ಐಪಿಎಲ್‌ನಿಂದ ಹಿಂದೆ ಸರಿದ ವಿವೋ, ಜನಾಕ್ರೋಶಕ್ಕೆ ಬೆದರಿದ ಚೀನಾ ಕಂಪನಿ?

ನವದೆಹಲಿ: ಚೀನಾ ವಿರುದ್ಧದ ಜನಾಕ್ರೋಶದ ಹಿನ್ನೆಲೆಯಲ್ಲಿ ವಿವೋ ಮೊಬೈಲ್ ಕಂಪನಿ, ಮುಂಬರುವ ಐಪಿಎಲ್ 13ನೇ ಆವೃತ್ತಿಯ ಶೀರ್ಷಿಕೆ ಪ್ರಾಯೋಜಕತ್ವದಿಂದ ಹಿಂದೆ ಸರಿದಿದೆ. ಚೀನಾ ಮೂಲದ ಕಂಪನಿ ಜತೆಗಿನ ಹಾಲಿ ಒಪ್ಪಂದವನ್ನು ಮುಂದುವರಿಸಲು ಬಿಸಿಸಿಐ ಮುಂದಾಗಿದ್ದರೂ, ಈ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾಗಿರುವ ಆಕ್ರೋಶದಿಂದಾಗಿ ವಿವೋ ಈ ವರ್ಷದ ಟೂರ್ನಿಗೆ ಪ್ರಾಯೋಜಕತ್ವ ವಹಿಸದಿರಲು ನಿರ್ಧರಿಸಿದೆ. ಇದರಿಂದಾಗಿ ಬಿಸಿಸಿಐಗೆ ಕೊನೇಕ್ಷಣದಲ್ಲಿ ಈಗ ಹೊಸ ಶೀರ್ಷಿಕೆ ಪ್ರಾಯೋಜಕರನ್ನು ಕಂಡುಕೊಳ್ಳುವ ಸವಾಲು ಎದುರಾಗಿದೆ.

ವಿವೋ ಕಂಪನಿ 2017ರಲ್ಲಿ 5 ವರ್ಷಗಳ ಒಪ್ಪಂದಕ್ಕೆ ಸಹಿ ಹಾಕಿತ್ತು. ಇದರಂತೆ 2022ರವರೆಗೆ ಪ್ರತಿ ವರ್ಷಕ್ಕೆ ತಲಾ 440 ಕೋಟಿ ರೂ. ಮೊತ್ತವನ್ನು ಬಿಸಿಸಿಐಗೆ ಪಾವತಿಸಬೇಕಾಗಿತ್ತು. ಈ ಒಪ್ಪಂದವನ್ನು ಉಳಿಸಿಕೊಳ್ಳಲು ವಿವೋ ಬಯಸಿದ್ದು, 2021ರಿಂದ 2023ರವರೆಗೆ ಮತ್ತೆ ಐಪಿಎಲ್ ಪ್ರಾಯೋಜಕತ್ವ ವಹಿಸುವುದಾಗಿ ತಿಳಿಸಿದೆ. ಆದರೆ ಚೀನಾ ಜತೆಗಿನ ಗಡಿ ಗಲಾಟೆಯಿಂದಾಗಿ ಉಂಟಾಗಿರುವ ಹಾಲಿ ವರ್ಷದ ಪ್ರಾಯೋಜಕತ್ವ ವಹಿಸಲು ನಿರಾಕರಿಸಿದೆ.

ಇದನ್ನೂ ಓದಿ: ಟ್ವಿಟರ್‌ನಲ್ಲಿ ಟ್ರೆಂಡಿಂಗ್‌ಗೆ ಬಂದ ಬಾಯ್ಕಾಟ್-ಚೈನೀಸ್ ಐಪಿಎಲ್!

ಐಪಿಎಲ್ 13ನೇ ಆವೃತ್ತಿ ಸೆಪ್ಟೆಂಬರ್ 19ರಿಂದ ನವೆಂಬರ್ 10ರವರೆಗೆ ಯುಎಇಯಲ್ಲಿ ನಿಗದಿಯಾಗಿದೆ. ಭಾರತದಲ್ಲಿನ ಕರೊನಾ ವೈರಸ್ ಹಾವಳಿಯಿಂದಾಗಿ ಟೂರ್ನಿಯನ್ನು ಅರಬ್ ದೇಶಕ್ಕೆ ಸ್ಥಳಾಂತರಿಸಲಾಗಿದೆ.

https://www.vijayavani.net/bcci-retains-chinese-sponsors-for-ipl/