀತಿ ಯಿಂದಾಗಿ ಜಾಗತಿಕ ಕ್ರೀಡಾ ಲೋಕವೇ ಸ್ತಬ್ಧಗೊಂಡಿದೆ. ಇದರಿಂದಾಗಿ ಭಾರತೀಯ ಕ್ರೀಡಾ ಲೀಗ್​ಗಳೂ ತೂಗುಯ್ಯಾಲೆಯಲ್ಲಿವೆ. ಈಗಾಗಲೇ 13ನೇ ಆವೃತ್ತಿಯ ಐಪಿಎಲ್ ಅನಿರ್ದಿಷ್ಟಾವಧಿಗೆ ಮುಂದೂಡಿಕೆಯಾಗಿದ್ದು, 8ನೇ ಪಿಕೆಎಲ್ ಕೂಡ ಅನಿಶ್ಚಿತತೆಯಲ್ಲಿದೆ. ಪೂರ್ವ ನಿಗದಿಯಂತೆ ಏಪ್ರಿಲ್​ನಲ್ಲಿ ಕಬಡ್ಡಿ ಆಟಗಾರರ ಹರಾಜು ಪ್ರಕ್ರಿಯೆ ನಡೆಯಬೇಕಿತ್ತು, ಜುಲೈ ತಿಂಗಳಲ್ಲಿ 8ನೇ ಆವೃತ್ತಿಗೆ ಚಾಲನೆ ಸಿಗಬೇಕಿತ್ತು. ಇದೀಗ ಅಕ್ಟೋಬರ್- ನವೆಂಬರ್ ತಿಂಗಳಲ್ಲಿ ಪಿಕೆಎಲ್ ಆಯೋಜಿಸಲು ಶ್ರೀಲಂಕಾ ಆಸಕ್ತಿ ವಹಿಸಿದೆ ಎಂದು ಶ್ರೀಲಂಕಾ ಮಾಧ್ಯಮಗಳು ವರದಿ ಮಾಡಿವೆ.

ಇದನ್ನೂ ಓದಿ; ಕರೊನಾ ಸಂಕಷ್ಟ ಮುಗಿದರೂ, ಮುಂದೈತೆ ಮಾರಿ ಹಬ್ಬ…!

ಆದರೆ ಪ್ರೊ ಕಬಡ್ಡಿ ಲೀಗ್ ಸಂಘಟಕರು, ಶ್ರೀಲಂಕಾದಲ್ಲಿ ಟೂರ್ನಿ ಆಯೋಜಿಸುವ ಸಾಧ್ಯತೆಯನ್ನು ತಳ್ಳಿ ಹಾಕಿದ್ದಾರೆ. 2014ರಲ್ಲಿ ಆರಂಭಗೊಂಡ ಪಿಕೆಎಲ್ ಶ್ರೀಲಂಕಾದಲ್ಲೂ ಸಾಕಷ್ಟು ಪ್ರಸಿದ್ಧಿ ಪಡೆದಿದೆ. 2019ರಲ್ಲಿ ನಡೆದ ದಕ್ಷಿಣ ಏಷ್ಯಾ ಗೇಮ್ಸ್​ನಲ್ಲಿ ಶ್ರೀಲಂಕಾ ಕಬಡ್ಡಿ ತಂಡ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿತ್ತು. ಭಾರತದ ಎದುರು ಸೋತರೂ ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪದಕ ಗೆದ್ದ ಸಾಧನೆ ಮಾಡಿತ್ತು. ಜತೆಗೆ ಶ್ರೀಲಂಕಾದ ರಣಿಂದು ಚಾಮರ (ಯುಪಿ ಯೋಧಾ) ಹಾಗೂ ಮಿಲಿಂದಾ ಚತುರಂಗ (ಜೈಪುರ ಪಿಂಕ್​ಪ್ಯಾಂಥರ್ಸ್) ಕಳೆದ ಲೀಗ್​ನಲ್ಲಿ ಆಡಿದ್ದರು. -ಏಜೆನ್ಸೀಸ್

https://www.vijayavani.net/sushant-singhs-financial-condition-was-good-ex-manager-shares-his-monthly-expenses/