ಬಲಿಷ್ಠ ಆಟಗಾರರಿಗೆ ಸೋಲುಣಿಸಿ ಎಟಿಪಿ ಫೈನಲ್ಸ್ ಪ್ರಶಸ್ತಿ ಗೆದ್ದ ಡೇನಿಲ್​ ಮೆಡ್ವೆಡೇವ್​

ಲಂಡನ್: ರಷ್ಯಾದ ಯುವ ಆಟಗಾರ ಡೇನಿಲ್ ಮೆಡ್ವೆಡೇವ್ ವರ್ಷಾಂತ್ಯದ ಪ್ರತಿಷ್ಠಿತ ಟೆನಿಸ್ ಟೂರ್ನಿ ಎಟಿಪಿ ಫೈನಲ್ಸ್‌ನಲ್ಲಿ ಪ್ರಶಸ್ತಿ ಜಯಿಸಿದ್ದಾರೆ. ಈ ಮೂಲಕ ವೃತ್ತಿಜೀವನದ ಅತಿದೊಡ್ಡ ಪ್ರಶಸ್ತಿ ಗೆಲುವಿನ ಸಾಧನೆ ಮಾಡಿದ್ದಾರೆ.

ವಿಶ್ವ ನಂ. 4 ಆಟಗಾರ ಮೆಡ್ವೆಡೇವ್ ಭಾನುವಾರ ನಡೆದ ಫೈನಲ್ ಪಂದ್ಯದಲ್ಲಿ ವಿಶ್ವ ನಂ. 3 ಡೊಮಿನಿಕ್ ಥೀಮ್ ವಿರುದ್ಧ 4-6, 7-6, 6-4 ಸೆಟ್‌ಗಳಿಂದ ಗೆಲುವು ದಾಖಲಿಸಿದರು. ಟೂರ್ನಿಯ ಸೆಮೀಸ್‌ನಲ್ಲಿ ವಿಶ್ವ ನಂ. 2 ರಾಫೆಲ್ ನಡಾಲ್ ಮತ್ತು ಗ್ರೂಪ್ ಹಂತದಲ್ಲಿ ವಿಶ್ವ ನಂ. 1 ನೊವಾಕ್ ಜೋಕೊವಿಕ್‌ಗೆ ಸೋಲುಣಿಸಿದ್ದ 24 ವರ್ಷದ ಮೆಡ್ವೆಡೇವ್ ಅರ್ಹವಾಗಿಯೇ ಪ್ರಶಸ್ತಿ ಒಲಿಸಿಕೊಂಡರು.

ಎಟಿಪಿ ಫೈನಲ್ಸ್ ಇತಿಹಾಸದಲ್ಲಿ ವಿಶ್ವ ರ‌್ಯಾಂಕಿಂಗ್‌ನ ಅಗ್ರ ಮೂವರು ಆಟಗಾರರಿಗೆ ಸೋಲುಣಿಸಿದ ಮೊದಲ ಮತ್ತು 1990ರ ಬಳಿಕ ಯಾವುದೇ ಟೂರ್ನಿಯಲ್ಲಿ ಈ ಸಾಧನೆ ಮಾಡಿದ 4ನೇ ಆಟಗಾರರೆನಿಸಿದರು. ಕರೊನಾ ಹಾವಳಿಯಿಂದಾಗಿ ಪ್ರೇಕ್ಷಕರಿಲ್ಲದೆ ಖಾಲಿ ಕ್ರೀಡಾಂಗಣದಲ್ಲಿ ನಡೆದ ಈ ಹಾರ್ಡ್ ಕೋರ್ಟ್ ಟೂರ್ನಿಯಲ್ಲಿ ಮೆಡ್ವೆಡೇವ್ ಆಡಿದ ಎಲ್ಲ 5 ಪಂದ್ಯಗಳಲ್ಲೂ ಗೆದ್ದ ಅಜೇಯ ಸಾಧನೆ ಮಾಡಿದರು.

ನವೆಂಬರ್ ತಿಂಗಳಲ್ಲಿ ಆಡಿದ ಎಲ್ಲ 10 ಪಂದ್ಯಗಳಲ್ಲೂ ಜಯಿಸಿರುವ ಮೆಡ್ವೆಡೇವ್, ಈ ಪೈಕಿ 7 ಗೆಲುವುಗಳನ್ನು ವಿಶ್ವ ರ‌್ಯಾಂಕಿಂಗ್‌ನಲ್ಲಿ ಅಗ್ರ 10ರೊಳಗಿರುವ ಆಟಗಾರರ ವಿರುದ್ಧವೇ ದಾಖಲಿಸಿದ್ದಾರೆ. ಯುಎಸ್ ಓಪನ್ ಚಾಂಪಿಯನ್ ಆಸ್ಟ್ರಿಯಾದ ಡೊಮಿನಿಕ್ ಥೀಮ್ ಟೂರ್ನಿಯಲ್ಲಿ ಸತತ 2ನೇ ವರ್ಷ ರನ್ನರ್‌ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟರು. ಕಳೆದ ವರ್ಷದ ಫೈನಲ್‌ನಲ್ಲಿ ಅವರು ಗ್ರೀಕ್‌ನ ಸ್ಟಿಫಾನೋಸ್​ ಸಿಸಿಪಾಸ್ ವಿರುದ್ಧ ಸೋಲು ಕಂಡಿದ್ದರು.

https://www.vijayavani.net/zaheer-khan-and-sagarika-ghatge-get-wishes-from-mumbai-indians-on-their-3rd-wedding-anniversary/