ಬಂಗಾಳ-ಸೌರಾಷ್ಟ್ರ ಜಿದ್ದಾಜಿದ್ದಿ: ರಣಜಿ ಫೈನಲ್, ಅಂತಿಮ ದಿನ ಇನಿಂಗ್ಸ್ ಮುನ್ನಡೆಯ ಕುತೂಹಲ

ರಾಜ್​ಕೋಟ್: ಪ್ರತಿಷ್ಠಿತ ರಣಜಿ ಟ್ರೋಫಿ ಫೈನಲ್​ನಲ್ಲಿ ವಿಜೇತರ ನಿರ್ಣಯ ಮೊದಲ ಇನಿಂಗ್ಸ್ ಮುನ್ನಡೆಯ ಆಧಾರದಲ್ಲಿ ನಿಶ್ಚಯವಾಗುವುದು ಖಚಿತವಾಗಿರುವ ಕಾರಣ, ಸೌರಾಷ್ಟ್ರ ಹಾಗೂ ಬಂಗಾಳ ತಂಡಗಳು ಮುನ್ನಡೆ ಪಡೆಯಲು ದೊಡ್ಡ ಮಟ್ಟದ ಜಿದ್ದಾಜಿದ್ದಿನ ಹೋರಾಟ ನಡೆಸಿವೆ. ಯಾವ ತಂಡ ಇನಿಂಗ್ಸ್ ಮುನ್ನಡೆ ಪಡೆಯಲಿದೆಯೋ ಆ ತಂಡಕ್ಕೆ ಟ್ರೋಫಿ ಒಲಿಯಲಿದೆ. ಬಂಗಾಳ ತಂಡಕ್ಕೆ ಟ್ರೋಫಿ ಜಯಿಸಲು ಇನ್ನೂ 72 ರನ್ ಬಾರಿಸಬೇಕಿದ್ದರೆ, ಸೌರಾಷ್ಟ್ರ ತಂಡ 4 ವಿಕೆಟ್​ಗಳನ್ನು ಉರುಳಿಸಬೇಕಿದೆ.

ಎಸ್​ಸಿಎ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಗುರುವಾರ, 3 ವಿಕೆಟ್​ಗೆ 134 ರನ್​ಗಳಿಂದ 4ನೇ ದಿನದಾಟ ಮುಂದುವರಿಸಿದ ಬಂಗಾಳ ತಂಡ, ಇಡೀ ದಿನ ಬ್ಯಾಟಿಂಗ್ ಮಾಡಿ 3 ವಿಕೆಟ್​ಗಳಿಂದ 220 ರನ್ ಪೇರಿಸಿತು. 147 ಓವರ್​ಗಳಲ್ಲಿ 6 ವಿಕೆಟ್​ಗೆ 354 ರನ್ ಪೇರಿಸಿದ್ದು, ಇನ್ನೂ 72 ರನ್ ಹಿನ್ನಡೆಯಲ್ಲಿದೆ. ಕ್ವಾರ್ಟರ್​ಫೈನಲ್ ಹಾಗೂ ಸೆಮಿಫೈನಲ್​ನಲ್ಲಿ ಶತಕ ಸಿಡಿಸಿ ತಂಡದ ಪಾಲಿಗೆ ಆಪದ್ಭಾಂದವರಾಗಿದ್ದ ಅನುಷ್ಟಪ್ ಮಜುಮ್ದಾರ್ (58* ರನ್, 124 ಎಸೆತ, 8 ಬೌಂಡರಿ) ಹಾಗೂ ಅರ್ನಾಬ್ ನಂದಿ (28*) ಅಂತಿಮ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಂಡಿದ್ದಾರೆ.

ದಿನದಾಟದ ಮೊದಲ ಅವಧಿಯಲ್ಲಿ ಸೌರಾಷ್ಟ್ರ ತಂಡ ವಿಕೆಟ್ ಪಡೆಯುವಲ್ಲಿ ವಿಫಲವಾಯಿತು. ಆದರೆ, ಭೋಜನ ವಿರಾಮದ ಬಳಿಕ ಮೂರು ಪ್ರಮುಖ ವಿಕೆಟ್ ಉರುಳಿಸುವ ಮೂಲಕ ಸೌರಾಷ್ಟ್ರ ಪಂದ್ಯದ ಮೇಲೆ ಹಿಡಿತ ಸಾಧಿಸಿತ್ತು. 6 ವಿಕೆಟ್​ಗೆ 263 ರನ್ ಬಾರಿಸಿದ್ದ ಬಂಗಾಳ ತಂಡ ಟ್ರೋಫಿ ಆಸೆಯನ್ನು ಕೈಬಿಟ್ಟಿತು ಎನ್ನುವ ಹಂತದಲ್ಲಿಯೇ ಅನುಷ್ಟಪ್ ಮಜುಮ್ದಾರ್ ಹಾಗೂ ಅರ್ನಾಬ್ ನಂದಿ 7ನೇ ವಿಕೆಟ್​ಗೆ 158 ಎಸೆತಗಳಲ್ಲಿ 91 ರನ್ ಜತೆಯಾಟವಾಡುವ ಮೂಲಕ ಆಸರೆಯಾಗಿದ್ದಾರೆ. ಶುಕ್ರವಾರದ ಮೊದಲ ಅವಧಿಯ ಆಟದಲ್ಲಿ ಎರಡೂ ತಂಡಗಳು ತೋರುವ ನಿರ್ವಹಣೆಯ ಆಧಾರದ ಮೇಲೆ ಟ್ರೋಫಿ ಯಾರ ಮುಡಿಗೇರಲಿದೆ ಎನ್ನುವುದು ನಿರ್ಧಾರವಾಗಲಿದೆ.

ಮೂವರಿಂದ ಅರ್ಧಶತಕದ ಪ್ರತಿರೋಧ: 47 ರನ್​ಗಳಿಂದ ಬ್ಯಾಟಿಂಗ್ ಮುಂದುವರಿಸಿದ ಸುದೀಪ್ ಚಟರ್ಜಿ (81 ರನ್, 241 ಎಸೆತ, 7 ಬೌಂಡರಿ) ಹಾಗೂ 4 ರನ್​ನಿಂದ ಆಟ ಮುಂದುವರಿಸಿದ ವಿಕೆಟ್ ಕೀಪರ್-ಬ್ಯಾಟ್ಸ್​ಮನ್ ವೃದ್ಧಿಮಾನ್ ಸಾಹ (64ರನ್, 184 ಎಸೆತ, 10 ಬೌಂಡರಿ, 1 ಸಿಕ್ಸರ್) 4ನೇ ವಿಕೆಟ್​ಗೆ 101 ರನ್ ಸೇರಿಸಿ ಮುನ್ನಡೆಯ ಭರವಸೆ ನೀಡಿದ್ದರು. ಆದರೆ, 16 ರನ್​ಗಳ ಅಂತರದಲ್ಲಿ ಇವರಿಬ್ಬರು ಪೆವಿಲಿಯನ್ ಸೇರಿಕೊಂಡಾಗ ಬಂಗಾಳ ತಂಡ ಮತ್ತೆ ಆಘಾತ ಎದುರಿಸಿತ್ತು.

https://www.vijayavani.net/ipl-behind-closed-doors-bcci-to-decide-amid-coronavirus-pandemic/

https://www.vijayavani.net/icc-announces-full-schedule-womens-odi-world-cup-2021/