ಕಾಶ್ಮೀರಿ ಯುವತಿಯೊಂದಿಗೆ ಮುಂಬೈ ಕ್ರಿಕೆಟಿಗ ಸರ್ಫ್ರಾಜ್​​ ಖಾನ್​ ಶಾದಿ!

ಶ್ರೀನಗರ: ಮುಂಬೈ ಬ್ಯಾಟರ್​ ಸರ್ಫ್ರಾಜ್​ ಖಾನ್​ ಅವರು ಜಮ್ಮು-ಕಾಶ್ಮೀರದ ಸೋಫಿಯಾನ್​ ಜಿಲ್ಲೆಯ ಹುಡುಗಿ ರೋಮಾನಾ ಜಹೂರ್​ ಜತೆಗೆ ಭಾನುವಾರ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದಾರೆ. ಐಪಿಎಲ್​ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ತಂಡದ ಆಟಗಾರರಾಗಿರುವ ಸರ್ಫ್ರಾಜ್​, ಕಪ್ಪು ಬಣ್ಣದ ಶೆರ್ವಾನಿ ಧರಿಸಿ ಕಾಶ್ಮೀರದಲ್ಲಿ ವಿವಾಹವಾಗಿದ್ದು, ಇದರ ಚಿತ್ರ-ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿವೆ.

ಸರ್ಫ್ರಾಜ್​ ಅವರ ಸಹೋದರಿ ಅವರ ಗೆಳತಿ ಆಗಿರುವ ರೋಮಾನಾ ಜಹೀರ್​, ದೆಹಲಿಯಲ್ಲಿ ಎಂಎಸ್​ಸಿ ಅಧ್ಯಯನ ಮಾಡಿದ್ದಾರೆ. ಸರ್ಫ್ರಾಜ್​ ಸಹೋದರಿ ಕೂಡ ದೆಹಲಿಯಲ್ಲೇ ವಿದ್ಯಾಭ್ಯಾಸ ಮಾಡಿದ್ದು, ಈ ವೇಳೆ ಗೆಳತಿಯಾದ ರೋಮಾನಾರನ್ನು ಸರ್ಫ್ರಾಜ್​ ಖಾನ್​ ಕೂಡ ಸಹೋದರಿಯ ಮೂಲಕವೇ ಮೊದಲ ಬಾರಿ ಭೇಟಿಯಾಗಿದ್ದರು. ನಂತರ ಇಬ್ಬರೂ ಪ್ರೀತಿಸಲಾರಂಭಿಸಿದ್ದು, ಉಭಯ ಕುಟುಂಬದ ಒಪ್ಪಿಗೆ ಪಡೆದು ಇದೀಗ ವಿವಾಹವಾಗಿದ್ದಾರೆ.

ಕಳೆದ ದೇಶೀಯ ಕ್ರಿಕೆಟ್​ ಋತುವಿನಲ್ಲಿ ಮುಂಬೈ ತಂಡದ ಪರ ರನ್​ಪ್ರವಾಹ ಹರಿಸಿದ್ದ 25 ವರ್ಷದ ಸರ್ಫ್ರಾಜ್​​ ಖಾನ್​ಗೆ ಇತ್ತೀಚೆಗೆ ವೆಸ್ಟ್​ ಇಂಡೀಸ್​ ಪ್ರವಾಸದ ವೇಳೆ ಭಾರತ ತಂಡದಲ್ಲಿ ಸ್ಥಾನ ಲಭಿಸದ ಬಗ್ಗೆ ಕ್ರಿಕೆಟ್​ ಪ್ರೇಮಿಗಳು ಅಚ್ಚರಿ ವ್ಯಕ್ತಪಡಿಸಿದ್ದರು. ಆದರೆ ಸರ್ಫ್ರಾಜ್​ ಖಾನ್​, ಟೀಮ್​ ಇಂಡಿಯಾ ಪರ ಆಡಲು ಬೇಕಾದ ಫಿಟ್ನೆಸ್​ ಮಟ್ಟವನ್ನು ಹೊಂದಿಲ್ಲ ಮತ್ತು ಅವರ ದುರ್ವರ್ತನೆಯೂ ತಂಡ ಆಯ್ಕೆಗೆ ಹಿನ್ನಡೆಯಾಗಿದೆ ಎಂದು ಆಯ್ಕೆ ಸಮಿತಿಯ ಮೂಲಗಳು ಬಳಿಕ ತಿಳಿಸಿದ್ದವು.

2015ರಲ್ಲಿ ಆರ್​ಸಿಬಿ ತಂಡದ ಮೂಲಕ ಐಪಿಎಲ್​ಗೆ ಪದಾರ್ಪಣೆ ಮಾಡಿದ್ದ ಸರ್ಫ್ರಾಜ್​, 2014 ಮತ್ತು 2016ರ 19 ವಯೋಮಿತಿ ವಿಶ್ವಕಪ್​ಗಳಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದರು. ಇತ್ತೀಚೆಗೆ ಬೆಂಗಳೂರಿನಲ್ಲಿ ನಡೆದ ದುಲೀಪ್​ ಟ್ರೋಫಿಯಲ್ಲಿ ಅವರು ಪಶ್ಚಿಮ ವಲಯ ಪರ ಆಡಿದ್ದರು.

https://www.vijayavani.net/wc-schedule-with-kali-puja-on-nov-12-pakistan-vs-england-game-at-eden-could-witness-date-change