ಯುಎಇಯಲ್ಲಿ ಜೈವಿಕ-ಸುರಕ್ಷೆ ಉಲ್ಲಂಘಿಸುವ ಕ್ರಿಕೆಟಿಗರಿಗೆ 7 ದಿನ ಕ್ವಾರಂಟೈನ್!

ನವದೆಹಲಿ: ಭಾರತದಲ್ಲಿನ ಕರೊನಾ ವೈರಸ್ ಹಾವಳಿಯಿಂದಾಗಿ ಐಪಿಎಲ್ 13ನೇ ಆವೃತ್ತಿಯನ್ನು ಯುಎಇಗೆ ಸ್ಥಳಾಂತರಿಸಲಾಗಿದೆ. ಭಾರತದಲ್ಲಿ ಕರೊನಾ ಪರೀಕ್ಷೆ ಮುಗಿಸಿ ಅರಬ್ ದೇಶಕ್ಕೆ ತೆರಳಿದ ಬಳಿಕ ಕ್ರಿಕೆಟಿಗರನ್ನು ಅಲ್ಲೂ ಒಂದು ವಾರ ಕಾಲ ಕ್ವಾರಂಟೈನ್‌ನಲ್ಲಿಟ್ಟು ಜೈವಿಕ-ಸುರಕ್ಷಾ ವಾತಾವರಣದೊಳಗೆ ಸೇರಿಸಿಕೊಳ್ಳಲಾಗುತ್ತದೆ. ಒಂದು ವೇಳೆ ಆಟಗಾರ ಈ ಸಮಯದಲ್ಲಿ ಜೈವಿಕ ಸುರಕ್ಷಾ ವಾತಾವರಣದ ನಿಯಮ ಉಲ್ಲಂಘನೆ ಮಾಡಿದರೆ 7 ದಿನಗಳ ಕಾಲ ಐಪಿಎಲ್ ಟೂರ್ನಿಯಿಂದ ಹೊರಗುಳಿಯಬೇಕಾಗುತ್ತದೆ.

ಯುಎಇಯಲ್ಲಿ ಜೈವಿಕ-ಸುರಕ್ಷಾ ವಾತಾವರಣದ ನಿಯಮ ಉಲ್ಲಂಘಿಸುವವರನ್ನು 7 ದಿನಗಳ ಕಾಲ ಕ್ವಾರಂಟೈನ್‌ನಲ್ಲಿಡಲಾಗುತ್ತದೆ. ಈ ವೇಳೆ ಅವರಿಗೆ 6 ಮತ್ತು 7ನೇ ದಿನಗಳಲ್ಲಿ ನೆಗೆಟಿವ್ ವರದಿ ಬಂದರೆ ಜೈವಿಕ-ಬಬಲ್‌ಗೆ ಮರಳಲು ಅವಕಾಶ ನೀಡಲಾಗುತ್ತದೆ ಎಂದು ಬಿಸಿಸಿಐ ಮಾರ್ಗಸೂಚಿಯಲ್ಲಿ ತಿಳಿಸಿದೆ.

ಎಲ್ಲ ತಂಡಗಳಿಗೆ ಆಗಸ್ಟ್ 20ಕ್ಕೆ ಮುನ್ನ ಯುಎಇಗೆ ತೆರಳುವುದು ಬೇಡ ಎಂದು ಬಿಸಿಸಿಐ ಸೂಚಿಸಿದೆ. ಇದರಿಂದ ಎಲ್ಲ ಅಗತ್ಯ ಪರೀಕ್ಷಾ ಮತ್ತು ಕ್ವಾರಂಟೈನ್ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಲು ತಿಳಿಸಲಾಗಿದೆ.

ಇದನ್ನೂ ಓದಿ: VIDEO: ಗೋಮಾತೆಗೆ ಕ್ರಿಕೆಟಿಗ ಸುರೇಶ್​ ರೈನಾ ಆರೈಕೆ..!

ಕುಟುಂಬ ಸದಸ್ಯರ ಪ್ರಯಾಣ ಫ್ರಾಂಚೈಸಿಗಳಿಗೆ ಬಿಟ್ಟ ವಿಚಾರ

ಆಟಗಾರರು ಮತ್ತು ಸಿಬ್ಬಂದಿ ಯುಎಇಗೆ ಕುಟುಂಬ ಸದಸ್ಯರನ್ನು ಕರೆದೊಯ್ಯಲು ಅವಕಾಶ ನೀಡುವ ಬಗೆಗಿನ ನಿರ್ಧಾರವನ್ನು ಬಿಸಿಸಿಐ, ಫ್ರಾಂಚೈಸಿಗಳಿಗೆ ಬಿಟ್ಟಿದೆ. ಆದರೆ ಕುಟುಂಬ ಸದಸ್ಯರಿಗೆ ಅವಕಾಶ ದೊರೆತರೂ ಅವರು ಜೈವಿಕ-ಸುರಕ್ಷಾ ವಾತಾವರಣದ ಕಟ್ಟುನಿಟ್ಟಿನ ನಿಯಮಾವಳಿಗಳನ್ನು ಪಾಲಿಸುವುದು ಕಡ್ಡಾಯವಾಗಿರುತ್ತದೆ. ಅವರು ಕೂಡ ಜೈವಿಕ-ಬಬಲ್ ಹೊರಗಿನವರನ್ನು ಭೇಟಿಯಾಗಲು ಅವಕಾಶ ಇರುವುದಿಲ್ಲ. ಇನ್ನು ಪಂದ್ಯದ ವೇಳೆ ಆಟಗಾರರು ಮತ್ತು ಪಂದ್ಯ ಅಧಿಕಾರಿಗಳ ಪ್ರದೇಶಕ್ಕೆ ಅವರಿಗೆ ಪ್ರವೇಶ ನೀಡಲಾಗುವುದಿಲ್ಲ. ಅಭ್ಯಾಸದ ವೇಳೆಯೂ ಅವರು ಆಟಗಾರರಿಂದ ದೂರವಿರಬೇಕು.

https://www.vijayavani.net/chinese-mobile-giant-vivo-takes-a-break-from-ipl-2020-sponsorship/