ಕರೊನಾ ಹೋರಾಟಕ್ಕೆ 80 ಲಕ್ಷ ರೂ ದೇಣಿಗೆ ನೀಡಿದ ರೋಹಿತ್ ಶರ್ಮ

ನವದೆಹಲಿ: ಭಾರತದ ಸೀಮಿತ ಓವರ್​ಗಳ ತಂಡದ ಉಪನಾಯಕ ರೋಹಿತ್ ಶರ್ಮ ಕರೊನಾ ವೈರಸ್ ವಿರುದ್ಧದ ಹೋರಾಟಕ್ಕೆ 80 ಲಕ್ಷ ರೂಪಾಯಿ ದೇಣಿಗೆ ನೀಡಿದ್ದಾರೆ. ಈ ಮೊತ್ತದಲ್ಲಿ ಅವರು 45 ಲಕ್ಷ ರೂ.ಗಳನ್ನು ಪ್ರಧಾನ ಮಂತ್ರಿ ಪರಿಹಾರ ನಿಧಿಗೆ ನೀಡಿದರೆ, 25 ಲಕ್ಷ ರೂ.

ಮಹಾರಾಷ್ಟ್ರ ಮುಖ್ಯಮಂತ್ರಿಗಳ ಪರಿಹಾರ ನಿಧಿಗೆ ನೀಡಿ ದ್ದಾರೆ. ತಲಾ 5 ಲಕ್ಷ ರೂ.ಗಳನ್ನು ಬೀದಿ ನಾಯಿಗಳ ಸುರಕ್ಷತೆ ಮತ್ತು ಬಡವರಿಗೆ ಆಹಾರ ಹಂಚುತ್ತಿರುವ ‘ಝೊಮಾಟೊ ಫೀಡಿಂಗ್ ಇಂಡಿಯಾ’ ಅಭಿಯಾನಕ್ಕೆ ನೀಡಿದ್ದಾರೆ.

ಅನಿಲ್ ಕುಂಬ್ಳೆ, ಫುಟ್​ಬಾಲ್ ತಂಡ ಗೌಪ್ಯ ನೆರವು: ಭಾರತ ತಂಡದ ಮಾಜಿ ನಾಯಕ ಹಾಗೂ ಕೋಚ್ ಅನಿಲ್ ಕುಂಬ್ಳೆ ಪ್ರಧಾನ ಮಂತ್ರಿ ನಾಗರಿಕರ ಸಹಾಯ ಮತ್ತು ಪರಿಹಾರ ತುತು ಸ್ಥಿತಿ ನಿಧಿ (ಪಿಎಂ-ಕೇರ್ಸ್) ಹಾಗೂ ಕರ್ನಾಟಕ ಮುಖ್ಯಮಂತ್ರಿ ಪರಿಹಾರ ನಿಧಿಗೆ ಗೌಪ್ಯ ಮೊತ್ತದ ದೇಣಿಗೆ ಘೊಷಿಸಿದ್ದಾರೆ. ವಿರಾಟ್ ಕೊಹ್ಲಿ ಮಾದರಿಯಲ್ಲೇ ಕುಂಬ್ಳೆ ದೇಣಿಗೆ ಮೊತ್ತವನ್ನು ಬಹಿರಂಗಪಡಿಸಿಲ್ಲ. ಇದೇ ವೇಳೆ ಭಾರತ ಫುಟ್​ಬಾಲ್ ತಂಡವೂ ಗೌಪ್ಯ ಮೊತ್ತದ ದೇಣಿಗೆ ನೀಡಿದೆ. ತಂಡದ ಎಲ್ಲ ಆಟಗಾರರು ಹಣ ಸೇರಿಸಿ ಪಿಎಂ-ಕೇರ್ಸ್​ಗೆ ದೇಣಿಗೆ ನೀಡಿದ್ದೇವೆ ಎಂದು ತಂಡದ ನಾಯಕ ಸುನೀಲ್ ಛೇಟ್ರಿ ತಿಳಿಸಿದ್ದಾರೆ.

ನೀರಜ್ ಚೋಪ್ರಾ 3 ಲಕ್ಷ ರೂ.: ಏಷ್ಯಾಡ್ ಸ್ವರ್ಣ ಪದಕ ವಿಜೇತ ಜಾವೆಲಿನ್ ಥ್ರೋ ಪಟು ನೀರಜ್ ಚೋಪ್ರಾ 3 ಲಕ್ಷ ರೂಪಾಯಿ ದೇಣಿಗೆ ನೀಡಿದ್ದಾರೆ. 2 ಲಕ್ಷ ರೂ.ಗಳನ್ನು ಪಿಎಂ-ಕೇರ್ಸ್ ಮತ್ತು 1 ಲಕ್ಷ ರೂ.ಗಳನ್ನು ಹರಿಯಾಣ ಮುಖ್ಯಮಂತ್ರಿ ಪರಿಹಾರ ನಿಧಿಗೆ ನೀಡುವುದಾಗಿ ನೀರಜ್ ಚೋಪ್ರಾ ತಿಳಿಸಿದ್ದಾರೆ. ಹರಿಯಾಣದ ಪಾನಿಪತ್​ನವರಾದ ನೀರಜ್ ಚೋಪ್ರಾ ಟೋಕಿಯೊ ಒಲಿಂಪಿಕ್ಸ್​ಗೆ ಈಗಾಗಲೆ ಅರ್ಹತೆ ಗಿಟ್ಟಿಸಿಕೊಂಡಿದ್ದಾರೆ. ಭಾರತೀಯ ಟೇಬಲ್ ಟೆನಿಸ್ ಫೆಡರೇಷನ್ ಪ್ರಧಾನ ಮಂತ್ರಿ ಪರಿಹಾರ ನಿಧಿಗೆ 5 ಲಕ್ಷ ರೂ. ದೇಣಿಗೆ ನೀಡಿದೆ.

ಸಾನಿಯಾ 1.25 ಕೋಟಿ ರೂ. ಸಂಗ್ರಹ: ಭಾರತದ ಟೆನಿಸ್ ತಾರೆ ಸಾನಿಯಾ ಮಿರ್ಜಾ, ಲಾಕ್​ಡೌನ್ ನಡುವೆ ಸಂಕಷ್ಟದಲ್ಲಿರುವ ಬಡ ಕುಟುಂಬಗಳ ನೆರವಿಗಾಗಿ 1.25 ಕೋಟಿ ರೂ. ಸಂಗ್ರಹಿಸಿದ್ದಾರೆ. ಕೇವಲ 1 ವಾರದಲ್ಲಿ ಈ ಮೊತ್ತವನ್ನು ಸಂಗ್ರಹಿಸಿ ಸುಮಾರು 1 ಲಕ್ಷ ಜನರಿಗೆ ಹಂಚಿರುವೆ ಎಂದು ಸಾನಿಯಾ ಟ್ವಿಟರ್​ನಲ್ಲಿ ತಿಳಿಸಿದ್ದಾರೆ.

https://www.vijayavani.net/delhis-jawaharlal-nehru-stadium-to-be-used-as-quarantine-facility/