ಭಾರತಕ್ಕೆ ಹರಿಣಗಳ ನಾಡಿನಲ್ಲಿ ಇಂದಿನಿಂದ ಟೆಸ್ಟ್​ ಸವಾಲು; ಕೊನೆಗೊಳ್ಳುವುದೇ 31 ವರ್ಷಗಳ ಕಾಯುವಿಕೆ?

ಸೆಂಚುರಿಯನ್​: ತವರಿನ ಏಕದಿನ ವಿಶ್ವಕಪ್​ ಫೈನಲ್​ ಸೋಲಿನ ನಿರಾಸೆಯನ್ನು ಬದಿಗಿಟ್ಟು ಹರಿಣಗಳ ನಾಡಿನಲ್ಲಿ ಹೊಸ ಇತಿಹಾಸ ಬರೆಯಲು ರೋಹಿತ್​ ಶರ್ಮ ಬಳಗ ಸಜ್ಜಾಗಿದೆ. ಆತಿಥೇಯ ದ. ಆಫ್ರಿಕಾ ವಿರುದ್ಧ ಭಾರತ ತಂಡ ಮಂಗಳವಾರದಿಂದ 2 ಪಂದ್ಯಗಳ ಟೆಸ್ಟ್​ ಸರಣಿ ಆಡಲಿದ್ದು, ವೇಗದ ಬೌಲರ್​ಗಳ ಪಾಲಿಗೆ ಸ್ವರ್ಗವೆನಿಸಿದ ಸೂಪರ್​ಸ್ಪೋರ್ಟ್​ ಪಾರ್ಕ್​ನಲ್ಲಿ "ಬಾಕ್ಸಿಂಗ್​ ಡೇ'ಯ ಮೊದಲ ಕಾದಾಟ ನಡೆಯಲಿದೆ. ದ. ಆಫ್ರಿಕಾ ನೆಲದಲ್ಲಿ ಚೊಚ್ಚಲ ಸರಣಿ ಗೆಲುವಿನೊಂದಿಗೆ 31 ವರ್ಷಗಳ ಕಾಯುವಿಕೆ ಕೊನೆಗೊಳಿಸುವುದು ಟೀಮ್​ ಇಂಡಿಯಾದ ಹಂಬಲವಾಗಿದೆ.

ಭಾರತ ಇದುವರೆಗೆ ಟೆಸ್ಟ್​ ಕ್ರಿಕೆಟ್​ ಆಡುವ ಬಹುತೇಕ ಎಲ್ಲ ದೇಶಗಳಲ್ಲಿ ಸರಣಿ ಗೆದ್ದಿದ್ದು, ದ. ಆಫ್ರಿಕಾ ಒಂದೇ ಬಾಕಿ ಉಳಿದಿದೆ. ಈ ಬಾರಿ ಆ ಕನಸನ್ನೂ ನನಸಾಗಿಸುವ ಅತ್ಯುತ್ತಮ ಅವಕಾಶ ಟೀಮ್​ ಇಂಡಿಯಾದ ಮುಂದಿದೆ. ಅಭಿಮಾನಿಗಳಿಗೆ ವಿಶ್ವಕಪ್​ ಕೈತಪ್ಪಿದ ನೋವು ಮರೆಸಲು ರೋಹಿತ್​ ಶರ್ಮ ಬಳಗಕ್ಕೆ ಇದು ಅತ್ಯುತ್ತಮ ಅವಕಾಶವೆನಿಸಿದೆ. ವಿಶ್ವಕಪ್​ ನಂತರವೂ ಹುದ್ದೆಯಲ್ಲಿ ಮುಂದುವರಿದಿರುವ ರಾಹುಲ್​ ದ್ರಾವಿಡ್​ಗೂ ಆಟಗಾರ, ನಾಯಕನಾಗಿ ಸಾಧ್ಯವಾಗದ್ದನ್ನು ಕೋಚ್​ ಆಗಿ ಸಾಧಿಸುವ ಅವಕಾಶವಿದೆ. ಕಳೆದ 2 ಪ್ರವಾಸಗಳಲ್ಲಿ ಸವಾಲಿನ ಪಿಚ್​ನಲ್ಲೇ ತಲಾ 1 ಟೆಸ್ಟ್​ ಗೆದ್ದಿರುವ ಭಾರತ ಈ ಬಾರಿ ಇನ್ನೊಂದು ಹೆಜ್ಜೆ ಮುಂದೆ ಹೋಗಿ ಸರಣಿ ಒಲಿಸಿಕೊಳ್ಳಬೇಕಿದೆ. ಈ ಸರಣಿಯ ಐಸಿಸಿ ಟೆಸ್ಟ್​ ಚಾಂಪಿಯನ್​ಷಿಪ್​ 2023-25ರ ಭಾಗವಾಗಿದ್ದು, ಸತತ 3ನೇ ಬಾರಿ ಫೈನಲ್​ಗೇರುವ ನಿಟ್ಟಿನಲ್ಲೂ ಭಾರತಕ್ಕೆ ಈ ಸರಣಿ ಮಹತ್ವದ್ದಾಗಿದೆ.

ಕಾಡುತ್ತಿದೆ ಮಳೆ ಭೀತಿ

ಪಂದ್ಯಕ್ಕೆ ಮಳೆ ಭೀತಿ ಕಾಡುತ್ತಿದೆ. ಅದರಲ್ಲೂ ಪ್ರಮುಖವಾಗಿ ಮೊದಲ ದಿನದಾಟಕ್ಕೆ ಮಳೆ ಅಡಚಣೆ ತರುವ ಭೀತಿ ಹೆಚ್ಚಿದೆ. ಮಳೆಯಿಂದಾಗಿ ಸೋಮವಾರ ಅಭ್ಯಾಸಕ್ಕೂ ಅಡ್ಡಿಯಾಗಿದೆ.

ಟೀಮ್​ ನ್ಯೂಸ್​:

ಭಾರತ: ಕನ್ನಡಿಗ ಕೆಎಲ್​ ರಾಹುಲ್​ ಟೆಸ್ಟ್​ನಲ್ಲಿ ಮೊದಲ ಬಾರಿ ವಿಕೆಟ್​ ಕೀಪರ್​&ಬ್ಯಾಟರ್​ ಆಗಿ ಆಡಲು ಸಜ್ಜಾಗಿದ್ದರೆ, ಮತ್ತೋರ್ವ ಕನ್ನಡಿಗ ಹಾಗೂ ವೇಗಿ ಪ್ರಸಿದ್ಧಕೃಷ್ಣಗೆ ಟೆಸ್ಟ್​ ಪದಾರ್ಪಣೆ ಅವಕಾಶದ ನಿರೀೆ ಇದೆ. ಇನ್ನೊಂದು ಬೌಲರ್​ ಸ್ಥಾನಕ್ಕೆ ಆರ್​. ಅಶ್ವಿನ್​&ಶಾರ್ದೂಲ್​ ಠಾಕೂರ್​ ನಡುವೆ ಪೈಪೋಟಿ ಏರ್ಪಟ್ಟಿದೆ.

ಸಂಭಾವ್ಯ ತಂಡ: ರೋಹಿತ್​ ಶರ್ಮ (ನಾಯಕ), ಯಶಸ್ವಿ ಜೈಸ್ವಾಲ್​, ಶುಭಮಾನ್​ ಗಿಲ್​, ವಿರಾಟ್​ ಕೊಹ್ಲಿ, ಕೆಎಲ್​ ರಾಹುಲ್​ (ವಿ.ಕೀ), ಶ್ರೇಯಸ್​ ಅಯ್ಯರ್​, ರವೀಂದ್ರ ಜಡೇಜಾ, ಶಾರ್ದೂಲ್​ ಠಾಕೂರ್​/ಆರ್​. ಅಶ್ವಿನ್​, ಜಸ್​ಪ್ರೀತ್​ ಬುಮ್ರಾ, ಪ್ರಸಿದ್ಧಕೃಷ್ಣ, ಮೊಹಮದ್​ ಸಿರಾಜ್​.

ದಕ್ಷಿಣ ಆಫ್ರಿಕಾ: ಪ್ರಮುಖ ವೇಗಿಗಳಾದ ರಬಾಡ ಮತ್ತು ಎನ್​ಗಿಡಿ ಗಾಯದಿಂದ ಚೇತರಿಸಿಕೊಂಡು ಫಿಟ್​ ಆಗಿದ್ದು, ಆಡುವ 11ರ ಬಳಗದಲ್ಲಿ ಸ್ಥಾನ ಪಡೆಯಲಿದ್ದಾರೆ. ಮಧ್ಯಮ ಕ್ರಮಾಂಕದ ಸ್ಥಾನಕ್ಕೆ ಕೀಗನ್​ ಪೀರ್ಟಸೆನ್​ ಮತ್ತು ಡೇವಿಡ್​ ಬೆಂಡಿಂಗ್​ಹ್ಯಾಂ ನಡುವೆ ಸ್ಪರ್ಧೆಯಿದೆ.

ಸಂಭಾವ್ಯ ತಂಡ: ಡೀನ್​ ಎಲ್ಗರ್​, ಏಡನ್​ ಮಾರ್ಕ್ರಮ್​, ಟೋನಿ ಡಿ ಜಾರ್ಜಿ, ಟೆಂಬಾ ಬವುಮಾ (ನಾಯಕ), ಡೇವಿಡ್​ ಬೆಂಡಿಂಗ್​ಹ್ಯಾಂ/ಕೀಗನ್​ ಪೀರ್ಟಸೆನ್​, ಕೈಲ್​ ವೆರ್ರೆನ್ನೆ (ವಿ.ಕೀ), ಮಾಕೋರ್ ಜಾನ್ಸೆನ್​, ಕೇಶವ್​ ಮಹಾರಾಜ್​, ಗೆರಾಲ್ಡ್​ ಕೋಟ್​ಜೀ, ಕಗಿಸೊ ರಬಾಡ, ಲುಂಗಿ ಎನ್​ಗಿಡಿ.

ಆರಂಭ: ಮಧ್ಯಾಹ್ನ 1.30

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​

ಭಾರತಕ್ಕೆ ಸತ್ವಪರೀಕ್ಷೆಯ ಸಮಯ

ಭಾರತದ ಯುವ ತಂಡ ಟಿ20 ಸರಣಿಯಲ್ಲಿ ಸಮಬಲ ಸಾಧಿಸಿ, ಏಕದಿನ ಸರಣಿಯಲ್ಲಿ ಗೆಲುವಿನ ಸಾಧನೆ ಮಾಡಿದೆ. ಇದೀಗ ಟೆಸ್ಟ್​ ಸರಣಿಯಲ್ಲೂ ಯಶ ಸಾಧಿಸಬೇಕಾದರೆ ಭಾರತದ ಯುವ ಬ್ಯಾಟರ್​ಗಳು ಹರಿಣಗಳ ನಾಡಿನ ಬೌನ್ಸಿ ಪಿಚ್​ನಲ್ಲಿ ಎದುರಾಗುವ ಸತ್ವಪರೀಕ್ಷೆಯಲ್ಲಿ ಉತ್ತೀರ್ಣರಾಗುವುದು ಅಗತ್ಯವಾಗಿದೆ. ಯಶಸ್ವಿ ಜೈಸ್ವಾಲ್​, ಶುಭಮಾನ್​ ಗಿಲ್​ ಮತ್ತು ಶ್ರೇಯಸ್​ ಅಯ್ಯರ್​ ಆಫ್ರಿಕಾ ವೇಗಿಗಳನ್ನು ಹೇಗೆ ಎದುರಿಸಲಿದ್ದಾರೆ ಎಂಬುದು ನಿರ್ಣಾಯಕವೆನಿಸಿದೆ. ಜತೆಗೆ ವಿರಾಟ್​ ಕೊಹ್ಲಿ, ರೋಹಿತ್​ ಶರ್ಮ, ಕೆಎಲ್​ ರಾಹುಲ್​ ಬ್ಯಾಟಿಂಗ್​ ವಿಭಾಗದಲ್ಲಿ ಆಧಾರ ಆಗಬೇಕಾಗಿದೆ. ಕನ್ನಡಿಗ ರಾಹುಲ್​ ವಿಕೆಟ್​ ಕೀಪಿಂಗ್​ ಜವಾಬ್ದಾರಿಯನ್ನೂ ವಹಿಸಿಕೊಳ್ಳಲಿರುವುದರಿಂದ ಅವರ ಕೀಪಿಂಗ್​ ಕೌಶಲ ಮತ್ತು ಫಿಟ್ನೆಸ್​ಗೂ ಸವಾಲು ಎದುರಾಗಲಿದೆ.

ವಿಶ್ವಾಸದಲ್ಲಿ ದ. ಆಫ್ರಿಕಾ

ಭಾರತದಂತೆ ದ. ಆಫ್ರಿಕಾಕ್ಕೂ ವಿಶ್ವಕಪ್​ ನಿರಾಸೆಯನ್ನು ಮರೆಯಲು ಇದೊಂದು ಉತ್ತಮ ಅವಕಾಶವೆನಿಸಿದೆ. ಟೆಂಬಾ ಬವುಮಾ ಪಡೆ ಕಗಿಸೊ ರಬಾಡ, ಲುಂಗಿ ಎನ್​ಗಿಡಿ, ಮಾಕೋರ್ ಜಾನ್ಸೆನ್​ ಮತ್ತು ಗೆರಾಲ್ಡ್​ ಕೋಟ್​ಜೀ ಅವರಂಥ ಗುಣಮಟ್ಟದ ವೇಗಿಗಳ ಬಲ ಹೊಂದಿದೆ. ಬ್ಯಾಟಿಂಗ್​ನಲ್ಲೂ ಡೀನ್​ ಎಲ್ಗರ್​, ಏಡನ್​ ಮಾರ್ಕ್ರಮ್​, ಕೀಗನ್​ ಪೀರ್ಟಸೆನ್​ರಂಥ ಅನುಭವಿಗಳ ಜತೆಗೆ ಯುವ ಬ್ಯಾಟರ್​ ಟೋನಿ ಡಿ ಜಾರ್ಜಿ ಏಕದಿನ ಸರಣಿಯ ಯಶಸ್ಸನ್ನು ಟೆಸ್ಟ್​ನಲ್ಲೂ ಮುಂದುವರಿಸುವ ತವಕದಲ್ಲಿದ್ದಾರೆ.

ಮುಖಾಮುಖಿ: 42

ಭಾರತ: 15

ದಣ ಆಫ್ರಿಕಾ: 17

ಡ್ರಾ: 10

ದಣ ಆಫ್ರಿಕಾದಲ್ಲಿ: 23

ಭಾರತ: 4

ದಣ ಆಫ್ರಿಕಾ: 12

ಡ್ರಾ: 7

ಪಿಚ್​ ರಿಪೋರ್ಟ್​

ದ. ಆಫ್ರಿಕಾದ ವೇಗದ ಬೌಲಿಂಗ್​ ಸ್ನೇಹಿ ಪಿಚ್​ಗಳಲ್ಲಿ ಪ್ರಮುಖವಾಗಿರುವ ಸೂಪರ್​ಸ್ಪೋರ್ಟ್​ ಪಾರ್ಕ್​ ಪಿಚ್​ ವೈವಿಧ್ಯಮಯ ಬೌನ್ಸ್​ನಿಂದಲೂ ಕೂಡಿದೆ. ಇಲ್ಲಿ ಸಾಮಾನ್ಯವಾಗಿ ಟೆಸ್ಟ್​ನಲ್ಲಿ ಮೂರೂವರೆ ದಿನಗಳಲ್ಲೇ ಫಲಿತಾಂಶ ಬಂದುಬಿಡುತ್ತದೆ. ಹೀಗಾಗಿ ಮಳೆ ಸ್ವಲ್ಪ ಕಾಡಿದರೂ, ಸ್ಪಷ್ಟ ಫಲಿತಾಂಶ ನಿರೀಕ್ಷಿಸಬಹುದು. ಆದರೆ ಬ್ಯಾಟಿಂಗ್​ ಇಲ್ಲಿ ಸವಾಲೆನಿಸಿದ್ದು, ಸ್ಪಿನ್​ ಬೌಲರ್​ಗಳೂ ಪರದಾಡಬೇಕಾಗುತ್ತದೆ. ಭಾರತ ಕಳೆದ ಬಾರಿ ಇಲ್ಲಿ ಆಡಿದ ಟೆಸ್ಟ್​ನಲ್ಲಿ ಗೆದ್ದಿದ್ದರೂ, ದ. ಆಫ್ರಿಕಾ ಇಲ್ಲಿ ಆಡಿದ 28 ಟೆಸ್ಟ್​ಗಳಲ್ಲಿ 22ರಲ್ಲಿ ಗೆದ್ದ ಬಲಿಷ್ಠ ದಾಖಲೆ ಹೊಂದಿದೆ ಎಂಬುದು ಗಮನಾರ್ಹ.

https://www.vijayavani.net/final-frontier-india-cricket-team-aim-to-break-31-year-old-jinx-in-ind-vs-sa-test-series