ಹಾಂಕಾಂಗ್​ ಸಿಕ್ಸಸ್​ನಲ್ಲಿ ಓವರ್​ಗೆ 6 ಸಿಕ್ಸರ್​ ಚಚ್ಚಿಸಿಕೊಂಡ ರಾಬಿನ್​ ಉತ್ತಪ್ಪ; ಭಾರತಕ್ಕೆ ಸತತ ಸೋಲಿನ ನಿರಾಸೆ

ಹಾಂಕಾಂಗ್​: ಭಾರತದ ಮಾಜಿ ಆಟಗಾರರನ್ನು ಒಳಗೊಂಡ ತಂಡ ಹಾಂಕಾಂಗ್​ ಸಿಕ್ಸಸ್​ ಕ್ರಿಕೆಟ್​ ಟೂರ್ನಿಯಲ್ಲಿ ಆಡಿದ ಎಲ್ಲ 5 ಪಂದ್ಯಗಳಲ್ಲೂ ಸೋಲು ಕಂಡು ನಿರಾಸೆ ಅನುಭವಿಸಿದೆ. ಕನ್ನಡಿಗ ರಾಬಿನ್​ ಉತ್ತಪ್ಪ ಸಾರಥ್ಯದ ತಂಡ ಯುಎಇ ಮತ್ತು ಓಮನ್​ನಂಥ ಕ್ರಿಕೆಟ್​ ಶಿಶು ದೇಶಗಳ ವಿರುದ್ಧವೂ ಪರಾಭವಗೊಂಡಿತು.

ಟೂರ್ನಿಯ ಆರಂಭಿಕ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ಎದುರು ಸೋತಿದ್ದ ಭಾರತ ತಂಡ ಸಿ ಗುಂಪಿನ ತನ್ನ 2ನೇ ಪಂದ್ಯದಲ್ಲಿ ಯುಎಇ ಎದುರು ಕೇವಲ 1 ರನ್​ಗಳಿಂದ ಪರಾಭವಗೊಂಡಿತು. ಯುಎಇ 5 ವಿಕೆಟ್​ಗೆ 130 ರನ್​ ಗಳಿಸಿದರೆ, ಭಾರತ 4 ವಿಕೆಟ್​ಗೆ 129 ರನ್​ ಗಳಿಸಿ ಸೋತಿತು. ಕೊನೇ ಓವರ್​ನಲ್ಲಿ 32 ರನ್​ ಬೇಕಿದ್ದಾಗ ಸ್ಟುವರ್ಟ್​ ಬಿನ್ನಿ ಸತತ 4 ಸಿಕ್ಸರ್​ ಸಹಿತ 29 ರನ್​ ಕಸಿದರು. ಆದರೆ ಕೊನೇ ಎಸೆತದಲ್ಲಿ 3 ರನ್​ ಬೇಕಿದ್ದಾಗ ಬಿನ್ನಿ 2ನೇ ರನ್​ ಕಸಿಯುವ ಯತ್ನದಲ್ಲಿ ರನೌಟಾದರು.

ನಂತರದಲ್ಲಿ ಪ್ಲೇಟ್​ ವಿಭಾಗದಲ್ಲಿ ಆಡಿದ 3 ಪಂದ್ಯಗಳಲ್ಲೂ ಭಾರತ ತಂಡ ಕ್ರಮವಾಗಿ ಇಂಗ್ಲೆಂಡ್​, ನ್ಯೂಜಿಲೆಂಡ್​ ಮತ್ತು ಓಮನ್​ ಎದುರು ಸೋಲು ಅನುಭವಿಸಿತು. ಇದರಿಂದ ಪ್ಲೇಟ್​ ವಿಭಾಗದ ಸೆಮಿೈನಲ್​ಗೇರಲು ಭಾರತ ವಿಫಲವಾಯಿತು. ಉತ್ತಪ್ಪ ಓಮನ್​ ವಿರುದ್ಧದ ಪಂದ್ಯದಲ್ಲಿ 13 ಎಸೆತಗಳಲ್ಲೇ 5 ಸಿಕ್ಸರ್​, 5 ಬೌಂಡರಿ ಸಹಿತ 52 ರನ್​ ಸಿಡಿಸಿ ಮಿಂಚಿದರು.

ಶ್ರೀಲಂಕಾ ಚಾಂಪಿಯನ್​: ಲಿಹುರು ಮಧುಶಂಕ ಸಾರಥ್ಯದ ಶ್ರೀಲಂಕಾ ತಂಡ ಹಾಂಕಾಂಗ್​ ಸಿಕ್ಸಸ್​ ಟೂರ್ನಿಯ ಚಾಂಪಿಯನ್​ ಆಗಿ ಹೊರಹೊಮ್ಮಿತು. 7 ವರ್ಷಗಳ ನಂತರ ನಡೆದ ಟೂರ್ನಿಯ ಫೈನಲ್​ನಲ್ಲಿ ಲಂಕಾ, ಪಾಕಿಸ್ತಾನ ಎದುರು 3 ವಿಕೆಟ್​ಗಳಿಂದ ಗೆಲುವು ಸಾಧಿಸಿತು. ಶ್ರೀಲಂಕಾ 2007ರ ನಂತರ 2ನೇ ಬಾರಿಗೆ ಪ್ರಶಸ್ತಿ ಗೆದ್ದ ಸಾಧನೆ ಮಾಡಿತು.

ಓವರ್​ಗೆ ಆರು ಸಿಕ್ಸರ್​ ಚಚ್ಚಿಸಿಕೊಂಡ ಉತ್ತಪ್ಪ!

ಹಾಂಕಾಂಗ್​ ಸಿಕ್ಸಸ್​ ನಿಯಮಾವಳಿ ಪ್ರಕಾರ ವಿಕೆಟ್​ ಕೀಪರ್​ ಹೊರತಾಗಿ ಇತರ ಐವರು ಆಟಗಾರರೂ ಕನಿಷ್ಠ ಒಂದಾದರೂ ಓವರ್​ ಬೌಲಿಂಗ್​ ಮಾಡಬೇಕಾಗಿತ್ತು. ಇದರನ್ವಯ ರಾಬಿನ್​ ಉತ್ತಪ್ಪ ಇಂಗ್ಲೆಂಡ್​ ವಿರುದ್ಧದ ಪಂದ್ಯದಲ್ಲಿ ಬೌಲಿಂಗ್​ಗೆ ಇಳಿದಾಗ ರವಿ ಬೋಪಾರ ಓವರ್​ನ ಎಲ್ಲ 6 ಎಸೆತಗಳಲ್ಲೂ ಸಿಕ್ಸರ್​ ಸಿಡಿಸಿದರು. ಜತೆಗೆ ಒಂದು ವೈಡ್​ ಕೂಡ ಎಸೆದ ಉತ್ತಪ್ಪ ಆ ಓವರ್​ನಲ್ಲಿ ಒಟ್ಟು 37 ರನ್​ ಬಿಟ್ಟುಕೊಟ್ಟರು. ಇದರಿಂದ ಇಂಗ್ಲೆಂಡ್​ 6 ಓವರ್​ಗಳಲ್ಲಿ 1 ವಿಕೆಟ್​ಗೆ 120 ರನ್​ ಪೇರಿಸಿದರೆ, ಭಾರತ 3 ವಿಕೆಟ್​ಗೆ 105 ರನ್​ ಗಳಿಸಲಷ್ಟೇ ಶಕ್ತವಾಯಿತು.

https://www.vijayavani.net/kohlis-salary-has-increased-from-12-lakhs-to-21-crores-in-ipl-joining-the-exclusive-club