ಟೆಸ್ಟ್​​ ಕ್ಯಾಪ್ಟನ್​ ಆಗಿ ಗಿಲ್​ ಆಯ್ಕೆ ಮಾಡಿದ್ದೇಕೆ? ಯಾರಾದ್ರೂ ಪ್ರಶ್ನಿಸಿದ್ರೆ ಈ ವಿಡಿಯೋ ತೋರಿಸಿ ಸಾಕು! Shubman Gill

Shubman Gill : ಇಂಗ್ಲೆಂಡ್‌ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ನಾಯಕ ಶುಭಮನ್ ಗಿಲ್, ತಮ್ಮ ಅನುಭವದಿಂದ ಮಾತ್ರವಲ್ಲದೆ ಅರ್ಥಪೂರ್ಣ ನಿರ್ಧಾರಗಳಿಂದಲೂ ಹಿರಿಯ ಕ್ರಿಕೆಟಿಗರನ್ನು ಅಚ್ಚರಿಗೊಳಿಸುತ್ತಿದ್ದಾರೆ.

ಬರ್ಮಿಂಗ್ಹ್ಯಾಮ್​ನಲ್ಲಿ ನಡೆಯುತ್ತಿರುವ ಎರಡನೇ ಟೆಸ್ಟ್ ಪಂದ್ಯದಲ್ಲಿ ನಡೆದ ಒಂದು ಕುತೂಹಲಕಾರಿ ಘಟನೆ ಈಗ ಎಲ್ಲರ ಗಮನ ಸೆಳೆಯುತ್ತಿದೆ. ಭಾರತೀಯ ಬೌಲಿಂಗ್ ವಿಭಾಗವನ್ನು ಮುನ್ನಡೆಸುತ್ತಿರುವ ಮೊಹಮ್ಮದ್ ಸಿರಾಜ್ ಜತೆ ಫೀಲ್ಡಿಂಗ್ ಯೋಜನೆಯ ಬಗ್ಗೆ ಗಿಲ್ ಬಿಸಿ ಬಿಸಿ ಚರ್ಚೆ ನಡೆಸಿದರು. ಗಿಲ್​ ಅವರು ಆಡಿದ ಮಾತುಗಳು ಸ್ಟಂಪ್​ ಮೈಕ್​ನಲ್ಲಿ ದಾಖಲಾಗಿದ್ದು, ಕ್ರೀಡಾಭಿಮಾನಿಗಳನ್ನು ಹುಬ್ಬೇರಿಸಿದೆ.

ಈ ಸಂಭಾಷಣೆಯಲ್ಲಿ, ಮೊಹಮ್ಮದ್ ಸಿರಾಜ್ ಆರಂಭದಲ್ಲಿ ಕ್ಯಾಪ್ಟನ್ ಗಿಲ್‌ಗೆ ಫೀಲ್ಡರ್‌ಗಳನ್ನು ಎಲ್ಲಿ ಇರಿಸಬೇಕೆಂದು ಸೂಚಿಸುತ್ತಾರೆ. ಆದಾಗ್ಯೂ, ಸಿರಾಜ್ ಹೇಳಿದ ಎಲ್ಲವನ್ನೂ ಕೇಳಿದ ನಂತರ, ನೀವು ಇಲ್ಲಿ ಸಾಮಾನ್ಯ ಲೆಂಗ್ತ್ ಆಡಿದರೆ ಮಾತ್ರ ಔಟ್ ಮಾಡಬಹುದು. ಇದು ಭಾರತದ ಅಥವಾ ಈ ಹಿಂದಿನ ಪಂದ್ಯ ನಡೆದ ಲೀಡ್ಸ್ ಪಿಚ್ ಅಲ್ಲ. ಅವರು ಈ ಹಿಂದೆ ಇದೇ ರೀತಿ ಔಟ್ ಆಗಿದ್ದರು. ನನ್ನನ್ನು ನಂಬಿ ಸಾಮಾನ್ಯ ಎಸೆತವನ್ನೇ ಎಸೆಯಿರಿ ಎಂದು ಗಿಲ್, ಸಿರಾಜ್​ಗೆ ಸಲಹೆ ನೀಡುತ್ತಾರೆ. ಆದರೆ, ಸಿರಾಜ್ ಆರಂಭದಲ್ಲಿ ತನ್ನದೇ ಆದ ದಾರಿಯಲ್ಲಿ ಹೋಗಲು ಬಯಸಿದ್ದರು. ಕೊನೆಗೆ, ನಾಯಕ ಗಿಲ್​ ಸೂಚನೆಯಂತೆ ನಾರ್ಮಲ್​ ಡೆಲಿವರಿ ಎಸೆಯುತ್ತಾರೆ.

ಇದನ್ನೂ ಓದಿ: ಯುವಕನ ಜತೆ 3 ಮಕ್ಕಳ ತಾಯಿಯ ಅಕ್ರಮ ಸಂಬಂಧ: ಆತನ ಮೊಬೈಲ್​ ನೋಡಿದಾಗ ಆಕೆಗೆ ಕಾದಿತ್ತು​ ಶಾಕ್​! Extramarital affair

ಸಿರಾಜ್ ಮಾಮೂಲಿಯಂತೆ ಆಫ್ ಸ್ಟಂಪ್‌ನ ಹೊರಗೆ ಚೆಂಡನ್ನು ಎಸೆಯುತ್ತಾರೆ. ಆ ಎಸೆತವನ್ನು ಜ್ಯಾಕ್ ಕ್ರಾಲಿ ಶಾಟ್​ ಆಡಿದಾಗ, ಆ ಚೆಂಡು ನೇರವಾಗಿ ಪಾಯಿಂಟ್‌ನಲ್ಲಿ ನಿಂತಿದ್ದ ಸಾಯಿ ಸುದರ್ಶನ್ ಅವರ ಕೈಗೆ ಹೋಗುತ್ತದೆ. ಈ ವೇಳೆ ಅವರು ಸುಲಭವಾಗಿ ಕ್ಯಾಚ್ ತೆಗೆದುಕೊಂಡರು. ಇದರೊಂದಿಗೆ, ಬೌಲರ್ ಮತ್ತು ನಾಯಕ ಹಾಗೂ ಎಲ್ಲಾ ತಂಡದ ಸದಸ್ಯರು ಆಚರಿಸಿದರು. ಈ ವಿಕೆಟ್‌ನೊಂದಿಗೆ, ಸಿರಾಜ್, ಇಂಗ್ಲೆಂಡ್‌ಗೆ ಮೊದಲ ಆಘಾತ ನೀಡಿದರು ಮತ್ತು ಶೀಘ್ರದಲ್ಲೇ ಆಕಾಶ್ ದೀಪ್ ಇನ್ನೂ ಎರಡು ನಿರ್ಣಾಯಕ ವಿಕೆಟ್‌ಗಳನ್ನು ಪಡೆದು ಸ್ಕೋರ್‌ಬೋರ್ಡ್ ಅನ್ನು ಕಡಿಮೆ ಮಾಡಿದರು.

ಸಿರಾಜ್​ ಮತ್ತು ಗಿಲ್​ ನಡುವಿನ ಸಂಭಾಷಣೆಯ ವಿಡಿಯೋ ವೈರಲ್​ ಆಗಿದ್ದು, ಅದನ್ನು ನೋಡಿದವರು ಗಿಲ್​ ನಾಯಕತ್ವವನ್ನು ಕೊಂಡಾಡುತ್ತಿದ್ದಾರೆ. ಅಲ್ಲದೆ, ಬಿಸಿಸಿಐ ಗಿಲ್​ ಅವರನ್ನು ಟೆಸ್ಟ್​ ತಂಡದ ನಾಯಕನನ್ನಾಗಿ ಏಕೆ ಆಯ್ಕೆ ಮಾಡಿತು ಎಂಬುದಕ್ಕೆ ಈ ವಿಡಿಯೋ ಸಾಕ್ಷಿ ಎಂದು ಕಾಮೆಂಟ್​ ಮಾಡುತ್ತಿದ್ದಾರೆ.

ಪಂದ್ಯದ ವಿಚಾರಕ್ಕೆ ಬಂದರೆ, ಎಡ್ಜ್‌ಬಾಸ್ಟನ್‌ನಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್ ಮತ್ತು ಭಾರತ ನಡುವಿನ ಎರಡನೇ ಟೆಸ್ಟ್ ಪಂದ್ಯ ಅಂತಿಮ ಹಂತಕ್ಕೆ ತಲುಪಿದೆ. ಈ ಪಂದ್ಯದಲ್ಲಿ ಪ್ರವಾಸಿ ತಂಡ ಭಾರತ, ಗೆಲುವಿನಿಂದ 7 ವಿಕೆಟ್‌ಗಳ ದೂರದಲ್ಲಿದ್ದರೆ, ಆತಿಥೇಯ ಇಂಗ್ಲೆಂಡ್ ಸೋಲಿನಿಂದ ತಪ್ಪಿಸಿಕೊಳ್ಳಲು 536 ರನ್‌ಗಳ ದೂರದಲ್ಲಿದೆ. 608 ರನ್‌ಗಳ ಬೃಹತ್ ಗುರಿಯೊಂದಿಗೆ ಮೈದಾನಕ್ಕೆ ಇಳಿದ ಬೆನ್​ ಸ್ಟೋಕ್ಸ್ ಪಡೆ ನಾಲ್ಕನೇ ದಿನದ ಅಂತ್ಯಕ್ಕೆ ಮೂರು ವಿಕೆಟ್‌ಗಳ ನಷ್ಟಕ್ಕೆ 72 ರನ್ ಗಳಿಸಿದೆ. ಓಲಿ ಪೋಪ್ (24) ಮತ್ತು ಹ್ಯಾರಿ ಬ್ರೂಕ್ (15) ಸದ್ಯ ಕ್ರೀಸ್‌ನಲ್ಲಿದ್ದಾರೆ.

https://www.vijayavani.net/ind-vs-eng-shubman-gill-is-serious-about-pant-why

https://www.vijayavani.net/three-birds-are-sitting-on-the-grass-to-find-them-you-need-sharp-eyes-as-well-as-brain