ದಶಕದ ಬಳಿಕ ಏಷ್ಯಾದಲ್ಲಿ ಟೆಸ್ಟ್​ ಸರಣಿ ಗೆದ್ದ ದಕ್ಷಿಣ ಆಫ್ರಿಕಾ

ಚಟ್ಟೋಗ್ರಾಮ್​: ಬೌಲರ್​ಗಳ ಅಮೋಘ ದಾಳಿಯ ಬಲದಿಂದ ದಕ್ಷಿಣ ಆಫ್ರಿಕಾ ತಂಡ 2ನೇ ಹಾಗೂ ಅಂತಿಮ ಟೆಸ್ಟ್​ ಪಂದ್ಯದಲ್ಲಿ ಆತಿಥೇಯ ಬಾಂಗ್ಲಾದೇಶ ವಿರುದ್ಧ ಇನಿಂಗ್ಸ್​ ಮತ್ತು 273 ರನ್​ಗಳಿಂದ ಗೆಲುವು ದಾಖಲಿಸಿದೆ. ಈ ಮೂಲಕ ಸರಣಿಯನ್ನು 2-0 ಅಂತರದಿಂದ ವಶಪಡಿಸಿಕೊಂಡಿದೆ. ಹರಿಣಗಳಿಗೆ ಏಷ್ಯಾದಲ್ಲಿ ಇದು ದಶಕದ ಬಳಿಕ ಒಲಿದ ಟೆಸ್ಟ್​ ಸರಣಿ ಗೆಲುವಾಗಿದೆ. ಅಲ್ಲದೆ 2008ರ ಬಳಿಕ ಮೊದಲ ಬಾರಿಗೆ ಏಷ್ಯಾದಲ್ಲಿ ಸರಣಿ ಕ್ಲೀನ್​ಸ್ವೀಪ್​ ಸಾಧಿಸಿರುವ ದ. ಆಫ್ರಿಕಾ, ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದೆ. ದ. ಆಫ್ರಿಕಾ ಇನ್ನು ಡಬ್ಲ್ಯುಟಿಸಿ ಫೈನಲ್​ಗೇರಬೇಕಾದರೆ, ತವರಿನಲ್ಲಿ ಆಡಲಿರುವ ಕೊನೇ 4 ಟೆಸ್ಟ್​ಗಳಲ್ಲಿ 3ರಲ್ಲಿ ಗೆದ್ದರೂ ಸಾಕಾಗುತ್ತದೆ.

ಮೂರನೇ ದಿನವಾದ ಗುರುವಾರ ಬೆಳಗ್ಗೆ 4 ವಿಕೆಟ್​ಗೆ 38 ರನ್​ಗಳಿಂದ ಮೊದಲ ಇನಿಂಗ್ಸ್​ ಮುಂದುವರಿಸಿದ ಬಾಂಗ್ಲಾದೇಶ, ವೇಗಿ ಕಗಿಸೊ ರಬಾಡ (37ಕ್ಕೆ 5) ದಾಳಿಗೆ ಕುಸಿದು ಭೋಜನ ವಿರಾಮದ ಬಳಿಕ 159 ರನ್​ಗಳಿಗೆ ಆಲೌಟ್​ ಆಯಿತು. 416 ರನ್​ ಹಿನ್ನಡೆಯೊಂದಿಗೆ ಫಾಲೋಆನ್​ಗೆ ಗುರಿಯಾದ ಬಾಂಗ್ಲಾ, 2ನೇ ಇನಿಂಗ್ಸ್​ನಲ್ಲಿ ಸ್ಪಿನ್ನರ್​ಗಳಾದ ಕೇಶವ್​ ಮಹಾರಾಜ್​ (59ಕ್ಕೆ 5) ಮತ್ತು ಸೆನುರನ್​ ಮುತ್ತುಸ್ವಾಮಿ (45ಕ್ಕೆ 4) ದಾಳಿಗೆ ಕುಸಿದು 143 ರನ್​ಗಳಿಗೆ ಸರ್ವಪತನ ಕಂಡು ಶರಣಾಯಿತು. ಈ ಮೂಲಕ ದ. ಆಫ್ರಿಕಾ ಎದುರು ತನ್ನ ಇದುವರೆಗಿನ ಅತಿದೊಡ್ಡ ಸೋಲು ಅನುಭವಿಸಿತು.

ದಕ್ಷಿಣ ಆಫ್ರಿಕಾ: 6 ವಿಕೆಟ್​ಗೆ 575 ಡಿಕ್ಲೇರ್​, ಬಾಂಗ್ಲಾದೇಶ: 45.2 ಓವರ್​ಗಳಲ್ಲಿ 159 (ಮಾಮಿನುಲ್​ ಹಕ್​ 82, ಶಾಂಟೊ 9, ತೈಜುಲ್​ 30, ರಬಾಡ 37ಕ್ಕೆ 5, ಡೇನ್​ ಪೀಟರ್​ಸನ್​ 31ಕ್ಕೆ 2, ಮಹಾರಾಜ್​ 57ಕ್ಕೆ 2) ಮತ್ತು 43.4 ಓವರ್​ಗಳಲ್ಲಿ 143 (ಶಾದ್ಮನ್​ 6, ಮಾಮಿನುಲ್​ 0, ಶಾಂಟೊ 36, ಮಹಿದುಲ್​ 29, ಹಸನ್​ ಮಹ್ಮುದ್​ 38*, ಮಹಾರಾಜ್​ 59ಕ್ಕೆ 5, ಸೆನುರನ್​ ಮುತ್ತುಸ್ವಾಮಿ 45ಕ್ಕೆ 4), ಪಂದ್ಯಶ್ರೇಷ್ಠ: ಟೋನಿ ಡಿ ಜಾರ್ಜಿ, ಸರಣಿಶ್ರೇಷ್ಠ: ಕಗಿಸೊ ರಬಾಡ.

https://www.vijayavani.net/bollywood-producers-son-agni-chopra-who-is-running-in-ranji-trophy